26
ईसुल माय टाकांअ कावोतरों
(मार्क १४:१-२; लुक २२:१-२; योहान ११:४५-५३)
1 ए बादया गोठ्या आखी पारवाअयो तांहांअ ईसुंय तीयाअ चेलाहांन आख्यों, 2 “तुमां जांअताह का, बेन दीह हातींअ पास्का तेहवार आवेह। तांहांअ मांहांअ पोयराल मोंजे मांन एंहडा लोकाहांअ आथाहांम होपी देवाय, का जे मांन कुरुसापेअ जोळीन माय टाकीअ।”
3 तीयुज वोखत मोडा पुंजारा आने येहुदीहींअ वोळील मोडांम-मोडा पुंजारा कायफाअ मेहेलाम टोलवाअया, 4 आने ईसुल चुपी रीते तीईन माय टाकांअ तीयाहां कावोतरों केअयों। 5 पेन तीयाहां आख्यों का, “तेहवाराअ वोखत तीयाल माय टाकुलोंअ नांय। काहाका, मांहेंअ धामाल कीअ।”
बेथानी गांवांम एक बाय ईसुअ मुनकापेअ आस्तोर रीसवेह
(मार्क १४:३-९; योहान १२:१-८)
6 ईसु बेथानी गांवांम सीमोन जो पेअलांअ कोड रोगावालो आथो तीयाअ कोअमें आथो तांहांअ, 7 एक बाय तीयाअहीं आली। तीयुपेअ आरोसाअ ढोगळाअ एक बोरनी आथी जींहमे मोगों आस्तोर पोअलों आथों। ईसु खाहलो तांहांअ तीयुंय तों आस्तोर ईसुअ मुनकापेअ रीसवी देदों। 8 ईं हीईन चेला खीजवाअया। तीयाहां आख्यों का, “ईयुंय ईं आस्तोर एंहडोंज काहा वेळफी टाक्यों? 9 ते ईयाल वेचती ता खुब पोयसा उबजुअता आने ते पोयसा ते गोरीबाहांन दीअ सेकती।”
10 तांहांअ चेलाहांअ गोठ जांयन ईसुंय तीयाहांन आख्यों, “ईयु बायुल हेरान काहा केअताह? ईयुंय ता मांअ खातुर हारों काम केअयोंह। 11 गोरीब मांहेंअ तुमांअरी कायोम रेनारें हाय। पेन आंय कांय तुमांअरी वादारे नांह रेनारो। 12 मांअ सोरीलाल डाटांअ तीयारीम ईयुंय ईं आस्तोर तीयापेअ रीसव्योंह। 13 आंय तुमनेंह नोक्कीज आखुंह: आखी दुन्याम जींहीं बी हारी गोठ जाहेर केराय, तींहीं ईयु बायुंय जों केअयोंह तों बी ईयुअ ईयादगीरीम आखाय।”
येहुदा ईसुअ दुस्मान बोंणी जाहे
(मार्क १४:१०-११; लुक २२:३-६)
14 हातींअ केरीयोत गांवांअ येहुदा जो ईसुअ बारा चेलाहांमेर्योअ आथो तीयांय मोडा पुंजाराहांअहीं जायन 15 तीयाहांन फुच्यों, “ईसुल आंय तेरावी द्युंव ता तुमां मांन कोताअ पोयसा दांअ राजी हाय?” तांहांअ तीयाहां तीयाल चांदीअ तीस सीक्का गोंईंन देदा। 16 आने तेहेअनेअ येहुदा ईसुल तेरावी दांअ मोको होदांअ टेक्यो।
ईसु पास्काअ मांडो खांअ तीयारी केअहे
(मार्क १४:१२-२१; लुक २२:७-१३, २१-२३)
17 खोमीरा वोगुराअ नोटामनेअ बोंणावला मांडा खांअ तेहवाराअ पेअलाअ दीह चेलाहां ईसुअहीं जायन फुच्यों, “तुं खाय सेको तीयाअ खातुर पास्का तेहवाराअ मांडो आमां कांहीं तीयार केअजी? तोअ काय मोर्जी हाय?” 18 तांहांअ ईसुंय आख्यों, “सेहेराम फोलाणा मांहांअहीं जायन तीयाल आखजा, ‘गुरुजी आखेह का, तुल आखलो तो मांअ वोखत पाही आलोह। तोअ कोअमें आंय मांअ चेलाहांअरी पास्काअ मांडो खांअ हाय।’” 19 तांहांअ चेलाहां ईसुंय तीयाहांन आखलों तीयाअ पोरमाणे केअयों। आने तीयाहां पास्काअ मांडो तीयार केअयो।
