24
ईसु भोवीसवाणी केअहे का येरुसालेमाअ मोंदीर तोळी पाळाय
(मार्क १३:१-२; लुक २१:५-६)
1 ईसु मोंदीरामेनेअ नींगीन जाहलो तांहांअ, तीयाअ चेला मोंदीराअ बोंगलाहांअ सोबा देखावांअ तीयाअहीं गीया। 2 तांहांअ तीयांय तीयाहांन आख्यों, “तुमां ईं बादों हेअताहकने? आंय तुमनेंह नोक्कीज आखुंह: ईया मोंदीरामेर्योअ दोरेक ढोगळो फेकी देवाय। एक बी ढोगळो बीहरा ढोगळापेअ नांय रीअ।”
ईसुअ चेलाहांपेअ पोळनारें दुखें आने सोतावोंण्या
(मार्क १३:३-१३; लुक २१:७-१९)
3 ईसु जेतुन चाळाहांवाली डोगीअ कारायापेअ बोठो तांहांअ, तीयाअ चेलाहां तीयाअहीं जायन तीयाल खानगीम फुच्यों, “आमनेंह आखे, ईं बादों केंहडीवेल बोंणीअ? आने तुं फाचो आवोह तीयाअ ने ईया जोमानाअ ओंताअ नीसाणी काय हाय?”
4 तांहांअ ईसुंय जोवाब देदो, “चेतीन रेजा का केडों बी तुमनेंह नांय ठोगे। 5 काहाका, खुब लोक आवीअ आने आखीअ का मांयुंज तीयाहांन मोकल्या। ते आखीअ, ‘आंयज ख्रीस्त हाय’ आने ते खुब मांहांहांन ठोगीअ। 6 लोक तुमनेंह पाही वेअनारी लोळायाहांअ बाबोताम का सेटे वेअनारी लोळायाहांअ बाबोताम गोठ्या आखीअ। पेन तुमां बीताज मा। एंहडों बादों ता वेरांअज जोजे। पेन ईयु दुन्याअ ओंत तुरुत नांय आवे। 7 एक जातीअ लोक बीहरी जातीअ लोकाहांअरी लोळीअ। आने एक राज्याअ लोक बीहरा राज्याअ लोकाहांअरी लोळीअ। आने खुब जागे काल पोळीअ आने तोरती-कोंप वीअ। 8 ए बादया बाबोत्या पेअलांअ बोंणीअ। हातींअ आंय फाचो आवुं तीयाअ पेअलांअ बीजया बाबोत्या बोंणीअ। जों बोंणीअ तों ता बायाअ सुटी वेरांअ वोखत वेअनारा दुखाहांअ होच दुखावालों वीअ।
9 “तांहांअ मांअपेअ तुमां राखला वीसवासाअ लीदे लोक तुमनेंह नोफरोत कीअ। आने ते तुमनेंह एंहडा ओमोलदाराहांअहीं लीअ जाय का जे तुमांअरी खाराब रीते वोरतीअ आने तुमनेंह माय टाकीअ। 10 आने तांहांअ खुब मांहेंअ मांअपेर्योअ तीयाहांअ वीसवास सोळी दीअ। आने तें एक-बीहराल तेरावी दीअ आने एक-बीहराल नोफरोत कीअ। 11 ‘आमां पोरमेहेराअ गोठ जाहेर केअनारा हाय’ एंहकींअ झुटी रीते आखनारा खुब लोक आवीअ आने खुब मांहांहांन ठोगीअ। 12 दुन्याम पाप वादी जाय तीयाअ लीदे खुब मांहेंअ एक-बीहरापेअ माया राखांअ बोंद कीअ देय। a 13 पेन ईया दुखाअ वोखताअ सेवुट लोगुंअ जें मांहेंअ मांअपेर्योअ तीयाहांअ वीसवास जालवी राखीअ, तीयाहांनुंज पोरमेहेर वाचावीअ। 14 आखी दुन्याम पोरमेहेराअ राज्याअ बाबोताअ हारी गोठ जाहेर केराय आने तीयाअ पोरीणामे बादी जातीअ मांहेंअ ते गोठ उनाय। आने तांहांअज ओंत आवीअ।
खुब दुखें पोळनारें हाय
(मार्क १३:१४-२३; लुक २१:२०-२४)
