17
नांव काडी वोलली वेस्याल सीक्सा
1 हातींअ सांत कोटुरावाला सांत दुतांयमेर्योअ एक दुत मांअहीं आलो आने मांन आख्यों, “मांअरी चाल! पांअयांअ खुब चोरुंहपेअ बोठली ने नांव काडी वोलली वेस्याअ नीसाणी तोरीके जों सेहेर हाय तीयाअ लोकाहांअ नीयाय कीईन पोरमेहेर तीयाहांन केंहकींअ सीक्सा कीअ तों आंय तुल देखावेंह। 2 तोरतीपेर्याअ लोकाहांपेअ राज केअनाराहां तीया सेहेराअ लोकाहांअरी सीनालों केअयोंह। आने जेंहकींअ वेस्या आदमीहींन दाराख्साअ रोह पीयावीन साकवेह आने सोताअरी सीनालों केरावेह, तेंहकींअ तीया सेहेराअ लोकाहीं तोरतीपेअ रेनारा लोकाहांन सोताअरी सीनालों केराव्योंह।”
3 हातींअ पोवीतोर आत्मा मोदोताकींअ तो दुत मांन उजाळाम उसली लीअ गीयो। आने तींहीं मांयुं एक राता जोनावोरुअ उपेअ बोठली एक बाय देखी। तीया जोनावोरुअ आखा सोरीलापेअ पोरमेहेराअ नींदा केअतें नांवें लेखलें आथें। आने तीया जोनावोरुअ सांत मुंनकें आने दोह हीनकें आथें। 4 तीयु बायुंय जांबा आने राता रोंगाअ पोतळें पोवलें। आने ते होनाअ ने कींमती ढोगळाहांअ ने हीरा-मोतीअ दागीनांहकींअ पोरीज आथी। तीयुअ आथाम होनाअ एक मोडो कोटुरो आथो। तो कोटुरो एंहडी एक वोस्तुकींअ र्पोर्यो आथो का जे ते बाय नोफरोत केरांअ लायोक आने खाराब कामें केअहे आने सीनालों केअहे, तीयाअ नीसाणी हाय। 5 तीयुअ नींडापेअ एक नांव लेखलों आथों। तीयाअ भेदुवालो ओर्थो एंहडो हाय: “आंय मोडा सेहेर बाबीलोन दुन्यामेरीअ बादी वेस्यांहन सीनालों आने बीहरें खोटें कामें केरांअ हीकवुअनारी याहकी हाय।” 6 मांयुं देख्यों ता, ते बाय पोरमेहेराअ पोवीतोर लोकाहांअ, मोंजे का, जीयाहां ईसुअ बाबोताअ हाचाय जाहेर केअयी तीयाहांअ रोगुत पीईन ते साकी गेहली। तीयुल देखीन आंय खुब बोगलाय गीयो।
7 तांहांअ तीया दुतांय मांन आख्यों, “काहाल तुं बोगलाय गीयोह? आंय तुल ईयु बायाअ भेद आने ते बोठीह तीया जोनावोरुअ का जीयाअ सांत मुंनकें ने दोह हीनकें हाय तीयाअ भेद होमजावेंह। 8 तुंयुं देख्यों तों जोनावोर एक जोमानाम जीवतों आथों। पेन आमी तों जीवतों नांह। तेबी तों तोल्या वोगुराअ खाड्डामनेअ माहरीज बारे नींगीन आवनारों हाय। आने तों एंहडा जागे जानारों हाय का जींहीं पोरमेहेर तीयाअ नास कीअ। तोरतीपेअ रेनारा जीया लोकाहांअ नांवें आत्मीक रीते कायोमाअ खातुर जीवनारा लोकाहांअ ईयादीअ चोपळीम दुन्या होरजाअयी तीयाअ पेअलुर्येंअ नोंदाअलें नांय आथें, ते लोक तीया जोनावोरुल देखीन बोगलाय जाय। काहाका, एक जोमानाम तों जोनावोर जीवत्लों, आमी तों नांह जीवतों, पेन तों फाचों देखाअयों।
