माथी 25

दोह कुवारी पोयरीहींअ बाबोताम दाखलो

¹ “पोरमेहेराअ राज्याअ हारकामोणी, दीवा लीईन वोल्‍लाल मीलांअ जानार्या दोह कुवारी पोयरीहींअरी कीअ सेकाय। ² तीयुहुंमेर्याअ पांच बोग्या आथ्या आने पांच हुच्यार आथ्या। ³ बोग्या पोयरीहीं सोताअ दीवा ता लेदला, पेन तीयुहुं दीवा सीलगावांअ सोताअ आरी वादाराअ तेल नांय लेदों। ⁴ पेन हुच्यार पोयरीहीं सोताअ दीवाहांअरी बोरनीहींम वादाराअ तेल बी लेदों। ⁵ वोल्‍लाल आवता टेम वीयों तीयाअ लीदे ते बादया पोयर्या जोपी-जोपीन हुवी गीया।

⁶ “पोरा-पोर रातींअ एंहडी बोंब पोळी का, ‘वोल्‍लो आवी गीयोह। तीयाल मीलांअ नींगा’। ⁷ तांहांअ ते बादया कुवार्या पोयर्या जाग्या आने सोत-सोताअ दीवाहांअ बोली गेहल्या वादया वाडीन दीवा तीयार केअया। ⁸ तांहांअ बोग्या पोयरीहीं हुच्यार पोयरींय न आख्यों, ‘तुमाहांपेर्योंअ तेल आमनेंह थोळों-थोळों दा। काहाका, आमांअ दीवा उलवाय जांअ तीयारीम हाय।’ ⁹ पेन हुच्यार पोयरीहीं जोवाब देदो, ‘नांह, आमांअ ने तुमांअ वीअ रे ओतोंअ तेल आमाहांपेअ नांह। तुमां तेल वेचनाराहांअहीं जायन तुमांअ खातुर वेचाअतों लीअ आवा।’

¹⁰ “बोग्या पोयर्या तेल वेचाअतों लांअ गीया। आने ओताअमुज वोल्‍लो आवी पोच्यो। आने हुच्यार पोयर्या जे तीयार आथ्या ते तीयाअरी वोराळाअ जेवोंण केरांअ कोअमें गीया। आने तीया पोंगाअ बांअणों तुरुतुज बुजी देवाअयों। ¹¹ हातींअ बीहर्या पोयर्या बी तींहीं आल्या, आने तीयुहुं बोंबलीन वोल्‍लाल आख्यों, ‘साहेब, साहेब, आमांअ खातुर बांअणों उगाळ।’ ¹² पेन तीयांय जोवाब देदो, ‘आंय तुमनेंह नोक्कीज आखुंह का आंय तुमनेंह ओअखुअतो नांह।’” ¹³ हातींअ ईसुंय आख्यों, “तीयाअ लीदे, तुमां कायोम तीयार रा। काहाका, मांअ फाचो आवांअ दीह का घेळी तुमां नांह जांअता।”

तीन चाकोराहांअ बाबोताम दाखलो

(लुक १९:११-२७)

¹⁴ “पोरमेहेराअ राज्याअ हारकामोणी, खुब सेटे जानारों आथों तीया मांहांअरी कीअ सेकाय। जाता पेअलांअ, तीयांय सोताअ चाकोराहांन हादीन तीयाहांन सोताअ मीलकोत होपी। ¹⁵ दोरेक चाकोराअ आवळोता पोरमाणे तीयांय एक चाकोराल पांच हाजार सीक्का, आने बीहराल बेन हाजार सीक्का, आने तीजाल एक हाजार सीक्का देदा। हातींअ तों जातों रीयों। ¹⁶ जीया चाकोराल पांच हाजार सीक्का मीलला, तीयांय तुरुतुज जायन तीयाहांन धोंदाम रोकी देदा, आने तीयाहांकींअ बीहरा पांच हाजार सीक्का कामाव्या। ¹⁷ तेंहकीअज कीईन, जीया चाकोराल बेन हाजार सीक्का मीलला, तीयांय बीहरा बेन हाजार सीक्का कामाव्या। ¹⁸ पेन जीया चाकोराल एक हाजार सीक्का मीलला, तीयांय जायन पुंय खाडो खोदयो आने तीयाअ सेटांय देदला ते पोयसा तींहमें दोबावी थोव्या।

¹⁹ “खुब वोखत हातींअ तीया चाकोराहांअ सेट फाचो आलो आने तीयांय तीयाहांन देदला पोयसाहांअ हीसाब मागांअ टेक्यो। ²⁰ तांहांअ जीयाल पांच हाजार सीक्का मीलला तो चाकोर आलो आने बीहरा पांच हाजार सीक्का लावीन आख्यों, ‘सेट, तुंयुं मांन पांच हाजार सीक्का देदला। हेअ! मांयुं बीहरा पांच हाजार सीक्का कामाव्याह!’

