Yohani 6

ɄYesu ilɨsia avaanhu imbilima ihaano

(Mataayi 14:13-21; Malɨka 6:30-44; Lʉʉka 9:10-17)

Pambele ʉYesu akalovoka ɨlɨsʉmbe ɨlya Galilaya. Ɨlɨsʉmbe ɨlio ɨlɨtavua ɨlɨngɨ lɨkatambʉlwagha Tibelia. 2 Avaanhu vinga vakamʼbɨngɨlɨla ʉYesu, ʉlwakʉva valyale vikʉfyagha ifivalɨlo vwɨmɨla ifidegho fino avombagha mʉlwa kʉsosia avatamu. 3 Pe ʉYesu na vavʉlanɨsɨvua vaake vakatogha kʉ kɨdunda, vakikala ʉkuo. 4 Ʉnsiki ʉghuo, ɨkyɨmɨke ɨkya Pasaka ɨkya Vayahudi kɨlyale piipi.

5 ɄYesu akalɨvona ɨlɨpʉgha ɨlya vaanhu likwisa kwa mwene. Pe akamposia ʉFilipo akati, “Filipo, ndepoonu tughʉla kʉʉghi amakate, kuuti avaanhu ava valie?” 6 ɄYesu akamposia enendɨɨkɨ kʉkʉmʉghela, ʉlwakʉva ʉmwene alyakagwile kɨno itapivomba. 7 ɄFilipo akamwamʉla akati, “Nambe twale tʉʉve ni ndalama nyinga idinali filʉndo fivɨlɨ kughʉla amakate, amakate aghuo naghaale ghikwɨla nambe kʉkʉmpeela nʉjʉnge akamenyʉle akadebe.” 8 Pe ʉNdeleeya ʉnnuuna ghwa Simoni ʉPeteli, ʉmo mʉ vavʉlanɨsɨvua vaake, akamʼbʉʉla akati, 9 “Pwale apa ʉmwana jʉmonga, alɨ na makate ghahaano agha ngongilue ni samaki ivɨlɨ. Neke ifyakʉlia ifi fitanga kɨki kʉ vaanhu avinga ava?”

10 ɄYesu akavavʉʉla avavʉlanɨsɨvua vaake akati, “Mʉvavʉʉle avaanhu vikale paasi.” Pe avaanhu vala vakikala. Apoonu pala pano valikalile, palyale pe lʉsoli. Mʉ lɨpʉgha lɨla avakɨnhaata veene valyale imbilima ihaano. 11 Pe ʉYesu akatoola amakate ghala, akamhongesia ʉNgʉlʉve, akavaghavɨla avaanhu vooni vano pwevalyale pala. Akatoola isamaki akavomba vʉle vʉle. Nʉjʉnge akapelua ndavʉle aveele ilonda.

12 Avaanhu vooni ye vikwite, ʉYesu akavavʉʉla avavʉlanɨsɨvua vaake akati, “Mʉkongʼhanie ifisighasi fyoni, kɨleke kusova kɨmonga.” 13 Pe vakakongʼhania ifisighasi ifya makate ghala agha ngongilue, vakamemia indɨɨlo kɨjigho ni vɨlɨ. 14 Avaanhu vala ye vakyaghile ɨkɨdegho kɨno avombile ʉYesu, kɨkava kɨvalɨlo kʉ veene kukagʉla ʉvʉvaha vwake, vakati, “Kyangʼhaani ʉmuunhu ʉjʉ ghwe mʼbɨli jʉno twahʉvɨlagha kuuti ikwisa mʉ ɨɨsi muno.” 15 ɄYesu akakagʉla kuuti avaanhu vala vilonda kʉkʉmwʉmɨlɨsia aave Ntwa ghwave. Neke akavʉʉka pala, akalʉta kange kʉ kɨdunda, ʉkuo akava mwene.

ɄYesu ighenda pakyanya pa malenga

(Mataayi 14:22-33; Malɨka 6:45-52)

16 Ye vwilile, avavʉlanɨsɨvua va Yesu vakalʉta kʉ lɨsʉmbe ɨlya Galilaya. 17 Vakapanda ɨngalava, vakatengʉla kulovoka ɨlɨsʉmbe kulʉta kʉ Kapelenaumu. Ʉnsiki ʉghuo jɨlyale ngʼhiisi, neke ʉYesu alyakyale kufika pa veene.

18 Ɨlɨsʉmbe lɨkatengʉla kusambalʉka, ʉlwakʉva ɨmhepo ɨmbaha jɨkava jigugula. 19 Avavʉlanɨsɨvua va Yesu ye vaghendisie ɨngalava ikilomita ihaano nambe ntanda ndɨɨkɨ, vakamwagha ʉYesu ighenda pakyanya pa malenga, alɨ piipi nɨ ngalava, vakoghopa kyongo. 20 ɄYesu akavavʉʉla akati, “Namʉngoghopaghe, neene!” 21 Pe aveene vakalondagha kuuti ingile mʉ ngalava. Nakalɨngi ɨngalava jɨkafika ɨmwambo jɨno vakalʉtagha.

