Kusyʉka kwa Yesu
16
Pakɨvwilile ye jɨsilile ɨSabati,
ʉMaliya ʉmhʉma mʉ lɨkaaja ɨlya Magidala,
ʉSalome nʉ Maliya ʉngʼina ghwa Yakovo,
vakaghʉla amafuta amanono kuuti vakaghʉpake ʉmʼbɨlɨ ghwa Yesu.
2 Ɨkɨghono ɨkya kwasia mʉ mʉlʉngʉ,a
palwakɨlo ɨlɨjʉva ye lidibula,
vakalʉta kʉ mbiipa.
3 Ye valɨ mʉ sɨla,
vakijovasyagha veene viiti,
“Veeni jʉno kyaɨkʉtʉvʉsɨkɨsia ɨlɨvue lɨla pa mʉlyango ghwa mbiipa?”
4 Ɨlɨvue lyale lɨkome kyongo.
Ye vafikile,
vakavona ɨlɨvue lɨbɨlʉsivue.
5 Vakingila mʉ mbiipa,
ʉmuo vakamwagha ʉnsoleka afwalile ʉmwenda ʉmʼbalafu,
ikalile ʉlʉbale lwa kʉndio,
pe vakakenyemʉka kyongo.
6 Ʉmwene ʉnsoleka ʉjuo akavavʉʉla akati,
“Namʉngakenyemʉkaghe.
Mʉkʉmʉlonda ʉYesu ʉghwa kʉ Nasaleti jʉno akakomelilue pa kɨkovekano?
Asyʉkile,
napwale apa!
Lola pano vakamʼbɨkile.
7 Mʉlʉte mʉvavʉʉle avavʉlanɨsɨvua vaake,
kyongo ʉPeteli kuuti,
alongwile kʉ Galilaya.
Ʉkuo mulʉta mʉkʉmʼbona ndavʉle alyavavʉlile.”
8 Ye vapʉliike isio,
vakadegha na kutetema,
vakahʉma kʉnji,
vakavʉʉka pa mbiipa vikɨmbɨla.
Navakapanga kwa muunhu ʉlwakʉva vakava vikwoghopa.
ɄYesu ikuhʉfia kwa Maliya ʉmhʉma mʉ lɨkaaja ɨlya Magidala
9 ɄYesu ye asyʉkile palwakɨlo ɨkɨghono ɨkya kwasia mʉ mʉlʉngʉ,
akihʉfia taasi kwa Maliya ʉmhʉma mʉ lɨkaaja ɨlya Magidala,
jʉno alyamʼbʉsisie amapepo lekelalʉbale.
10 ɄMaliya akalʉta kʉkʉvapangɨla vano vakamʼbɨngɨlɨlagha ʉYesu,
ʉnsiki ʉghuo vakajiighe vasukuniile,
vilɨla ɨfua.
11 Ye vapʉliike kwa Maliya kuuti ʉYesu mwʉmi,
kange amʼbwene,
navakɨtɨka.
ɄYesu ikuhʉfia kʉ vavʉlanɨsɨvua vaake vavɨlɨ
12 Pambele,
ʉYesu akihʉfia kʉ vavʉlanɨsɨvua vavɨlɨ mʉ kɨhwani ɨkɨngɨ.
Avavʉlanɨsɨvua avuo valyahʉmile kʉ Yelusalemu,
vakalʉtagha kʉ kɨkaaja ɨkya pa vʉpiipi.
13 Voope vakalʉta vakavapangɨla avajanave,
poope navakɨtɨka.
ɄYesu isuungʼha avavʉlanɨsɨvua vaake
14 Kange,
ʉYesu akihʉfia kʉ vavʉlanɨsɨvua kɨjigho na jʉmo,
ʉnsiki ʉghuo vakava vilia.
Akavadalɨkɨla,
ʉlwakʉva valyale vasiiti kukwɨtɨka ʉvwolesi vwa vano valyamʼbwene ye asyʉkile.
15 Pepano ʉYesu akavalaghɨla avavʉlanɨsɨvua vaake akati,
“Mʉlʉtaghe mʉ ɨɨsi jooni mʉpʉlɨsyaghe ɨMhola ɨNofu kʉ vaanhu vooni.
16 Jʉno ikwɨtɨka na kukwofughua,
ʉjuo alakuluka.
Neke jʉno naikwɨtɨka,
alahɨghua.
17 Kange,
vano vɨtiike vivombagha ifidegho ifi:
Mʉ lɨtavua lyango vidagagha amapepo,
kange vijovagha mʉ njovele ɨmhia.
18 Vangakole ɨnjoka,
nambe vanganyue ɨnyambɨkɨla,
navangafue.
Kange,
vivɨkagha amavoko ghaave pa vatamu,
avatamu visokagha.”
ɄYesu itolua kulʉta kʉkyanya
19 ɄMʉtwa ʉYesu ye ajovile navo,
pe akatolua kulʉta kʉkyanya,
akava nʉ vʉtavʉlɨlua palɨkɨmo nʉ Ngʉlʉve.
20 Pepano avavʉlanɨsɨvua vaake vakalʉtagha kupʉlɨsia kwoni ɨMhola ɨNofu.
ɄMʉtwa akavombagha ɨmbombo palɨkɨmo na veene,
akavapelagha ingʉfu isa kʉvomba ifidegho fino fyale fivalɨlo kuhʉfia kuuti,
ɨMhola ɨNofu jɨno vipʉlɨsia ja kyangʼhaani.b