योहानाल जाहेर वेअल्या बाबोत्या
1
आगली गोठ
1 पोरमेहेरांय ईसु ख्रीस्तुल जाहेर केअल्या गोठ्या ईयु चोपळीम लेखल्या हाय। माहरीज आने नोक्कीज बोंणनारा हाय ते बोनाव ख्रीस्त सोताअ सेवोकुंहन जाणावे तीयाअ खातुर पोरमेहेरांय ते गोठ्या तीयाल जाहेर केअल्या। ख्रीस्तुंह सोताअ दुताल सोताअ सेवोक योहानाअहीं, मोंजे मांअहीं मोकलीन ते गोठ्या मांन जाणाव्या। 2 मांयुं योहानांय होकीकोतुम जेंहडोंज देख्यों आने जेंहडोंज आंय उनाअयो तेंहडोंज आंय लेखुंह। ए बादया गोठ्या पोरमेहेराअहींनेअ आलल्या आने ईसु ख्रीस्तुंह मांन ते होकीकोतुम जेंहडयाज आथ्या तेंहडयाज आखी देखावल्या। 3 मांयुं ईयु चोपळीम जों काय लेख्योंह तों, मोंडोळाअ लोकाहांन वाची देखावनाराल पोरमेहेर आसीरवाद दीअ, आने तों कालजी राखीन उनायन मांयुं लेखली ईयु भोवीसवाणी अ गोठीहींअ मारफोते पोरमेहेरांय देदला हुकोमाहांअ पोरमाणे चालनारांहन बी पोरमेहेर आसीरवाद दीअ। तीयाअ लीदे, ए गोठ्या वाचजा, कालजी राखीन ते उनाअजा, आने तीयाअ पोरमाणे चालजा! काहाका, ख्रीस्तुंह मांन जाहेर केअयाह ते बादा बोनाव थोळाकुज सोमोयाम बोंणीअ।
आसीया वीस्ताराअ मोंडोळुंहन योहान सालाम आखेह
4-5 आंय योहान आसीयाअ वीस्ताराअ सांतु मोंडोळुंहन ईं कागलों लेखुंह। पोरमेहेर बाहको जो आमी हायाताम हाय, जो पेअलोअ हायाताम आथो, आने जो भोवीस्यांम हायाताम रेनारो हाय तो, आने तीयाअ आत्मा जो तीयाअ राज-गादीअ आगलांअ हाय आने जीयापेअ बादी जातीअ आदीकार हाय तो, आने ईसु ख्रीस्त जीयांय पोरमेहेराअ बाबोताम लोकाहांन ईमानदारीअ रीते आख्यों आने जो मोअलामेनेअ पेअलांम पेअलोअ जीवतो उठ्यो आने जो दुन्याअ राजांयपेअ राज केअहे तो, तुमाहांपेअ मेरबानी केअ आने तुमनेंह सुख-सांती दे!
तो आपुंहपेअ माया राखेह, आने तो आपुअ खातुर सोताअ रोगुत पाळीन मोय गीयो आने एंहकींअ कीईन तीयांय आपनेंह आपुअ पापाहांअ सीक्सामेनेअ वाचाव्येंह। 6 तीयांय आपनेंह एंहडा लोक बोंणाव्याह का, जीयाहांअ जीवोनाहांम पोरमेहेर राज केअहे। तीयांय आपनेंह तीयाअ पोरमेहेर आने बाहकाअ सेवा केअनारा पुंजारा बी बोंणाव्याह। ईयाअ पोरीणामे आपुंह कोबुल केअतेंह का, ओ ईसु ख्रीस्त कायोमाअ खातुर जोही आने ताकोतावालो हाय। आमेन!
