3
सारदी सेहेराअ मोंडोळाल बोद
1 “सारदी सेहेराअ मोंडोळाअ वीसवासींहन aए गोठ लेख:
जीयाम खुब ताकोतावाला पोरमेहेराअ आत्मा हाय, आने जीयापेअ सांत तारा बी हाय, तो आंय तुमनेंह ए गोठ्या आखुंह:
तुमां जोंबी केअतेंह, तों बादोंज आंय जांअहुं। लोक आखताह का तुमां आत्मीक रीते जीवतें हाय, पेन खोरेखोर ता तुमां आत्मीक रीते मोअलें हाय। 2 जागी उठा! तुमाहांपेअ वाय ओतीअज गोती रीयीह आने ते बी जाती रीअ। तीयाअ लीदे, सोताल आत्मीक रीते मोजबुत केरा! काहाका, आंय जांअहुं का, तुमां जों काय केअयोंह तों मांअ पोरमेहेराअ नोजराम आरदोंज हाय। 3 तीयाअ लीदे, पोरमेहेराअ गोठ तुमां उनाअलें तांहांअ तीयुल तुमां केंहकींअ मोनाम उतावी लेदली, तों तुमां ईत कीई ला। तीयु गोठी पोरमाणे चालतें रा, आने सोताअ पापाहांअ खातुर दुखी वीईन ते सोळी दा। जो तुमां एंहकींअ जागी नांय उठा ता, जेंहकींअ बांड ओचींतोज आवी जाहे, तेंहकींअ आंय तुमांअहीं ओचींतोज आवी जाहें। तुमांअ नीयाय केरांअ खातुर आंय केंहडीवेल वेल आवेंह, तीयाअ बी तुमनेंह खोबुर नांय पोळीअ।
4 तेबी, सारदी सेहेराअ मोंडोळाम तुमांअहीं एंहडें थोळेंक मांहेंअ हाय का जीयाहां, जेंहकींअ पोतळापेअ डाग लागेह तेंहकींअ सोताअ आत्मीक जीवोना ल पापाअ डाग लागांअ नांह देदो। तीयाअ पोरीणामे, तें पांडेंअ-फोट पोतळें पोवला मांहांअ होच आत्मीक रीते चोख्खें वीईन मांअरी रीअ। काहाका तेंहकींअ कीईन मांअरी रांअ तें लायोक हाय। 5 सेतानुपेअ जीत मीलवुअनारा मांहांहांन आंय तीयाहां पांडेंअ-फोट पोतळें पोव्यें वीअ तेंहकींअ आत्मीक रीते एकदोम चोख्खें केअहें, आने कायोमाअ खातुर जीवनारांअ नांवें जीयु चोपळीम नोंदाअतेंह तीयु चोपळीमनेअ तीयाहांअ नांवें आंय कीदीह बी नुसी नांय टाकुं। पेन आंय मांअ बाहकाअ आने तीयाअ दुताहांअ आगलांअ तें मांअ मांहेंअ हाय एंहकींअ मानी लेहें। 6 जेंबी होमजांअ मागतेंह, तें पोरमेहेराअ आत्मा मोंडोळुंहन जो बोद देहे, तो कालजी राखीन उनाय!”
फीलादेलफीया सेहेराअ मोंडोळाल बोद
7 “फीलादेलफीया सेहेराअ मोंडोळाअ वीसवासींहन bए गोठ लेख:
जो पोवीतोर आने हाचो हाय तो आंय, ए गोठ्या तुमनेंह आखुंह:
जुना जोमानाअ येरुसालेम सेहेराम लोकाहांन वीहांअ दांअ जेंहकींअ दावीद राजाल आदीकार आथो, तेंहकींअ नोवा येरुसालेम सेहेराम लोकाहांन वीहांअ दांअ मांन आदीकार हाय। cजों आंय उगाळुं, तों केडों बी बुजी नांय सेके। तेंहकींअज जों आंय बुजुं, तों केडों बी उगाळी नांय सेके।
8 तुमां जोंबी केअतेंह, तों बादों आंय जांअहुं। हेरा! तुमांअ खातुर मांयुं एक बांअणों उगाळों राख्योंह। तीयाल केडों बी बुजी नांह सेकतों। तुमां थोळेंकुज हाय तेबी तुमां मांअ गोठी पोरमाणे चाल्येंह आने बीहराहांअ आगलांअ मांन नांह ओअखुअतें एंहडों नांह आख्यों। 9 हेरा! तुमांअमेर्याअ थोळाक लोक सेतानाअ मोंडोळामेर्याअ हाय। ते ठोग सोताल येहुदी आखावताह, पेन होकीकोतुम ते येहुदी नांह। तीयाहांन आंय तुमांअहीं लावीन तुमांअ पागे पोळावेंह। आने आंय तीयाहांन कोबुल केरावेंह का, आंय तुमाहांपेअ माया राखुंह।
10 तुमां दुखाहांअ वोखत बी धीरोज राखीन रीयेंह। तीयाअ लीदे, ख्रीस्ताल नांय माननारा दुन्याअ लोकाहांन पोरमेहेर पारखीअ तीयु वोखत आत्मीक रीते तुमांअ नुक्सान केरांअ जे कोसीस कीअ, तीयाहांअ आथाहांमेनेअ आंय तुमनेंह वाचावी लेहें। 11 आंय माहरीज तुमांअहीं आवनारो हाय तीयाअ लीदे, तुमां जे हाच्या गोठ्या हीकयाह तीयुहुंअ पोरमाणे चालांअ चालु राखजा, ईयाअ खातुर का, पोरमेहेरांय तुमांअ खातुर राखी थोवलों ईनाम तुमां गोमावी दा एंहडों केडों बी नांय कीअ दे। 12 सेतानाल हारवुअनारें बादें, होरगाम मांअ पोरमेहेराअ मोंदीरामेर्याअ खांबुंअ होच मोजबुत रीअ।
आने तीयाहांन तो जागो कीदीह बी सोळांअ नांय पोळे। ते पोरमेहेराअ सोताअज लोक हाय तों देखावांअ आंय तीयाहांपेअ पोरमेहेराअ नांव लेखेंह। आने तें पोरमेहेराअ सेहेराअ मांहेंअ हाय तों देखावांअ आंय तीयाहांपेअ मांअ पोरमेहेराअ सेहेराअ नांव लेखेंह। तों सेहेर नोवों येरुसालेम हाय। तों होरगामेर्याअ मांअ पोरमेहेराअहींनेअ उतीअ। ते मांअ सोताअ लोक हाय तों देखावांअ आंय तीयाहांपेअ मांअ नोवों नांव लेखेंह। 13 जेंबी होमजांअ मागतेंह, तें पोरमेहेराअ आत्मा मोंडोळुंहन जो बोद देहे, तो कालजी राखीन उनाय!”