ɄYesu ghwe nkate ghwa vwʉmi

22 Ɨkɨghono ɨkɨvɨngɨlɨli, avaanhu vinga vano valyajiighe ɨmwambo ɨjɨngɨ ɨja lɨsʉmbe, vakajaagha pala ɨngalava jɨmo jeene. Kange, vakakagwile kuuti ʉYesu naavʉʉka na vavʉlanɨsɨvua vaake ye vilʉta nɨ ngalava, ʉlwakʉva avavʉlanɨsɨvua vaake vakalʉtile veene. 23 Pe avaanhu avange vakiisa ni ngalava isingi kuhʉma kʉ lɨkaaja ɨlya Tibelia, vakafika pano avaanhu vakaliile amakate, ʉYesu ye amhongisie ʉNgʉlʉve. 24 Avaanhu vala ye vakagwile kuuti, ʉYesu napwale pala, nambe avavʉlanɨsɨvua vaake, vakapanda ingalava sila, vakalʉta kʉ Kapelenaumu kʉkʉmʉlonda ʉYesu.

25 Avaanhu vala ye vafikile ɨmwambo ɨja lɨsʉmbe, vakamwagha ʉYesu, vakamposia vakati, “Ghwe Mʼbʉlanɨsi, ghwisa lɨɨghi kʉno?” 26 ɄYesu akavamʉla akati, “Kyangʼhaani nɨkʉvavʉʉla, nakwekʉti mʉkʉndonda ʉlwakʉva mwafyagha ifivalɨlo kukilila ifidegho fino navomba, ʉlwene mʉkʉndonda ʉlwakʉva mwalia amakate, mukuta. 27 Namʉngatʉngʉmalɨlaghe ɨkyakʉlia kɨno kinangɨka, looli ɨkyakʉlia kɨno nakinangɨka, kɨno kɨkʉkʉpeela ʉvwʉmi ʉvwa kʉvʉsila kʉsila. Ɨkyakʉlia ɨkio kye kɨno ʉne ne Mwana ghwa Muunhu nɨkʉvapeela, ʉlwakʉva ʉNgʉlʉve ʉNhaata ahʉfisie kyangʼhaani kuuti, ʉne neene ghwa kʉvomba ɨmbombo ɨjio.”

28 Pe aveene vakamposia vakati, “Tʉkɨte kɨki neke tʉvombe imbombo sino ikeela ʉNgʉlʉve?” 29 ɄYesu akavamʉla akati, “Ɨmbombo jɨno ikeela ʉNgʉlʉve je ɨjɨ: Mʉnyɨtɨkaghe ʉne ne jʉno nɨsungʼhilue nʉ mwene.” 30 Vakamʼbʉʉla vakati, “Ghuhʉfia ɨkɨvalɨlo kɨki tʉkyaghe, neke tʉkwɨtɨke? Lɨno, ghuhʉfia ɨkɨvalɨlo kɨki? 31 Avakʉʉlʉ viitu ye valɨ kʉ lʉkʉve, valyaliile ɨmana, ndavʉle lɨlembilue mʉ Malembe aMɨmɨke kuuti, ‘Alyavapeliile amakate kuhʉma kʉkyanya.’ ” 32 ɄYesu akavavʉʉla akati, “Kyangʼhaani nɨkʉvavʉʉla, ʉMoose naghwe jʉno alyavapeliile amakate kuhʉma kʉkyanya, looli ghwe Nhaata jʉno lɨno ɨkʉvapeela ʉmue amakate agha kyangʼhaani ghano ghihʉma kʉkyanya. 33 Nijova ʉluo, ʉlwakʉva ʉnkate ʉghwa kyangʼhaani, neene ne jʉno ʉNgʉlʉve asungʼhile kuhʉma kʉkyanya kʉkʉvapeela avaanhu ʉvwʉmi ʉvwa kʉvʉsila kʉsila.” 34 Pe vakamʼbʉʉla vakati, “Ghwe ntwa, tusʉʉma ʉtʉpelaghe jaatu ʉnkate ʉghuo.”

35 ɄYesu akavavʉʉla akati, “Ʉne nɨlɨ nkate ghʉno ghʉkʉvapeela avaanhu ʉvwʉmi. Ʉmuunhu jʉno ikwisa kʉlyʉne, ɨnjala najɨlamʼbava lʉsiku, jʉno ɨkʉnyɨtɨka, ɨkyʉmɨlua nakɨlamwagha lʉsiku.

