10
बीहरो एक दुत बीहरो एक चांबळाअ हानोअ वेटलो लीईन आवेह
1 हातींअ मांयुं एक ताकोतावाला दुताल जुगामेनेअ उतुअतो देख्यो। तो दुत वादलाकींअ वेटलाअलो आथो। तीयाअ मुनकापेअ एक बाण आथो। तीयाअ मुखलांय दीहाअ होच तेजुवाली आथी आने तीयाअ पाग आगीअ खांबुंअ होच देखाअत्ला। 2 तीयाअ आथाम एक चांबळाअ हानोअ उगाळो वेटलो आथो। तीयांय सोताअ एक पाग मोडा दोरीयापेअ आने बीहरो पाग जोमीनुपेअ थोव्यो। 3 हातीम तीयांय सींह-वाग रेकेह तेंहडा मोडा आवाजे बोंबलीन एगोंह कांवींह आख्यों। तो बोंबल्यो तांहांअ आंय होमजी सेकुं एंहडा सोब्दा गोगीन सांत वोखत गाजयों।
4 तेंहडों गाजयों तांहांअ आंय उनाअयो ते सोब्दा आंय लेखांअ केअत्लो। पेन होरगामेनेअ आंय उनाअयो तीया आवाजुंह मांन आख्यों, “गाजयों तांहांअ तुंयुं जे सोब्दा उनाअया ते सोब्दांहन सील मारी दे! मोंजे तीयाहांन सुपा राख! तीयाहांन लेखतो मा!”
5 हातींअ मोडा दोरीयापेअ आने जोमीनुपेअ पाग थोवीन उबी रेहलो मांयुं देखलो तीया दुतांय सोताअ हुदो आथ उचो केअयो, 6 आने तीयांय कायोम जीवता रेनाराअ, मोंजे का, जीयांय जुग आने तीयामेर्योंअ बादों, आने मोडो दोरीयो ने तीयामेर्योंअ बादों, तोरती आने तीहमेंर्योंअ बादों होरजयोंह तीया पोरमेहेराअ होम खादो। आने तीयांय आख्यों, “पोरमेहेर आमी वाअ नांह लागवुअनारो। 7 पेन सातमो दुत सोताअ पीपारो वाजावीअ तांहांअ, पोरमेहेराअ भेदुवालो ईरादो पुरो वीअ। जेंहकींअ पोरमेहेराअ गोठ जाहेर केआनारांहन तीयांय जाहेर केअलों, तेंहकींअज तो ईरादो पुरो वीअ।”
8 हातींअ जुगामेनेअ आंय उनाअलो तीया आवाजुंह फाचों मांन आख्यों, “जायन मोडा दोरीयापेअ आने जोमीनुपेअ पाग थोवीन उबी रेहला दुताअ आथाम उगाळो हाय तो चांबळाअ वेटलो लीअ ले!”
9 तांहांअ आंय तीया दुताअहीं गीयो आने तीयापेनेअ चांबळाअ हानोंअ वेटलो माग्यो। तांहांअ तीयांय मांन आख्यों, “ईं लीईन खाय जो! तीयाअ होवाद तोअ मुंयांम मोदुअ होच गुलो लागीअ। पेन तीयाअ होवाद तोअ डेडीम कोळवो लागीअ।” 10 तांहांअ मांयुं तीया होरगाअ दुताअ आथामनेअ तो हानोअ वेटलो लेदो आने तो खादो। मांअ मुंयांम तीयाअ होवाद मोदुअ होच गुलो लाग्यो। पेन तीयाल आंय गींईं गीयो तांहांअ मांअ डेडीम तीयाअ होवाद कोळवो लाग्यो। 11 हातींअ जुगामेनेअ आंय उनाअलो तीया आवाजुंह मांन आख्यों, “खुब जातीअ लोकाहांन, खुब देसुंहन, आने खुब बोल्या गोगनारा लोकाहांन, आने खुब राजुंहन जों वेनारों हाय तीया बाबोताम जाहेर कोअतो रे।”