4
होरगाम पोरमेहेराअ भोकती
1 तीयांय ईं बादों आखी पाळ्यों हातींअ, मांन बीहरों दोरसोन वीयों। आने तींहमें मांयुं होरगाम एक बांअणों उगाळलों देख्यों। आने जीयाअ आवाज पीपाराअ आवाजुअ होच आथो आने जीयांय मांअरी पेअलांअ बी गोठ्या केअल्या, तीयांयज फाचों मांन आख्यों, “ईंहीं उपेअ चोळी आव! आने आमी हातींअ जे बोनाव नोक्कीज बोंणनारा हाय, ते आंय तुल देखावेंह।” 2 तुरुतुज पोरमेहेराअ आत्मांय मांन सोताअ काबाम लीअ लेदो। मांयुं होरगाम एक राज-गादी देखी आने तीयु गादीपेअ बोहीन एगोह राज केअत्लो। 3 तीयाअ देखाव राता रोंगाअ हीराअ बोंणावला दागीनाअ होच आने राता रोंगाअ बीहरा कींमती ढोगळाअ बोंणावला दागीनाअ होच खुब तेजुवालो आथो। गादीअ चारु वेल वादलाम देखाअहे तेंहडों बाण आथों। तों लीला रोंगाअ एक मोडा ढोगळाअ बोंणावला दागीनाअ होच तेजुवालों आथों। 4 तीयु राज-गादीअ चारु वेल बीज्या चोवीस राज-गादया आथ्या। तीयु बादी गादींहपेअ चोवीस वोळील बोठला आथा। तीयाहां पांडेंअ-फोट पोतळें पोवलें आने सोताअ मुंनकांहपेअ होनाअ मुंगोट पोवला। 5 राज-गादीमनेअ वीज नींगत्ली ने गाजत्लों ने चोचळुअत्लों। तीयु राज-गादीअ आगलांअ सांत बोलत्या दीव्या आथ्या। ते दीव्या ता पोरमेहेराअ खुब ताकोतावाला आत्माअ नीसाण्या हाय। 6 तीयु राज-गादीअ आगलांअ चोख्खा काचुअ बोंणला दोरीयाअ होच देखाअनारों कायक आथों। तों बोरोफुअ होच एकदोम चोख्खों आथों।
राज-गादीअ चारु वेल एगुह जातीअ चार जीवता-जीव आथा। तीया जीवुंअ आगलांअ-फाचलांअ बादी जागे डोंआं आथा। 7 तीयाहांमेर्योअ एक जीव सींह वागुअ होच देखाअत्लो। आने बीहरो जीव हांडळ्याअ होच देखाअत्लो। तीजा जीवुअ मुंय मांहांअ मुंयुंअ होच आथों। आने चोवथो जीव उडनारा गोरुळफाकुअ होच देखाअत्लो। 8 तीया चारु जीवुंअ सोव-सोव फाकळ्या आथ्या। आने तीयाहांअ आखा डीलुम आने फाकळीहींअ थुले बादी जागे डोंआंन-डोंआंज आथा। ते जीव रात-दीह एक धार्या एंहकींअ आख्या केअत्ला का,
“बादी जातीअ ताकोतावालो मालीख पोरमेहेर
पोवीतोर, पोवीतोर, पोवीतोर हाय!
जो आगलांअनेअज हायाताम आथो, आने आमी बी हायाताम हाय,
आने भोवीस्यांम बी हायाताम रेनारो हाय, तो ओज हाय!” 9 ते चारु जीवता-जीव राज-गादीपेअ बोठला आने कायोम जीवता रेनारा पोरमेहेराअ गुणगान केअताह, तीयाल मान देताह, आने तीयाअ आभार बी मानताह। जीयु बी वोखत ते एंहकींअ केअताह,
10 तीयु वोखत ते चोवीस वोळील राज-गादीपेअ जो बोठोह तीयाल पागे पोळताह आने कायोम जीवता रेनारा तीयाअ भोकती केअताह। आने ते वोळील सोताअ मुंनकापेर्याअ मुंगोट उतावीन तीयाअ आगलांअ ते थोवीन आखताह: 11 “ओ आमांअ मालीख आने पोरमेहेर, बादा जीव तोअ गुणगान केअ, आने ते बादा तुल मान दे, आने तुंज एखलो ताकोतावालो हाय एंहडों कोबुल केअ तों तुलुज सोबेह। काहाका, बादाहांन होरजुअनारो ता तुं एखलोज हाय। आने तोअ मोर्जीकींअज तुंयुं तों बादों होरज्योंह, आने तीयाअ लीदे, तों हायाताम हाय।”