7 उनाअजा! दुन्याअ खाराब लोकाहांअ नीयाय केरांअ खातुर ख्रीस्त वादलांअरी नोक्कीज आवनारो हाय! बादें मांहेंअ तीयाल आवतो देखीअ, आने तीयाल माय टाकावनारा लोक बी तीयाल आवतो देखीअ। तोरतीमेर्येंअ बादी जातींअ मांहेंअ बी तीयाल देखीन रोळीअ। आंह, नोक्कीज एंहडोंज वीअ। a
8 मालीख पोरमेहेर आखेह का, “बाठ्ठी बाबोतीहींअ वेजलुअनारो आने तीयुहुंअ ओंत लावनारो आंयज हाय। b आंय आमी बी हायाताम हाय, पेअलोअ बी हायाताम आथो, आने भोवीस्यांम बी आवनारो हाय। आंय खुब ताकोतावालो पोरमेहेर हाय।”
योहानाल वेअलों ख्रीस्तुअ दोरसोन
9 आंय योहान तुमांअ ख्रीस्ती पावुह हाय आने तुमांअ होच आंय बी दुखें वेठुंह। जेंहकींअ तुमांअ जीवोनाहांम ख्रीस्त राज केअहे, तेंहकींअ तो मांअ जीवोनाम बी राज केअहे। आने ईसुअ आर्याअ आपुअ सोबोंदुअ लीदे जेंहकींअ तुमां धीरोज राखीन कोसोटया वेठतेंह, तेंहकींअ आंय बी धीरोज राखीन कोसोटया वेठुंह। पोरमेहेराअ आने ईसुअ बाबोताअ गोठ आंय लोकाहांन जाहेर केअत्लो तीयाअ लीदे, सारकारी ओमोलदाराहां मांन पात्मो नांवांअ बेटुम पार-होद केअलो। 10 तींहीं एक रोवीवाराअ दीह, पोवीतोर आत्मांय मांन सोताअ काबाम लीअ लेदो। तीयु वोखत मांअ फाचलांअ आंय एगाहाल मांन कांवींह आखता उनाअयो। 11 तीयाअ आवाज पीपाराअ आवाजुअ होच मोडो आने चोख्खो आथो। तो मांन एंहकींअ आखत्लो का, “तुं जों काय हीअहो, तों चांबळाअ वेटलापेअ लेखी ले आने तीयाल सांतु मोंडोळुंहपेअ मोकली दे! मोंजे का, एफेसु, सीमीरना, पेरगामु, थीयातीरा, सारदी, फीलादेलफीया, आने लावोदीकेया सेहेराहांअ मोंडोळुंहपेअ मोकली दे!” 12 मांअरी गोठ केअनाराल हेरांअ खातुर आंय फाचलांअ फीर्यो तांहांअ, मांयुं दीवा थोवुलोंअ मोडें-मोडें सांत होनाअ कोळ्यें देख्यें। 13 तीया कोळ्यांअ नीसमें एगोंह आथों, तों मांहांअ पोयराअ होच देखाअत्लों। तीयांय एंहडो एक झोब्बो पोवलो का जो तीयाअ पागुअ पाट्ली लोगुंअ पोळत्लो। आने तीयांय सोताअ सातीअरी होनाअ पोट्टो बांदलो। 14 तीयाअ मुंनकाअ चोट्यें पांडाअ उनुअ होच आने ईमाअ होच पांडेंअ आथें। तीयाअ डोंआं आगीअ झालीअ होच तेजुवाला आथा। 15 तीयाअ पाग आगीम तोपवीन चोख्खा केअला कांहांअ होच आथा। तीयाअ आवाज मोडा दोरीयाअ चुवांअ आवाजुअ होच खुब मोडो आथो। 16 तीयाअ हुदा आथाम सांत तारा आथा। तीयाअ मुंयांमेनेअ बेनुं वेल धारवाली तारवाअ नींगत्ली। तीयाअ मुंय खुब तेजुवाला दीहाअ होच तेजुवालों आथों। 17 तीयाल देखीन आंय तीयाअ पागुअहीं मोअलाअ मीलतो वीईन उंडली पोळ्यो। पेन तीयांय सोताअ हुदो आथ मांअपेअ थोवीन मांन आख्यों, “काबराअतो मां! बादी बाबोतीहींअ वेजलुअनारो, आने तीयुहुंअ ओंत लावनारो आंयज हाय। c 18 आंय कायोम जीवतो रेनारो हाय। आंय मोय गेहलो खेरो, पेन आमी आंय जीवतो हाय आने कायोम जीवतोज रेहें बी। मांहांहांन मोत आवावनारी ताकोतुपेअ आने मोअलांअ कोलीपेअ बी मांन आदीकार हाय। 19 तीयाअ लीदे, तुं जों आमी हीअ रीयोह, तों आने हातींअ तुं जों काय हेअनारो हाय, मोंजे का, आमी जे बाबोत्या बोंणत्याह आने फाचलांअ नेअ जे बाबोत्या बोंणनार्या हाय, तीयुहुंअ बाबोताम तुं लेखी लेजे! 20 तुंयुं मांअ हुदा आथाम जे सांत तारा देख्याह, आने तुंयुं दीवा थोवुलोंअ मोडें-मोडें होनाअ सांत कोळ्यें देख्येंह, तीयाहांअ ओर्थो ओ हाय: ए सांत तारा, दुताहांअ होच सांतु मोंडोळुंअ देखरेख राखनारा आगेवानाहांअ नीसाण्या हाय। आने दीवा थोवुलोंअ सांत कोळ्यें, सांतु मोंडोळुंअ नीसाण्या हाय।”