9
पाचमो दुत सोताअ पीपारो वाजावेह
1 हातींअ पाचमा दुतांय सोताअ पीपारो वाजाव्यो तांहांअ, मांयुं एक खाराब दुताल देख्यो। तो दुत जुगामेनेअ तोरतीपेअ टुटी पोळला एक ताराअ होच आथो। तीया दुताल तोल्या वोगुराअ खाडाअ मुवालाअ कुची देवाअयी। 2 तीया दुतांय तोल्या वोगुराअ खाडाअ मुवालों उगाळ्यों। तीयाअ पोरीणामे, तीया खाड्डामनेअ मोडी भोट्टीमनेअ नींगतों वीअ एंहडों खुब तुअरों नींग्यों। तीया तुअराकींअ दीहाअ उजवोळ आने होवामान एकदोम आंदारों वीअ गीयों। 3 तीया तुअरांमनेअ टीडें तोरतीपेअ उडी आलें। पोरमेहेरांय तीयाहांन लोकाहांन चावांअ वीसींअ होच ताकोत देदी। 4 पोरमेहेरांय तीया टीडांहन एंहकींअ आख्यों, ते तोरतीपेर्याअ चाराल का केल्ला बी चाळ-बाटवाल नुकसान नांय केअ, पेन जीया लोकाहांअ नीडांहपेअ पोरमेहेराअ सीक्काअ नीसाणी नांह, तीयाहांन ओताअज नुकसान केअ। 5 पोरमेहेरांय तीया टीडांहन तीया लोकाहांन माय टाकांअ सुट नांह देदी, पेन तीयांय तीयाहांन पांच मोयना लोगुंअ तीया लोकाहांन तारास दांअ सुट देदली। तें लोकाहांन रीबावे तांहांअ जों दुख वेअत्लों तों, वीसीअ चावेह तांहांअ जेंहकींअ आया टाकेह तेंहडों आथों। 6 तीया टीडांहन खाराब लोकाहांन तारास दांअ सुट देवाअहे तीया पांच मोयनाअ सोमोयाम तीया लोकाहांन ओतोंअ खाराब दुख वीअ का, ते मोत मागीअ पेन तों तीयाहांन नांय मीले। ते मोरांअ होदीअ पेन ते मोय नांय सेके।
7 तें टीडें लोळायुअ खातुर तीयार वेअला कोळांअ होच देखाअत्लें आने तीयाहांअ मुंनकांहपेअ होनाअ मुंगोंटुअ होच एगोंह कांवींह आथों। आने तीयाहांअ मुंयें मांहांहांअ मुंयुंअ होच आथें। 8 तीयाहांअ चोट्यें बायाहांअ चोट्यांअ होच लांबें आथें। तीयाहांअ दात सींह-वागुंअ दातुंअ होच मोजबुत आथा। 9 तीयाहांअ सातीपेअ बोकतोरें आथें का जें नोळाअ बोंणावला बोकतोरुंअ होच आथें। तें उडत्लें तांहांअ तीयाहांअ फाकळींहमनेअ एंहडो आवाज आवत्लो का जो खुब कोळा जुपीन लोळायुम खुब साटा दोवळी जानारा तांगांअ होच आथो। 10 तीयाहांअ सेपटया वीसींअ सेपटींअ होच आथ्या। तीयु सेपटींहकींअ तें लोकाहांन चावत्लें। लोकाहांन पांच मोयना लोगुंअ रीबावी सेके एंहडी गोती तीयाहांअ सेपटींहम आथी। 11 तोल्या वोगुराअ खाडाअ दुतुज तीया टीडांअ राजा हाय। तीयाअ नांव हीबरु बोलीम “आबाददोन” हाय। आने गीरीक भासाम तीयाअ नांव “आपोल्योन” हाय। ईया बेनुं नांवांअ ओर्थो “नास केअनारो” हाय।
12 तेज पेअलांम-पेअलीअ मोडी आफोत आथी। हेरा! बीज्या बेन आफोत्या आजी आवनार्या हाय।
सोठ्ठो दुत सोताअ पीपारो वाजावेह
13 हातींअ सोठठा दुतांय सोताअ पीपारो वाजाव्यो। तांहांअ पोरमेहेराअ आगलांअ जे होनाअ वेदी आथी तीयुअ चारु खुणा नेअ एगाहाल गोगता आंय उनाअयो। 14 तीयांय तीया पीपारावाला सोठठा दुताल आख्यों, “मोडी खाडी युफरेटीसुअहीं मांयुं बांदी थोव्याह तीया चार दुताहांन सोळी थोव!” 15 तांहांअ तीया दुतांय तीया चार दुताहांन सोळी थोव्या। तीया दुताहांन पोरमेहेरांय तीया वोरसाअ, तीया मोयनाअ, तीया दीहाअ, आने तीया खास नोक्की केअली घेळीअ खातुरुज तीयार राखला। तीया दुतांय तीयाहांन ईयाअ खातुर सोळी थोवला का ते तीयाहांअ कोळांअ सावारी केअनारा लोस्कोरुकींअ खाराब लोकाहांअ तीजा भागाल माय टाके। 16 तीया कोळापेअ सावारी केअनारा लोस्कोराअ आकळो एगांह मांन जाणाव्यो। तो आकळो वीह कोरोळुअ आथो।
17 कोळा आने तीयांयपेर्याअ सावार आथा ते मांन दोरसोनुम एंहडा देखाअत्ला! सावारुंअ सातीपेअ पोवलें बोकतोरें आगीअ होच रातें-चोळ आने तुअराअ होच जांबल्यें आने गोंदरोखुअ होच पीवलें आथें। तीया कोळांअ मुंनकें सींह-वागुंअ मुंनकांअ होच आथें। तीयाहांअ मुंयुंहमनेअ आग आने तुअरों आने बोलता गोंदरोखुअ झाल्या नींगत्ल्या। 18 कोळांअ मुंयुंहमनेअ नींगत्ली तीयु आगींह, आने तुअरांह, आने बोलती गोंदरोखुंह खाराब लोकाहांअ तीजा भागाल माय टाक्यो। 19 खाराब लोकाहांन माय टाकनारी ताकोत तीया कोळांअ मुंयुंहम आने सेपटांहम आथी। तीयाहांअ सेपटा हापळाहांअ मुंनकांअ होच मुंनकाल्या आथा। आने तीयाहांकींअ ते लोकाहांन नुकसान केअत्ला।
20 तेबी, ईयु बादी आफोतींहमनेअ वाचायन जीवता रेहला लोकाहीं सोताअ खोटा कामाहांअ लीदे दुखी वीईन तें सोळी नांय देदें। मोंजे का, तीयाहां सोताअ बोंणावली मुरतींअ पुंजा केरांअ नांय सोळ्यों। आने तीयाहां पुतळाहांअ आने हीअ नांय सेके का उनाय नांय सेके का चाली नांय सेके एंहडी होनाअ, चांदीअ, कांहांअ, ढोगळाअ, का लाकळांअ मुरतींअ पुंजा केरांअ चालुज राख्यों। 21 आने लोकाहांअ खुन केरांअ का मेली वीध्याअ कामें केरांअ का बीहरें खाराब कामें केरांअ का चोरी केरांअ तीयाहां नांय सोळ्यों।