8
घेटाअ बोचाअ होच हाय तो वेटलापेर्योअ सातमों सील तोळेह
1 घेटाअ बोचाअ होच हाय तीयांय वेटलापेर्योअ सातमो सील तोळ्यो तांहांअ होरगाम लोग-भोग आरदो काल्लाख सुम-साम वीअ गीयों। 2 हातींअ मांयुं पोरमेहेराअ आगलांअ उबी रेनारा सांत दुताहांन देख्या। पोरमेहेराअ बीहरा एक दुतांय तीयाहांमेर्याअ दोरेकुल एक-एक पीपारो देदो।
3 तुणी केरांअ होनाअ कोळ्यों लीईन बीहरो एक दुत आलो आने वेदीअ पाही उबी रीयो। तीयाल तुणी केरांअ वोस्तु खुब देवाअयी, ईयाअ खातुर का पोरमेहेराअ राज-गादीअ आगलांअ हाय तीयु होनाअ वेदीपेअ तो तीया तुणीअरी पोरमेहेराअ लोकाहांअ ओरुजया बी चोळवे। हातींअ तीयु वेदीपेअ तीयांय तुणी केअयी। 4 तांहांअ तीया दुताअ आथामेर्याअ तुणी केरांअ कोळ्यामनेअ तुअरों नींगीन पोरमेहेराअ लोकाहीं केअली ओरुजुंअरी उपेअ पोरमेहेराअहीं पोच्यों। 5 हातींअ तीया दुतांय तीयापेरीअ तुणी केरुलोंअ कोळ्याम वेदीमेर्याअ एंगारा पोअया आने ते तोरतीपेअ ठालवी देदा। तांहांअ तीयुज घेळी गाजांअ ने चोचळांअ टेक्यों आने वीजलांअ टेक्यों आने तोरती कापी उठी।
चार दुत सोत-सोताअ पीपारा वाजावताह
6 हातींअ ते सांत दुत जीयाहांपेअ एक-एक पीपारो आथो ते सोत-सोताअ पीपारा वाजावांअ तीयार वीया।
7 पेअलाअ दुतांय सोताअ पीपारो वाजाव्यो तांहांअ तोरतीपेअ रोगुत पेलला गारांअ आने आगीवालो वोहरात पोळ्यो। तीयाअ पोरीणामे, तोरतीअ उपर्याअ भागाम जोंबी हाय तीयाअ तीजो भाग बोली गीयो। मोंजे का, चाळाहांअ तीजो भाग आने बादी जातीअ लीला चाराअ तीजो भाग बोली गीयो।
8 हातींअ बीहरा दुतांय सोताअ पीपारो वाजाव्यो। तांहांअ आगीकींअ बोलता मोडा डोगुअ होच एगोंह कांवींह दोरीयाम पोळ्यों। तीयाअ पोरीणामे, दोरीयाअ तीजो भाग रोगुताअ होच रातो-चोळ वीअ गीयो, 9 आने दोरीयामेर्याअ जीव-जीवळांअ तीजो भाग मोय गीयो, आने दोरीयामेर्याअ तीजा भागाअ जाहाजुंअ नास वीयो।
10 हातींअ तीजा दुतांय सोताअ पीपारो वाजाव्यो। तांहांअ एक मोडो तारो जो दीवीअ होच बोलत्लो तो, जुगामेनेअ गोर्यो आने तीजा भागाअ खाडींहम आने तीजा भागाअ पांअयांअ चोरुंहम पोळ्यो। 11 तीया ताराअ नांव ता “कोळवाअ” हाय। तीयाअ कोळवासुअ पोरीणामे, तीजा भागाअ खाडींअ पांय आने चोरुंहमेर्योंअ पांय कोळवों वीअ गीयों आने कोळवों वीअ गेहलों तों पांय पीदों तीयाअ लीदे खुब लोक मोय गीया।
12 हातींअ चोवथा दुतांय सोताअ पीपारो वाजाव्यो तांहांअ, दीह, चांद, आने तारांहन पोरमेहेरांय मार पाळ्यो। तीयाअ लीदे, तीयाहांअ तीजा भागाअ तेज जातों रीयों। आने दीहाअ तीजा भागाअ वोखत आने रातीअ तीजा भागाअ वोखत तीयाहांअ उजवोळ नांय पोळ्यो।
13 हातींअ मांयुं हेअयों ता, उचे जुगाम उडता एक गोरुळफाकुल मोडा आवाजे बोंबलीन एंहकींअ आखता आंय उनाअयो, “हाय! हाय! आजी ता बाकी रेहला तीन होरगाअ दुत सोत-सोताअ पीपारा वाजावीअ तांहांअ, तोरतीपेर्याअ खाराब लोकाहांपेअ कोत्याअ मोडया आफोत्या पोळीअ! आने ते सोताअ पीपारा वाजावांअ तीयारीमुंज हाय।”