ɄYesu ivomba isa vughane vwa Nhaata

36 “Neke nɨvavʉlile kuuti napano mʉnyaghile, mʉjiighe namʉkʉnyɨtɨka. 37 Avaanhu vooni vano ʉNhaata ɨkʉmheela, vikwisa kʉlyʉne na kʉkʉnyɨtɨka. Jʉno ikwisa kʉlyʉne nanɨlantaagha lʉsiku. 38 Nijova ʉluo, ʉlwakʉva ʉne nisile kuhʉma kʉkyanya kuuti nɨvombaghe isa vughane vwa Nhaata jʉno asungʼhile, nanisile kuvomba isa vughane vwango. 39 Ʉvughane vwa Nhaata jʉno asungʼhile vwe ʉvʉ: Nɨleke kusofia nambe jʉmo mʉ vano amheliile, looli nɨvasyʉsie ɨkɨghono ɨkya vʉsililo. 40 ɄNhaata ghwango ilonda kuuti, ʉmuunhu jʉno akagwile kuuti ʉne nɨlɨ Mwanaake na kʉkʉnyɨtɨka, ʉpɨle ʉvwʉmi ʉvwa kʉvʉsila kʉsila. Na jʉʉne nilikʉnsyʉsia ɨkɨghono ɨkya vʉsililo.”

41 Pe aVayahudi vakatengʉla kukungʼulasia, ʉlwakʉva ʉYesu alyajovile kuuti, “Ʉne neene nkate ghʉno ʉNgʉlʉve aletile kuhʉma kʉkyanya.” 42 Vakiposania veene viiti, “Asi, ʉmuunhu ʉjʉ naghwe Yesu, ʉmwana ghwa Yosefu? Avapaafi vaake tʉvamanyile! Lɨno, lwandaani iiti ahʉmile kʉkyanya?”

43 ɄYesu akavamʉla akati, “Mʉleke pikungʼulasia. 44 Nakwale ʉmuunhu jʉno ndepoonu ikwisa kʉlyʉne, nave ʉNhaata jʉno asungʼhile ʉne naamʉlongwisie. Na jʉʉne nilikʉnsyʉsia ʉmuunhu ʉjuo ɨkɨghono ɨkya vʉsililo. 45 Ʉmʼbɨli jʉmonga alyalembile mʉ Malembe aMɨmɨke kuuti, ‘Avaanhu vooni vilivʉlanɨsɨvua nʉ Ngʉlʉve.’ Ʉmuunhu jʉno ɨkʉmpʉlɨkɨsia ʉNhaata na kumanyɨla kwa mwene, ikwisa kʉlyʉne. 46 Nakwale ʉmuunhu jʉno amwaghile ʉNhaata, looli ʉne neene nɨmwaghile, ʉlwakʉva nɨhʉmile kwa mwene.

Ʉmʼbɨlɨ nɨ danda ja Yesu Kɨlɨsite

47 “Kyangʼhaani nɨkʉvavʉʉla, ʉmuunhu jʉno ɨkʉnyɨtɨka ʉne, alɨ nʉ vwʉmi ʉvwa kʉvʉsila kʉsila. 48 Ʉne nɨlɨ nkate ghʉno ghʉkʉvapeela avaanhu ʉvwʉmi. 49 Avakʉʉlʉ viinu nambe valyaliile ɨmana kʉ lʉkʉve, valyafwile. 50 Neke apa pweghʉle ʉnkate ghʉno ghʉhʉmile kʉkyanya, ʉmuunhu angalie, naifua. 51 Ʉne nɨlɨ nkate ghʉno ghʉhʉmile kʉkyanya. Ʉmuunhu jʉno ilia ʉnkate ʉghuo, iiva nʉ vwʉmi ʉvwa kʉvʉsila kʉsila. Ʉnkate ʉghuo ghwe mʼbɨlɨ ghwango ghʉno nitavʉla kuuti, avaanhu vooni vavisaghe nʉ vwʉmi ʉvwa kʉvʉsila kʉsila.”

52 AVayahudi vakatengʉla kukanɨngʼhana na kuposania veene viiti, “Asi, ʉmuunhu ʉjʉ ɨkʉtʉpeela ndaani ʉmʼbɨlɨ ghwake tʉlie?” 53 ɄYesu akavavʉʉla akati, “Kyangʼhaani nɨkʉvavʉʉla, nave namulia ʉmʼbɨlɨ ghwango ne Mwana ghwa Muunhu, na kunyua ɨdanda jango, namuuva nʉ vwʉmi ʉvwa kʉvʉsila kʉsila. 54 Ʉmuunhu jʉno ilia ʉmʼbɨlɨ ghwango na kunyua ɨdanda jango, alɨ nʉ vwʉmi ʉvwa kʉvʉsila kʉsila, na jʉʉne nilikʉnsyʉsia ɨkɨghono ɨkya vʉsililo. 55 Nijova ʉluo, ʉlwakʉva ʉmʼbɨlɨ ghwango kye kyakʉlia kya kyangʼhaani, najɨ danda jango jivʉsia ɨkyʉmɨlua kyangʼhaani. 56 Jʉno ilia ʉmʼbɨlɨ ghwango na kunyua ɨdanda jango, ʉjuo ikukala mʉlyʉne, na jʉʉne nikukala mwa mwene.

