14
वाचाय गेहला लोक गीत आखताह
1 हातींअ मांयुं देख्यों ता, घेटाअ बोचाअ होच हाय तो येरुसालेमामेर्याअ सीयोन डोगाअपेअ उबी रेहलो। तीयाअरी एक लाख आने चुम्मालीस हाजार लोक बी उबा आथा। जो घेटाअ बोचाअ होच हाय तीयांय सोताअ नांव आने पोरमेहेर बाहकाअ नांव बी तीयाहांअ नीडांहपेअ लेखलों। 2 हातींअ आंय जुगामेनेअ पांअयांअ मोडा काटुअ होच आने गाजतों वीअ एंहडो आवाज उनाअयो। तो आवाज तारीवाला वाजाअ आवाजुअ होच बी आथो। 3 ते एक लाख चुम्मालीस हाजार लोक राज-गादीअ आने तीया चार जीवता जीवुंअ आने तीया वोळीलुंअ आगलांअ उबी रेहला। ते लोक नोवोंज गीत आखत्ला। ते एक लाख चुम्मालीस हाजार लोक, जीयाहांन घेटाअ बोचाअ होच हाय तीयांय पोरमेहेराअ खातुर तोरतीपनेअ सोळव्याह, ते एखलाज तों गीत हीकी सेक्या। बीहरों केडों बी तों गीत हीकी नांय सेक्यो। 4 ते १,४४,००० लोक, एकदोम चोख्या रेनार्या कुवार्या पोयरीहींअ होच आत्मीक रीते एकदोम चोख्खा हाय। तीयाहां केल्ला बी झुटा देवुअ भोकती नांह केअयी, आने एंहकींअ कीईन तीयाहां सोताल बाटलाव्या नांह। ते लोक, घेटाअ बोचाअ होच हाय तो जींहीं बी जाहे तींहीं तीयाअरी जाताह। ते लोक, घेटाअ बोचाअ होच हाय तीयांय पोरमेहेराअ खातुर जीयाहांन तोरतीपेर्याअ बीहरांमनेअ सोळवी लेदाह, तीया लोकाहांअ नीसाणी तोरीके हाय, ईयाअ खातुर का, तो तीया लोकाहांन पोरमेहेराअ खातुर, आने सोताअ खातुर खास ओरपोण केअ। 5 ए लोक कीदीह बी झुटों नांह गोगता, आने ते डागु वोगुराअ हाय।
बीहरा तीन दुत
6 हातींअ मांयुं बीहरा एक दुताल जुगीअ ने होरगाअ नीसमें उडतो देख्यो। तो तोरतीपेअ रेनारा बादा लोकाहांन, मोंजे का, दोरेक देसाअ लोकाहांन, दोरेक कुळुअ लोकाहांन, दोरेक बोली गोगनारा लोकाहांन, आने दोरेक जातीअ लोकाहांन जाहेर केरांअ खातुर कायोम टीकनारी हारी गोठ पोरमेहेरापेनेअ लीअ आवत्लो। 7 तीयांय जोरपेअ बोंबलीन आख्यों, “पोरमेहेराअ बीख राखा, आने तीयाअ मोडायाअ खातुर तीयाअ गुणगान केरा! काहाका, लोकाहांअ नीयाय केरांअ तीयांय नोक्की केअलो सोमोय आवी गीयोह। जुग, तोरती, मोडो दोरीयो, आने पांअयांअ चोर बोंणावनारा पोरमेहेराअ भोकती केरा!”
