16
पोरमेहेर होजर्या लोकाहांपेअ खीजवायन तीयाहांन सीक्सा देहे
1 हातींअ मोंदीरामेनेअ एगाहाल बोंबलीन तीया दुताहांन एंहकींअ आखता आंय उनाअयो का, “ईंहींनेअ जा, आने तुमांहपेर्याअ सांतु कोटुरांहम जो दाराख्साअ रोह पोअलो हाय तो, तोरतीपेअ रीसवी दा! होजर्या लोकाहांपेअ पोरमेहेर रोगवाअयोह आने तो तीयाहांन सीक्सा कीअ तीयाअ ए नीसाणी हाय।” 2 तांहांअ पेअला दुतांय जायन तीयापेर्याअ कोटुराम आथो तो दाराख्साअ रोह तोरतीपेअ रीसवी देदो। तीयाअ पोरीणामे, तीया जोनावोरुअ आकळांअ नीसाण्या केअल्या आने जीयाहां तीया जोनावोरुअ मुरतीअ भोकती केअली तीयाहांअ बादाहांअ सोरीलाहांपेअ खुब आकरें ने रीबाव्या केअ एंहडें चांदें नींगी टाकाअयें।
3 हातींअ बीहरा दुतांय तीयापेर्याअ कोटुराम आथो तो दाराख्साअ रोह मोडा दोरीयापेअ रीसवी देदो। तीयाअ पोरीणामे, मोडा दोरीयाअ पांय मोअला मांहांहांअ रोगुताअ होच लाल-चोळ वीअ गीयों। तीयाअ लीदे, दोरीयामेर्येंअ बादें जीव-जीवळें मोय गीयें।
4 हातींअ तीजा दुतांय तीयापेर्याअ कोटुराम आथो तो दाराख्साअ रोह खाडींहपेअ ने पांअयांअ चोरुंहपेअ रीसवी देदो। तीयाअ पोरीणामे, खाडींअ ने चोरुंअ पांय रोगुत बोंणी गीयों। 5 हातींअ आंय पांअयांपेअ आदीकार आथो तीया दुताल एंहकींअ आखता उनाअयो, “ओ पोरमेहेर! तुं आमी बी हायाताम हाय, आने तुं कायोम हायाताम रीयोह। तुंज पोवीतोर हाय। 6 होजर्या लोकाहीं, तोअ पोवीतोर मांहांहांन आने तुंयुं जाणावली गोठ जाहेर केअनाराहांन माय टाक्याह। आने एंहकींअ कीईन, तीयाहां तीया लोकाहांअ रोगुत पाळ्योंह। आने तीयाअ लीदे, तीयाहांन पीयांअ खातुर रोगुत दीईन तुं तीयाहांन जे सीक्सा कीअहो, तींहमें तुं नीयायी हाय। एंहडी सीक्सा मीलवांअज ते लोक लायोक हाय!” 7 हातींअ आंय वेदीमनेअ एगाहाल तीयाअ जोवाब देता उनाअयो, “ओ! खुब ताकोतावाला मालीख पोरमेहेर! तुं हाची ने नीयायी रीतेज लोकाहांन सीक्सा कीअहो।”
8 हातींअ मांयुं देख्यों ता, चोवथा दुतांय तीयापेर्याअ कोटुराम आथो तो दाराख्साअ रोह दीहुपेअ रीसवी देदो। तीयाकींअ तीयांय दीहुल एंहडी सुट देदी का, तो सोताअ आकरा तोपुकींअ मांहांहांन हेकी टाके। 9 दीहाअ आकरा तोपुकींअ मांहेंअ पुजलायांअ टेक्यें। तीयाअ लीदे, तीयाहां पोरमेहेराअ नींदा केअयी। काहाका, एंहडया आफोत्या तीयांयज तीया लोकाहांपेअ पाळल्या। तेबी, तीयाहां सोताअ पापाहांअ खातुर दुखी वीईन ते सोळी नांय देदा आने पोरमेहेराअ मोडाय बी नांय केअयी।
10 हातींअ पाचमा दुतांय सोताअ कोटुरामेर्योअ दाराख्साअ रोह तीया चावर्या जोनावोरुअ गादीपेअ रीसवी देदो। तीयाअ पोरीणामे, तीया जोनावोरुअ राजुपेअ आंदारों फेलाय गीयों। आने तीयाअ लीदे, तों जोनावोर आने जीया लोकाहांपेअ तों राज केअत्लों ते बादा लोक आकरा दुखाअ लीदे सोताअ जीब्या चावांअ टेक्या। 11 तीयाहांअ चांदें खुब दुखत्लें तीयाअ लीदे तीयाहां होरगाम राज केअनारा पोरमेहेराअ नींदा केअयी। पेन जें खोटें कामें तें केअत्लें तीयाहांअ लीदे ते दुखी बी नांय वीया आने तें कामें तीयाहां सोळ्यें बी नांय।
