Imbʉlanɨsio vwɨmɨla kusaghɨlana
17
ɄYesu akavavʉʉla avavʉlanɨsɨvua vaake akati,
“Ingelo sino sipelela avaanhu kuvomba inyɨvi pwesili,
neke ɨga kwa muunhu jʉno ipelela ingelo isio!
2 Lwale luuva kʉba kwa muunhu ʉjuo kupinyilisivua ʉlwala kʉ singo na kutaghua mʉ nyanja,
kukila ʉlʉpumuko lʉno kyaikwʉpɨla,
vwɨmɨla kʉkʉmwambʉsia jʉmonga mʉ vadebe ava avombe inyɨvi!
3 Lɨno,
mulolelelaghe kuuti mʉleke kuvomba ʉluo!
“Ʉnnino angakʉhoke,
mʼbʉʉle vwɨmɨla ʉvʉhosi vwake;
angalaate,
nsaghɨle.
4 Nambe nave ɨkʉkʉhoka kavɨlɨ kavɨlɨa mʉ kɨghono kɨmo,
na kugomoka kʉlyʉve kavɨlɨ kavɨlɨ,
iiti,
‘Ʉsaghɨle,’
ʉve nsaghɨlaghe!”
Ingʉfu isa lwɨtɨko
5 Pepano avasungʼhua vala vakamʼbʉʉla ʉMʉtwa vakati,
“Ʉtwongelesie ʉlwɨtɨko!”
6 ɄMʉtwa akavamʉla akati,
“Mwale mʉʉve nʉ lwɨtɨko nambe ʉlʉdebe ndavʉle akaveju akadebe fiijo,
mwale mʉkʉghʉvʉʉla ʉmpiki ʉnkʉjʉ ʉghʉ kuuti,
‘Kumuka,
ghujogheke mʉ nyanja!’
Ghwope ghwale ghʉkʉvakʉnda.
Ʉvʉkʉndi mʉ mbombo
7 “Tʉʉti jʉmonga mʉlyʉmue alɨ nʉ mʼbombi jʉno ɨkʉkʉlɨmɨla ʉmʉghʉnda nambe ɨkʉkʉdɨmɨla ingʼombe.
Ghwe veeni jʉno ndepoonu ɨkʉmʼbʉʉla ʉmʼbombi ʉjuo pano ahʉmile kʉ mbombo kuuti,
‘Isagha ngʼhaningʼhaani ghukale ʉlie ɨkyakʉlia’?
8 Jeeje naangavombe ʉluo.
Looli kyaiiti,
‘Ndɨngʼhanɨkɨsie ɨkyakʉlia,
kange ʉnhengelele kuhanga nimala kulia na kunyua.
Kyanɨmalile,
pe na jʉʉve ʉlie na kunyua.’
9 Asi,
kyaʉkʉmhongesia ʉmʼbombi jʉla ʉlwakʉva avombile sino ʉveele ʉmʉlaghiile?
Jeeje!
10 Fye lʉlɨvuo na jʉmue,
mʉngamale kuvomba sooni sino ʉNgʉlʉve avalaghiile,
pe mʉtisaghe,
‘Ʉsue tʉlɨ vavombi vʉvʉle,
tʉvombile sino tʉnoghiile kuvomba.’ ”
ɄYesu isosia avanya bʉʉba kɨjigho
11 ɄYesu ye ilʉta kʉ Yelusalemu,
akakilila ɨsɨla jɨno jɨlyakilile pakate pa ɨɨsi ɨja Samalia nɨ ja Galilaya.
12 Ye ikwingila mʉ kɨkaaja kɨmonga,
akatangʼhana na vaanhu kɨjigho avanya bʉʉba.
Avaanhu vala,
vakɨɨma pa vʉtali nʉ mwene,
13 vakakemeela fiijo vakati,
“Ghwe Yesu ghwe Ntwa,
ʉtʉsʉngʉkɨle!”
14 ɄYesu ye avaghile,
akavavʉʉla akati,
“Lʉtagha muhʉfie kʉ vatekesi.”
Ye valɨ mʉ sɨla vilʉta,
vakavalala.
15 Neke jʉmonga mʉ veene,
ye avwene asokile,
akagomoka ngʼhaningʼhaani kwa Yesu,
kʉmo ɨkʉmʉghinia fiijo ʉNgʉlʉve.
16 Ye afikile,
akakupama pavʉlongolo pa maghʉlʉ gha Yesu na kʉkʉmhongesia.
Ʉmuunhu ʉjuo,
alyale Nsamalia.
17 ɄYesu akaposia akati,
“Navavalasivue avaanhu vooni kɨjigho?
Avange budikalʉbale valɨ kʉʉghi?
18 Nakwale jʉno agomwike kʉkʉmʉlʉmba ʉNgʉlʉve,
looli jʉ mpooma ʉjʉ?”
