21
नोवी जुग, नोवी तोरती, आने नोवों येरुसालेम सेहेर
1 हातींअ मांयुं नोवी जुग आने नोवी तोरती देखी। पेअलुरी जुग ने पेअलुरी तोरती उलुप वीअ गेहल्या। आने आमी दोरीयाअ ता नांव नीसाणी बी नांह रीयी। 2 हातींअ मांयुं पोरमेहेराअ पोवीतोर सेहेराल, मोंजे का, नोवा येरुसालेम सेहेराल होरगामेर्याअ पोरमेहेराअहींनेअ एठाअ उतुअता देख्यों। तीया सेहेराल पोरमेहेरांय तीयार केअलों। आने नोवी वोल्लील सोताअ वोल्लाल मीलांअ तीयारी केअयी वीअ तेंहकींअ, तों खुब सोबालों देखाअत्लों। 3 आने आंय पोरमेहेराअ राजगादीपनेअ एक मोडो आवाज उनाअयो। तीया आवाजुंह एंहकींअ आख्यों, “वेरा! आमी पोरमेहेर सोताअ मांहांहांअरी वोहती कीअ; तो तीयाहांमुज वोहती कीअ; ते तीयाअ लोक बोंणीअ; पोरमेहेर सोतेज तीयाहांअरी रीअ; आने तो तीयाहांअ पोरमेहेर बोंणीअ।”
4 तो तीयाहांअ डोंअहांमेर्येंअ रोजयें नुसी टाकतो वीअ तेंहकींअ तो तीयाहांअ बादें दुखें मीटावी दीअ। तीयाहांमेर्योंअ केडों बी फाचों कीदीह बी नांय मोय, का केडों बी जीव बालीन नांय रोळे, का केडाल केल्ली बी जातीअ दुख नांय लागीअ। काहाका, ए बादया पेअलुर्याअ बाबोत्या कायोमाअ खातुर चाल्या गीयाह।
5 हातींअ राज-गादीपेअ बोठलो हाय तीयांय आख्यों, “वेरा! आमी आंय बादों नोवों बोंणावुंह!” तीयांय मांन आख्यों, “ए गोठ्या लेखी ले! काहाका, ते मानांअ लायोक हाय आने ते नोक्कीज पुर्या वीअ।” 6 तीयांय मांन ईं बी आख्यों, “मांयुं बादों पुरों केअयोंह। पेअलो आने सेल्लो आंयज हाय। मोंजे का, बादी बाबोतीहींअ वेजलुअनारो आने तीयुहुंअ ओंत लावनारो आंयज हाय। जोंबी आत्मीक बाबोतीहींअ खातुर फाअप्यों हाय, तीयाल आंय लोकाहांन कायोमाअ खातुर जीवावनारा पांअयांअ चोरुंहमनेअ मोफोतुमुज पांय देहें। 7 सेतानुपेअ जीत मीलवुअनारा बादाहांन आंय वारसायुम ए बादा आसीरवाद देहें। आने आंय तीयाहांअ पोरमेहेर बोंणेंह आने तें मांअ पोयरें बोंणीअ। 8 पेन बीखर्यें, वीसवास नांह राखनारें, नोफरोतुअ लायोकुअ मांहेंअ, खुनी, सीनालों केअनारें, मेली वीध्या केअनारें, मुरतींहन पुंजनारें, झुटों गोगनारें तें बादें गोंदरोखुकींअ बोलती आगीअ कुंडुम दुखें भोगवीअ। ईया कुंडुम दुखें भोगवुलोंअ तोंज बीहरी वोखोत मोरांअ हाय।”
9 हातींअ ते सांत आफोत्या लावनारा दाराख्साअ रोह पोअला कोटुरावाला सांत होरगाअ दुतांयमेर्याअ एक दुतांय मांअहीं आवीन आख्यों, “मांअरी आव! आंय तुल ख्रीस्तुअरी, मोंजे का, घेटाअ बोचाअ होच हाय तीयाअरी कायोमाअ खातुर जोळाय जानारा लोक देखावुंह। ते लोक नोवी वोल्ली होच वीअ।”
10 हातींअ पोरमेहेराअ आत्मा मोदोताकींअ तो होरगाअ दुत मांन एक मोडा ने खुब उचा डोगाअपेअ लीअ गीयो। तींहीं तीयांय मांन पोवीतोर सेहेर येरुसालेमाल होरगामेर्याअ पोरमेहेराअहींनेअ उती आवता देखाव्यों। 11 आने तों सेहेर पोरमेहेराअ मोडायाअ उजवोळाकींअ झोल-झोल केअत्लों। तीया सेहेराअ चेंण पोळ्या केअत्ली। ते चेंण खुब कींमती ढोगळाअ होच, मोंजे का, राता रोंगाअ हीराअ होच, मोंजे का, काचुअ होच चोख्खी आथी। 12 तीया सेहेराअ चारु वेल खुब उचो आने मोजबुत कोट आथो, आने तीया कोटुअ बार बांअणें आथें। आने एक-एक बांअणाअ आगलांअ एक-एक दुत चोकी केअत्लो। तीया एक-एक बांअणापेअ ईसरायेल लोकाहांअ बारु कुळुंमेर्याअ एक-एक कुळुअ नांव लेखलों आथों। 13 तीया बांअणांहमेर्येंअ तीन बांअणें दीह उगताअ वेल आथें, तीन बांअणें उत्तोरुअ वेल आथें, तीन बांअणें दोकसीणुअ वेल आथें, आने तीन बांअणें दीह बुडताअ वेल आथें। 14 सेहेराअ कोट पायाअ बार ढोगळांहपेअ बांदलो आथो। आने तीया दोरेक पायाअ ढोगळापेअ, घेटाअ बोचाअ होच हाय तीयाअ बारु खास चेलाहांअ एक-एकाअ नांव लेखलों आथों।
