येहुदापनेअ कागलों
1
सालामाअ गोठ
1 ईसु ख्रीस्तुअ सेवोक आने याकोबाअ पावुह आंय येहुदा, तुमनेंह ईं कागलों लेखुंह। पोरमेहेरांय तुमनेंह तीयाअ पोयरें बोंणांअ हादयेंह। आने तुमां एंहडी खातरी राखीन जीवतेंह का, पोरमेहेर बाहको तुमाहांपेअ माया राखेह आने ईसु ख्रीस्त तुमनेंह हाचवेह।
2 पोरमेहेर तुमाहांपेअ वादारे ने वादारे दाया केअ, आने तुमनेंह वादारे ने वादारे सांती दे, आने तुमाहांपेअ वादारे ने वादारे माया राखे!
ईं कागलों लेखांअ कारोण
3 मांअ मेराला दोस्दारुहुं, पोरमेहेरांय आपनेंह आपुअ पापाहांअ सीक्सामेनेअ वाचाव्येंह तीया बाबोताम तुमनेंह लेखांअ मांअ खुब मोर्जी आथी। तांवज मांन एंहडों लाग्यों का, बीहरा लोक ख्रीस्ती धारांअ वीरुद केअताह तेबी, पोरमेहेरांय सोताअ लोकाहांन कायोमाअ खातुर होपला ते धारा हाचवी राखांअ तुमां झुमतें रा एंहडो उफ तुमनेंह दांअ खातुर, ईं कागलों लेखांअ जोरुल हाय। 4 काहाका, थोळाक लोक सुपी रीते तुमांहम दाखोल वीअ गीयाह। ते पोरमेहेरांय देखावली हाची वाटे नांह चालता। ते पोरमेहेराअ मेरबानीअ उलटो ओर्थो काडताह, आने तीयु मेरबानील गोंवें तीयु बायाअरी चोरी खांअ सुट तोरीके वापरुअताह। आने ते आपुअ एकुज उपरी आने मालीख ईसु ख्रीस्तुअ से सेटे जाता रीयाह। ईया लोकाहांन सीक्सा केरांअ बाबोताम ता, पोरमेहेरांय खुब वोरसांअ पेअलांअज पोवीतोर लेखाणाहांम आखी देदोंह।
पोरमेहेर तीयाअ वीरुद केअनारांअरी केंहकींअ वोरतेह?
5 मालीखांय ईसरायेल लोकाहांन मीसोर देसाअ गुलामीमेनेअ सोळवुअला। तेबी फाचलांअ नेअ तीयांय तीयाहांमेर्याअ जेबी तीयाल ईमानदार नांह रीया तीया लोकाहांअ नास केअलो। ईं बादों तुमां जांअतेंहज। तेबी फाचो आंय तुमनेंह ते बाबोत ईत केरावुंह। 6 आंय तुमनेंह तीया होरगाअ दुताहांअ बाबोताम बी ईत केरावुंह का जे, पोरमेहेरांय तीयाहांन देदला आदीकाराअ होद उनखी गेहला, आने होरगामेर्योंअ सोताअ रेहठाण सोळी देदलों। तीयाअ लीदे, पोरमेहेरांय तीयाहांन आंदारी कोलीम कायोमाअ खातुर बांदी थोव्याह। तींहीं ते, पोरमेहेर बादाहांअ नीयाय कीअ तीया मोडा दीह लोगुंअ रे, एंहकींअ पोरमेहेरांय तीयाहांन कोंडी थोव्याह। 7 एंहकींअज पोरमेहेरांय सोदोम आने गोमोरा सेहेराहांअ आने तीयाअ पाहल्याअ गांवांहांमेर्याअ लोकाहांन तीयाहां केअला पापाहांअ खातुर सीक्सा केअयी। ते सीनालाम आने कुदरोतुअ वीरुदुअ सांवसारुम पोळी गेहला। तीयाअ लीदे तीया सेहेराहांअ लोक कायोम बोलती रेनारी आगीम सीक्सा भोगवुअता रीयाह। आने तुमांअमेर्याअ एंहडा पाप केअनाराहांन पोरमेहेर केल्ली सीक्सा दीअ तीयाअ ते लोक चेतवोंणीअ नोमुना बोंण्याह।
पोरमेहेराअ वीरुद केअनारा बीहरा लोक
