11
पोरमेहेराअ बाबोताअ साक्सी देनारा बेन आदमी
1 हातींअ एक दुतांय, लाकळीअ होच मापुअ होटी मांन देदी। तीयांय मांन आख्यों, “ख्रीस्त तुल आखेह: उठ! आने पोरमेहेराअ मोंदीराम जायन तीया मोंदीराअ आने वेदीअ माप ले! आने तीया मोंदीराम जें भोकती केअतेंह तीयाहांअ गोंणोतरी केअ! 2 पेन मोंदीराअ बार्याअ चोवठाअ माप मां लेतो! काहाका तों चोवठों येहुदी जातीअ नांह तीया लोकाहांन पोरमेहेरांय दीअ देदोंह। तीयाअ पोरीणामे, ते लोक बेतालीस मोयना लोगुंअ पोवीतोर येरुसालेम सेहेराल तीयाहांअ पागाहांअ थुले रोंअदी टाकीअ। 3 आने आंय बेन एंहडा साक्सींहन नीमेंह का, जीयाहांन आंय बारहोव ने सांहींट दीह लोगुंअ मांअ आखल्या गोठ्या जाहेर केरांअ होक देहें। मांहांहांअ पापाहांअ लीदे ते दुखी हाय तों देखावांअ ते खोतलाअ चींजांअ पोतळें पोवीअ।”
4 तोरतीपेअ राज केअनारा मालीखाअ हाजरीम जें बेन जेतुनाअ चाळें ने दीवा केरांअ बेन मोडें कोळ्यें हाय तें ईया बेन साक्सीहींअ नीसाण्या हाय। 5 जों केडों बी तीयाहांन नुकसान केरांअ जाय ता, तीया साक्सीहींअ मुंयुंहमनेअ आग नींगीअ ने तीयाहांअ तीया दुसमोनाहांअ नास कीअ। जों केडों तीयाहांन नुकसान केरांअ मागीअ तीयाहांन ते बेनुं साक्सी एंहकींअज कीईन माय टाकीअ। 6 तीयाहांपेअ जुग बोंद केरांअ, मोंजे का, वोहरातुल ओटकावांअ आदीकार बी रीअ, ईयाअ खातुर का, जांहांअ ते पोरमेहेराअ गोठ आखता वीअ, तीयु वोखत वोहरातुल ते ओटकावी सेके। आने तीयाहांन खाडींहपेअ आने मोडा दोरीयाअ पांअयुल रोगुताअ होच रातों-चोळ बोंणावी दांअ बी आदीकार वीअ, आने गोंवें तोतीअ वोखत तोरतीपेअ दोरेक जातीअ आफोत फेलावांअ बी तीयाहांपेअ आदीकार वीअ।
7 तेबी, जांहांअ ते पोरमेहेराअ गोठ आखांअ पुरों कीअ, तांहांअ तोल्या वोगुराअ खाड्डामनेअ नींगीन उपेअ आवनारों एक जोनावोर तीयाहांपेअ हुमलो कीअ आने तीयाहांन हारवीन तीयाहांन माय टाकीअ। 8 तीयु साक्सीहींअ लास्या तीया मोडा सेहेराअ हेरीहींम पोळी रीअ। आत्मीक रीते हेअजी ता तों सेहेर, सोदोम सेहेर ने मीसोर देसाअ होच गोंणाय। काहाका, तीया सेहेराअ लोक खुब खाराब हाय। तीया सेहेरामुज तीयाहां सोताअ मालीखाल कुरुसापेअ जोळीन माय टाकलो। 9 खुब जातीअ मांहेंअ, आने कुळाहांअ मांहेंअ, आने जुदया-जुदया बोल्या गोगनारें मांहेंअ, आने जुदा-जुदा देसाहांअ मांहेंअ, तीयाहांअ लासींहन साळा तीन दीह लोगुंअ हेअया कीअ आने केडाल बी तीयुहुंन डाटांअ नांय दीअ। 10 तोरतीपेअ रेनारा खाराब लोक तीयु साक्सींहन मोअला देखीन आनोंद कीअ। आने ते लोक एक-बीहराल भेट मोकलीन उजवोणी कीअ। काहाका, पोरमेहेराअ गोठ आखनारा तीयाहां बेनहुं ए बादी जातीअ आफोत्या मोकलीन तोरतीपेअ रेनारा तीया लोकाहांन हेरान कीअ टाकला।
