15
सांत दुत सेल्या आफोत्या लावताह
1 हातींअ मांयुं जुगाम नोवीज जातीअ बीहरों एगोंह कांवींह देख्यों। मोंजे का, मांयुं सांत दुताहांन देख्या। होजर्या लोकाहांन सांत जुदी-जुदी रीते सीक्सा दांअज तीयाहांअ काम आथों। होजर्या लोकाहांपेअ पोरमेहेर ओतोअ बादो रोगवाअयोह का, तीयाहांन सीक्सा दांअ ओ सेल्लो सोमोय हाय। सोताअ पाप सोळांअ तीया लोकाहांन एक तोक दांअज तीयु सीक्साअ ईरादो हाय।
2 हातींअ मांयुं काचुअ होच, ने आग पेलला मोडा दोरीयाअ होच एगोंह कांवींह देख्यों। आने तीया चावर्या जोनावोरुअ मुरतीअ पुंजा नांय कीईन आने तीयांय नीमला मांहांहांन सोतापेअ तीयाअ नांवांअ आकळाअ नीसाणी नांय केरांअ दीईन तीया जोनावोरुपेअ जीत मीलवुअला लोकाहांन मांयुं देख्या। ते लोक तीया मोडा दोरीयाअ पाही उबी रेहला। तीयाहांअ आथाहांम पोरमेहेराअ गुणगान केरांअ खातुर तारीवालें वाजें आथें। 3 ते पोरमेहेराअ सेवोक मोसेंय जेंहकींअ आखलों तेंहकींअ एक गीत आखत्ला। घेटाअ बोचाअ होच हाय तीयाअ गुणगान केरांअ खातुर ते एंहकींअ कीईन आखत्ला:
4 “ओ मालीख, खुब गोतीवाला पोरमेहेर! जोंबी तुं कीअहो तों खुब गोतीवालों आने गोजोब हाय। ओ कायोमाअ खातुर राज केअनारा! तुं कायोम नीयायी रीते आने हाची रीते वोरतोह। ओ मालीख! बादें मांहेंअ तोअ बीख राखीअ आने तुल मान दीअ। काहाका, तुं एखलोज पोवीतोर हाय! बादा देसाहांअ मांहेंअ आवीअ आने तोअ भोकती कीअ। काहाका, बादाहांन तुं देखावोह का तुंयुं नीयायी रीते होजर्या लोकाहांअ नीयाय केअयोह।”
5 हातींअ मांयुं होरगाम मोंदीर देख्यों। तों मोंदीर, ईसरायेल लोकाहीं उजाळाम जो कारारुअ तोंबु बोंणावलो आने जींहमें पोरमेहेराअ दोह नीयोम आथा, तीया तोंबुअ होच आथों। तों मोंदीर उगाळों आथों। 6 लोकाहांन सीक्सा दांअ खातुर सांत आफोत्या मोकलुअनारा सांत दुत मोंदीरामेनेअ बारे आला। तीयाहां चोख्खें ने झोजलुअतें होनाअ पोतळें पोवलें। आने तीयाहां सोताअ सातींहपेअ होनाअ पोटटा बी बांदला। 7 हातींअ तीया चार जीवता-जीवुंहमेर्याअ एकांय तीया सांत दुताहांन एकेकुल होनाअ एक-एक कोटुरो देदो। तीया कोटुरांहम दाराख्साअ रोह पोअलो आथो। तो दाराख्साअ रोह, कायोम जीवनारो पोरमेहेर होजर्या लोकाहांन आकरी सीक्सा देनारो हाय तीयाअ नीसाणी तोरीके आथो। 8 तों मोंदीर तुअराकींअ पोराय गीयों। तों तुअरों ईं देखावत्लों का, मोडायावालो आने खुब ताकोतावालो पोरमेहेर तींहीं हाजोर हाय। आने तीया सांत दुताहांअ मारफोते आवनार्या सांत आफोत्या जांव लोगुंअ पुर्या नांय वीअ जाय, तांव लोगुंअ केडों बी तीया मोंदीराम जाय नांय सेक्यों।