8 तेबी ते झुटा बोद देनारा तीया जुना जोमानाअ लोकाहांअ होचुज वोरतुअताह। ते सोताल होपनाम देखाअला दोरसोनुंअ आदारे पारकी बायाहांअरी चोरी खायन सोताअ सोरीलुंहन बाटलावताह। आने ते तीया दोरसोनुंअ आदारे पोरमेहेराअ आदीकारुल बी नोफरोत केअताह। 9 होरगाअ दुताहांअ उपरी मीखायेलुल तीया झुटा बोद देनाराहांअ केअता वादारे आदीकार आथो तेबी तीयांय तीयाहांअ होच नांह केअयों। मोसेअ मुरदों डाटांअ बाबोताम सेतानाअरी तीयाअ आळा-झोळी लागली तांहांअ होरगाअ दुत मीखायेलुल एंहडों नांह लाग्यों का, खाराब सोब्दांहकींअ सेतानाअ भुल काडांअ सोताअ आथाम हाय। पेन उलटों, तीयांय ता सेतानाल ओतोंअज आखलों, “मालीखुज तुल ठोपको दे!” 10 पेन ते झुटा बोद देनारा, ते सोते जों नांह होमजुअता, तीयाअ नींदा केअताह। ते लोक ता, जों काय होमजुअताह, मोंजे का, डोगरांअ होच कुदरोती रीते तीयाहांअ मोनाहांम जेंहकींअज वीचार आवताह तेंहकींअज वोरतुअताह, आने तीया वीचारुंहनुंज सोताअ नासाअ कारोण बोंणावी देताह। 11 तीया लोकाहांअ आवीज बोंणीअ! काहाका, जेंहकींअ कायीनुंह आदरायाअ लीदे सोताअ पावुहलुज माय टाकलो, तेंहकींअ ए लोक बी खाराब हाय। आने जेंहकींअ बालामुंह सोताअ पोयसाहांअ लालोच पुरी केरांअ खातुर ईसरायेल लोकाहांमेर्याअ थोळाकाहांन बीहरा देवुंअ भोकती केरावली, तेंहकींअज ए लोक बी सोताअ पोयसाहांअ लालोच पुरी केरांअ मोर्जी राखताह। जेंहकींअ कोराहुंह मोसेअ वीरुद धामाल उठावली, तेंहकींअ ए लोक बी मोंडोळाअ वोळीलुंअ वीरुद धामाल उठावताह। 12 जांहांअ तुमां मालीखाअ मायाअ ईयादगीरीम मांडो खांअ टोलवाअतेंह, तांहांअ ए लोक बी सोरोम वोगुराअ बोंणीन तुमांअरी बोहीन खाताह-पीताह। आने तींहीं बी ते बीहराहांअ वीचार केअया वोगुर सोताअज सोगवोळ हाचवी लेताह। ते लोक ता हुकली जोमीनुपेअ साटो बी वोहरात देया वोगुर वाराअरी हाअडाय जानारा कामु वोगुराअ वादलांअ होच नोककामा हाय। आने ते सीजोन वीती जाय तेबी एक बी फोलवों जीयाहांअ नांह लागतों तीया चाळाहांअ होच बी हाय। ते सोते आत्मीक रीते मोअला हाय ओतोंअज नांह, पेन जेंहकींअ मुलाअरी उपटी टाकलें चाळें फोलवों नांह दीअ सेकतें, तेंहकींअ ते बीहराहांन आत्मीक जीवोन दीईज नांह सेकता। 13 जेंहकींअ दोरीयाअ चुवें दोरीयामेरीअ गोंदकी हाअडी लावीन बादाहांन नोजरे चोळे तीयु रीते तीयाअ फेबदें तोळीपेअ फेलावतेंह, तेंहकींअ ए लोक बी सोरोमु वोगुर सोताअ खाराब कामें बीहराहांन देखावताह। जेंहकींअ सोताअ जागा बोदली-बोदलीन उगनारा तारांअ नीसाणीअ आदारे जाहाजुवाला सोताअ जाहाजुल सोलामोत रीते चालवी नांह सेकता, तेंहकींअ ईया लोकाहांपेअ बी आदार राखाय एंहडों नांह। तीया झुटा बोद देनाराहांन सीक्सा दांअ खातुर पोरमेहेरांय आंदाराम-आंदार्यो जागो कायोमाअ खातुर रोकी थोव्योह। 14 आदामुनेअ सोठ्ठी पीळीअ मांहुंअ हेनोख, तीया लोकाहांअ बाबोताम खुब वोखतु पेअलांअज भोवीसवाणी दीअ गीयोंह। तीयांय एंहकींअ आख्योंह, “वेरा ता खेरा! मालीख सोताअ लाखो पोवीतोर दुताहांअरी आवेह। 