9 हारी ओकुल वापरीन वीचार केअनारें ए बाबोत होमजी सेकतेंह। तीया जोनावोरुअ जें सांत मुंनकें हाय, तें ते बाय रेहे तीया सेहेराअ सांत डोगींअ नीसाणी हाय। तें मुंनकें सांत राजांअ बी नीसाणी हाय। 10 तीया सांत राजांयमेर्याअ पांच राजांअ नास वीयोह। एक राजा आमी हायाताम हाय। आने बीहरो राजा आजी आवनारो हाय। तो आवीअ तांहांअ तो थोळाक वोखताअ खातुरुज राज कीअ। 11 आने तों जोनावोर जों एक सोमोयाम जीवतों आथों आने आमी जीवतों नांह, तोज आठमो राजा हाय जो फाचो आवीअ। आने हातींअ पोरमेहेर तीयाअ बी नास कीअ। 12 दोह हीनकें तुंयुं देख्यें तें दोह राजांअ नीसाणी हाय। तीयाहांअ राज आजी चालु नांह वीयों। तीया राजाहांन एक काल्लाखुअ खातुर राज केरांअ आदीकार मील्यो वीअ तेंहडों तीया जोनावोराहांअरी थोळाक सोमोयाअ खातुर राज केरांअ आदीकार मीलीअ। 13 ईया दोहु-दोह राजांअ ईरादो ता एकुज वीअ: लोकाहांपेअ राज केरांअ सोताअ होक आने आदीकार ते तीया जोनावोरुल होपी दीअ। 14 ते राजा आने तों जोनावोर, घेटाअ बोचाअ होच हाय तीयाअरी लोळीअ। पेन घेटाअ बोचाअ होच हाय तो तीयाहांन हारवीअ। काहाका, तो मालीखुंअ मालीख आने राजांअ राजा हाय। तीयाअरी मीलीन तीया राजाहांन ने तीया जोनावोरुल हारवुअनारा तीयाअ हेंगात्या बी हाय। पोरमेहेरांय तीयाहांन सोताअ लोक बोंणांअ हादयाह आने पोसोंद केअयाह। आने ते तीयाल ईमानदार रेताह।”
15 तीया होरगाअ दुतांय फाचों मांन आख्यों, “खुब चोरुंअ पांय तुंयुं देख्यों जीयापेअ ते वेस्या बोठीह, तों पांय ता दोरेक जातीअ, दोरेक देसाअ, आने दोरेक बोली गोगनारा लोकाहांअ टोलाअ नीसाणी हाय। 16 तुंयुं देख्या ते दोह राजा, जीयाहांअ नीसाणी दोह हीनकें हाय, ते राजा आने तों जोनावोर, जीया सेहेराअ नीसाणी ते ते वेस्या हाय, तीया सेहेराअ नोफरोत कीअ। आने तीयाअ पोरीणामे, तीयुअ बादें पोतळें काडी लेदें वीअ तेंहकींअ ते तीया सेहेरामेर्योंअ बादोंज पाळावी लीअ, आने तीयुअ माह खाय गीया वीअ तेंहकींअ तीया सेहेराअ नास कीअ। आने तीयाल आगीम सीलगावी दीअ। 17 काहाका, पोरमेहेर सोताअ ईरादो पुरो केरांअ खातुर तीयाहांअ मोनाहांम तीयु वेस्याअरी एंहडों केरांअ मोर्जी पेदा कीअ आने ते बादा राजा तीया जोनावोरुल सोताअ आदीकार होपी दांअ एक मोनुअ वीअ। आने एंहकींअ कीईन पोरमेहेराअ गोठ्या पुर्या वीअ। 18 आने जीयु बायुल तुंयुं देखीह ते ता, तोरतीअ लोकाहांअ राजांयपेअ राज केअनारा तीया मोडा सेहेराअ नीसाणी हाय।”