ɄYesu ɨkʉnsosia ʉmʼbombi ghwa mʼbaha ghwa vasikali
7
ɄYesu ye amalile kʉkʉvavʉlanɨsia avaanhu,
akalʉta mʉ lɨkaaja ɨlya Kapelenaumu.
2 Mʉ lɨkaaja lɨla,
mwealyale ʉmʼbaha ghwa vasikali ava Kɨlooma.
Ʉmʼbaha ʉjuo alyale nʉ mʼbombi ghwake jʉno alyamʉghanile fiijo.
Neke ʉmʼbombi jʉla alyale ntamu kyongo,
ghʉkava ghukova.
3 Ʉmʼbaha jʉla ye apʉliike imhola sa Yesu,
akasuungʼha avagojoa vamonga va Vayahudi,
kuuti valʉte vansʉʉme ʉYesu,
iise ansosie ʉmʼbombi ghwake.
4 Avagojo vala ye vafikile kwa Yesu,
vakampelepesia vakati,
“Ʉmuunhu ʉjʉ anoghiile ʉlʉtango lʉno ɨkʉkʉsʉʉma,
5 ʉlwakʉva avaghanile avaanhu viitu.
Kange,
ʉjʉ ghwe jʉno alyatʉjengiile ɨsinagogi jiitu.”
6 Pepano ʉYesu akavʉʉka na vagojo vala kulʉta kʉ nyumba ɨja mʼbaha jʉla.
Ye valɨ piipi kufika pa nyumba jɨla,
ʉmʼbaha jʉla akasuungʼha avamanyaani vaake valʉte kwa Yesu vamʼbʉʉle kuuti,
“Ghwe Ntwa,
ʉleke kukukatasia kukwingila mʉ nyumba jango,
ʉlwakʉva ʉne nanɨnoghiile.
7 Ʉne nɨveele nivwene kuuti,
nanɨnoghiile nambe kukwisa kʉlyʉve.
Lɨno,
nɨkʉkʉsʉʉma ʉjove lɨ lɨsio lyene,
ʉmʼbombi ghwango,
isooka.
8 Ʉlwakʉva,
na jʉʉne nipʉlɨka kʉ vavaha vango,
kange nɨlɨ na vasikali vano vipʉlɨka kʉlyʉne.
Nɨngamʼbʉʉle jʉmonga nɨɨti,
‘Lʉta!’
Ilʉta.
Ʉjʉnge,
nɨngati,
‘Isa!’
Ikwisa.
Najʉ mʼbombi ghwango nɨngamʼbʉʉle kuuti,
‘Vomba ndɨɨkɨ!’
Ivomba.”
9 ɄYesu ye apʉliike amasio aghuo,
akadegha kyongo.
Pe akalɨsyetʉkɨla ɨlɨpʉgha ɨlya vaanhu lɨno lɨlyale lɨkʉmʼbɨngɨlɨla akati,
“Nɨkʉvavʉʉla kuuti,
nambe mʉ Vaisilaeli vooni,
nanɨmwaghile ʉmuunhu ʉnya lwɨtɨko ʉlʉkome ndavʉle ʉjʉ!”
10 Avaanhu vano valyasungʼhilue,
ye vagomwike kʉ nyumba ja mʼbaha jʉla,
vakavona ʉmʼbombi asokile.
ɄYesu ɨkʉnsyʉsia ʉmwana ghwa mʉkɨjʉʉva ʉmfwɨle
11 Pambele,
ʉYesu na vavʉlanɨsɨvua vaake,
palɨkɨmo nɨ lɨpʉgha ɨlɨvaha ɨlya vaanhu vakalʉta kʉ lɨkaaja ɨlya Naini.
12 Ye valɨ piipi nʉ mʉlyango ʉghwa lɨkaaja lɨla,
vakatangʼhana na vaanhu kɨpʉgha vihʉma mʉ lɨkaaja,
vapɨndile ʉmfimba ghwa mwana ʉnʼdɨɨmi,
mʉ lɨvokosi.
