22
1-2 हातींअ तीया होरगाअ दुतांय मांन, पोरमेहेराअ आने घेटाअ बोचाअ होच हाय तीयाअ राज-गादीमनेअ नींगीन तीया सेहेराअ नीसमें रीईन वोराअत्ली ते खाडी देखावी। तीयु खाडीअ पांय पीनारा लोक कायोमाअ खातुर जीवीअ। तों पांय काचुअ होच उजवोळावालों आने चोख्खों आथों। तीयु खाडीअ बेनुं तोळींहपेअ फोलवावालें चाळें आथें। तें फोलवें खानारा लोक कायोमाअ खातुर जीवीअ। तीया चाळाहांअ बार जातीअ फोलवें लागत्लें। दोरेक मोयने नोवीज जातीअ फोलवें लागत्लें। ईया चाळाहांअ रोहुकींअ देसाहांअ लोकाहांन नोवी गोती मीलत्ली।
3 पोरमेहेर हाराप दे एंहडों केडों बी का काय बी तीया सेहेराम नांयज वीअ। पेन तीया सेहेराम पोरमेहेराअ आने घेटाअ बोचाअ होच हाय तीयाअ राज-गादी वीअ। आने तीयाअ पोरीणामे, तीयाअ सेवोक तीयाअ भोकती कीअ। 4 ते तीयाअ मुंय देखीअ, आने तो तीयाहांअ नीडांहपेअ सोताअ नांव लेखीअ। 5 तींहीं कीदीह बी रात नांय पोळीअ। पोरमेहेराअ सेवोकुंहन दीवाअ का दीहाअ उजवोळाअ जोरुल नांय पोळीअ। काहाका, मालीख पोरमेहेर सोतेज तीयाहांपेअ सोताअ उजवोळ पाळीअ। ते कायोमाअ खातुर राजांअ होच राज कीअ।
ईसु फाचो आवेह
6 तीया होरगाअ दुतांय मांन आख्यों, “पोरमेहेरांय तुल जाहेर केअल्या ए गोठ्या हाच्या हाय आने ते नोक्कीज पुर्या वीअ। पोरमेहेरांय जाणावल्या गोठ्या जाहेर केअनाराहांन दोरवोणी देनारा मालीख पोरमेहेरांय, जे बोनाव माहरीज बोंणनारा हाय ते सोताअ सेवोकुंहन देखावांअ सोताअ दुताल मोकल्योह।” 7 ईसु तीयाअ बादा लोकाहांन आखेह का, “वेरा! आंय माहरीज आवुंह! मांयुं ईयु चोपळीम जाहेर केअल्याह तीयुहुंअ गोठीहींअ पोरमाणे चालनारों दोरेक मांहुंअ खुब सुखी रीअ।”
8 मांयुं ईयु चोपळीम लेख्याह ते बादया बाबोत्या उनाअनारो आने हेअनारो आंय योहान सोतेज हाय। ईं बादों उनायांअ आने हेरांअ पुरों वीयों हातींअ, ए बाबोत्या मांन देखावनारा होरगाअ दुताअ भोकती केरांअ खातुर आंय तीयाअ पागे पोळ्यो। 9 पेन तीयांय मांन आख्यों, “मांअ भोकती मां कीअहो! पेन पोरमेहेराअज भोकती केअ! काहाका, आंय तोअ होच आने पोरमेहेराअ गोठ जाहेर केअनारा तोअ ख्रीस्ती पावुंअ होच सेवोकुज हाय। आने ईयु चोपळीम लेखली गोठीहींअ पोरमाणे चालनारा बीहरा लोकाहीं अ होच बी आंय सेवोक हाय।” 10 तीया होरगाअ दुतांय मांन ईं बी आख्यों, “ईयु चोपळीम पोरमेहेरांय जेबी आगाह्या केअयाह तीयुहुंन सुप्या मां राखतो! काहाका, ते हाच्या पोळांअ सोमोय पाहीज हाय। 11 तो सोमोय पाहीज हाय तेबी, खोटें कामें केअनारें तेंहकींअ केरांअ चालुज राखांअ मागतें वीअ ता, तीयाहांअ मोर्जी। तीयाअ बोदलो तीयाहांन माहरीज मीलीअ। मेलें कामें केअनारें तेंहकींअ केरांअ चालु राखांअ मागतें वीअ ता, तीयाहांअ मोर्जी। तीयाअ बोदलो तीयाहांन माहरीज मीलीअ। हाचें कामें केअनारें तें हाचें कामें केअयाज केअ, आने पोवीतोर हाय तें पोवीतोर रांअ चालुज राखे!”
