18
बाबीलोन सेहेराअ नास
1 ईयाअ हातींअ मांयुं बीहरा एक दुताल होरगामेनेअ एठाअ उती आवतो देख्यो। तो खुब ताकोतावालो आथो। आने तीयाअ तेजुकींअ आखी तोरती झोग-मोग वीअ गीयी। 2 तीयांय जोरपेअ बोंबलीन आख्यों का, “मोडा सेहेराअ नीसाणी हाय तों बाबीलोन सेहेर एकदोम नास कीअ टाकाअनारों हाय। तीयाअ पोरीणामे, तों सेहेर पुतळाहांअ ने बीहरा पुतळाहांअ रेहठाण बोंणी जाय। आने तीयाअ हातींअ तीया सेहेराम बादी जातीअ खाराब ने नोफरोत केरांअ लायोक चीळें वोहती कीअ। 3 पोरमेहेर तीया मोडा सेहेराअ ईयाअ लीदे नास कीअ का, जेंहकींअ वेस्या आदमीहींन दाराख्साअ रोह पीयावीन सोताअरी सीनालों केरावेह तेंहकींअ तीया सेहेराअ खुब भागाअ लोकाहीं बादा देसाअ लोकाहांन सोताअरी सीनालों केराव्योंह। आने तोरतीअ लोकाहांअ राजाहां बी तीया सेहेराअ खुब भागाअ लोकाहांअरी सीनालों केअयोंह। तीया सेहेराअ खुब भागाअ लोकाहांअ जाहो-जालालीवाला जीवोनाअ पोरीणामे तोरतीपेर्याअ वेपारी मालदार बोंणी गीयाह।”
4 हातींअ आंय बीहरा एक आवाजुल होरगामेनेअ एंहकींअ आखता उनाअयो का, “पोरमेहेर आखेह का, ‘ओ मांअ लोकुंह! तीया बाबीलोन सेहेरामेनेअ बारे नींगी आवा, ईयाअ खातुर का, तीया सेहेराअ खुब भागाअ लोकाहांअ होच तुमां पाप नांय केरा आने आंय तीयाहांन केअनारो हाय ते सीक्सा तुमनेंह वेठांअ नांय पोळे। 5 तीया सेहेराअ खुब भागाअ लोकाहांअ पाप ओताअ बादा वादी गीयाह का, तीया पापाहांअ ढीगलो जुगाम लोगुंअ पोची गीयो वीअ तेंहडों हाय। मांन आमी तीयाहांन सीक्सा केअया वोगुर रेवाय एंहडों नांह। तीयाअ लीदे, तुमां तीया सेहेरामेनेअ नींगी आवा!’”
6 तीया सेहेराअ लोकाहांन सीक्सा केरांअ पोरमेहेरांय नीम्याह तीया दुताहांन तीया आवाजुंह आख्यों, “तीया सेहेराअ लोकाहीं बीहरा लोकाहीं अ जोतोंअ नुकसान केअयोंह, तोतोंअ नुकसान तुमां बी तीया सेहेराअ लोकाहांन केअजा! होकीकोतुम ता, तीयाहां बीहरा लोकाहीं अ जोतोंअ नुकसान केअयोंह, तीयाअ केअता बेन भाग वादारे नुकसान कीईन तुमां तीयाअ बोदलो वालजा! 7 तीया सेहेराअ मांहेंअ मोडायुम आने जाहो-जाहालीम रीयेंह, तोतेंअ तुमां तीयाहांन रीबावा ने दुखें पाळा। काहाका, तें सोताअ मोनाम एंहकींअ वीचारतेंह का, ‘आमां ता राणीअ होच हाय। आमां रोंडेअ बायाअ होच नांह। मोंजे, आमनेंह कीदीह बी जीव बालीन रोळांअ नांय पोळीअ।’ 8 तीयाअ लीदे, एकुज दीहुम तीया सेहेराअ मांहांहांपेअ आफोत्या आवी पोळीअ। खास कीईन, तीया सेहेराअ मांहेंअ मोय जाय आने तीया मोअलांअ लीदे बीहरें मांहेंअ जीव बालीन रोळीअ। आने तीया सेहेराम काल पोळीअ, आने तों सेहेर बाली देवाय। तीया सेहेराअ लोकाहांअ नीयाय केअनारो मालीख पोरमेहेर खुब ताकोतावालो हाय तीयाअ लीदे तो तीयाहांन एंहडी सीक्सा कीअ सेकेह।
