13
मोडा दोरीयामनेअ नींगनारों चावर्यों जोनावोर
1 हातींअ मांयुं एक चावर्या जोनावोरुल मोडा दोरीयामनेअ बारे नींगता देख्यों। तीयाअ सांत मुंनकें आने दोह हीनकें आथें। आने दोरेक हीनकापेअ मुंगोट आथो आने दोरेक मुनकापेअ पोरमेहेराअ ओपमान वेअ एंहडों नांव लेखलों आथों। 2 मांयुं देखलों तों जोनावोर चीत्ताअ होच आथों। तीयाअ पाग आसालाअ पागाहांअ होच आथा। आने तीयाअ मुंय सींह-वागुअ मुंयुंअ होच आथों। तीया ओजगोरुंह तीया जोनावोरुल ताकोत देदी, आने तीयाअ राज-गादीपेअ बोहीन लोकाहांपेअ ओमोल चालवांअ खातुर तीयांय तीयाल आदीकार बी देदो।
3 तीया जोनावोरुअ एक मुंनकाम तो मोय जाय एंहडो घा पोळलो। पेन तो घा पुराय गीयो आने तों जोनावोर जीवी गीयों। तों देखीन, तोरतीपेर्याअ खुब भागाअ लोकाहांन नोवाय लागी आने ते तीया जोनावोरुअ चेला बोंणी गीया। 4 तीयाहां तीया ओजगोरुअ भोकती केअयी। काहाका, तीयांय तीया जोनावोरुल खुब ताकोत देदली। लोकाहीं तीया जोनावोरुअ बी भोकती केअयी। आने ते बोगलायन आखत्ला का, “केडों बी ईया जोनावोरुअ होच ताकोतावालो ं नांह! तीयाअरी लोळांअ खातुर केडाअ बी हींमोत नांय वीअ!”
5 तीया जोनावोरुल सोताअ बाबोताम मोडया-मोडया गोठ्या केरांअ आने पोरमेहेराअ ओपमान केरांअ सुट देवाअयी। आने बेतालीस मोयना लोगुंअ लोकाहांपेअ ओमोल चालवांअ बी तीयाल सुट देवाअयी। 6 आने तों जोनावोर पोरमेहेराअ नींदा केअत्लों, तीयाअ नांवांअ नींदा केअत्लों, पोरमेहेर जींहीं रेहे तीया जागाअ नींदा केअत्लों, आने होरगामेर्याअ लोकाहांअ बी तों नींदा केअत्लों। 7 पोरमेहेराअ लोकाहांअरी लोळीन तीयाहांपेअ जीत मीलवांअ बी तीया जोनावोरुल सुट देवाअयी, आने बादा कुळाहांअ लोकाहांपेअ, आने बादी जातीअ लोकाहांपेअ, आने बादया बोल्या गोगनारा लोकाहांपेअ, आने बादा देसाहांअ लोकाहांपेअ राज केरांअ तीयाल सुट देवाअयी। 8 तोरतीपेर्याअ खुब भागाअ लोकाहीं तीयाअ भोकती केअयी। ते भोकती केअनारा एंहडा लोक आथा का जीयाहांअ नांवें, घेटाअ बोचाअ होच हाय ने जो माय टाकाअलो, तीयांय सोताअ चोपळीम नांह नोंदयें। जें मांहेंअ आत्मीक रीते होरगाम कायोमाअ खातुर जीवीअ तीयाहांअ नांवें, दुन्या बोंणावली तीयाअ पेअलांअज तीयांय सोताअ चोपळीम नोंदी थोव्येंह।
9 जेंबी होमजांअ मागतेंह, तें पोरमेहेराअहींनेअ आवनारी ए गोठ कालजी राखीन उनाय!
