2
एफेसु सेहेराअ मोंडोळाल बोद
1 तीयांय मांन ईं बी आख्यों, “एफेसु सेहेराअ मोंडोळाअ वीसवासींहन a एंहकींअ लेख:
जीयाअ आथाम सांत तारा हाय, आने दीवा थोवुलोंअ मोडा-मोडा सांत होनाअ कोळ्यांअ नीसमें जो फीरेह तो आंय ए गोठ्या आखुंह: v 2 तुमां जोंबी केअतेंह तों बादों आंय जांअहुं। खास कीईन तुमां जे खुब मेहनोत कीअ रीयेंह, ते, मोंजे का, खुब धीरोज राखीन मांअ जे सेवा तुमां कीअ रीयेंह ते मांयुं देखीह। आने आंय ईं बी जांअहुं का खोटों हीकवुअनारा लोकाहांन तुमां चालवी नांह लेतें, आने सोताल मालीखाअ खास चेला एंहकींअ आखावनारा लोकाहांन तुमां पारखी हेअयाह, आने तुमां जांय गीयेंह का ते तीया बाबोताम झुटों गोगताह। 3 आंय ईं बी जांअहुं का तुमां धीरोज राखीन मांअ सेवा केअतें रेतेंह। मांअपेअ तुमां वीसवास केअतेंह तीयाअ लीदे मांहेंअ तुमनेंह दुखें पाळत्लें तेबी तुमां मांअ सेवा केरांअ चालुज राख्योंह, आने मांअ सेवा केअता तुमां थाकी नांह गीयें।
4 तेबी, तुमांअ वीरुद मांअ ओतोंअ आखुलोंअ हाय: तुमां पेअलांम-पेअलोअ मांअपेअ वीसवास राखलो तांहांअ तुमां जेंहडी माया मांअपेअ ने एक-बीहरापेअ राखत्लें, तेंहडी माया आमी नांह राखतें। 5 तीयाअ लीदे आंय तुमनेंह आखुंह, तुमां मांअपेअ ने एक-बीहरापेअ केंहडी माया राखत्लें तों ईत केरा, आने पेअलुर्याअ होच आमी तुमां माया नांह राखतें तों जांय लेजा! ईयु भुलुअ लीदे दुखी वेरा आने पेअलुर्याअ होच मांअपेअ ने एक-बीहरापेअ माया राखजा! जो तुमां दुखी वीईन नांय हुदराह ता आंय तुमांअ नीयाय केरांअ आवेंह, आने मांअ मोंडोळु तोरीके तुमांअ नांव-नीसाणी मीटावी देहें। 6 पेन तुमांहम ओ हारो गुण हाय: मुरतींअ पुंजा केरांअ आने खाराब रीते वोरतांअ वीसवास्यांहन हीकवुअनारा नीकोलाय पोंथाअ लोकाहांन जेंहकींअ आंय नोफरोत कीअहुं, तेंहकींअ तुमां बी नोफरोत केअतेंह।
7 जेंबी होमजांअ मागतेंह, तें पोरमेहेराअ आत्मा मोंडोळुंहन जो बोद देहे, तो कालजी राखीन उनाय। सेतानाल हारवुअनारा बादाहांन आंय पोरमेहेराअ बोगीचामेर्योंअ bओमोर जीवोन देनारा फोलवावाला चाळाअ फोलवों खांअ होक देहें।”
सीमीरना सेहेराअ मोंडोळाल बोद
8 “सीमीरना सेहेराअ मोंडोळाअ वीसवासींहन cएंहकींअ लेख:
बादी बाबोतीहींअ वेजलुअनारो बी आंयज हाय, आने तीयुहुंअ ओंत लावनारो बी आंयज हाय। * आने आंय मोयन बी फाचो जीवतो उठ्योह। आंय ए गोठ आखुंह:
9 तुमां जें दुखें वेठतेंह तें आने तुमांअ गोरीबायाअ हालोत ईं बादों आंय जांअहुं। पेन आंय ईं बी जांअहुं का, आत्मीक बाबोतुंहम तुमाहांपेअ बादोंज हाय। जें सोताल येहुदी आखावताह ते तुमांअ खोट्या-खोट्या गोठ्या कीअ फीरताह तों आंय जांअहुं। पेन आंय ता तीयाहांन येहुदी नांह गोंअतो। आंय तीयाहांन सेतानाअ मोंडोळामेर्याअज गोंअहुं। 10 जें दुखें तुमाहांपेअ पोळनारें हाय तीयाहांकींअ काबराय मां जातें। खोरेखोर ता, मांअपेर्योअ तुमांअ वीसवास सोळी दा तीयाअ खातुर तुमनेंह लालचावांअ खातुर सेतान तुमांअमेर्याअ थोळाकाहांन जेलाम कोंडावी देनारो हाय। थोळाक वोखत लोगुंअज तुमनेंह दुखें वेठांअ पोळीअ। मांअपेर्याअ वीसवासाअ लीदे तुमनेंह मोरांअ पोळे तेबी मांअपेर्योअ वीसवास तुमां जालवी राखजा। आने होरीफायुम जीतनाराल जेंहकींअ मांहेंअ आर पोवावीन ईनाम देतेंह, तेंहकींअ आंय तुमनेंह ईनामु तोरीके खेरों जीवोन देहें।
11 जेंबी होमजांअ मागतेंह, तें पोरमेहेराअ आत्मा मोंडोळुंहन जो बोद देहे, तो कालजी राखीन उनाय। सेतानाल हारवुअनारा बादाहांन बीहरी वोखत मोरांअज नांय पोळे।”
पेरगामु सेहेराअ मोंडोळाल बोद
12 “पेरगामु सेहेराअ मोंडोळाअ वीसवासींहन dए गोठ लेख:
जीयापेअ बेनुं वेल धारवाली तारवाअ हाय तो, मोंजे, आंय एंहकींअ आखुंह:
13 आंय जांअहुं का, जींहीं सेतानाअ राज चालेह एंहडी जागे तुमांअ वोहती हाय। तेबी तुमां मांअपेअ पाको वीसवास राखतेंह। जींहीं सेतानाअ राज चालेह तेंहडा तुमांअ सेहेराम मांअ ईमानदार साक्सी आंतीपा तुमांअ डोंआं नोजरे माय टाकाअलो। एंहडा सोमोये बी तुमां मांअपेर्योअ वीसवास सोळी नांह देदो। 14 तेबी, तुमांअ वीरुद थोळ्याक बाबोत्या मांअ तुमनेंह आखुलोंअ हाय: बालामुंह जेंहडों सीकसोण देदलों तेंहडों सीकसोण देनारा तुमांअ मोंडोळामेर्याअ थोळाकाहांन तुमां चालवी लेतेंह। जुना जोमानाम ईसरायेल लोकाहांन पाप केरांअ लालचावांअ खातुर बालाकुल हीकवुअनारो ओज बालाम आथो। तीयांय एंहडों ईयाअ खातुर हीकवुअलों का, ईसरायेल लोक मुरतींहन चोळवुअलो मांडो खाय आने खोटी रीते सांवसार केअ। 15 बालामुअ होच हीकवुअनारा नीकोलाय पोंथाअ मांहांहांअ बोदा पोरमाणे चालीन तेंहडाज पाप केअनारा तुमांअ मोंडोळाअ थोळाक लोकाहांन बी तुमां चालवी लेतेंह। 16 ईयाअ खातुर तुमां दुखी वेरा आने तीयाहांन जाराक बी चालवी मां लेतें। जो तुमां एंहकींअ नांय कीअहा ता, आंय जाराक बी वाअ लागव्या वोगुर तुमांअहीं आवेंह, आने ईया खोटा बोदाहांअ पोरमाणे चालनारांअ वीरुद आंय मांअ सोब्दांहकींअ लोळेंह आने तीयाहांन सीक्सा देहें।
17 जेंबी होमजांअ मागतेंह, तें पोरमेहेराअ आत्मा मोंडोळुंहन जो बोद देहे, तो कालजी राखीन उनाय।
सेतानाल हारवुअनारा बादाहांन आंय, होरगाम दोबावी राख्योंह तों मान्ना खावावेंह आने तीयाहांन पांडोअ ढोगळो देहें। आने तीयापेअ एंहडों नोवों नांव कोतरावेंह का जों तो ढोगळो मीलवुअनारा सीवाय बीहरों केडों बी नांय जांय सेके।”
थीयातीरा सेहेराअ मोंडोळाल बोद
18 “थीयातीरा सेहेराअ मोंडोळाअ वीसवासींहन eए गोठ लेख:
जीयाअ डोंआं आगीअ जीबलींअ होच तेजुवाला हाय आने जीयाअ पाग आगीम चोख्खा केअला कांहांअ होच चोमकुअताह, तो मोंजे, आंय पोरमेहेराअ पोयरो ए गोठ तुल आखुंह:
19 तुमां जोंबी केअतेंह तों बादों आंय जांअहुं, मोंजे का, तुमां मांअपेअ ने बीहराहांपेअ माया राखतेंह, आने तुमां मांअपेअ वीसवास राखतेंह, आने तुमां लोकाहांअ सेवा केअतेंह, आने तुमां धीरोज राखीन दुखें वेठतेंह, ईं बादों आंय जांअहुं। आंय ईं बी जांअहुं का, ए बादया बाबोत्या तुमां पेअलांअ केअता आमी वादारे हारकींअ केअतेंह। 20 तेबी, मांअ तुमांअ वीरुद ओतोंअ आखुलोंअ हाय: तुमां तुमांअ मोंडोळामेरीअ एंहडी एक बायुल चालवी लेतेंह का, जे जुना जोमानाअ खाराब राणी एसेबेलुअ होच हाय। ते सोताल पोरमेहेराअ गोठ जाहेर केअनारी आखावेह, पेन ते सोताअ बोदा कींअ मांअ सोताअ सेवोकुंहन भोरमावेह। ते तीयाहांन खाराब रीते सांवसार केरांअ आने मुरतींहन चोळवुअलो मांडो खांअ दोरवोणी देहे। 21 मांयुं तीयुल सोताअ खाराब वोरतोनुअ खातुर दुखी वीईन तों वोरतोन सोळी दांअ तोक देदीह। तेबी ते तों बादों सोळी दांअ नांह मागती। 22 तीयाअ लीदे, आंय तीयुल खुब आजार्यें पाळेंह। आने जे तीयुअरी सीनालों केअताह, ते तीयुअ खोटें कामें नांय सोळे ता, आंय तीयाहांन बी तीयुअज होच खुब दुखें पाळेंह। 23 आने जें तीयुअ बोदा पोरमाणे चालीन तीयुअ पोयराहांअ होच बोंण्येंह, तीयाहांन आंय नोक्कीज माय टाकेंह। तीयाकींअ बादा मोंडोळुंअ लोकाहांन खोबुर पोळीअ का, बादा मांहांहांअ वीचार आने ईरादा जांअनारो आंयज हाय। आंय तुमांअमेर्याअ दोरेकुल तीयांय केअला कामाहांअ पोरमाणे बोदलो देहें।
24 पेन थीयातीरा मोंडोळाअ बीहरा वीसवास्यांहन आंय ओतोंअ आखांअ मागुंह: तुमां तीया खोटा बोदा पोरमाणे नांह चालतें, मोंजे का, जीयाल खोटो बोद देनारा लोक सेतानाअहींनेअ आवनारी उंडी भेदुवाली गोठ आखताह, तीयाअ पोरमाणे नांह चालतें। तुमाहांपेअ तीयाअ सीवाय बीहरो वोजो थोवांअ आंय नांह मागतो। 25 तुमां खाली ओतोंअज केअजा! आंय आवुं तांव लोगुंअ मांअपेर्योअ तुमांअ वीसवास जालवी राखजा आने मांअ आखलों मानतें रेजा!
26 जें सेतानाल हारवुअतेंह आने मोअता लोगुंअ मान गोंवतें कामें केअतेंह, तीयाहांन आंय पोरमेहेराअ वीरुद केअनारा बादा लोकाहांपेअ आदीकार देहें। 27 खास कीईन ते जों केअताह तों ता पोरमेहेरांय ईसरायेलुअ राजाअ बाबोताम आख्योंह तीयाअ होच हाय: पोरमेहेरांय तीया बाबोताम एंहकींअ आख्योंह, ‘तो तीयाहांपेअ जाणे का नोळाअ लाकळीकींअ आदीकार चालवुअतो वीअ तेंहकींअ तीयाहांपेअ कोळोक रीते आदीकार चालवीअ, आने तो तीयाहांन कादुअ बासनांअ होच कुटका कीअ टाकीअ।’ 28 जेंहकींअ मांअ बाहकांय मांन आदीकार देदोह, तेंहकींअ आंय तीयाहांन तो आदीकार देहें। आने सेतानाल हारवुअनारांहन बादाहांन आंय उजाल्या ताराअ होच तेजुवाली मोडाय देहें। 29 जेंबी होमजांअ मागतेंह, तें पोरमेहेराअ आत्मा मोंडोळुंहन जो बोद देहे, तो कालजी राखीन उनाय।”