Ʉmwana ʉjuo,
alyale mwene mwa mʉkɨjʉʉva ʉmfwɨle.
Avaanhu vinga kuhʉma mʉ lɨkaaja ɨlio,
valyale palɨkɨmo nʉ mʉkɨjʉʉva jʉla.
13 ɄMʉtwa ye amwaghile ʉmfwɨle jʉla,
akamʼbonela ɨkɨsa.
Akamʼbʉʉla akati,
“Ʉleke pilɨla.”
14 Pe akavelelela pa lɨvokosi lya mfimba,
akalyabasia,
avaanhu vano valyapɨndile,
vakɨɨma.
ɄYesu akati,
“Ghwe nʼdɨɨmi ʉve!
Nɨkʉkʉvʉʉla,
sisimuka!”
15 Nakalɨngi ʉmfue jʉla akasisimuka,
akikala,
akatengʉla kujova.
Pepano ʉYesu akampeela ʉngʼina,
ʉmwana jʉla.
16 Avaanhu vooni vakoghopa,
vakatengʉla kʉkʉmʉghinia ʉNgʉlʉve viiti,
“Ʉmʼbɨli ʉmʼbaha,
isile kʉlyʉsue!
ɄNgʉlʉve isile kutanga avaanhu vaake!”
17 Ɨmhola ɨjɨ jɨno alyavombile ʉYesu,
jɨkakwɨla imbale sooni isa Yudea na mʉ ɨɨsi isa pa vʉpiipi.
ɄYohani ʉMwofughi isuungʼha avavʉlanɨsɨvua vaake kwa Yesu
18 ɄYohani akapangɨlua na vavʉlanɨsɨvua vaake sooni sino ʉYesu akava ivomba.
Pe ʉYohani akavakemeela vavɨlɨ mʉ vavʉlanɨsɨvua vaake,
19 akavasuungʼha kwa Mʉtwa ʉYesu vamposie ndɨɨkɨ,
“Ʉve veeve Kɨlɨsite jʉno avavɨli valyavɨlile kuuti ilikwisa?
Nave naveeve tʉhʉvɨlaghe ʉjʉnge?”
20 Avavʉlanɨsɨvua vala ye vafikile kwa Yesu,
vakati,
“ɄYohani ʉMwofughi atʉsungʼhile kʉlyʉve tʉkʉposie kuuti,
‘Ʉve veeve Kɨlɨsite jʉno avavɨli valyavɨlile kuuti ilikwisa?
Nave naveeve tʉhʉvɨlaghe ʉjʉnge?’ ”
21 Ʉnsiki ghʉla ghʉla,
ʉYesu akava isosia vinga inhamu saave.
Akava isosia na vano valyale na mapepo amalamafu.
Kange,
nava vabofu vinga akavasosyagha,
vakalolagha.
22 Pe akavamʉla avasungʼhua vala akati,
“Mʉlʉte mʉmʼbʉʉle ʉYohani sooni sino mʉsivwene na kupʉlɨka.
Avabofu vilola,
avalema amaghʉlʉ vighenda,
avanya bʉʉba vivalala,
avanya mapʉle vipʉlɨka,
avafue visyʉka.
Kange,
avakotofu vipʉlɨsɨvua ɨMhola ɨNofu.b
23 Afunyilue ʉmuunhu jʉno ɨkʉnyɨtɨka ʉne kɨsila nganighani.”
24 Avaanhu vano vakasungʼhilue nʉ Yohani ye vavʉkile,
ʉYesu akatengʉla kʉkʉlɨvʉʉla ɨlɨpʉgha lɨla imhola isa Yohani.
Akati,
“Mʉkalʉtile kʉ lɨhaka,
kulola ɨkɨki?