12 ईसु तीयाअ बादा लोकाहांन आखेह का, “वेरा! आंय माहरीज आवुंह। तुमांअमेर्याअ दोरेक मांहांय केअला कामाहांअ पोरमाणे तीयाल दांअ खातुर बोदलो मांअरी लीअ आवुंह। 13 आंयज पेअलोअ आने सेल्लो हाय, मोंजे का, बादी बाबोतीहींअ वेजलुअनारो आने तीयुहुंअ ओंत लावनारो आंयज हाय।”
14 तीया सेहेराअ बांअणांअ पादरो वीहीन कायोमाअ खातुर जीवावनारा फोलवांवाला तीया चाळाअ फोलवें खाय सेके तीयाअ खातुर जें मांहेंअ सोताअ झोब्बा तुवीन उजला केअतें वीअ तेंहकींअ सोताल आत्मीक रीते चोख्खें केअतेंह, तें मांहेंअ खुब सुखी हाय। आसीरवाद दीअ। 15 पेन हुंणांअ होच हाय तें मांहेंअ, मोंजे का, मेली वीध्या केअनारें, सीनालों केअनारें, खुन केअनारें, मुरतींअ पुंजा केअनारें, झुटों गोगांअ मोर्जी राखनारें, झुटों गोगनारें, तें बादें तीया पोवीतोर सेहेराअ बारेज रीअ।
16 “मांयुं ईसुंय ए बादया गोठ्या मोंडोळुंहमेर्याअ तुमनेंह जाणावांअ खातुर मांअ दुताल मोकल्योह। आंय दावीदाअ वोसुलामेर्योअ ख्रीस्त हाय। आने आंय उजाल्या ताराअ होच झोजलुअनारो हाय।”
17 वीसवास केरांअ मागनारांहन दोरेकुल पोरमेहेराअ आत्मा, आने वोल्लाअरी जोळाय जानारी वोल्लीअ होच ख्रीस्तुअरी कायोमाअ खातुर जोळाय जानारा लोक आखताह का, “आवा!” आने जों ईं उनाअहे तों बी, वीसवास केरांअ मागनारांहन एंहकींअ आखेह का, “आवा!”
आत्मीक रीते फांअप्यें हाय तें आवे, मोंजे का, आत्मीक रीते लोकाहांन कायोमाअ खातुर जीवावनारों पांय पीयांअ मागतेंह, तें तों पांय मोफोतुम मीलवे!
सेल्या गोठ्या
18 आंय ईसु, ईयु चोपळीम मांयुं जाहेर केअल्या गोठ्या उनाअनारा दोरेकुल एंहडी कोळोक चेतवोंणी दीहुं का, “ईयु चोपळीम नोंदली बाबोतींहम जोंबी वादाराअ उंमेरीअ ता, ईयु चोपळीम जे-जे आफोत्या मांयुं नोंदयाह ते बादया पोरमेहेर तीयापेअ पाळीअ। 19 आने ईयु चोपळीम मांयुं जाहेर केअली बाबोतींहमनेअ जोंबी काय बी काडी टाकीअ ता, ईयु चोपळीम जाणावला चाळाअ फोलवों खांअ तीयाअ होक, मोंजे का, जों फोलवों खानारा लोक कायोमाअ खातुर जीवीअ तों फोलवों खांअ होक, आने पोवीतोर सेहेराम वीहांअ होक, तीयापेनेअ पोरमेहेर लीअ लीअ।”
20 ए बादया गोठ्या हाच्या हाय तीयाअ खातरी केअनारो ईसु आखेह: “नोक्कीज आंय माहरीज आवुंह!”
आंय योहान तीयाल जोवाब दीहुं: “आमेन! ओ मालीख ईसु, आव!”
21 आपुअ मालीख ईसु, पोरमेहेराअ तुमांअ बादा लोकाहांपेअ मेरबानी केअतो रे! आमेन!