57 “Ndavʉle ʉNhaata jʉno asungʼhile vʉle mwʉmi, na jʉʉne nɨlɨ mwʉmi mʉ ngʉfu saake, fye enendɨɨkɨ kwa muunhu jʉno ilia ʉmʼbɨlɨ ghwango, iiva mwʉmi mʉ ngʉfu sango. 58 Ʉne nɨlɨ nkate ghʉno ghʉhʉmile kʉkyanya. Ʉnkate ʉghʉ naghʉlɨ ndavʉle ʉnkate ghʉno avakʉʉlʉ viinu valyaliile. Nambe valyaliile, vakafua. Ʉmuunhu jʉno ilia ʉnkate ʉghʉ, iiva nʉ vwʉmi ʉvwa kʉvʉsila kʉsila.” 59 ɄYesu alyajovile amasio aghuo ye alɨ pivʉlanɨsia mʉ sinagogi kʉ Kapelenaumu.

Avavɨngɨlɨli vamonga vikʉmʉleka ʉYesu

60 Avaanhu vinga mʉ vavɨngɨlɨli vaake ye vapʉliike isio, vakajova vakati, “Imbʉlanɨsio isi nhalamu kyongo! Ghwe veeni jʉno ndepoonu ikwʉpɨla imbʉlanɨsio isio?” 61 ɄYesu ye alʉtangʼhinie kuuti avavɨngɨlɨli vaake vikungʼulasia vwɨmɨla imbʉlanɨsio isio, akavaposia akati, “Asi, ɨlɨsio ɨlɨ lɨkʉvakʉvasia? 62 Pe luliiva ndaani, muliiva mʉkʉnyaagha ne Mwana ghwa Muunhu, nitogha kulʉta kʉkyanya kʉno nɨlyale ʉlʉtasi? 63 ɄMhepo ghwa Ngʉlʉve ghwe jʉno ɨkʉvapeela avaanhu ʉvwʉmi ʉvwa fighono fyoni. Ingʉfu sa muunhu nasingampeele ʉmuunhu ʉvwʉmi. Amasio ghano nɨvavʉlile ghikʉvapeela ʉmue kuuva nʉ Mhepo ghwa Ngʉlʉve, ghwope ɨkʉvapeela ʉvwʉmi.

64 “Neke pwevale vamonga pakate palyʉmue vano navikʉnyɨtɨka.” ɄYesu alyajovile amasio aghuo, ʉlwakʉva alyakagwile kuhʉma kʉvʉtengʉlɨlo kuuti ve vaani vano navikʉmwɨtɨka, kange ghwe veeni jʉno ilikʉmwohela. 65 Pe akafijovagha akatisagha, “Fye nambe nɨvavʉlile kuuti, nakwale ʉmuunhu jʉno ndepoonu ikwisa kʉlyʉne nave ʉNhaata naamʉlongwisie.”

66 Kuhʉma ʉnsiki ʉghuo, vinga mʉ vavɨngɨlɨli vaake vakamʉleka, vakavʉhɨɨla kʉkʉmʼbɨngɨlɨla. 67 Pe ʉYesu akavaposia avavʉlanɨsɨvua vala kɨjigho na vavɨlɨ akati, “Asi, na jʉmue mulonda pikʉndeka?” 68 ɄSimoni ʉPeteli akamwamʉla akati, “Ghwe Mʉtwa, tʉkʉleke tʉlʉte kwani? Ʉve ʉlɨ na masio ghano ghikʉtʉpeela ʉvwʉmi ʉvwa kʉvʉsila kʉsila. 69 Ʉsue tukwɨtɨka, kange tʉkagwile kuuti, ʉve veeve Mwɨmɨke kuhʉma kwa Ngʉlʉve.” 70 Pepano ʉYesu akavavʉʉla akati, “Nɨvasalwile ʉmue kɨjigho na vavɨlɨ kuuva vavʉlanɨsɨvua vango, neke jʉmonga pakate palyʉmue ilongosivua nʉ Setano.” 71 Apuo ʉYesu alyale ɨkʉnʼjova ʉYuuda ʉmwana ghwa Simoni ʉIsikalioti, ʉlwakʉva ghwe jʉno ilikʉmwohela ʉYesu, napano alyale ʉmo mʉ vavʉlanɨsɨvua kɨjigho na vavɨlɨ.