27
राजपाल पीलाताअ आगलांअ ईसु
(मार्क १५:१; लुक २३:१-२; योहान १८:२८-३२)
1 बीहरे दीह उजालों वेअतां बादा मोडा पुंजाराहां आने लोकाहांअ वोळीलाहीं ईसुल केंहकींअ माय टाकुलोंअ तों नोक्की केअयों। 2 हातींअ तीयाहां तीयाल बांदयो आने तीयाल लीअ जायन राजपाल पीलाताल होपी देदो।
येहुदा कोंअबी मोअहे
(खास चेलाहांअ कामें १:१८-१९)
3 ईसुल तेरावी देनारा येहुदाल खोबुर पोळी का, तीयाहां ईसुल माय टाकांअ नोक्की केअयोंह। तांहांअ तीयांय जों केअलों तीयाअ लीदे तो खुब दुखी वीयो। आने मोडा पुंजाराहां ने वोळीलाहीं तीयाल देदला चांदीअ तीस सीक्का तीयाहांन फाचा देता 4 तीयांय आख्यों,“गुना वोगुराअ मांहांअल तेरावी दीईन मांयुं पाप केअयोह।” तांहांअ तीयाहां तीयाल आख्यों, “तींहमें आमांअ काय? तोअ काम तुं जांव। ” 5 तांहांअ येहुदांय मोंदीराम जायन तींहीं ते चांदीअ सीक्का टाकी देदा आने तींहींनेअ जायन तो कोंअबी मोअयो।
6 तांहांअ मोडा पुंजाराहां ते पोयसा वीसी लेदा आने एक-बीहराल आख्यों, “ए ता एक मांहांअल माय टाकांअ बोदलाम मीलला पोयसा हाय। तीयाअ लीदे आपुंह ईया सीक्काहांन मोंदीराअ तीजोरीम थोवी नांह सेकता।” 7 तीयाअ लीदे तीया पोयसाहांअ बाबोताम तीयाहां ठोराव केअयो आने तीयाहांकींअ ओजाण्यें मांहेंअ जें मोय जाय तीयाहांन डाटांअ खातुर कुंबाराअ खेत वेचाअतों लेदों। 8 ईया कारोणाअ लीदे, आमी लोगुंअ तों खेत “रोगुताअ खेत” आखाअहे। 9 पोरमेहेराअ गोठ जाहेर केअनारा येरेमीयांय जों आखलों तों पुरों वीयों का,
“ईसरायेल लोकाहीं तीयाअ कींमोताअ खातुर जे चांदीअ तीस सीक्का नोक्की केअला,
आने मालीखांय मांन हुकोम केअयो तीयाअ पोरमाणे,
तीया सीक्कांहकींअ तीयाहां कुंबाराअ खेत वेचाअतों लेदों।”
पीलात ईसुल सावाल केअहे
(मार्क १५:२-५; लुक २३:३-५; योहान १८:३३-३८)
11 ईसु राजपालाअ आगलांअ उबी रीयो। तांहांअ राजपालांय तीयाल फुच्यों, “तुं येहुदीहींअ राजा हाय का?” तांहांअ ईसुंय जोवाब देदो, “तुं सोतेज आखोह।” 12 मोडा पुंजाराहां आने वोळीलाहीं ईसुपेअ गुना थोव्या तेबी तीयांय काय बी जोवाब नांय देदो। 13 तांहांअ पीलातांय तीयाल आख्यों, “ते तोअपेअ केंहडा-केंहडा गुना थोवताह, ते तुं नांह उनाअतो का?” 14 पेन ईसुंय ता एक सोब्दाअ बी जोवाब नांय देदो। तीयाअ लीदे, राजपालाल खुब नोवाय लागी।
ईसुल मोताअ साज्या
(मार्क १५:६-१५; लुक २३:१३-२५; योहान १८:३९-१९:१६)
