20
ख्रीस्त एक हाजार वोरसें राज केअहे
1 हातींअ मांयुं एक दुताल होरगामेनेअ उतुअतो देख्यो। तीयापेअ तोल्या वोगुराअ खाड्डाअ कुची आथी आने तीयाअ आथाम एक मोडी हाकुल आथी। 2 तीया दुतांय, तीया ओजगोरुल, मोंजे तीया जुना जोमानाअ हाप, जो खोटायुवालो सेतान हाय तीयाल तेअयो, आने तीयु हाकलीकींअ एंहडो बांदी देदो का, एक हाजार वोरसें लोगुंअ केडों बी ते हाकुल नांय सोळे। 3 तो सेतान एक हाजार वोरसें पुरें वेअ तांव लोगुंअ लोकाहांन फाचा नांय ठोगे तीयाअ खातुर तीया दुतांय तीयाल तोल्या वोगुराअ खाड्डाम टाकी देदो, आने तीया खाड्डाअ मुवालाअ टापणो बोंद कीईन टालों मार्यों, आने तीया टालापेअ सील मारी देदों। एक हाजार वोरसें पुरें वीअ हातींअ, पोरमेहेराअ दुताअ तीया सेतानाल थोळाक वोखताअ खातुर सोळांअ पोळीअ।
4 हातींअ मांयुं राज-गादया देख्या आने तीयुहुंपेअ मांहेंअ बोठलें आथें। तीया मांहांहांन पोरमेहेरांय नीयाय केरांअ आदीकार देदलो। ईसुअ बाबोताम साक्सी देदली आने पोरमेहेराअ गोठ आखलों तीया कारोणे मुंनकें वाडीन माय टाकाअला लोकाहांन मांयुं तींहीं देख्या। तीयाहां तीया जोनावोरुअ का तीयाअ मुरतीअ पुंजा नांह केअयी। आने तीयाहां सोताअ नीडांहपेअ का आथाहांपेअ तीया जोनावोरुंह नीमला मांहांहांन नीसाणी केरांअ नांह देदी। ते लोक मोअलांमेनेअ फाचा जीवता उठया आने हाजार वोरसें लोगुंअ तीयाहां ख्रीस्तुअरी राज केअयों। 5 मोअलामेनेअ पेअलांम-पेअलांअ जीवता उठनारा ता एज लोक आथा। (बाकी रेहलें मोअलें मांहेंअ तें एक हाजार वोरसें पुरें वीयें तांव लोगुंअ मोअलांमेनेअ जीवतें नांय उठयें।) 6 मोअलामेनेअ पेअलांम पेअलांअ जीवता उठनारा ते लोक खुब सुखी ने पोवीतोर हाय। ते बीहरी वोखत मोअनारा नांह। पेन उलटों, ते पोरमेहेराअ आने ख्रीस्तुअ पुंजारा बोंणीअ आने ख्रीस्तुअरी एक हाजार वोरसें लोगुंअ राज कीअ।
ख्रीस्त सेतानाल हारवेह
7 तें हाजार वोरसें पुरें वीअ हातींअ, एक दुत सेतानाल तीया तोल्या वोगुराअ खाड्डा रुपी जेलाम नेअ सोळी दीअ। 8 तो सेतान बारे आवीअ आने गोग आने मागोग आखाअनारा बादा देसाअ होजर्या लोकाहांन ठोगीअ, ईयाअ खातुर का, तो तीयाहांन पोरमेहेराअ लोकाहांअरी लोळांअ टोलवे। ते लोक दोरीयाअ तोळीपेरीअ रेटीअ होच ओताअ बादा वीअ। 9 आने ते आखी तोरतीपेअ फीरी वोलीअ आने पोरमेहेराअ लोकाहांअ पोळावुल, मोंजे का, तीयाअ मेराला सेहेर येरुसालेमाल घेरी वोलीअ। तांहांअ पोरमेहेर जुगामेनेअ आग पाळीअ ने ते आग तीया लोकाहांन बाली टाकीअ। 10 तीया लोकाहांन ठोगनारा सेतान बोलता गोंदरोखुअ आगीवाला कुंडुम टाकाय जाय। ईयाज कुंडुम होरगाअ दुतांय तीया जोनावोरुल आने सोताल पोरमेहेराअ गोठ जाहेर केअनारो एंहकींअ झुटी रीते आखावनाराल टाकी देदला। ते तींहीं रात दीह कायोमाअ खातुर रीबाअया कीअ।
सेल्ला नीयायाअ चुकादो
11 हातींअ मांयुं पांडीअ मोडी राजगादी ने तीयापेअ जो बोठलो आथो तीयाल देख्यो। तोरती आने जुग तीयाअ हाजरीमनेअ उलुप वीअ गीयें। आने तीयाहांअ नांव नीसाणी बी नांय रीयी। 12 हातींअ मांयुं मोय गेहला हानांअ-मोडा बादाहांन तीयु राज-गादीअ आगलांअ उबी रेहलें देख्यें। आने तींहीं होरगाअ दुताहीं थोळेंक चोपळें उगाळ्यें। आने कायोमाअ खातुर जीवनारांअ नांवें जीया चोपळाम नोंदाअयेंह तों चोपळों बी होरगाअ दुतांय उगाळ्यों। तीया चोपळांहम लेखलों तेंहकींअ-तेंहकींअ लोकाहीं केअला कामाहांअ आदारे गादीपेअ बोठलो तीयांय तीया लोकाहांअ नीयायाअ चुकादो देदो। 13 आने दोरीयाम मोअलें मांहेंअ पोरमेहेराअ राज-गादीअ आगलांअ उबी रांअ खातुर फाचें जीवतें वीयें। जोमीनाम डाटाअलें मांहेंअ बी तीयाअ राज-गादीअ आगलांअ उबी रांअ खातुर फाचें जीवतें वीयें। तीयाहां केअला कामाहांअ आदारेज तीयाहांअ नीयायाअ चुकादो वीयो। 14 मोईन हातींअ मोअलांअ कोलीम सेल्ला नीयायाअ वाट जोवत्लें तें मांहेंअ तीयु आगीअ कुंडुम टाकी देवाअयें। ओ आगीअ कुंडुज मांहेंअ बीहरी वोखत मोय तो जागो हाय। 15 कायोमाअ खातुर जीवनारांअ नांवें नोंदाअतेंह तीया चोपळाम जीयाहांअ नांवें नोंदाअलें नांय आथें, तें बादें तीयु आगीअ कुंडुम टाकी देवाअयें।