ईसु सोताल तेरावी देनाराअ बाबोताम आखेह
(मार्क १४:१७-२१; लुक २२:२१-२३; योहान १३:२१-३०)
20 वाअतों पोळ्यों तांहांअ ईसु बारु चेलाहांअरी खांअ बोठो। 21 ते खाहला तांहांअ तीयांय आख्यों, “आंय तुमनेंह नोक्कीज आखुंह: तुमाहांमेर्योअ एक मांन तेरावी दीअ।” 22 तांहांअ चेला खुब दुखी वीया आने ते वारा-फोरती तीयाल फुचांअ टेक्या का, “मालीख, तुल तेरावी देनारो आंय ता नांहक्ने?” 23 तांहांअ ईसुंय जोवाब देदो, “मांअरी एकुज वाटकीमेर्याअ रोहाम मांडो पीजवीन जो खाहे तोज मांन तेरावी देनारो हाय। 24 मांहांअ पोयरो आंय ता जेंहकींअ मांअ बाबोताम लेखलों हाय तीयाअ पोरमाणेज मोय जानारो हाय। पेन जों मांहुंअ मांन तेरावी देनारों हाय तीयाल बोराबोर वीतीअ। तों मांहुंअ जो जोनम्योंज नांय वेअतों ता, तीयाअ खातुर वादारे हारों आथों।” 25 तांहांअ ईसुल तेरावी देनारा येहुदांय फुच्यों, “गुरुजी, तो आंय ता नांहक्ने?” तांहांअ ईसुंय जोवाब देदो, “आंह, तो तुंज हाय।”
मालीखाअ मोताअ ईयादगीरीअ मांडो
(मार्क १४:२२-२६; लुक २२:१४-२०; १ कोरींथी ११:२३-२५)
26 ते खाहला तांहांअ ईसुंय मांडो लेदो आने पोरमेहेराअ आभार मानीन तो पाज्यो; आने चेलाहांन तो देता आख्यों, “ओ ला ने खा। ओ मांअ सोरीलुअ नीसाणी a हाय।” 27 हातींअ तीयांय पीयालो लेदो आने पोरमेहेराअ आभार मान्यो आने चेलाहांन तो देता आख्यों, “तुमां बादा ईंहमेनेअ पीया। 28 काहाका, ईंहमेर्योअ दाराख्साअ रोह, आंय पाळनारो हाय तीया मांअ रोगुताअ नीसाणी b हाय। ईया रोगुताकींअ पोरमेहेर खुब लोकुंअ पाप माफ केरांअ खातुर तीयाहांअरी नोवो कारार केअहे। 29 आंय तुमनेंह आखुंह, मांअ बाहकाअ राज्याम आंय तुमांअरी नोवी रीते दाराख्साअ रोह नांय प्युंव तीदीह लोगुंअ आंय ओ दाराख्साअ रोह पीनारोज नांह।”
30 आने एक गीत आखीन हातींअ ईसु ने चेला जेतुन चाळाहांवाली डोगीअ वेल जांअ नींग्या।
पीतोराअ बाबोताम भोवीसवाणी
(मार्क १४:२७-३१; लुक २२:३१-३४; योहान १३:३६-३८)
31 वाटे ईसुंय चेलाहांन आख्यों, “आज रातींअ तुमां बादा मांन सोळीन नाही जाहा। c काहाका, पोवीतोर लेखाणाहांम लेखलों हाय का,
‘आंय भारवाळाल माय टाकेंह,