9 तोरतीपेर्याअ लोकाहांअ राजा का जे तीया सेहेराअ लोकाहांअरी सीनालों कीईन मोज-सोकुम रीयाह, ते तीया सेहेराल लागली आगीअ तुअरों देखीन खुब जीव बालीन रोळीअ। 10 तीया सेहेराअ लोकाहांअ होच सोताल बी सीक्सा वीअ एंहडी बीखुअ लीदे ते राजा तीया सेहेराअ से सेटेज उबी रीअ आने आखीअ, ‘हाय! हाय! ओ मोडा ने ताकोतावाला बाबीलोन सेहेराअ लोकुंह! तुमांअ केंहडी दोस्या वीअ गीयी! पोरमेहेरांय तुमनेंह एकुज घेळीम सीक्सा कीअ देदीह!’
11 तोरतीपेर्याअ वेपारी बी तीया सेहेराअ लोकाहांअ खातुर खुब जीव बालीन रोळीअ। काहाका तीया सेहेराअ लोकाहांन जे वोस्तु ते वेचांअ आथा, ते वोस्तु लेनारों आमी केडों बी नांह रीयों। 12 तीया वेपारींहपेअ तीया सेहेराअ लोक वेचाअत्या लेनारा आथा ते वोस्तु ए हाय: होनाअ, चांदीअ, हीरांअ, आने मोतींअ बीडारो, खुब मोगें रेसमी पोतळें , जांबा रोंगाअ पोतळें , रेसमी पोतळें , आने राता रोंगाअ पोतळें , बादी जातीअ हारी गुंदीवालें लाकळें, आथीअ मोडा दातुंहमनेअ बोंणावल्या वोस्तु, मोगा लाकळांहमनेअ बोंणावल्या वोस्तु, कांहांमनेअ, नोळामनेअ आरोसाअ ढोगळाहांमेनेअ बोंणावल्या वोस्तु, 13 तोज, मासालो, तुणी, बोळ, लोबान, दाराख्साअ रोह, जेतुनाअ तेल, मेंदाअ नोट आने गोंव, डोगरें आने घेटें, कोळा आने कोळाअ तांगें। आने ते गुलामुंअ तोरीके मांहेंअ बी वेचीअ।
14 ते वेपारी बाबीलोन सेहेराअ लोकाहांन आखीअ: ‘हार्या- हार्या वोस्तु मीलवांअ तुमां मोर्जी राखत्ला ते बादया वोस्तु तुमांअ आथ नांह लाग्या। बादी जाहो-जालालीअ आने सोबाली वोस्ताहांन तुमां गोमावी देदयाह। ते वोस्तु आमी फाच्या कीदीह बी तुमनेंह झुळनार्या नांह!’ 15 ते वोस्तु तीया सेहेराअ लोकाहांन वेचीन मालदार बोंणला वेपारी तीया लोकाहांअ होच सोताल बी दुखें वेठांअ पोळीअ एंहडी बीखुअ लीदे तीया सेहेराअ से सेटे उबी रीअ आने तीया लोकाहांअ खातुर खुब जीव बालीन रोळीअ। 16 आने ते एंहकींअ आखीअ: ‘हाय! हाय! ओ मोडा सेहेर बाबीलोनुअ लोकुंह! तुमां ता मोगें रेसमी ने जांबा ने राता रोंगाअ पोतळें पोवीन होनाअ ने हीरा- मोतीअ सामानुकींअ पीळाअली राणीअ होच आथा! 17 तुमांअ बादी मीलकोत पोरमेहेरांय एकुज घेळीम नास कीअ टाकी!’