10 जीयाहांन तीयाहांअ दुसमोन जेलाम कोंडावी दे एंहडों पोरमेहेरांय ठोराव्योंह, तीयाहांन तीयाहांअ दुसमोन जेलाम कोंडावी दीअ। आने जीयाहांन मांहेंअ तारवायुकींअ माय टाकीअ एंहडों पोरमेहेरांय नोक्की केअयोंह, तीयाहांन तें मांहेंअ तारवायाकींअज माय टाकीअ। तीयाअ लीदे सोताअ जीवोनाहांम पोळनारी मुस्कुलींहन पोरमेहेराअ लोकाहांअ वेठी लांअ जोजे आने पोरमेहेराल ईमानदार रांअ जोजे।
तोरतीमनेअ नींगनारों चावर्यों जोनावोर
11 हातींअ मांयुं बीहरा एक चावर्या जोनावोरुल तोरतीमनेअ उपेअ आवता देख्यों। घेटाअ होच तीयाअ बेन हानेंअ हीनकें आथें। पेन तों एक ओजगोरुअ आवाजुअ होच गोग्यों। 12 तीया जोनावोरुंह तीया पेअलाअ जोनावोरुपेअ आथो तीया आदीकारुल वापर्यो। तीयांय तोरतीपेअ रेनारा बादा लोकाहांन पेअलाअ जोनावोरुअ, मोंजे का, जीयाअ मोय जाय एंहडो घा पुराय गेहलो, तीयाअ भोकती केरावी। 13 ईया बीहरा जोनावोरुंह मोडा-मोडा चोमोत्कार बी कीअ देखाव्या, ओतेअ लोगुंअ का, तीयांय लोकाहांअ देखताज जुगामेनेअ आग बी पाळी देखावी। 14 पेअला जोनावोरुअ तोरफ्याअ जे जे चोमोत्कार केरांअ तीयाल जे सुट देवाअली, तीया चोमोत्कारुंहकींअ तीयांय ख्रीस्ताल नांय माननारा दुन्याअ लोकाहांन भोरमावी टाक्या। आने तीयांय तीया लोकाहांन पेअलाअ जोनावोरुल, मोंजे का, जीयाल माय टाकलों तेबी जों जीवी गेहलों, तीया जोनावोरुल मान दांअ खातुर तीयाअ मुरती बोंणावांअ आख्यों। 15 आने तीयाल तीया पेअलाअ जोनावोरुअ मुरतीम जीव थोवांअ ताकोत देवाअली, ईयाअ खातुर का ते मुरती गोगे। आने जोंबी तीयु जोनावोरुअ मुरतीअ भोकती नांय केअ, तीयाल माय टाकांअ तो एगाहाल हुकोम केअ।
16 आने बीहरा जोनावोरुंह एंहडी फोरोज पाळी का, तीयाअ मांहेंअ, दोरेक मांहांअ मोंजे का, सोमाजुम वादारे मानुवालें वेअ, का ओसा मानुवालें वेअ, मालदार वेअ, का गोरीब वेअ, सोतोंतोर वेअ, का गुलाम वेअ, बादाहांअ हुदा आथुपेअ का नींडापेअ, तीया जोनावोरुअ नांव फाची दे। 17 तीया जोनावोरुअ मांहांहां एंहडों ईयाअ खातुर केअयों का, ते नीसाणी नांय वेअ तेंहडों केल्लों बी मांहुंअ काय बी वेचाअतों लीअ नांय सेके, का वेची नांय सेके। ते नीसाणी ता तीया जोनावोरुअ नांव का तीयाअ नांवांअ आकळो हाय। 18 ईयु नीसाणीअ ओर्थो होमजांअ खातुर मांहांअ गीयान वापरीन वीचार केरांअ पोळे एंहडों हाय। जोंबी गीयानुवालों वीअ तों गीयान वापरीन ईया जोनावोरुअ आकळांहपनेअ तीयाअ नांव होदी काडी सेके। काहाका, ते आकळा ता एक मांहांअ खातुर वापराअनारा आकळा हाय। ते आकळा ता तीन सोगळा (६६६) हाय।