²¹ तांहांअ तीयाअ सेटांय तीयाल आख्यों, ‘साबास! ओ हारा ने ईमानदार चाकोर, थोळाक पोयसाम तुं ईमानदार रीयोह। तीयाअ लीदे, आंय तुल वादारे वोस्ताहांपेअ कारभारी नीमेंह। तुं मांअरी खुसालीम रे!’

²² “हातींअ जीयाल बेन हाजार सीक्का मीलला तीया चाकोरांय बी आवीन आख्यों, ‘सेट, तुंयुं मांन बेन हाजार सीक्का होपला। हेअ! मांयुं बीहरा बेन हाजार सीक्का कामाव्याह!’ ²³ तांहांअ तीयाअ सेटांय तीयाल आख्यों, ‘साबास! हारा ने ईमानदार चाकोर, थोळाक पोयसाम तुं ईमानदार रीयोह। तीयाअ लीदे, आंय तुल वादारे वोस्ताहांपेअ कारभारी नीमेंह। तुं मांअरी खुसालीम रे!’

²⁴ “हातींअ जीयाल एक हाजार सीक्का मीलला तीया चाकोरांय बी आवीन आख्यों, ‘सेट, मांन खोबुर आथी का तोअरी वेहवार राखुलोंअ ओगरों हाय। आने तुं बीहराहां मेहनोत कीईन मीलव्यों वीअ तों लीअ लेनारो हाय। ²⁵ आने मांन बीख आथी तीयाअ लीदे, मांयुं जायन तोअ पोयसा पुंय दोबावी देदा। हेअ! ए तोअ ते पोयसा।’

²⁶ “तांहांअ तीयाअ सेटांय जोवाब देता तीयाल आख्यों, ‘ओ खाराब आने आल्याह चाकोर! तुल खोबुर आथी का आंय बीहराहां मेहनोत कीईन मीलव्यों वीअ तों लीअ लेअनारो हाय। ²⁷ ता मांअ पोयसा बेंकाम तेबी तोअ थोवांअ जोजत्‍लों, ईयाअ खातुर का आंय फाचो आवुं तांहांअ मांअ पोयसा मांन वीयादाअरी फाचा मीली जाता।’

²⁸ “हातींअ सेटांय बीहरा चाकोराहांन आख्यों, ‘तीयापेर्याअ एक हाजार सीक्का लीअ ला आने ते जीयापेअ दोह हाजार सीक्का हाय तीयाल दीअ दा। ²⁹ काहाका, जे लोक तीयाहांन मांयुं जों देदोंह तों बोराबोर वापरुअताह, तीयाहांन आंय खुब वादारे देहें। आने जे लोक तीयाहांन मांयुं जों देदोंह तों बोराबोर नांह वापरुअता, तीयाहांपेनेअ ता आंय तीयाहांपेअ जों पेअलांअज हाय तों बी लीअ लेहें। ³⁰ ईया नोक्कामा चाकोराल बार्याअ आंदाराम टाकी दा! तींहीं तो एंहडाहांअरी वीअ का जें खुब दुखाअ लीदे रोळीअ आने सोताअ दात कीकरावीअ।’

सेल्‍ला नीयायाअ दीह

³¹ “मांहांअ पोयरो आंय मांअ मोडाय लीईन बादा दुताहांअरी आवेंह तांहांअ, आंय मांअ मोडायावाली गादीपेअ बोंहेंह। ³² आने दुत दुन्याअ बादा लोकाहांन मांअ आगलांअ टोलवीअ, आने जेंहकींअ भारवाळ बोकळाहांमेनेअ घेटाहांन जुदें पाळेह, तेंहकींअ आंय लोकाहांन एक-बीहरामेनेअ जुदा पाळेंह। ³³ जेंहकींअ भारवाळ घेटाहांन एकवेल आने बोकळाहांन बीहरीवेल उबी राखेह, तेंहकींअ आंय हाचा लोकाहांन मांअ हुदीवेल आने जे हाचा नांह तीयाहांन मांअ उल्‍टीवेल उबी राखेंह।