15 दोर वोरसे पास्काअ तेहवाराअ वोखत, जीया बी केदील सोळी थोवांअ लोक मागणी केअ, तीयाल सोळी थोवे एंहडो राजपालाअ रीवाज आथो। 16 तीयु वोखत बाराबास नांवांअ एक नांवांअतो केदी आथो। 17 तीयाअ लीदे, तींहीं टोलवाअला लोकाहांन पीलातांय फुच्यों, “आंय तुमांअ खातुर केडाल सोळी थोवुं? बाराबासाल का ख्रीस्त आखाअनारा ईसुल?तुमांअ काय मोर्जी हाय?” 18 काहाका, तो जांअत्लो का मोडा पुंजाराहां खाली आदरायाअ लीदेज ईसुल तीयाअ आथाम होप्योह।
19 पीलात जोजाअ खुळसीपेअ बोठलो तांहांअ तीयाअ कोअवालींय तीयाल खोबुर मोकली का, “ईया हाचा मांहांअल तुं काय बी साज्या मा केअतो। काहाका, आज रातींअ ईयाअ लीदे मांन खुब खाराब होपनों पोळ्योंह।” 20 पेन मोडा पुंजाराहां आने वोळीलाहीं टोलामेर्याअ लोकाहांन चोळव्या का, ते बाराबासाल सोळी दांअ आने ईसुल माय टाकांअ पीलातापेअ मागणी केअ। 21 तीयाअ लीदे, “ईया बेनाहांमेनेअ केडाल आंय तुमांअ खातुर सोळी थोवुं? तुमांअ काय मोर्जी हाय?” एंहकींअ राजपालांय लोकाहांन फुच्यों तांहांअ तीयाहां जोवाब देदो, “बाराबासाल”। 22 तांहांअ पीलातांय तीयाहांन फुच्यों, “तांहांअ ख्रीस्त आखाअनारा ईसुल आंय काय क्युंव?” तांहांअ तीयाहां बादाहां जोवाब देदो, “तीयाल कुरुसापेअ जोळ।” 23 तांहांअ पीलातांय फुच्यों, “काहा रा? तीयांय काय गुनो केअयोह?” पेन ते पेअलांअ केअता वादारे जोरपेअ बोंबली उठया, “तीयाल कुरुसापेअ जोळ।”
24 पीलातांय हेअयों का तीयाअ कायज चालतों नांह, पेन उलटों लोक धामाल केरांअ चालु केअताह। तांहांअ तीयांय पांय लेदों ने लोकाहांअ आगलांअ सोताअ आथ तुवीन आख्यों, “ईया मांहांअ मोताअ बाबोताम आंय नीरदुस हाय। तो गुनो तुमांअ माथे।” 25 तांहांअ बादा लोकाहीं आख्यों, “तीयाअ मोताअ गुनो आमांअ माथे ने आमांअ पोयराहांअ माथे।” 26 हातींअ तीयांय तीयाहांअ खातुर बाराबासाल सोळी थोव्यो। पेन ईसुल ता तीयांय तीयाल चापकाहांअ मार ठोकीन कुरुसापेअ जोळांअ खातुर सोयनीकाहांन होपी देदो।
सोयनीक ईसुअ मोस्कुरी केअताह
(मार्क १५:१६-२०; योहान १९:२-३)
27 हातींअ राजपालाअ सोयनीक ईसुल राजपालाअ मेहेलाम लीअ गीया आने बादा सोयनीक तीयाअ चारुवेल टोलवाअया। 28 तीयाहां तीयाअ डोगलो काडीन तीयाल जांबा रोंगाअ झोब्बो पोवाव्यो। 29 हातींअ तीयाहां काटाहांअ मुंगोट बोंणावीन तीयाअ मुनकापेअ थोव्यो, आने तीयाअ हुदा आथाम एक होटी तेरावी आने तीयाअ आगलांअ गुठोणे पोळीन तीयाअ मोस्कुरी केअता आख्यों, “ओ येहुदीहींअ राजा, सालाम!” 30 हातींअ ते तीयापेअ थुप्या आने होटी लीईन तीयाअ मुनकाम ठोकत्ला। 31 तीयाअ मोस्कुरी कीअ रीया हातींअ तीयाहां झोब्बो काडीन तीयाअ सोताअज डोगलो तीयाल पोवाव्यो, आने कुरुसापेअ जोळांअ खातुर ते तीयाल लीअ गीया।