Mwahʉvɨlagha kʉkʉmwagha ʉmuunhu jʉno ikeela kwɨtɨka ndavʉle ɨlɨtete lɨno likeela kʉdepa nɨ mhepo?
Jeeje!
25 Pe mʉkalʉtile kulola ʉmuunhu jʉno alɨ ndaani?
Asi,
mʉkalʉtile kulola ʉmuunhu jʉno afwalile amenda agha ndalama nyinga?
Pʉlɨkɨsia,
avaanhu vano vifwala amenda agha ndalama nyinga,
kange valɨ ni fiinu fyoni ifinofu,
vikukala mʉ majumba agha kɨtwa,
navikukala kʉ lɨhaka jeeje!
26 Lɨno,
pe mʉkalʉtile kulola ʉmuunhu jʉno alɨ ndaani?
Mʉkalʉtile kʉkʉmʉlola ʉmʼbɨli?
Se seene!
Nɨkʉvavʉʉla kuuti ʉjuo namʼbɨli lwene,
looli ʉjuo mʼbaha kukila ʉmʼbɨli.
27 Ʉjuo ghwe jʉno imhola saake silembilue mʉ Malembe aMɨmɨke kuuti,
‘Lolagha,
nɨkʉnsuungʼha ʉnyamhola ghwango
akʉlongolele,
ʉjuo ghwe ɨkʉkʉlɨngʼhanɨkɨsyagha ɨsɨla jaako.’c ”
28 ɄYesu akajova kange akati,
“Nɨkʉvavʉʉla kuuti,
kʉ vaanhu vooni nakwale,
kange naaghelile kuvoneka ʉmuunhu ʉmʼbaha kukila ʉYohani.
Neke jʉno nʼdebe mʉ Vʉtwa vwa Ngʉlʉve,
ghwe mʼbaha kukila ʉYohani.”
29 Pepano avaanhu vooni palɨkɨmo na vasongesia songo,
vano valyapʉliike amasio gha Yesu vwɨmɨla ʉYohani,
vakɨtɨka kuuti ʉNgʉlʉve ghwa kyangʼhaani.
Ʉlwakʉva avaanhu avuo ve vano valyofughue nʉ Yohani.
30 Looli,
aVafalisayi na vavʉlanɨsi va ndaghɨlo,
navalyofughue nʉ Yohani,
ʉlwakʉva valyasitile sino ʉNgʉlʉve alyafumbilue kʉ veene.
31 ɄYesu akajova kange akati,
“Nɨhwanɨkɨsie nɨ kɨki avaanhu ava kɨsina ɨkɨ?
Vahwaniine nɨ kɨki?
32 Vahwaniine na vaana vano vineena kʉ lɨghʉlɨlo,
neke vikʉvavʉʉla avajanave viiti,
‘Tʉvakʉviile ifilongilongi ifya lʉkeelo,
namʉsejile!
Tʉvɨmbiile ʉlwɨmbo ʉlwa lʉsukunalo,
namʉlɨlile!’
33 “Fye lʉlɨvuo na jʉmue!
ɄYohani ʉMwofughi ye isile,
naalisagha amakate nambe kunyua ʉlʉhʉʉje,d
mʉkati,
‘Alɨ nɨ lɨpepo.’
34 Neke ʉne,
ne Mwana ghwa Muunhu nisile,
nilia na kunyua ndavʉle vivomba avange,
mwiti,
‘Lola!
Ʉjʉ nyamwojo kange mʉghaasi!
Kange mmanyaani ghwa vasongesia songo,
na vahosi!’
35 Neke ʉvʉkagʉsi vwa Ngʉlʉve,
vuvoneka vwa kyangʼhaani kʉ vaanhu vaake.”
ɄYesu ɨkʉmpyanɨla ʉmhosi
36 Ɨkɨghono kɨmonga,
ʉMfalisayi jʉno akatambʉlwagha Simoni,
alyankemelile ʉYesu kuuti alʉte kulia kwa mwene.