15 मांअरी गोठ्या केअनारा दुतुपेअ तीया सेहेराअ, ने तीयाअ बांअणांअ, आने कोटुअ माप लांअ खातुर होनाअ मापुअ होटी आथी। 16 तों सेहेर चोरोस आकारुअ आथों। मोंजे का, तीयाअ लांबाय ने पोलाय एक हारकीज आथी। तीया दुतांय पोतापेरीअ मापुअ होटीकींअ तीया सेहेराल माप्यों ता, तों पोंदोर होव मायल (१५००) लांबों आथों। तीयाअ लांबाय पोलाय आने उचाय हारकीज आथी। 17 तीया होरगाअ दुतांय कोट माप्यो ता, तो बेन होव ने सोला (२१६) फुट उचो आथो। मापांअ खातुर मांहेंअ जो माप वापरुअतेंह, तोज माप वापरीन तीया दुतांय तो कोट माप्यो।
18 तीया कोटुअ बांदकामाम राता रोंगाअ कींमती ढोगळा वापराअला, आने सेहेर ता डागु वोगुराअ काचुअ होच पीवोर होनाअज बोंणलों आथों। 19 आने तीया सेहेराअ कोटुअ पायाअ ढोगळा दोरेक जातीअ कींमती हीरा-मोतींहकींअ सोबी रेहला। पायाअ पेअलो ढोगळो यासपेर नांवांअ राता रोंगाअ हीरा-मोतीकींअ सोबी रेहलो, आने पायाअ बीहरो ढोगळो साफीर नांवांअ भुरा रोंगाअ हीरा मोतीकींअ सोबी रेहलो, आने पायाअ तीजो ढोगळो खालसेडोनी नांवांअ लीला रोंगाअ हीरा-मोतीकींअ सोबी रेहलो, आने पायाअ चोवथो ढोगळो एमेरोल्ड नांवांअ लीला रोंगाअ बीहरा एक हीरा-मोतीकींअ सोबी रेहलो। 20 पायाअ पाचमो ढोगळो सारडोनीक्स नांवांअ तोपकुर्या आने पांडाअ रोंगाअ हीरा-मोतीकींअ सोबी रेहलो। पायाअ सोठ्ठो ढोगळो सारडीयु नांवांअ राता रोंगाअ हीरा-मोतीकींअ सोबी रेहलो। आने पायाअ सातमो ढोगळो खीरीसोलायट नांवांअ पीवला रोंगाअ हीरा-मोतीकींअ सोबी रेहलो। पायाअ आठमों ढोगळो बेरील नांवांअ लीला रोंगाअ बीहरा जातीअ हीरा-मोतीकींअ सोबी रेहलो। पायाअ नोवमों ढोगळो टोपाझ नांवांअ पीवला रोंगाअ बीहरा जातीअ हीरा-मोतीकींअ सोबी रेहलो। पायाअ दोस्मो ढोगळो खीरीसोपीरासु नांवांअ लीला रोंगाअ जुदी जातीअ हीरा-मोतीकींअ सोबी रेहलो। पायाअ ओग्यारमो ढोगळो हीयाकींथ नांवांअ भुरा रोंगाअ जुदी जातीअ हीरा-मोतीकींअ सोबी रेहलो। पायाअ बारमो ढोगळो आमेथीस्ट नांवांअ जांबा रोंगाअ हीरा-मोतीकींअ सोबी रेहलो। 21 तें बारु बांअणें मोतींअ बोंणलें आथें। तीयाहांमेर्योंअ दोरेक बांअणों एक-एक मोतीअ बोंणलों आथों, आने तीया सेहेराअ मोडी गोली डागु वोगुराअ काचुअ जेंहडा चोख्खा होनाअ आथी। 22 सेहेराम एक बी मोंदीर नांय आथों। काहाका, मालीख जो खुब ताकोतावालो पोरमेहेर आने घेटाअ बोचाअ होच हाय तोज तीया सेहेराअ मोंदीर हाय। 23 तीया सेहेराल दीहाअ का चांदाअ जोरुल नांह। काहाका, पोरमेहेराअ मोडायाअ तेज तीया सेहेराल उजवोळ देहे। आने घेटाअ बोचाअ होच हाय तो तीया सेहेराअ दीवो हाय। 24 दुन्याअ लोक तीया उजवोळाम चालीअ आने तोरतीअ लोकाहांपेअ राज केअत्ला ते, तोरतीपेअ सोताल मीलली माल-मीलकोत मालीखाअहीं लीअ आवीअ। 25 तीया सेहेराअ बांअणें दीह पुरो वेरांअ सोमोये बोंद नांय वीअ। काहाका, तींहीं रात पोळनारीज नांह। 26 बादा देसाहांअ लोक सोताल मीलली माल-मीलकोत आने खोजाना तीया सेहेराम लीअ आवीअ। 27 पेन केल्ली बी जातीअ खोटायुल तीया सेहेराम वीहांअ नांय देवाय। मोंजे का, खोटें आने नाज आवे एंहडें कामें केअनाराहांन, का झुटों गोगनारांहन तीया सेहेराम वीहांअज नांय देवाय। पेन जीयाहांअ नांवें घेटाअ बोचाअ होच हाय तीयापेर्याअ चोपळाम, मोंजे, कायोमाअ खातुर जीवनारा लोकाहांअ नांवें नोंदाअतेंह तीया चोपळाम नोंदाअयेंह, तीया लोकाहांनुंज तीया सेहेराम वीहांअ देवाय।