लावोदीकेया सेहेराअ मोंडोळाल बोद
14 “लावोदीकेया सेहेराअ मोंडोळाअ वीसवासींहन d ए गोठ लेख:
आंय ए गोठ्या तुमनेंह आखुंह:
जो एकदोम हाचो हाय तो आंयज हाय। मांअ साक्सी खातरीवाली आने हाची हाय। आने जीयाअ मारफोते पोरमेहेरांय बादों होरज्यों तो बी आंयज हाय। 15 तुमां जोंबी केअतेंह तों बादों आंय जांअहुं। तुमां नांह ता मांअपेर्योअ वीसवास सोळी देतें, का नांह ता हुची-हुचीम मांअ सेवा केअतें। ईयु बाबोताम तुमां हेलें नांह ने उनें नांह। मांअ एंहडी मोर्जी हाय का तुमां हेलें वेरा नेता उनें वेरा! 16 तुमां मांअ गोठीहींअ पारवाअ नांह केअतें तीयाअ लीदे, जेंहकींअ मांहेंअ हेल-बोफनों पांय मुंयांम कालीन फुचकारी टाकतेंह, तेंहकींअ आंय तुमनेंह सोळी दांअ तीयारीम हाय। 17 तुमां आखतेंह: ‘आमाहांपेअ आत्मीक रीते जोजे तोतोंअ हाय। आत्मीक बाबोताम आमां मालदार हाय। ईयु बाबोताम आमनेंह वादारे काय नांह जोजतों।’ पेन तुमां जांअतें नांह का, जें मांहेंअ दुखी, आने कींअवालेंह, आने गोरीब, आने आंदलें, आने नागें-उगाळें हाय, तीयाहांअ होच आत्मीक बाबोतीहींअ तुमनेंह खुबुज जोरुली हाय। 18 तीयाअ लीदे, आंय तुमनेंह एंहडी सालाह दीहुं का, मांअपेनेअ आगीम चोख्खों केअलों एकदोम पीवोर होनो वेचाअतों लेतें वीअ तेंहकींअ, तुमां आत्मीक रीते होकीकोतुम जीयाअ जोरुल हाय तों बादों मांअपेनेअ मीलवी ला, ईयाअ खातुर का तुमां आत्मीक रीते होकीकोतुम मालदार बोंणा। आने सोताअ नागा ओंगुंअ सोरोम दोबावांअ खातुर पांडेंअ पोतळें मांअपेनेअ वेचाअतें लेतें वीअ तेंहकींअ, मांन तुमनेंह गुना वोगुराअ बोंणावांअ दा। आने तुमांअ नोजुर फुटे तीयाअ खातुर सोताअ डोंआहम आंजांअ डोंअ-आजण्यों मांअपेनेअ वेचाअतों लेतें वीअ तेंहकींअ, तुमां मांन तुमनेंह आत्मीक बाबोत्या होमजांअ मोदोत केरांअ दा। 19 जीयाहांपेअ आंय माया राखुंह, तीयाहांन बादाहांन आंय ठोपको दीहुं आने हुदारुंह। तीयाअ लीदे, तुमां तुमांअ पापाहांअ खातुर खेरा मोनाकींअ दुखी वेरा आने ते सोळी दा। 20 हेरा! आंय तुमांअ बांअणाअहीं उबी रीईन बांअणों खोकळावतो वीअ तेंहकींअ, मांअ गोठ्या मानी लांअ तुमनेंह बादाहांन हात कीअहुं। जेंबी मांअ आवाज उनायन मांअ गोठ्या मानीअ, तीयांयअहीं आंय आवेंह। आने एकुज ठालीम खानारा दोस्दारुंअ होच आंय तीयाहांअरी खुब सोबोंद राखेंह। 21 जेंहकींअ आंय सेतानाल हारवीन मांअ बाहकाअ राज-गादीपेअ बोहीन राज कीअहुं, तेंहकींअ सेतानाल हारवुअनारा बादाहांन मांअरी राज-गादीपेअ बोहीन राज केरांअ राज्या देहें। 22 जेंबी होमजांअ मागतेंह, तें पोरमेहेराअ आत्मा मोंडोळुंहन जो बोद आखेह, तो कालजी राखीन उनाय।”