सोयनीक ईसुल कुरुसापेअ जोळी देताह
(मार्क १५:२१-३२; लुक २३:२६-४३; योहान १९:१७-२७)
32 सोयनीक सेहेराअ बारे नींगत्ला तांहांअ तीयाहांन कुरेने गांवांअ सीमोन नांवांअ एक मांहुंअ मील्यों। तांहांअ तीयाहां तीयाल ईसुअ कुरुस जोबोर-जोस्ती उसलाव्यो। 33 ते ‘गोलगोथा’ नांवांअ जागे आवी पोच्या। ‘गोलगोथा’ मोंजे ‘खोपरीअ जागो’। 34 तांहांअ सोयनीकाहां ईसुल कोळवी दावा बेळलो दाराख्साअ रोह पीयांअ देदो। पेन साकी हीईन तीयांय तो नांय पीदो।
35 तीयाहां तीयाअ पोतळें काडी लेदें आने हातींअ तीयाल कुरुसापेअ जोळी देदो। हातींअ तीयाहां चीठ्या टाकीन तीयाअ पोतळें माजाअ-माज वाटी लेदें। 36 हातींअ तीयाहां तींहीं बोहीन तीयाअ चोकी केअयी। 37 तीयाहां तीयाअ गुनो देखावता पाट्याम लेखाव्यों का, “येहुदीहींअ राजा ईसु ओज हाय।” हातींअ तीयाहां तों पाट्यों कुरुसापेअ ईसुअ मुंनकाअ उपर्याअ भागाम लागव्यों। 38 हातींअ तीयाहां ईसुअरी बेन लुटाराहांन कुरुसाहांपेअ जोळ्या। एकाल तीयाअ हुदीवेल आने बीहराल उलटीवेल।
39 कुरुसाअहीं रीईन जानारा लोक सोताअ मुंनकें टुडावी-टुडवीन ईसुअ ओपमान केअत्ला का, 40 “मोंदीराल तोळी टाकनारा आने तीयाल तीनुंज दीहाहांम फाचों बांदनारा, तुं सोतालुज वाचाव; जो तुं पोरमेहेराअ पोयरो वीअ ता, कुरुसापेनेअ एठा उती आव!”
41 एंहकींअज कीईन, मोडा पुंजाराहां, नीयोम हीकवुअनाराहां, आने वोळीलाहीं बी तीयाअ मोस्कुरी केअता आख्यों, 42 “ईयांय बीहराहांन वाचाव्या, पेन सोताल तो वाचावी नांह सेकतो। ओ ता ईसरायेलाअ राजा हाय; तीयाअ आमी कुरुसापेनेअ एठा उती आवांअ जोजे। तांहांअ आमां तीयापेअ वीसवास कीअहुं। 43 तो पोरमेहेरापेअ भोरुचो राखेह; जो पोरमेहेर तीयापेअ राजी वीअ ता, तो ईयाल आमी वाचावे। काहाका, तीयांय आखलों, ‘आंय पोरमेहेराअ पोयरो हाय।’”
44 आने ईसुअरी कुरुसाहांपेअ जोळाअला लुटाराहां बी ईयाज पोरमाणे तीयाअ मोस्कुरी केअयी।
ईसुअ मोत
(मार्क १५:३३-४१; लुक २३:४४-४९; योहान १९:२८-३०)
45 पारगाप बारेक वाजेनेअ तीनेक वाजे लोगुंअ आखा देसाम आंदारों फेलाय गीयों। 46 लोग-भोग तीनेक वाजे ईसु जोरपेअ बोंबली उठ्यो, “एली, एली, लेमा साबाकथानी?” ईयाअ ओर्थो ओ हाय का, “ओ मांअ पोरमेहेर, मांअ पोरमेहेर, तुंयुं मांन काहा सोळी देदोह?” 47 कुरुसाअ पाही उबी रेहला लोकाहांमेनेअ थोळाकाहीं ईं उनायन आख्यों, “तो एलीयाल हादेह।” 