जाहाज चालवुअनारांअ उपरी बादा, आने जाहाजाम बोहीन जानारें बादें, आने जाहाज चालवुअनारा बादा, आने दोरीयाअ वाटे जायन धोंदो केअनारा बीहरा बादा, तीया सेहेराअ से सेटे उबी रीअ, 18 आने बाबीलोन सेहेराल लागली आगीअ तुअरों देखीन ते बोंबलीअ। आने ते एंहकींअ आखीअ: ‘ईया मोडा सेहेराअ होच बीहरों सेहेर कीदीह बी आथोंज नांय!’ 19 ते खुब दुखी हाय तों देखावांअ खातुर सोताअ मुंनकांहपेअ उदलो टाकीअ आने ते खुब जीव बालीन रोळीअ। रोळता-रोळता ते बोंबलीन एंहकींअ आखीअ: ‘हाय हाय! ईया मोडा सेहेराअ लोकाहांअ खातुर सोताअ वेपारी जाहाजुंम मोग्या-मोग्या वोस्तु लीअ आवीन तीया जाहाजुंअ मालीख मालदार बोंणी गेहला। तीया बाबीलोन सेहेराल पोरमेहेरांय एकुज घेळीम उजाळ बोंणावी देदोंह।’”
20 हातींअ होरगामेनेअ एक आवाजुंह एंहकींअ आख्यों, “ओ होरगामेर्याअहां, मालीखाअ खास चेलाहां, पोरमेहेराअ गोठ जाहेर केअनाराहां, आने पोरमेहेराअ बीहरा बादा लोकुंह! बाबीलोन सेहेराअ नास वीयो तीयाअ लीदे तुमां आनोंद केरा! काहाका तीया सेहेराअ लोक तुमांअरी खाराब रीते वोरत्याह तीयाअ लीदे पोरमेहेरांय तीयाहांन नीयायी रीते सीक्सा केअयीह।”
21 हातींअ ताकोतावाला एक दुतांय कोअटीअ पुळुअ होच एक मोडो ढोगळो लीईन मोडा दोरीयाम टाक्यो आने आख्यों, “जेंहकींअ मांयुं ईया ढोगळाल फेकी टाक्योह तेंहकींअज पोरमेहेर मोडा सेहेर बाबीलोनुल खुब जोरपेअ नास कीअ। आने तों सेहेर फाचों कीदीह बी देखाय नांय। 22 तीया सेहेराम आमीनेअ कीदीह बी तारीवालें वाजें नांय वाजे, गीतें आखनारें नांय आखे, पाव्या बी नांय वाजे, ने पीपारा बी नांय वाजे। आने तीया सेहेराम केल्ली बी जातीअ धोंदो नांय चालीअ। नोट दोलांअ कोअटया बी नांय चाले। 23 तीया सेहेराम रातीं एक बी दीवो नांय बोले तीयाअ लीदे रातीं तींहमें आंदारों गुळुक रीअ। तींहीं वोल्ला-वोल्लींअ कीकार्या बोंद वीअ जाय। तीया सेहेराअ लोकाहांअ दोस्या एंहडी बोंणीअ। ईयाअ कारोण ईं हाय का, तीया सेहेराअ वेपारी, जे आखी दुन्याम नांवांअता आथा, तीयाहां सोताअ मेली वीदयाकींअ बादा देसाहांअ लोकाहांन ठोग्याह! 24 आने तीया सेहेराअ लोकाहीं पोरमेहेराअ गोठ जाहेर केअनारांअ रोगुत पाळीन तींहीं तीयाहांन माय टाकला। आने आखी दुन्यामेर्याअ पोरमेहेराअ बीहरा लोकाहांन माय टाकांअ बीहरा लोकाहांन उफ देनारा बी तेज लोक आथा।”