जाहेर वेअल्या बाबोत्या वसावी देहवाली 6

घेटाअ बोचाअ होच हाय तो पेअलोअ सील तोळेह

¹ हातींअ मांयुं हेअयों ता, घेटाअ बोचाअ होच हाय तीयांय चांबळाअ वेटलापेर्याअ सांतु सीलुंहमनेअ पेअलोअ सील तोळ्यो। तांहांअ तीया चार जीवता-जीवुंहमेर्याअ एकाल गाजतों वीअ एंहडा मोडा आवाजे एंहकींअ आखता आंय उनाअयो का, “आव!” ² आने मांयुं देख्यों ता, मांअ आगलांअ एक पांडोअ कोळो आथो। तीयापेअ जो सावार आथो तीयाअ आथाम एक तुंदली आथी। तीयाल एक मुंगोट देवाअलो। तीयांय पेअलांअ बी जीत्या मीलवुअल्या आने तो आमी बी वादारे जीत्या मीलवांअ चाली नींग्यो।

³ हातींअ घेटाअ बोचाअ होच हाय तीयांय तीया वेटलापेर्योअ बीहरो सील तोळ्यो। आने आंय तीया जीवता-जीवुंहमेर्याअ बीहराल एंहकींअ आखता उनाअयो का, “आव!” ⁴ तांहांअ बीहरो राता रोंगाअ कोळो आलो। तीयापेअ जो सावार आथो तीयाल, मांहेंअ एक-बीहराअरी सांतीम नांय रे पेन उलटों एक-बीहराल माय टाके एंहडों केरांअ आदीकार देवाअलो। ईया कामुअ खातुर तीयाल एक मोडी तारवाअ बी देवाअली।

⁵ हातींअ घेटाअ बोचाअ होच हाय तीयांय तीया वेटलापेर्योअ तीजो सील तोळ्यो। तांहांअ आंय तीया जीवता-जीवुंहमेर्याअ तीजा जीवुल एंहडों आखता उनाअयो, “आव!” ईयु वोखत मांयुं देख्यों ता, तींहीं एक कालो कोळो आथो। तीयापेअ जो सावार आथो तीयाअ आथाम “ताराजों” आथों। ⁶ हातींअ आंय तीया चार जीवता-जीवुंअ नीसमेंनेअ आवतो वीअ एंहडो आवाज उनाअयो। तीया आवाजुंह कोळापेर्याअ सावारुल आख्यों, “लोग-भोग एक हेर गोंवांहांअ कींमोत ओतीअ बादी वीअ का ते वेचाअता लांअ खातुर एक मांहांअ आखा दीहाअ मोजरी जाती रीअ। आने लोग-भोग डोळ कीलो जुवाअ बी तीयुज कींमोतुम वेचाय। पेन जेतुनाअ तेल बोंणावांअ खातुर जेतुन उबजावनारा बोगीचांहन, आने दाराख्साअ रोह बोंणावांअ खातुर दाराखसें उबजावनारा दाराख्साअ वाळींहन बीगाळाह मां!”

⁷ हातींअ घेटाअ बोचाअ होच हाय तीयांय वेटलापेर्योअ चोवथो सील तोळ्यो। तांहांअ आंय तीया जीवता-जीवुंहमेर्याअ चोवथा जीवुल एंहकींअ आखता उनाअयो का, “आव!” ⁸ तांहांअ मांयुं तींहीं एक झाका रोंगाअ कोळाल देख्यो। तीयापेअ जो सावार आथो तीयाअ नांव “मोत आवावनारो” आथों आने “मोअलांअ कोलीअ मांहुंअ” नांवांअ एगोंह तीयाअ फाचलां-फाचलांअ चाली नींग्‍यों। दुन्यापेर्याअ चोथा भागाअ लोक लोळायुम, कालुम, आजाराहांम आने रानी जोनावोरुंहकींअ मोय जाय एंहडों केरांअ तीयाल आदीकार देवाअयो।

⁹ हातींअ, घेटाअ बोचाअ होच जो हाय तीयांय वेटलापेर्योअ पाचमों सील तोळ्यो। तांहांअ मांयुं पोरमेहेराअ गोठीपेअ वीसवास केअलो तीया कारोणे आने ईसुअ बाबोताअ गोठ बीहराहांन आखली तीया कारोणे पोरमेहेराअ जे सेवोक माय टाकाअला, तीयाहांअ जीवुंहन तीयु वेदीअ थुले देख्या। ¹⁰ तीयाहां जोरपेअ बोंबलीन मालीखाल आख्यों, “ओ खुब ताकोतावाला, पोवीतोर आने हाचा मालीख! ईयु तोरतीपेर्याअ जीया लोकाहीं आमांअ रोगुत पाळीन आमनेंह माय टाक्याह, तीयाहांअ नीयाय कीईन तीयाहांन सीक्सा दांअ तुं आजी कोतीअ वाअ लागवोह?” ¹¹ तांहांअ पोरमेहेरांय तीयाहांन दोरेकुल एक-एक पांडोअ ने लांबो झोब्‍बो देदो आने तीयाहांन आख्यों, “तुमांअ आर्याअ सेवोकुंहन आने वीसवास्यांहन लोक जांव लोगुंअ नांय माय टाके तांव लोगुंअ तुमां आजी थोळीक वाअ ओटकी जा।”

¹² हातींअ, घेटाअ बोचाअ होच हाय तीयांय चांबळाअ वेटलापेर्योअ सोठ्ठो सील तोळ्यो। तांहांअ मोडो तोरती-कोंप वीयो। आने दीह काला उनुमनेअ बोंणावला कांबलाअ होच कालो पोळी गीयो, आने चांद आखो रोगुताअ होच रातो-चोळ वीअ गीयो। ¹³ आने मोडा वादुअरी खेकराय पोळनारा काचा उंबरांअ होच, जुगामेनेअ खुब बादा तारा तोरतीपेअ गोरी पोळ्या। ¹⁴ जेंहकींअ जुना चांबळाअ उगाळलो वेटलो फाटीन बेन कुटका वीअ जाहे आने बेनुं वेल वेटलो वोली जाहे, तेंहकींअ जुग फाटीन उगळी गीयी आने बेनुं वेल वेटलो वोली गीयी। आने दोरेक डोगुअ आने दोरीयाअ बेट सोत-सोताअ जागेनेअ होरकी गीया। ¹⁵ तीयाअ पोरीणामे, तोरतीपेर्याअ बादा खाराब लोक दोरुंहम आने खोळकांहम दोबी गीया। तीया लोकाहांम, राजा, मोडा-मोडा ओमोलदार, लोस्‍कोरुंअ केपटोन, मालदार लोक, जोरावार लोक, आने बीहरा बादा लोक, मोंजे का, गुलाम का सोतोंतोर वीअ ते बादा होमाअला आथा। ¹⁶ ते लोक डोगुंहन आने खोळकांहन बोंबलीन आखत्‍ला, “ओ डोगुहुं आने खोळकाहां, राज-गादीपेअ बोठलो हाय तो आमनेंह हीअ नांय सेके आने घेटाअ बोचाअ होच हाय तो आमनेंह सीक्सा नांय कीअ सेके तीयाअ खातुर, आमाहांपेअ पोळीन आमनेंह दोबावी दा! ¹⁷ काहाका, तीयांय आमनेंह सीक्सा दांअ नोक्की केअलो दीह आवी गीयोह आने तीयाअ सीक्सामेनेअ केडों बी वाचाय नांह सेकतों!”