8 बीहरो दुत तीयाअ फाचलांअ आलो, आने तो एंहकींअ आखत्लो: “बाबीलोन जों मोडा सेहेराअ नीसाणी हाय, तीयाअ एकदोम नास वीयोह। जेंहकींअ वेस्या आदमीहींन दाराख्साअ रोह पीयावीन सोताअरी सीनालों केरावेह, तेंहकींअ ईया मोडा सेहेराअ लोकाहीं बादा देसाहांअ लोकाहांन पोरमेहेराल सोळी दांअ उफ देदोह। तीयाअ लीदे, पोरमेहेरांय तीया सेहेराअ लोकाहांन सीक्सा केअयीह।”
9 तीया बेन दुताहांअ फाचलांअ तीजो एक दुत आलो। तीयांय बोंबलीन आख्यों, “जेंबी मांहेंअ तीया पेअलाअ जोनावोरुअ आने तीयाअ मुरतीअ भोकती कीअ आने तीयांय नीमला मांहांहांन तीयाहांअ नीडांहपेअ का आथाहांपेअ सीक्को मारीन तीया जोनावोरुअ नीसाणी केरांअ दीअ, 10 तीयाहांन पोरमेहेर तीयाहांपेअ चोळली तीयाअ रोगुअ लीदे आकरी सीक्सा कीअ। पोरमेहेर तीयाहांन सोताअ पोवीतोर दुताहांअ देखता आने घेटाअ बोचाअ होच हाय तीयाअ देखता बोलता गोंदरोखुअ आगीम टाकीन रीबावीअ। 11 तीयाहांन रीबावनारी आगीअ तुअरों कायोमाअ खातुर उचे ने उचे चोळ्या कीअ। पोरमेहेर तीयाहांन रात-दीह एकधार्या रीबावीअ। जे लोक तीया जोनावोरुअ आने तीयाअ मुरतीअ पुंजा केअताह आने तीयांय नीमला मांहांहांन तीयाहांपेअ तीया जोनावोरुअ नीसाणी केरांअ देताह, तीया लोकाहांन एंहकींअज वीअ।”
12 ईया ओर्थो ओ हाय का, पोरमेहेराअ पोवीतोर लोकाहांअ धीरोज राखीन सोतावोणी वेठांअ जोजे, पोरमेहेराअ हुकोम पालांअ जोजे, अने ईसुपेअ वीसवास राखता रांअ जोजे।
13 हातींअ आंय होरगामेनेअ एक आवाजुल एंहकींअ आखता उनाअयो: “ए गोठ लेखी ले: ‘जे लोक मोअता लोगुंअ मालीख ईसुअरी जोळाअला रेताह, तीयाहांन पोरमेहेर आमीनेअ खुब आसीरवाद दीअ।’”
पोरमेहेराअ आत्मा आखेह का, “आंह, पोरमेहेर तीयाहांन नोक्कीज आसीरवाद दीअ। ते मोय जाय हातींअ तीयाहांन खुब मेहनोत केरांअ नांय पोळे, पेन उलटों, तीयाहांन आराम मीलीअ। काहाका, तीया लोकाहीं केअला कामाहांअ ईयादी तीयाहांअरी जाय।”
तोरतीपेर्याअ खाराब लोकाहांन वेअनारी सीक्सा
14 हातींअ मांयुं एक पांडोंअ वादलों देख्यों। तीया वादलापेअ एगोंह बोठलों। तों मांहांअ पोयराअ होच देखाअत्लों। तीयांय सोताअ मुनकापेअ होनाअ एक मुंगोट पोवलो। तीयाअ आथाम एक धारवालो दाहलो आथो। 15 हातींअ बीहरो एक दुत होरगामेन्याअ मोंदीरामेनेअ बारे आलो, आने तीयांय वादलापेअ जो बोठलो आथो तीयाल बोंबलीन आख्यों, “तोरतीपेर्याअ ओनाजुल वाडांअ सोमोय आवी गीयोह। तीयाअ लीदे, तोअ दाहलाकींअ ओनाज वाडांअ चालु केअ! काहाका, तोरतीपेर्योंअ ओनाज पाकी गीयोंह।” 16 तांहांअ वादलापेअ जो बोठलो तीयांय सोताअ दाहलाकींअ तोरतीपेर्याअ ओनाजुल जोबोर-जोस्ती वाडी लेदों।
17 हातींअ मांयुं बीहरा एक दुताल होरगामेन्याअ मोंदीरामेनेअ बारे आवता देख्यो। तीयापेअ बी धारवालो दाहलो आथो। 18 हातींअ बीहरो एक दुत वेदीमनेअ आलो। तीयाल वेदीअ आगीपेअ आदीकार आथो। तीयांय धारवाला दाहलावाला होरगाअ दुताल बोंबलीन आख्यों, “तोअ धारवाला दाहलाकींअ तोरतीअ दाराख्साअ वाळीअ दाराखसें वाडी ले! हातींअ तीया दाराखसाहांन टोलवेअ! काहाका, तें दाराखसें पाकी गीयेंह।” 19 तांहांअ तीया होरगाअ दुतांय सोताअ दाहलाकींअ तोरतीअ दाराख्साअ वाळीअ दाराखसाहांन जोबोरजोस्ती वाडी टाक्या आने तीयुहुंन टोलव्या। हातींअ तीयांय तीया दाराखसाहांन दाराख्साअ रोह काडांअ मोडी कुंडीम टाक्या। ते कुंडी, तोरतीपेर्याअ खाराब लोकाहांन पोरमेहेर जे सीक्सा देहे, तीयाअ नीसाणी हाय। 20 पोरमेहेरांय नीमला एक आदमी, सेहेराअ बारीअ दाराख्साअ कुंडीम खाराब लोकाहांन सुंदी टाक्या। तीयु दाराख्साअ कुंडीमनेअ जों रोगुत नीगत्लों, तों वोल्याअ होच वोअया केअत्लों। आने तों रोगुत कोळांअ लोगामुंअ लोगुंअ पोचे ओतोंअ उंडों आथों, आने लोगभोग एकहोव एंसीं मायल सेटे लोगुंअ वोअया केअत्लों।