11 पेन साळा तीन दीह हातींअ, पोरमेहेर तीयाहांअ लासींहम जीव थोवीअ। हातींअ ते फाचा उठीअ, आने तीयाहांन फाचा जीवता वीईन उठता हेअनारा लोकाहांन खुब बीख लागीअ। 12 हातींअ ते बेनुं साक्सी होरगामेनेअ एक मोडो आवाज उनाय। तो आवाज तीयाहांन एंहकींअ आखीअ: ‘ईंहीं उपेअ आवा!’ तांहांअ ते तीयाहांअ दुसमोनाहांअ देखता वादलापेअ बोहीन होरगाम जाय।
13 तीयुज घेळी एक मोडो तोरतीकोंप वीअ। आने तीयाअ लीदे, तीया सेहेराअ दोस्मा भागाअ बोंगला नास वीअ। आने तीया तोरतीकोंपुअ लीदे, सांत हाजार मांहेंअ मोय जाय। तीया सेहेराअ वाचाय गेहलें बीहरें मांहेंअ बी जाय आने कोबुल कीअ का, होरगाम राज केअनारो पोरमेहेर खुब बीख लागे एंहडो हाय।
14 तेज बीहरी मोडी आफोत वीअ। हेरा! तीजी मोडी आफोत माहरीज आवनारी हाय।
सातमो दुत सोताअ पीपारो वाजावेह
15 सातमा दुतांय सोताअ पीपारो वाजाव्यो तांहांअ, आंय होरगाम मोडा-मोडा आवाज उनाअयो। आने ते आवाज एंहकींअ आखत्ला, “तोरतीपेर्याअ बादा लोकाहांपेअ राज केरांअ आदीकार आमी आपुअ मालीखाअ आने तीया ख्रीस्तुअ हाय। आने तो तीया लोकाहांपेअ कायोमाअ खातुर राज कीअ!” 16 तांहांअ पोरमेहेराअ आगलांअ सोत-सोताअ गादींहपेअ बोठला चोवीस वोळीलाहीं पुंय पोळीन पोरमेहेराअ भोकती केअयी। 17 तीयाहां आख्यों का, “ओ खुब ताकोतावाला मालीख पोरमेहेर, तुंज आमी बी हाय ने आगलोअ बी आथो। आमां तोअ आभार मानताह। काहाका, तोअ वीरुद केअनारा बादाहांन तुंयुं हारवी देदाह। 18 तोअपेअ वीसवास नांय केअनारा बादा देसाहांअ लोक तोअपेअ रोगवाअला। तीयाअ लीदे, तुं बी तीयाहांपेअ खुब रोगवाअयोह। आने तुंयुं एंहडों नोक्की केअयोंह का, तुं बादा मोअला लोकाहांअ नीयाय केरांअ हाय तो ओज खेरो सोमोय हाय। तुंयुं एंहडों बी नोक्की केअयोंह का, तोअ बादा सेवोकुंहन, मोंजे का, तुंयुं जाणावली गोठ जाहेर केअनाराहांन, आने तोअ बीख राखनारा तोअ बीहरा बादा लोकाहांन, मोंजे, तें सोमाजुअ नोजराम वादारे मानुवाला वीअ का ओसा मानुवाला वीअ, तीयाहांन बादाहांन बी बोदलो दांअ ओज खेरो सोमोय हाय। आने तुंयुं ईं बी नोक्की केअयोंह का, तोरतीपेर्याअ बीहरा लोकाहीं अ नास केअनारांअ नास केरांअ खेरो वोखत बी ओज हाय।”
19 हातींअ मांयुं होरगामेर्यों पोरमेहेराअ मोंदीर उगळुअतों देख्यों, आने तीया मोंदीराम मांयुं ते पोवीतोर पेटी देखी, जींहमें पोरमेहेरांय जुना जोमानाअ येहुदी लोकाहांअरी केअलो कारार थोवलो आथो। हातींअ वीज चोमकुअत्ली, गाजत्लों, ने चोचळुअत्लों। आने तोरतीकोंप वेअत्लो, आने जुगामेनेअ मोडें-मोडें गारें पोळत्लें।