आने बादें घेटें फुटकुर वीअ जाय।’ 32 पेन जीवतो उठीन हातींअ आंय तुमांअ आगलांअ गालीलाम जाहें।” 33 तांहांअ पीतोरांय तीयाल जोवाब देता आख्यों, “बीहरा बादा तुल सोळीन जाय तेबी आंय कीदीह बी तुल सोळीन नांय जांव।” 34 तांहांअ ईसुंय तीयाल आख्यों, “आंय तुल नोक्कीज आखुंह, आज रातींअ कुकळो वाहे तीयाअ पेअलांअ तुं तीन वोखत आखोह का, तुं मांन नांह ओअखुअतो।” 35 तांहांअ पीतोरांय तीयाल आख्यों, “मांअ तोअरी मोरांअ पोळे तेबी आंय एंहकींअ नांय आखुं का, आंय तुल नांह ओअखुअतो।” बीहरा चेलाहां बी एंहकींअज आख्यों।
गेथसेमाने वाळीम ईसु पोरमेहेराल ओरुज केअहे
(मार्क १४:३२-४२; लुक २२:३९-४६)
36 हातींअ ईसु तीयाअ चेलाहांअरी “गेथसेमाने” नांवांअ एक जागे गीयो। तींहीं तीयांय तीयाहांन आख्यों, “आंय एपुंअ जायन पोरमेहेराल ओरुज कीअहुं तांव तुमां ईंहीं बोहा।” 37 पीतोर आने झेब्दीअ बेन पोयरा याकोब आने योहानाल आरी लीईन तो खुब दुखी वेरांअ आने कीदरायांअ टेक्यो। 38 हातींअ तीयांय तीयाहांन आख्यों, “मांअ मोनाम ओतोंअ दुख वेअहे का, मांअ जीव नींगी जाय एंहडों मांन लागेह। तुमां ईंहीं मांअरी जागता रा।”
39 तीयाहांअ से थोळेक सेटे जायन हातींअ ईसु पुंय उबडो पोळीन पोरमेहेराल ओरुज केरांअ टेक्यो का, “ओ मांअ बाहका, बोंणी सेके ता ईं दुख मांअपेअ पोळांअ मा देतो। d तेबी, मांअ मोर्जी पोरमाणे नांय, पेन तोअ मोर्जी पोरमाणे वेरांअ दे!” 40 हातींअ ईसु चेलाहांअहीं आलो आने तीयाहांन हुवता हीईन तीयांय पीतोराल आख्यों, “एक काल्लाख बी तुमां मांअरी जागता नांह रेअ सेकता का? 41 जागता रीईन पोरमेहेराल ओरुज केरा, ईयाअ खातुर का तुमांअ पारखों वेअहे तांहांअ तुमां तीयाअ वीरुद कीअ सेका। e आत्मा तीयार हाय, पेन सोरीद ता नोबलो हाय।” 42 बीहरी वोखुत जायन ईसुंय पोरमेहेराल ओरुज केअयी, “मांअ बाहका, ईं दुख मांअ वेठया वोगुर सुटकोज नांय वीअ ता, तोअ मोर्जी पोरमाणे वेरांअ दे।” 43 फाचों आवीन तीयांय तीयाहांन हुवता देख्या; काहाका, नींदाअ लीदे तीयाहांअ डोंआं मीचाय गेअला। 44 फाचे ईसु तीयाहांन सोळीन गीयो आने पेअलांअ आखला तेज सोब्दा आखीन तीयांय तीसरी वोखुत पोरमेहेराल ओरुज केअयी। 45 हातींअ तीयांय चेलाहांअहीं आवीन तीयाहांन आख्यों, “आजी तुमां हुवताह ने आराम केअताह का? हेरा! मांहांअ पोयरो आंय पापी मांहांअ आथाम तेराय जांअ हाय तो वोखत आवी गीयोह। 46 उठा, आपुंह जाजी। एपलो मांन तेरावी देनारो पाही आवी गीयोह।”
मोंदीराअ चोकीदार ईसुल तीअ लीअ जाताह
(मार्क १४:४३-५०; लुक २२:४७-५३; योहान १८:३-१२)