48 तांहांअ तीयाहांमेर्योंअ एक मांहुंअ तुरुतुज दोवळी जायन पोचो लोब्बोळ लीअ आलों, आने तीयाल राही दाराख्साअ रोहाम पीजव्यो, आने लाकळीअरी बांदीन तो ईसु चुहे तीयाअ खातुर तीयाल देदो। 49 पेन बीहराहां आख्यों, “उबी रे! एलीया ईयाल वाचावांअ आवेह का नांह तों आपुंह हेअजी!” 50 हातींअ फाचे जोरपेअ बोंबलीन ईसुंय सोताअ जीव सोळ्यो। 51 तीयुज घेळी मोंदीराअ पोळदो उपेअनेअ एठा लोगुंअ चीरायन बेन कुटका वीअ गीयो। आने तोरती कापी आने खोळकें फाटी गीयें। 52 आने कोबीर उगळी गीया आने मोय गेहलें पोवीतोर मांहेंअ फाचें जीवतें उठयें। 53 ईसु फाचो जीवतो उठ्यो हातींअ तें मांहेंअ कोबीराहांमेनेअ नींग्यें आने पोवीतोर सेहेर येरुसालेमाम गीयें आने खुब लोकाहांन देखाअयें।
54 तोरतीकोंप आने तीयाअरी जेबी बोनाव बोंणला ते देखीन, एकहोव सोयनीकाहांअ उपरी ओमोलदार आने ईसुअ चोकी केरांअ तीयाअरी जे सोयनीक आथा ते बादा खुब बी गीया आने तीयाहां आख्यों का, “ओ खोरेखोर पोरमेहेराअ पोयरो आथो!”
55 सेटे उबी रीईन ए बोनाव हेअनार्या खुब बाया बी तींहीं आथ्या। ते ईसु गालील जील्लाम आथो तांहांअ तीयाअ चेल्या बोंणल्या आने आरी रीईन तीयाअ सेवा केअत्ल्या। 56 तीयुहुंम मागदाला गांवांअ मारीयोम, याकोब आने योसेफाअ याहकी मारीयोम, आने झेब्दीअ पोयरो याकोब आने योहानाअ याहकी आथ्या।
ईसुअ लास कोबीराम ओजाअहे
(मार्क १५:४२-४७; लुक २३:५०-५६; योहान १९:३८-४२)
57 वाअतों पोळ्यों तांहांअ, आरीमाथेया गांवांमेर्योंअ योसेफ नांवांअ एक मालदार मांहुंअ तींहीं आलों। तो सोते बी ईसुअ चेलो आथो। 58 तीयांय पीलाताअहीं जायन ईसुअ लास मागी। तांहांअ पीलातांय ते तीयाल होपांअ हुकोम केअयो। 59 हातींअ योसेफांय लास लीईन तीयुल नोवा रेसमी पोतळाम चोंअडावी, 60 आने खोळकाम खोरवीन बोंणावली सोताअ नोवी कोबीराम ते ओजी, आने कोबीराअ मुवालापेअ एक मोडो ढोगळो उंडलावीन तो जातो रीयो। 61 मागदाला गांवांअ मारीयोम आने बीहरी मारीयोम कोबीराअ आगलांअ बोही रेहल्या।
कोबीराअहीं सोयनीक चोकी केअताह
62 बीहरे दीह, मोंजे, सोनीवारुअ दीह, मोडा पुंजाराहां आने फोरीसीहीं पीलाताअहीं जायन, 63 तीयाल आख्यों, “साहेब, आमनेंह ईत हाय का, तो ठोग जीवतो आथो तांहांअ तीयांय आखलों, ‘तीन दीह हातींअ आंय फाचो जीवतो उठेंह।’ 64 तीयाअ लीदे, चोकीदार तीन दीह लोगुंअ कोबीराअ बोराबोर चोकी केअ एंहडो तुं हुकोम केअ। नेता तीयाअ चेला आवीन तों मुरदों चोय जाय आने हातींअ लोकाहांन आखीअ, ‘तो फाचो जीवतो उठ्योह।’ ते झुटाय तीयांय पेअलांअ आखली तीया झुटायुअ केअता वादारे खाराब वीअ।”