Pe ʉYesu akalʉta kʉ kaaja kwa Mfalisayi jʉla,
akikala na kulia ɨkyakʉlia.
37 Mʉ lɨkaaja lɨla,
mwealyale ʉmʉkɨjʉʉva jʉmonga,
jʉno alyale mhosi kyongo.
Ʉmʉkɨjʉʉva ʉjuo,
ye apʉliike kuuti ʉYesu alɨ pilia kʉ kaaja kwa Mfalisayi,
akalʉta nɨ supa ɨnya mafuta amanono agha ndalama nyinga.
38 Ye afikile,
akɨɨma kʉnsana kwa Yesu,
piipi na maghʉlʉ ghaake.
Akatengʉla pilɨla,
neke amasosi ghaake ghakava ghidomokela mʉ maghʉlʉ gha Yesu.
Pe akava ipulusia amaghʉlʉ gha Yesu nɨ lɨnyele lyake,
kʉmo inonela na kʉkʉghapaka amafuta.
39 ɄMfalisayi jʉla,
ye alʉvwene ʉluo,
akasaagha mʉ mwojo ghwake kuuti,
“Ʉmuunhu ʉjʉ ale aave mʼbɨli,
ngale akagwile kuuti,
ʉmʉkɨjʉʉva jʉno ɨkʉmwabasia muunhu ghwa ndaani.
Ale ikagʉla kuuti mhosi.”
40 Pe ʉYesu akajova akati,
“Simoni,
nɨlɨ nɨ lɨsio,
nilonda nɨkʉvʉʉle.”
Ghwope akati,
“Eena Mʼbʉlanɨsi,
mbʉʉle.”
Pepano ʉYesu akati,
41 “Kwevalyale avaanhu vavɨlɨ,
vano valyale visighilua ihela nʉ muunhu jʉmonga.
Jʉmo alyakopile idinali ifilʉndo fihaano,
ʉjʉnge alyakopile idinali ifijigho fihaano.
42 Avaanhu ava ye vakunilue kuhomba,
jʉno alyavakopiile,
akavasaghɨla.
Lɨno,
mʉ avuo vano vakasighilwagha,
alɨku kyaɨkʉmʉghana fiijo ʉmuunhu jʉla?”
43 ɄSimoni akamwamʉla akati,
“Ʉne niiti jʉno asaghilue nyinga.”
ɄYesu akati,
“Ʉjovile se seene.”
44 Apuo,
ʉYesu akamʉlola ʉmʉkɨjʉʉva jʉla,
akamʼbʉʉla ʉSimoni akati,
“Ʉmwaghile ʉmʉkɨjʉʉva ʉjʉ?
Ye ningiile mʉlyʉve muno,
ʉve nʉmheliile amalenga agha kwofugha amaghʉlʉ ghango.e
Neke ʉjʉ,
anyofwighe amaghʉlʉ ghango na masosi ghaake,
na kupulusia nɨ lɨnyele lyake.
45 Ye ʉkʉhʉngɨla,
nʉnoniile.
Looli ʉjʉ,
kuhʉma nikwingila muno,
naakatiile kunonela amaghʉlʉ ghango.
46 Kange,
nʉmhakile amafuta kʉ mutu,f
looli ʉjʉ amhakile amaghʉlʉ ghango amafuta amanono agha ndalama nyinga!
47 Lɨno nɨkʉkʉvʉʉla,
ʉlʉghano lwa mʉkɨjʉʉva ʉjʉ lʉkome,
ʉlwakʉva apyanilue inyɨvi saake nyinga.
Neke ʉmuunhu jʉno ipyanɨlua inyɨvi ndebe,
ʉjuo ighana padebe.”
48 Pepano,
ʉYesu akamʼbʉʉla ʉmʉkɨjʉʉva jʉla akati,
“Ʉpyanilue inyɨvi saako.”