12 हातींअ सोठठा दुतांय पोतापेर्याअ कोटुराम आथो तो दाराख्साअ रोह मोडी खाडी युफरेटीसुपेअ रीसवी देदो। तीयाअ पोरीणामे, दीह उगताअ वेल्योअ राजा सोताअ लोस्कोरुंअरी ते खाडी उनखी जाय तीयाअ लीदे वाट दांअ खातुर ते खाडी हुकाय गीयी। 13 हातींअ मांयुं डेटकांअ होच देखाअत्ला तेंहडा तीन पुतळाहांन तीया ओजगोरुअ मुंयांमेनेअ आने तीया जोनावोरुअ मुंयांमेनेअ आने पोरमेहेराअ गोठ जाहेर केअनारा एंहकींअ सोताल झुटी रीते आखावनाराअ मुंयांमेनेअ नींगता देख्या। 14 ए तीनुं आत्मा चोमोत्काराअ कामें कीअ सेकनारा पुतळा आथा। ते आखी दुन्यापेअ राज केअनारा बादाहांन टोलवांअ खातुर तीयाहांअहीं गीया, ईयाअ खातुर का, खुब ताकोतावालो पोरमेहेर सोताअ दुसमोनाहांन सीक्सा केअ तीया मोडा दीह ते तीयाअरी लोळे। 15-16 ते खाराब आत्मा राज केअनारा तीयाहांन आने तीयाहांअ लोस्कोरुंहन एंहडी एक जागे टोलवीअ का जो हीबरु बोलीम “आरमागेदुन” आखाअहे।
आंय मालीख ईसुल एंहकींअ आखता उनाअयो का, “मांअ गोठ धीयान राखीन उनाअ: ओचींतोज आवनारा बांडुअ होच आंय ओचींतोज आवेंह। तीयाअ लीदे, बीहराहांन सोताअ नाज नांय देखाय तीयाअ खातुर सोताअ पोवला पोतळाहांन हाचवुअनारा मांहांअ होच जें मांहेंअ सोताल नाजवायांअ नांय पोळे तीयाअ खातुर आत्मीक रीते जागतें रेतेंह आने हाची रीते जीवतेंह, तीयाहांपेअ आंय खुस वेअहें।”
17 हातींअ सातमा दुतांय पोतापेर्याअ कोटुराम आथो तो दाराख्साअ रोह हावामानुम रीसवी देदो। हातींअ आंय होरगामेन्याअ मोंदीराम जे राज-गादी आथी तींहमेंनेअ एगाहाल मोडा आवाजे एंहकींअ आखता उनाअयो का, “आंय बादाहांन सीक्सा केरांअ काम पुरों केअनारो हाय!” 18 तीयाअ हातींअ वीजल्यों, मोडा आवाज वेअया, गाजयों, आने मोडो तोरतीकोंप वीयो। तेंहडो मोडो तोरती कोंप पोरमेहेरांय मांहुंअ होरजुअलों तेहेअनेअ आज लोगुंअ कीदीह बी नांह वीयो। 19 बाबीलोन जों मोडा सेहेराअ नीसाणी हाय, तीयाअ तीन कुटका वीअ गीया। आने बादाज देसाहांअ सेहेराहांअ नास वीयो। पोरमेहेर तीया सेहेराअ लोकाहांअ बादा पापुंहन वीहराय नांह गीयो। तीयांय तीयाहांन सोताअ रोगु रुपी दाराख्साअ रोह कोटुराम पोईन पीयाव्यो वीअ तेंहडों तीया लोकाहांपेअ खुब खीजवायन तीयाहांन खुब आकरी सीक्सा केअयी। 20 बादाज बेट उलुप वीअ गीया आने बादा डोगुंअ नांव-नीसाणी बी नांय रीयी। 21 जुगामेनेअ मांहांहांपेअ लोगभोग ओळी-ओळी मोणुअ गारांअ मोड्या-मोड्या हीलाट्याज-हीलाट्याज नींगी पोळ्या। आने ईया गारांअ लीदे मांहांया पोरमेहेराअ नींदा केअयी। काहाका, बादी आफोतींअ से खुब आकरी ए आफोत तीयांय तीयाहांपेअ पाळली।