योहानाल जाहेर वेअल्या बाबोत्या
ईयु चोपळीअ बाबोताम बेन गोठ्या
ख्रीस्ती मोंडोळाअ सोरुवाताअ दीहाहांम ख्रीस्ती मांहेंअ ईसु ख्रीस्तुल सोताअ ‘मालीख’ मानत्लें। तीयाहांअ ईया वीसवासाअ लीदे, जें ख्रीस्ती नांह तें मांहेंअ, तीयाहांन सोतावत्लें। “योहानाल जाहेर केअल्या गोठ्या” नांवांअ ए चोपळी तीया सोमोयाम लेखाअली। वाचनारा ख्रीस्तींहन आस्या बांदावांअ, उफ दांअ, आने दुखाहांअ ने सोतावोणीअ वोखतुंहम बी ख्रीस्तुल ईमानदार रांअ कालावाला केरांअ ए चोपळी लेखनाराअ खास ईरादो हाय।
ईयु चोपळीअ खुब भागाहांम, आपुंह लेखनाराअ आगलांअ एक-हातींअ-एक जाहेर वेअल्या आत्मीक बाबोत्या आने एक-हातींअ-एक तीयाल वेअला दोरसोनुंअ बाबोताम वाची सेकतेंह। लेखनारांह तों बादों नीसाणींअ रुपाम लेखी देखाव्योंह। तीया सोमोयाअ ख्रीस्तींहन तों बादों होमजाअयों वीअ। पेन बीहरा बादाहांन तों बोराबोर नांय होमजाअयों वीअ। ईयु चोपळीअ मुददा एक-हातींअ-एक वेअनारा जुदा-जुदा दोरसोनुंहकींअ आने जुदी-जुदी रीते ते ने तेज मुददा फाचा-फाचा आखाअता हेरांअ मीलताह। ईयु चोपळीमेरीअ बाबोतीहींअ ओर्थो काडनारांअ वीचार जुदा-जुदा हाय तेबी, चोपळीअ खास मुददो ता एकदोम चोख्खो देखाय आवेह। तो मुददो ओ हाय: ख्रीस्त जो मालीख हाय तीयाअ मारफोते पोरमेहेर तीयाअ बादा दुसमोनाहांन आने सेतानाल सेल्ली वोखत आने पुरी रीते हारवीअ, आने जांहांअ तो पुरी रीते ए मोडी जीत मीलवीअ तांहांअ, तो तीयाअ ईमानदार लोकाहांन नोवी जुगाम ने नोवी तोरतीम राखीअ आने एंहकींअ कीईन तो तीयाहांन हारो बोदलो दीअ।
ईयु चोपळीमेरीअ बाबोतीहींअ रुपरेखा
आगली गोठ १:१-८
सोरुवाताअ दोरसोन आने सांत मोंडोळुंहन लेखलें कागलें १:९-३:२२
सांत सीलुंहवालो चांबळाअ वेटलो ४:१-८:१
सांत पीपारा ८:२-११:१९
मोडो ओजगोर ने बेन चावर्यें जोनावरें १२:१-१३:१८
जुदें-जेदें दोरसोनें १४:१-१५:८
पोरमेहेराअ रोगु रुपी सांत कोटुरा १६:१-२१
बाबीलोन सेहेराअ नास, आने चावर्या जोनावोरुअ ने झुटी रीते सोताल पोरमेहेराअ गोठ आखावनाराअ ने सेतानाअ हार १७:१-२०:१०
सेल्लो नीयाय २०:११-१५
नोवी जुग, नोवी तोरती, ने नोवों येरुसालेम सेहेर २१:१-२२:५
सेल्या गोठ्या २२:६-२१