19
होरगाम जीतुअ उजवोणी
1 ईं बादों बोंण्यों हातींअ आंय होरगाम मांहांहांअ मोडा टोलाल बोंबलुअता उनाअयो। तें एंहकींअ आखत्लें,
“हाल्लेलुया! आपुअ पोरमेहेराअ गुणगान केरा! तीयांय सोताअ लोकाहांन वाचाव्याह! तो मोडायावालो आने खुब ताकोतावालो हाय! 2 तीयाअ गुणगान केरा! काहाका, तो नीयायाअ रीते ने हाची रीते बादाहांअ नीयाय केअहे। आने तीयांय तीया मोडा सेहेराअ लोकाहांन सीक्सा केअयीह। आदमींअरी सीनालों केअनारी वेस्याअ होच तीया सेहेराअ लोकाहीं, तोरतीपेर्याअ बीहरा लोकाहांन सोताअरी सीनालों केरावीन तीयाहांन बीगाळ्याह। पोरमेहेराअ गुणगान केरा! काहाका, तीया सेहेराअ लोकाहीं तीयाअ सेवोकुंअ रोगुत पाळीन तीयाहांन माय टाक्याह तीयाअ लीदे तीयांय तीया लोकाहांन सीक्सा कीईन तीयाअ बोदलो वाल्योह।” 3 होरगाम तीया टोलामेर्याअ मांहांया फाचों आख्यों, “हाल्लेलुया! पोरमेहेराअ गुणगान केरा! काहाका तीया सेहेराल लागली आगींह तीयाल बालीन खाक कीअ टाक्योंह। तीयाअ तुअरों कायोमाअ खातुर उचे ने उचे जाया कीअ।”
4 तांहांअ ते चोवीस वोळील आने ते चार जीवता-जीव पागे पोळ्या आने राज-गादीपेअ बोठला पोरमेहेराअ भोकती केअयी। आने तीयाहां आख्यों का, “आमेन, हाल्लेलुया! पोरमेहेराअ गुणगान केरा!”
5 हातींअ राज-गादीमनेअ एक आवाज आलो आने तीयांय आख्यों, “पोरमेहेराअ बादा सेवोकुहुं, मोंजे का, तीयाअ बीख राखनारा बादा लोकुंह! ते हातींअ सोमाजुम वादारे मानुवाला वेअ का ओसा मानुवाला, तुमां बादा आपुअ पोरमेहेराअ गुणगान केरा!”
6 हातींअ आंय एंहडो आवाज उनाअयो का जो लोकाहांअ मोडा टोलाअ आवाजुअ होच पांअयांअ काट खोकलुअतो वेअ एंहडो मोडो आने गाजेह तीया मोडा आवाजुअ होच आथो। तीया आवाजुंह एंहकींअ आख्यों, “हाल्लेलुया! पोरमेहेराअ गुणगान केरा! काहाका, खुब ताकोतावालो मालीख पोरमेहेर राज केअहे! 7 चाला आपुंह आनोंद केअजी! आने आपुंह खुब खुस वेअजी आने तीयाल मान देजी! काहाका, ईसु जो घेटाअ बोचाअ होच हाय तो, एक वोल्लो नोवी वोल्लीअरी वोराळ केअ तीयाअ होच, सोताअ लोकाहांअरी कायोमाअ खातुर जोळाय जांअ वोखत आवी गीयोह। आने ईसुअ लोक बी तीया दीहाअ खातुर तीयार वीयाह। 8 जेंहकींअ एक नोवी वोल्ली चोमकुअतें ने चोख्खें रेसमी पोतळें पोवीन तीयारी वेअहे, तेंहकींअ पोरमेहेरांय तीया लोकाहांन एकदोम चोख्खा केअयाह।” (चोख्खें रेसमी पोतळें ता, पोरमेहेराअ पोवीतोर लोक जे हाचें कामें केअताह तीयाअ नीसाणी हाय।)
9 हातींअ तीया होरगाअ दुतांय मांन आख्यों, “ए गोठ्या लेखी ले! ईसु जो घेटाअ बोचाअ होच हाय तो सोताअ लोकाहांअरी कायोमाअ खातुर जोळाय जांअ हाय। तीयाअ उजवोंणीम जीयाहांन पोरमेहेरांय नोतर्याह, ते लोक खुब सुखी हाय! ए उजवोणी, एक वोल्लो नोवी वोल्लीअरी वोराळ केअहे तांहांअ जों जेवोंण वेअहे, तीयाअ होच वीअ।” हातींअ तीया दुतांय मांन ईं बी आख्यों, “ए गोठ्या ता खोरेखोर पोरमेहेरांय जाहेर केअल्याज हाय।” 10 तीया होरगाअ दुताअ भोकती केरांअ आंय तुरुतुज तीयाअ पागे पोळ्यो। पेन तीयांय मांन आख्यों, “मांअ भोकती मां कीअहो! काहाका, आंय बी तोअ होच आने ईसुअ बाबोताम लोकाहांन गोठ आखनारा तोअ ख्रीस्ती पावु-बोंअयुंअ होच एक सेवोकुज हाय। मोंजे, पोरमेहेराअ भोकती केअ! ईसुअ बाबोताम साक्सी देनारों दोरेक मांहुंअ पोवीतोर आत्मा जाणावेह तीया पोरमाणेज ते देहे।”