³⁴ “हातींअ राजा मोंजे आंय मांअ हुदीवेल्याअ लोकाहांन आखेंह, ‘मांअ बाहकापेनेअ बोरखोत मीलवुअला लोकाहीं, आवा आने जुग-तोरती बोंणावी तेहेअनेअ तीयांय तुमांअ खातुर तीयार कीईन राखलों राज्या मीलवा। ³⁵ काहाका, आंय पुखो आथो, तांहांअ तुमां मांन खावाव्यों; आंय फांअप्यो आथो, तांहांअ तुमां मांन पांय पाज्यों; आंय ओजाण्यो आथो, तांहांअ तुमां मांन तुमांअ कोअमें गोवारो राख्यो; ³⁶ मांअपेअ पुरतें पोतळें नांय आथें, तांहांअ तुमां मांन पोतळें देदें; आंय आजार्यो आथो, तांहांअ तुमां मांअ कालजी लेदी; आंय जेलाम कोंडाअलो आथो, तांहांअ तुमां मांअ मुलाकात लेदी।’

³⁷ “तांहांअ हाचा लोक मांन जोवाब दीअ का, ‘मालीख, तुल केंहडीवेल पुखो देखीन आमां तुल खावाव्यों? तुल केंहडीवेल फांअप्यो देखीन आमां तुल पांय पाज्यों? ³⁸ आमां तुल केंहडीवेल ओजाण्यो देखीन आमांअ कोअमें तुल गोवारो राख्यो? का पुरता पोतळा वोगुर देखीन तुल पोतळें देदें? ³⁹ आमां तुल केंहडीवेल आजार्यो देखीन तोअ कालजी लेदी? का जेलाम कोंडाअलो देखीन आमां तोअ मुलाकात लेदी?’

⁴⁰ “तांहांअ राजा मोंजे आंय तीयाहांन जोवाब देहें का, ‘आंय तुमनेंह नोक्कीज आखुंह: ईया मांअ पावु-बोंअयांहांमेनेअ हानाम-हानाअ खातुर सुदा तुमां जोंबी केअयोंह, तों मांअ खातुरुज केअयोंह।’ ⁴¹ हातींअ आंय मांअ उल्‍टीवेल्याअ लोकाहांन बी आखेंह, ‘ओ हाराप मीलवुअला लोकाहीं, मांअहींनेअ नींगीन, कायोम बोलनारी आगीवाला नोरकाम जा, जों पोरमेहेरांय सेतान ने तीयाअ दुताहांअ खातुर तीयार केअयोंह। ⁴² काहाका, आंय पुखो आथो, पेन तुमां मांन नांह खावाव्यों, फांअप्यो आथो, पेन तुमां मांन पांय नांह पाज्यों। ⁴³ आंय ओजाण्यो आथो, पेन तुमां मांन तुमांअ कोअमें गोवारो नांह राख्यो, पुरता पोतळा वोगुराअ आथो, पेन तुमां मांन पोतळें नांह देदें। आंय आजार्यो ने जेलाम कोंडाअलो आथो, पेन तुमां मांअ कालजी नांय लेदी।’

⁴⁴ “तांहांअ ते लोक बी मांन जोवाब दीअ का, ‘मालीख, आमां तुल केंहडीवेल पुखो का, फांअप्यो का, ओजाण्यो का, पुरता पोतळा वोगुराअ का, आजार्यो का, जेलाम कोंडाअलो देखलो आने तोअ मोदोद नांह केअयी?’

⁴⁵ “तांहांअ आंय तीयाहांन जोवाब देहें, ‘आंय तुमनेंह नोक्कीज आखुंह: ईयाहांमेनेअ हानाम-हानाअ सुदा तुमां जेबी मोदोत नांह केअयी, ते मांनुंज नांह केअयी एंहडों हाय।’

⁴⁶ “हातींअ ते लोक कायोमाअ खातुर सीक्सा वेठांअ जाय। पेन हाचा लोक कायोमाअ खातुर जीवांअ जाय।”