47 ईसु आजी गोगत्लो तांवज, बारा चेलाहांमेर्योअ येहुदा आलो; आने तीयाअरी मोडा पुंजाराहां आने वोळीलाहीं मोकलुअला खुब लोक आथा। तीयाहांपेअ तारवाया ने डेंगारा आथा। 48 ईसुल तेरावनारा येहुदांय तीयाहांन एंहडी नीसाणी दीईन आखलों, “जीयाल आंय चुबजीन सालाम क्युंव, तीयालुज तीअजा।” 49 तीयाअ पोरमाणे, येहुदा आलो आने पादरोज ईसुअहीं जायन “सालाम, गुरुजी” एंहकींअ आखीन तीयाल चुबज्यो। 50 तांहांअ ईसुंय तीयाल आख्यों, “दोस्त, जों केरांअ तुं आलोह तों केअ।” तांहांअ येहुदाअरी आलला तीया लोकाहीं आगलांअ आवीन ईसुल तेअयो आने तीयाल बांदी देदो। 51 ओताअमुज ईसुअ आर्याहांमेर्याअ एकांय सोताअ तारवाअ काडी आने मोडांम-मोडा पुंजाराअ चाकोराल चाटकाटीन तीयाअ कान वाडी टाकयो। 52 तांहांअ ईसुंय तीयाल आख्यों, “तोअ तारवाअ तीयुअ मीयानाम फाची थोवी दे; काहाका, तारवाअ काडनारा बादा तारवायाकींअज मोय। 53 तुं एंहकींअ धारोह का आंय मांअ बाहकापेअ मोदोत मागी नांह सेकतो आने तो मांन वाचावांअ खातुर हाजारु दुताहांन तुरुतुज मोकली नांह देतो? 54 पेन एंहकींअ वीअ ता, मांन एंहडों वेरांअज जोजे एंहडों पोवीतोर लेखाणाहांम जों लेखलों हाय तों केंहकींअ खेरों पोळीअ।”
55 हातींअ ईसुंय टोलामेर्याअ लोकाहांन आख्यों, “लुटाराल तेरांअ आला वीअ तेंहकींअ मांन तेरांअ खातुर तुमां तारवाया ने डेंगारा लीईन काहा आलाह? आंय रोददीह मोंदीराम बोहीन बोद देहलो तांहांअ काहाल तुमां मांन नांह तेअयो? 56 पेन पोरमेहेराअ गोठ जाहेर केअनाराहां पोवितोर लेखाणाहांम जों लेख्योंह तों खेरों पोळे तीयाअ खातुरुज ईं बादों वीयोंह।”
तीयु वोखत, बादा चेला ईसुल सोळीन नाही पोळ्या।
येहुदी पोंचाअ आगलांअ ईसु
(मार्क १४:५३-६५; लुक २२:५४-५५, ६३-७१; योहान १८:१३-१४, १९-२४)
57 ईसुल तेअनारा तीयाल मोडांम-मोडा पुंजारा कायफाअ कोअ लीअ गीया। तींहीं नीयोम हीकवुअनारा आने वोळील टोलवाअला। 58 पीतोर थोळेक सेटे रीईन ईसुअ फाचलां-फाचलांअ मोडांम-मोडा पुंजाराअ कोअ चोवठाम लोगुंअ गीयो। आने तो ईसुअ तापासाअ पोरीणाम जाणांअ खातुर माज चोवठाम जायन चोकीदाराहांअरी बोठो।
59 ईसुल माय टाकाय तीयाअ खातुर मोडा पुंजारा आने पोंचाअ बीहरा लोक तीयाअ वीरुद झुटी साक्सी देनाराहांन होदांअ टेक्या। 60 पेन खुब लोकाहीं तीयाअ वीरुद झुटया साकस्या पुर्या तेबी तीयाल माय टाकाय एंहडी एक बी साक्सी पोंचाअ लोकाहांन नांय झुळी। सेल्ले, बेन आदमी आगलांअ आला, 61 आने आख्यों, “ईया मांहांय आख्यों, ‘पोरमेहेराअ मोंदीराल तोळी पाळीन तीयाल फाचों तीनुंज दीहाहांम बांदी दांअ मांअपेअ ताकोत हाय।’”
62 तांहांअ मोडांम-मोडा पुंजारांय उठीन ईसुल आख्यों, “तुं कायज जोवाब नांह देतो का? ईं मांहेंअ तोअ वीरुद केंहडी साक्सी देतेंह?” 63 पेन ईसु ता ठाकोज रीयो। तांहांअ मोडांम-मोडा पुंजारांय तीयाल आख्यों, “जीवता पोरमेहेराअ होम खायन आमनेंह आखेअ। पोरमेहेराअ पोयरो जो ख्रीस्त हाय तो तुंज हाय का?”