पांडाअ कोळापेअ बोठलो सावार
11 हातींअ मांयुं होरगाल उगळी गेहलों देख्यों। तींहीं मांअ आगलांअ एक पांडोअ कोळो आथो। तीया कोळापेअ जो सावार आथो तीयाअ नांव “ईसु जो ईमानदार आने हाचो” हाय। तो हाची रीते बादाहांअ नीयाय केअहे आने सोताअ दुसमोनाहांअरी तो हाची रीते लोळेह। 12 तीयाअ डोंआं आगीअ झालीअ होच आथा। तीयाअ मुनकापेअ खुब मुंगोट आथा। आने तीयाअ नींडापेअ एंहडों एक नांव लेखलों आथों का जीयाअ ओर्थो तो एखलोज जांअहे। 13 आने तीयांय रोगुतुम पीजवुअलो झोब्बो पोवलो। तीया कोळापेअ बोठला सावारुअ नांव पोरमेहेराअ गुण जाहेर केअनारो* बी हाय। 14 होरगाअ बादें लोस्कोरें रेसमी चोख्खें ने पांडेंअ पोतळें पोवीन पांडाअ कोळांहपेअ सावार वीईन तीयाअ फाचलांअ जाहलें। 15 तो देहलो तो बोद एकदोम धारवाली तारवायुअ होच आथो। तीया बोदा कींअज तो बादा देसाहांअ होजर्या लोकाहांअ नास कीअ। नोळाअ लाकळीकींअ राज केअतो वीअ तेंहकींअ तो सोते तीयाहांपेअ मोजबुत रीते राज कीअ। जेंहकींअ एक मांहुंअ दाराख्साअ रोहाअ कुंडीम दाराखसाहांन सुंदेह तेंहकींअ, तो सोताअ दुसमोनाहांन सुंदी टाकीअ। तीया लोकाहांअ पापाहांअ लीदे जो खुब ताकोतावालो पोरमेहेर खुब रोगवाअयोह, तीया पोरमेहेराअ आखल्या पोरमाणे तो एंहकींअ कीअ। 16 तीयाअ झोब्बापेअ तीयाअ जांगीअ भागे “राजांअ राजा आने मालीखुंअ मालीख” एंहडों नांव लेखलों आथों।
17 हातींअ मांयुं एक दुताल दीहाअ एकदोम उजवोळाम उबी रेहलो देख्यो। तीयांय जुगाम खुब उचे उडनारा बादा चीळाहांन मुरदों खांअ खातुर बोंबलीन हात केअयें: “आवा! पोरमेहेर तुमनेंह जों मोडों जेवोंण देहे, तींहमें भाग लांअ टोलवाया! 18 मोअला राजांअ, लोस्कोरुंअ केपटोनुंअ, लोस्कोरुंअ आदमींअ, कोळांअ आने तीयाहांपेअ जे सावार हाय तीयाहांअ माह खांअ आवा। आने बादा लोकाहांअ मोंजे का, ते सोतोंतोर वेअ का गुलाम वेअ, सोमाजुम मानुवाला वेअ, का ना जेंहडा वेअ, तीया बादाहांअ माह खांअ आवा।”
19 हातींअ मांयुं, तीया जोनावोरुल आने तोरतीअ लोकाहांअ राजाहांन, आने तीयाहांअ लोस्कोरुंहन तीया पांडाअ कोळापेर्याअ सावारुअरी आने तीयाअ लोस्कोरुंअरी लोळांअ खातुर टोलवाअला देख्या। 20 हातींअ पांडाअ कोळापेअ बोठला सावारुंह तीया जोनावोरुल आने सोताल पोरमेहेराअ गोठ जाहेर केअनारो एंहकींअ झुटी रीते आखावनाराल तीअ लेदा। सोताल पोरमेहेराअ गोठ जाहेर केअनारो एंहकींअ झुटी रीते आखावनारा ईयांहज तीया जोनावोरुअ देखता चोमोत्काराअ कामें केअलें। आने तीयाकींअ तीयांय एंहडा लोकाहांन ठोगला का, जीयाहां तीया जोनावोरुअ नीसाणी लेदली, आने तीया जोनावोरुअ मुरतीअ भोकती केअली। तीया पांडाअ कोळापेअ बोठला सावारुंह तीया जोनावोरुल आने सोताल पोरमेहेराअ गोठ जाहेर केअनारो एंहकींअ झुटी रीते आखावनाराल गोंदरोखुकींअ बोलती आगीअ कुंडुम जीवताज टाकी देदा। 21 बीहरा बादा राजाहांन आने तीयाहांअ लोस्कोरुंहन तीया पांडाअ कोळापेअ सावार आथो तीयांय सोताअ देदला बोदा कींअ माय टाक्या। तो बोद धारवाली तारवायुअ होच आथो। तीयाहांअ लासींअ माह, बादों माह खानारा चीळाहां तारायन खादों।