15 “जीयु वोस्ताअ बाबोताम पोरमेहेराअ गोठ जाहेर केअनारा दानीयेलांय आख्योंह, तीयु फुंअची कीअ आवे एंहडी आने मोंदीराल नोक्कामो बोंणावनारी वोस्ताल मोंदीराअ पोवीतर जागे उबी रेहली तुमां हीअहा तांहांअ (ईं वाचनारों ईयाअ ओर्थो होमजे।), 16 जे येहुदीयाम वीअ ते उचे डोगाहांम नाही जाय। 17 जो सोताअ कोअ बारे वीअ b तो केल्ली बी वोस्तु लांअ कोअमें नांय जाय; 18 जो खेताम वीअ तो सोताअ झोब्बो लांअ कोअ फाचो नांय वोले; 19 तीया दीहाहांम बेन-जीवाअ बायाहांन आने आडुण्या पोयरावाली बायाहांन कोतोंअ बादों दुख पोळीअ! 20 वोहराताम का आरामाअ दीह तुमनेंह नाहांअ नांय पोळे तीयाअ खातुर पोरमेहेराल ओरुज केरा। 21 काहाका, तीया दीहाहांम जेंहडें खुब दुखें पोळीअ तेंहडें दुखें, पोरमेहेरांय जुग-तोरती बोंणावी तीया दीहाहांमेनेअ आज दीह लोगुंअ कीदीह बी नांह पोळ्यें, आने भोवीस्यांम पोळीअ बी नांय। 22 दुखाहांअ ते दीह जो पोरमेहेर ओसा नांय केअ ता, एंगोंह बी मांहुंअ नांय वाचाय; पेन तीयाअ पोसोंद केअला मांहांहांअ लीदे, तीयांय ते दीह ओसा केरांअ नोक्की केअयोंह।
23 “तांहांअ जो केडों तुमनेंह आखे का, ‘ख्रीस्त ईंहीं हाय’ नेता बीहरों केडों आखे का, ‘ख्रीस्त तींहीं हाय’ ता, तीयाअ गोठीपेअ तुमां वीसवास मां राखता। 24 तांहांअ झुटी रीते सोताल ‘आंय ख्रीस्त हाय’ एंहकींअ आने ‘आंय पोरमेहेराअ गोठ जाहेर केअनारो हाय’ एंहकींअ आखावनारा पेदा वीअ। ते चोमोत्काराअ मोडें-मोडें कामें बी कीअ देखावीअ आने लोकाहांन ठोगीअ। बोंणे ता, ते पोरमेहेरांय पोसोंद केअला लोकाहांन बी ठोगांअ कोसीस कीअ। 25 हेरा! मांयुं तुमनेंह ए बादया बाबोत्या पेअलांअनेअज आखी देदयाह।
26 “तीयाअ लीदे, केडों तुमनेंह ‘ख्रीस्त उजाळाम हाय’ एंहकींअ आखे ता तुमां तींहीं मां जाता। नेता केडों तुमनेंह ‘ख्रीस्त माजरीअ खोलीम हाय’ एंहकींअ आखे ता तीयाअ गोठ बी मां मानता। 27 काहाका, दीह उगताअवेलेनेअ दीह बुडताअवेल लोगुंअ झोझलुअनारी वीजाल जेंहकींअ बादें मांहेंअ हीअ सेकतेंह, तेंहकींअ मांहांअ पोयरो आंय फाचो आवेंह तांहांअ बादें मांहेंअ मांन हीअ सेकीअ। 28 जींहीं मोअलें खोकयें वीअ तींहीं गीदळें टोलवाअनारेंज आने तीया गीदळाहांन बादें मांहेंअ हीअ सेकतेंह। तेंहकींअज कीईन आंय फाचो आवेंह तांहांअ बादें मांहेंअ मांन हीअ सेकीअ।
मांहांअ पोयरो फाचों आवांअ दीह
(मार्क १३:२४-२७; लुक २१:२५-२८)
29 “तीया दीहाहांम पोळीअ तीया दुखाहांअ हातींअ तुरुतुज दीह कालो बोंणी जाय आने चांदाअ बी जोनी नांय पोळे आने जुगामेनेअ तारा टुटी पोळीअ आने जुगाहांमेरीअ बादी ताकोतावाली वोस्तु आलवाय जाय। 30 हातींअ, मांहांअ पोयरो आंय फाचो आवांअ वोखताअ नीसाणी जुगाम देखाय। तांहांअ दुन्याअ बादें मांहेंअ मांन ताकोत आने खुब मोडायाअरी आवतो देखीअ आने रोळीअ। 31 आने मोडो पीपारो वाजीअ तांहांअ आंय मांअ दुताहांन तोरतीअ खुणे-खुणे मोकलेंह, आने ते जायन दुन्याअ एक खुणा नेअ बीहरा खुणा लोगुंअ रेनारा पोरमेहेरांय पोसोंद केअला लोकाहांन टोलवीअ।
ओंजीराअ चाळापेनेअ हीकामोण
(मार्क १३:२८-३१; लुक २१:२९-३३)