64 तांहांअ ईसुंय जोवाब देदो, “तुंयुं आख्यों तेंहकींअ आंय तो हायज। पेन आंय तुमनेंह बादाहांन आखुंह, भोवीस्यांम तुमां मांहांअ पोयराल मोंजे मांन, खुब ताकोतावाला पोरमेहेराअ हुदी वेल बोठलो आने वादलाहांम आवतो हीअहा।”
65 तांहांअ मोडांम-मोडा पुंजारांय सोताअ झोब्बो फाळी टाकीन आख्यों, “ओ ता सोताल पोरमेहेर आखावेह। आमी आपनेंह बीहरी साक्सीहींअ जोरुल नांह। तीयांय जों आख्यों तों तुमां उनाअयाह। 66 तुमां काय धारताह?”
तांहांअ तीयाहां आख्यों, “तो मोताअ साज्या मीलवांअ लायोक हाय।”
67 हातींअ तीयाहां तीयाअ मुंयुंपेअ थुप्या आने तीयाल मुकाहांकींअ ठोक्यो। बीहराहीं तीयाअ मुंय बुजी दीईन गालाहांपेअ थापळीहींकींअ ठोकीन 68 आख्यों, “ओ ख्रीस्त, तुल केडांय ठोक्यो तों आखी देखाव।”
पीतोर ईसुअ नाकार केअहे
(मार्क १४:६६-७२; लुक २२:५६-६२; योहान १८:१५-१८, २५-२७)
69 पीतोर बारे चोवठाम बोठलो। तींहीं एक कामारी पोयरी आली आने तीयाल आख्यों, “तुं बी गालीलाअ ईसुअ आरी आथो।” 70 पेन पीतोरांय ता बादाहांअ आगलांअ तीयु गोठीअ नाकार कीईन आख्यों, “तुं काय आखोह तों आंय जांअतो नांह।” 71 हातींअ तो चोवठाम वीहांअ बांअणाअहीं गीयो। तींहीं बीहरी एक कामारी पोयरींय तीयाल देखीन तींहीं आथा तीयाहांन आख्यों, “ओ बी नाझारेथाअ ईसुअ आरी आथो।” 72 फाचे पीतोरांय ना पाळी आने होम खायन आख्यों, “तीया मांहांअल आंय ओअखुअतोज नांह।” 73 थोळीक वाअ हातींअ तींहीं उबी रेहला लोकाहीं पीतोराअहीं आवीन तीयाल आख्यों, “नोक्कीज तुं बी तीयाहांमेर्योअ हाय, काहाका तोअ बोलीपेनेअ तुं ओअखाय आवोह।” 74 तांहांअ पीतोर सोताल हाराप दांअ आने होम खायन आखांअ टेक्यो का, “आंय तीया मांहांअल ओअखुअतोज नांह।” तीयुज घेळी, कुकळो वाह्यो, 75 आने ईसुंय पीतोराल पेअलांअ आखली गोठ तीयाल ईत आली, “कुकळो वाहीअ तीयाअ पेअलांअ तुं तीन वोखत आखोह का तुं मांन नांह ओअखुअतो।” तांहांअ पीतोर बारे गीयो आने खुब रोळ्यो।