19 Pe ʉYesu akamʼbʉʉla akati,
“Ɨma,
lʉtagha,
ʉsokile vwɨmɨla ʉlwɨtɨko lwako!”
Kukwisa ʉVʉtwa vwa Ngʉlʉve
20 Ɨkɨghono kɨmonga,
aVafalisayi vakamposia ʉYesu vakati,
“ɄVʉtwa vwa Ngʉlʉve vulikwisa lɨɨghi?”
ɄYesu akavamʉla akati,
“ɄVʉtwa vwa Ngʉlʉve navukwisa ni fivalɨlo fino fivoneka na maaso.
21 Avaanhu navangati,
‘Lolagha!
Vʉlɨ apa!’
nambe,
‘Vʉlɨ kʉla!’
Pʉlɨkɨsia,
ʉVʉtwa vwa Ngʉlʉve vʉlɨ nkate mʉlyʉmue.”
22 Pe ʉYesu akavavʉʉla avavʉlanɨsɨvua vaake akati,
“Filikwisa ifighono,
fino mulinoghelua kʉkʉmbona ne Mwana ghwa Muunhu nambe ɨkɨghono kɨmo,
neke namulikʉnyaagha.
23 Avaanhu vilikʉvavʉlagha vitisagha,
‘Lolagha!
Jʉla pala!’
nambe,
‘Ʉjʉ apa!’
Namʉngavɨtɨkaghe nambe kʉkʉvavɨngɨlɨla.
24 Nɨvavʉlile isio,
ʉlwakʉva ʉnsiki niliiva nigomoka ne Mwana ghwa Muunhu,
nilikwisa hwene lʉmuli lwa fula vʉle lukwisa ngʼhaningʼhaani na kumulika imbale sooni mʉ mpalanga.
25 Ye sikyale pihʉmɨla isio,
taasi ne Mwana ghwa Muunhu nipumuka mʉ nyinga na kukanua na vaanhu ava kɨsina ɨkɨ.
26 “Ndavʉle lʉlyale ifighono ifya Nwaka,
fye luliiva ʉnsiki ʉghwa kʉgomoka ne Mwana ghwa Muunhu.
27 Ifighono ifya Nwaka,
avaanhu valyale vilia na kunyua,
vitoola na kutolua,
kuhanga ɨkɨghono kɨla pano ʉNwaka alingiile mʉ safina.
Apuo,
ɨfula ɨmbaha jɨkatoonya,
jɨkavatipula avaanhu vooni.
28 “Nambe ifighono ifya Loti,
lʉlyale vʉle vʉle.
Avaanhu valyale vilia na kunyua,
vighʉla na kughʉsia,
vivyala na kujenga.
29 Neke,
ɨkɨghono kɨla ʉLoti ye ahʉmile mʉ Sodoma,
ʉmwoto ʉnkali kuhʉma kʉkyanya ghʉlikile hwene fula,
ghʉkavatipula avaanhu vooni.
30 Fye luliiva ɨkɨghono kɨla,
ne Mwana ghwa Muunhu nɨlaava nikwisa.
31 “Ɨkɨghono ɨkio,
ʉmuunhu jʉno alɨ pa kɨtʉvɨlɨ,
naangikaghe kutoola ifiinu fyake fino fili mʉ nyumba,
looli ikaghe na kukɨmbɨla.
Ghwope jʉno alɨ kʉ mʉghʉnda,
naangagomokaghe kʉ kaaja kutoola kɨmonga.
32 Mʉkʉmbʉkaghe sino silyahʉmiile kwa nʼdala ghwa Loti.b
33 Ʉmuunhu jʉno ilonda kupoka ʉvwʉmi vwake,
ʉjuo alambʉsia;
neke ʉmuunhu jʉno ikwambʉsia,
ʉjuo ɨkʉvʉpoka.
34 “Nɨkʉvavʉʉla kuuti,
ɨkɨghono ɨkio avaanhu vavɨlɨ viliiva vaghonile pa kɨtala kɨmo,
jʉmo nɨkʉntoola kuuva palɨkɨmo nuune,
ʉjʉnge nɨkʉmʉleka.
35 Avakɨjʉʉva vavɨlɨ viliiva pihavʉla palɨkɨmo,
jʉmo nɨkʉntoola kuuva palɨkɨmo nuune,
ʉjʉnge nɨkʉmʉleka.
36 Avakɨnhaata vavɨlɨ,
viliiva pivomba ɨmbombo pa mʉghʉnda,
jʉmo nɨkʉntoola kuuva palɨkɨmo nuune,
ʉjʉnge nɨkʉmʉleka.”c
37 Avavʉlanɨsɨvua vakamposia vakati,
“Mʉtwa,
isio silivombeka kʉʉghi?”
Akavamʉla nʉ lʉjovo akati,
“Kʉno kwelɨlɨ ɨlɨkanu ɨlɨfue kwe kʉno amatumbusi ghikongʼhaana.”