32 “ओंजीराअ चाळापेनेअ ए हीकामोण ला। जांहांअ तीया चाळाअ डालख्या कोवल्या वेअत्याह आने तीयाअ पानठें फुटांअ टेकतेंह तांहांअ तुरुतुज तुमां जांय जाताह का उनालों पाही आलोंह। 33 तेंहकीअज कीईन, तीया दुखाहांअ दीहाहांअ बाबोताम मांयुं आखला बादा बोनाव बोंणता हेरा तांहांअ जांय जाजा का मांअ फाचो आवांअ सोमोय पाही आवी गीयोह। 34 आंय तुमनेंह नोक्कीज आखुंह: ईयु पीळीअ बादें मांहेंअ मोय जाय तीयाअ पेअलांअ ए बादा बोनाव बोंणीअ। 35 जुग ने तोरती जातें रीअ, पेन मांयुं आखल्या गोठ्या मांअ आखल्या पोरमाणे वीअज।c
ईसु फाचो आवीअ तो दीह का सोमोय केडाल बी खोबुर नांह
(मार्क १३:३२-३७; लुक १७:२६-३०, ३४-३६)
36 “मांहांअ पोयरो आंय फाचो आवांअ हाय तो दीह का तो सोमोय केडों बी नांह जांअतों। होरगाअ दुत बी नांह जांअता का पोयरो मोंजे आंय बी नांह जांअतो। पेन मांअ बाहको एखलोज तो जांअहे। 37 नुहाअ वोखताम जेंहकींअ वेअलों तेंहकीअज मांहांअ पोयरो आंय फाचो आवेंह तांहांअ बी वीअ। 38 रेल आलली तीयाअ पेअलार्याअ दीहाहांअ मांहेंअ नुह सोताअ कोअर्याहांअरी जाहाजाम चोळी गीयो तीदीह लोगुंअ खाहलें-पीहलें आने आदमी-थेअ वोराळें केअत्लें। 39 रेलाहीं आवीन तीयाहांअ बादाहांअ नास केअयो तांव लोगुंअ तीयाहांन खोबुर नांय आथी का काय वीअ रीयोंह। एंहकींअज कीईन, मांहांअ पोयरो आंय फाचो आवेंह तीदीह बी दुन्याअ मांहेंअ तीया दीहाअ चींता केअया वोगुर रीअ। 40 तांहांअ बेन आदमी खेताम काम केअता वीअ। तीयाहांमेनेअ एक होरगाम लीअ लेवाय आने बीहरो नोरकाअ सीक्सा भोगवांअ खातुर सोळी देवाय। 41 तेंहकींअज कीईन, बेन बाया एक कोअटीम दोअत्या वीअ। तीयुहुंमेनेअ एक होरगाम लीअ लेवाय आने बीहरी नोरकाअ सीक्सा भोगवांअ खातुर सोळी देवाय।
42 “आंय तुमांअ मालीख केल्ला दीह आवेंह तों तुमां नांह जांअता तीयाअ लीदे कायोम तीयार रीया। d 43 पेन ईं जांय ला का, कोअ मालीखाल तीयाअ कोअमें बांड केल्ली वोखत आवीअ तीयाअ पेअलांअनेअज खोबुर वेअती ता, तो मालीख रातींअ जागतोज रेतो आने तीयाअ कोअमें बांडाल बारदों पाळांअ नांय देतो। 44 तीयाअ लीदे, तुमां बी कायोम तीयार रेजा। काहाका, मांहांअ पोयरो आंय तुमां मांअ वाट नांय जोवा तेंहडा वोखत आवी जाहें।
ईमानदार आने ईमानदारी वोगुराअ चाकोर
(लुक १२:४१-४८)
45 “तांहांअ ईमानदार आने हुच्यार चाकोर केडाल आखाय? तो एंहडा चाकोराल आखाय का जीयाल तीयाअ सेटांय बीहरा चाकोराहांन टेमापेअ खांअ दांअ खातुर तीयाहांअ उपरी नीम्योह। 46 तो सेट फाचो आवे तांहांअ तीया चाकोराल तों काम केअता हेअ ता, तो तीया चाकोरापेअ राजी वीअ। 47 आंय तुमनेंह नोक्कीज आखुंह: तो सेट तीया चाकोराल सोताअ बादी मीलकोताअ कारभारी नीमीअ। 48 पेन जो तो चाकोर खाराब वीअ आने ‘मांअ सेट टेमाकींअज आवीअ’ एंहकींअ सोताअ मोनाम वीचारे, 49 आने सोताअ आर्याअ चाकोराहांन ठोकांअ टेके, आने साकट्या मांहांहांअरी मीलीन खांअ-पीयांअ टेके ता काय वीअ? 50 तांहांअ तीयांय वाट जोवी बी नांय वीअ तेंहडा वोखत तीयाअ सेट आवीअ, 51 आने तीया चाकोराल आकरी सीक्सा दीअ, आने तीयाल एंहडाहांअरी बारे टाकी दीअ का जीयाहां सोताअ सेटाअ सेवा केरांअ खाली ढोंगुज केअयी। तीया जागे ते खुब दुखाअ लीदे रोळीअ आने सोताअ दात कीकरावीअ।