जाहेर वेअल्या बाबोत्या वसावी देहवाली 12

एक बाय आने एक मोडो ओजगोर

¹ हातींअ मांयुं जुगाम नोवीज जातीअ एगोंह कांवींह देख्यों। मोंजे का, एक एंहडी बाय देखी का, जीयुअ देखाव आने पोतळें दीहाअ चेणुंअ होच चोमकुअतें आथें। तीयु बायाअ पागाहांअ थुले चांद आथो। आने तीयुअ मुनकापेअ बार तारांअ बोंणावलो मुंगोट आथो। ² तीयु बायाअ मोयना आथा। ते सुटी वेरांअ तीयारीम आथी आने सुटी वेरांअ दुखाअ लीदे ते जोरपेअ रोळत्‍ली।

³ तांहांअ ओचींतोंज मांयुं नोवीज जातीअ बीहरों एगोंह कांवींह देख्यों। मोंजे का, राता रोंगाअ एक मोडो ओजगोर मांयुं देख्यो। तीया ओजगोरुअ सांत मुंनकें आने दोह हीनकें आथें। आने दोरेक मुनकापेअ राजाअ मुंगोट आथो। ⁴ तीया ओजगोरुंह सोताअ सेपटाकींअ जुगामेर्याअ तीजा भागाअ तारा झोळपीन तोरतीपेअ तोळी पाळ्या। हातींअ तो सुटी वेरांअ तीयारीम आथी तीयु बायाअ आगलांअ जायन उबी रीयो, ईयाअ खातुर का, ते बाय सुटी वेअ का तुरुतुज तो तीयुअ पोयराल खाय जाय।

⁵ हातींअ तीयु बायुंय एंहडा एक पोयराल जोन्‍मो देदों का, जो बादा देसाहांअ लोकाहांपेअ, नोळाअ लाकळीकींअ राज केअतो वीअ तेंहकींअ पुरा आदीकाराकींअ राज कीअ। पोरमेहेरांय तीया पोयराल ओजगोरुअ आथामनेअ पाळावी लीदो ने तीयाल तो सोताअ राज-गादीअहीं लीअ गीयो। ⁶ आने ते बाय उजाळाम नाही गीयी। तींहीं होरगाअ दुत बारहोव ने सांहींट दीह लोगुंअ तीयुअ देखरेख राखे एंहडो एक जागो पोरमेहेरांय तीयाअ दुताहांअ मारफोते तीयार कीअ थोवलो।

⁷ हातींअ होरगाम लोळाय वीयी। मीखायेल आने तीयाअ आथाअ एठर्याअ होरगाअ दुत तीया ओजगोरुअरी आने तीयाअ आथाअ एठर्याअ दुताहांअरी लोळ्या। आने तो ओजगोर आने तीयाअ आथाअ एठर्याअ दुत बी मीखायेल आने तीयाअ आथाअ एठर्याअ दुताहांअरी लोळ्या। ⁸ पेन तो ओजगोर हाराय गीयो तीयाअ लीदे, तीयाल आने तीयाअ आथाअ एठर्याअ दुताहांन होरगाम रांअ होक नांय रीयो। ⁹ मीखायेलुंह आने तीयाअ आथाअ एठर्याअ दुताहीं तीया मोडा ओजगोरुल होरगामेनेअ एठाअ टाकी देदो। तो ओजगोर ता जुना जोमानाअ तो हाप हाय, जो खुब खाराब सेतान आखाअहे। तोरतीपेर्याअ बादा लोकाहांन ठोगनारो तोज हाय। मीखायेलुंह आने तीयाअ आथाअ एठर्याअ दुताहीं तीयाल आने तीयाअरी तीयाअ दुताहांन बी तोरतीपेअ टाकी देदा।

¹⁰ हातींअ आंय होरगाम एगाहाल जोरपेअ बोंबलीन एंहकींअ आखता उनाअयो, “आमी आपुअ पोरमेहेरांय तीयाअ ताकोताकींअ सोताअ लोकाहांन वाचावी लेदाह। आने तो बादा लोकाहांपेअ राज केअहे। आने आमी तीया ख्रीस्‍तुपेअ, बादा लोकाहांपेअ राज केरांअ आदीकार हाय। काहाका, आपुअ आर्याअ वीसवास्यांहपेअ रात-दीह दोस थोवनाराल पोरमेहेरांय होरगामेनेअ फेकी टाक्योह। रात-दीह पोरमेहेराअ आगलांअ तीयाहांपेअ दोस थोवनारो ओज ओजगोर हाय। ¹¹ घेटाअ बोचाअ होच हाय तो सोताअ रोगुत पाळीन मोअयो तीयापेअ तीयाहां राखला वीसवासुकींअ, आने ख्रीस्‍तुअ बाबोताम तीयाहां बीहराहांन आखली साक्सीकींअ तीयाहां सेतानाल हारव्योह। ख्रीस्‍तुअ बाबोताम साक्सी आखांअ खातुर ते सोताअ जीव दांअ बी आचकाअया नांह। ¹² तीयाअ लीदे, होरगामेर्याअ ओ बादा होरगाअ दुताहीं, तुमां आनोंद केरा! पेन आखी तोरतीपेअ रेनारा ओ लोकुंह! खुब मोडया आफोत्या तुमाहांपेअ पोळीअ। काहाका, सेतान तुमांअहीं उती आलोह, आने तीयाल खोबुर हाय का, तीयापेअ काम केरांअ सोमोय टुको हाय। तीयाअ लीदे, तो खुब खीजवाअयोह।” ¹³ जांहांअ तीया ओजगोरुल खोबुर पोळी का होरगाअ दुताहीं तीयाल तोरतीपेअ फेकी टाक्योह, तांहांअ तो तीयु पोयराल जोन्‍मो देनारी बायुल तेरांअ ओळी लाग्यो। ¹⁴ पेन एक होरगाअ दुतांय तीयु बायुल मोडा गोरुळफाकुअ बेन फाकळ्या देदया, ईयाअ खातुर का, ते उजाळाम तीयुअ खातुर पोरमेहेरांय तीयार केअला जागे उडीन नाही जाय, आने तीयाअ पोरीणामे तो ओजगोर तीयुअहीं लोगुंअ पोची नांय सेके, आने तींहीं होरगाअ दुत तीयुल साळा तीन वोरसें पोहे ने पाले।

¹⁵ हातींअ तीया ओजगोरुंह सोताअ मुंयांमेनेअ , एक खाडीअ ओतोंअ पांय, ते बाय आथी तीयु वेल सोळ्यों, ईयाअ खातुर का, ते बाय तीया पांअयांम वोराय जाय। ¹⁶ पेन जोमीनाम फाट पोळी ने ओजगोरुंह सोळलों खाडीअ पांय तींहमें उती गीयों, जाणे का तों बादों पांय जोमीन पी गीयी। एंहकींअ कीईन, जोमीनुंह तीयु बायुल मोदोत केअयी। ¹⁷ तांहांअ तो ओजगोर तीयु बायुपेअ खुब खीजवाअयो आने तो तीयु बायाअ बीहरा वोसुलाअ होच जे लोक आथा तीयाहांअरी लोळांअ गीयो। ते लोक पोरमेहेराअ हुकोमाहांअ पोरमाणे चालनारा आने ईसुअ बाबोताम बीहरा लोकाहांन साक्सी देनारा हाय। ¹⁸ तो ओजगोर मोडा दोरीयाअ तोळीपेरीअ रेटीम उबी रीयो।