15 तो बादा खाराब लोकाहांअ नीयाय केरांअ आवेह। तीया लोकाहीं पोरमेहेराअ वीरुद जें-जें खाराब कामें केअयेंह, आने तीयाअ वीरुद वेठाय नांय एंहडा खुब खाराब सोब्दा ते गोग्याह, तीयाअ खातुर तीयाहांन गुनाला जाहेर केरांअ खातुर तो आवेह।” 16 ते झुटा बोद देनारा ता, कायोम पोरमेहेराअ आने बीहरा लोकाहीं अ वीरुद बोबळ्याज केअताह। आने पोरमेहेराअ आने बीहरा लोकाहीं अ भुल्याज होदया केअताह। आने तीयाहांअ मोनाम जेंबी खाराब कामें केरांअ वीचार आवताह, तीयाहांअ पोरमाणे तें खाराब कामें केअयाज केअताह। ते मोडया-मोडया गोठ्या केअताह। आने ते सोताअ लाबुअ खातुर गुल्या-मोद गोठ्या केअताह।
चेतवोंणी आने हीकामोण
17 पेन मांअ दोस्दारुहुं! आपुअ मालीख ईसु ख्रीस्ताअ खास चेलाहां ईया लोकाहांअ बाबोताम जे भोवीसवाणी केअली ते तुमां ईत राखजा। 18 तीयाहां तुमनेंह चेतवोंणी देदली का, सेल्लो जोमानो एंहडो आवीअ का, तींहमें एंहडा लोक पेदा वीअ, जे पोरमेहेराअ आने तुमांअ मोस्कुरी कीअ, आने सोताअ पापी मोर्जींअ पोरमाणे चालीअ। आने पोरमेहेराअ आने तीयाअ लोकाहांअ मोस्कुरी कीअ। 19 एज लोक वीसवास्यांहम फाट-फुट पाळतह, आने सोताअ खाराब मोर्जींअ पोरमाणे चालताह, आने तीयाहांम पोवीतोर आत्मा नांह रेतो।
20 पेन मांअ मेराला दोस्दारुहुं, तुमां तुमनेंह मीलला एकदोम पोवीतोर धारांअ पोरमाणे एक-बीहराल ख्रीस्ती जीवोनाम वादावजा! पोवीतोर आत्माअ दोरवोणीकींअ पोरमेहेराल ओरुज केअजा! 21 आने पोरमेहेर कायोम माया राखेह तेंहडा लोकाहांन सोबे एंहडी रीते जीवोन जीवजा! आने आपुअ मालीख ईसु ख्रीस्त तुमाहांपेअ दाया कीईन तुमनेंह कायोमाअ खातुर जीवावनारो हाय तीयाअ वाट जोवतें रेजा! 22 आने तुमांअमेर्याअ थोळाकाहांन ख्रीस्ती वीसवासाअ बाबोताम सोंका जाहे। तीयाहांपेअ दाया राखीन ते सोंका दुर केअजा! 23 आने जें मांहेंअ झुटा बोद देनाराहांअ बोद मानीन नोरकाम जाय रीयेंह, तीयाहांन तींहमें जाता वाचावजा! जीयाहांपेअ झुटा बोद देनाराहांअ बोदाहांअ ओसोर पोळीह तीयाहांपेअ माया राखीन तीयाहांन पोरमेहेराअ वाटे चालांअ मोदोत केअजा! पेन चेतीन रेजा का, तुमां बी तीयाहांअ होच पापाम पोळी नांय जा। जेंहकींअ तुमां खाराब सीतरांहन ओतेंअज नोफरोत नांह केअतें, पेन तीया सीतरांहन आथलीन बाटलाअनारा मांहांहांन बी नोफरोत केअतेंह, तेंहकींअज तें मांहेंअ जीयु खाराब मोर्जींअ पोरमाणे चालतेंह, तीयु खाराब मोर्जींअ पोरमाणे वोरतांअ का वीचार केरांअ बी नोफरोत केअजा!
पोरमेहेराअ गुणगान
24 आपनेंह वाचावनारो एकुज पोरमेहेर पापाम पोळता तुमनेंह हाचवी सेकेह। आने तुमनेंह तीयाअ खुब उजवोळावाली हाजरीम, डागु वोगुराअ, आने खुब ओंह-खुसाल जीवु, सोताअ आगलांअ लावीन उबें राखी सेकेह। 25 मांहेंअ आपुअ मालीख ईसु ख्रीस्तुअ मारफोते पोरमेहेर जो एखलोज हाचो पोरमेहेर हाय ने आपनेंह वाचानारो हाय तीयाअ, गुणगान केअतें रे ने मान देतें रे! ताकोत आने आदीकार युगुंअ सोरुवातनेअ तीयाअज आथी, आने आमी बी तीयाअज हाय, आने कायोम तीयाअज रीअ! आमेन!