23
नीयोमाअ हीकवुअनाराहांअ आने फोरीसीहींअ बाबोताम चेतवोंणी
(मार्क १२:३८-३९; लुक ११:४३,४६; २०:४५-४६)
1 हातींअ ईसुंय टोलामेर्याअ लोकाहांन आने तीयाअ चेलाहांन आख्यों, 2 “मोसे ता पोरमेहेरांय देदला नीयोम लोकाहांन हीकवुअनारो गुरु आथो। आमी फोरीसीहीं आने नीयोम हीकवुअनाराहां सोताल तीया नीयोमाहांअ खुलासो केअनारा बोंणावी देदाह। 3 तीयाअ लीदे, ते तुमनेंह जोंबी केरांअ आखे तों तुमां केअजा। पेन ते जों केअताह तों तुमां मा केअता। काहाका, ते जों हीकवुअताह तीयाअ पोरमाणे ते सोते नांह केअता। 4 ते ता, पाली नांय सेकाय एंहडा खुब नीयोम पालांअ मांहांहांन फोरोज पाळताह। पेन ते सोते ता, ते नीयोम पालांअ मांहांहांन जाराक बी मोदोत नांह केअता।
5 “जांहांअ बी ते केल्लो बी नीयोम पालताह तांहांअ, तों ते बीहरा लोकाहांन देखावांअ खातुरुज केअताह। दाखला तोरीके, ते पोवीतोर लेखाणाहांअ कोलोम्या लेखलें मोडें-मोडें चांबळाअ खोकें सोताअ आथाहांपेअ बांदताह, आने सोताअ पोतळाहांअ झुलुर्या बी लांब्या-लांब्या राखताह। 6 आने जेवोंणाहांम हाराम-हारा जागे बोंहांअ, आने भोकती मोंडोळाअ पोंगाहांम वोळीलुंअ खातुर खास राखी थोवला जागे बोंहांअ तीयाहांन खुब गोंवेंह। 7 आने बाजाराहांम लोक तीयाहांअ सालामी केअ तों, आने ‘गुरुजी-गुरुजी’ एंहकींअ आखे तों बी तीयाहांन गोंवेंह। 8 पेन तुमां ता सोताल ‘गुरुजी’a मा आखावतें। काहाका, तुमांअ बादाहांअ एकुज ‘गुरु’ हाय। आने तुमां बादें पावु-बोंअयुं b हाय। 9 आने ईयु दुन्यामेर्याअ केडाल बी ‘बाहका’ एंहकींअ मा आखतें। काहाका, होरगामेर्योअ तुमांअ बाहको एकुज तुमांअ बादाहांअ ‘बाहको’ हाय। 10 आने सोताल ‘आगेवान’ c मा आखावतें। काहाका, आंय ख्रीस्त एकलोज तुमांअ बादाहांअ ‘आगेवान’ हाय। 11 तुमाहांमेर्योअ जोबी मोडांम-मोडो वीअ, तो बीहरा बादाहांअ सेवोक बोंणे। 12 पेन, जो सोताल मोडो बोंणावेह, तीयाल पोरमेहेर गोरीबळो बोंणावीअ, आने जो सोताल गीरीबळो बोंणावेह, तीयाल पोरमेहेर मोडो बोंणावीअ।
फोरीसी आने नीयोम हीकवुअनाराहांअ ढोंगी जीवोनाहांअ बाबोताम
(मार्क १२:४०; लुक ११:३९-४२, ४४, ५२; २०:४७)
13 “ओ नीयोम हीकवुअनाराहां आने फोरीसीहीं, तुमां ढोंगी हाय। लोक पोरमेहेराअ राज्याम नांय वीहे तेंहकींअ तुमां बांअणों बुजी देताह। तुमां खुब दुख भोगवाह। काहाका, तुमां सोते बी पोरमेहेराअ राज्याम नांह वीहता आने तींहमें वीहनारा बीहरा लोकाहांन बी वीहांअ नांह देता।
14 [[ “ओ नीयोम हीकवुअनाराहां आने फोरीसीहीं, तुमां ढोंगी हाय। तुमां खुब दुख भोगवाह। काहाका, तुमां रोंडेअ बायाहांअ मीलकोत पाळावी लेताह। आने उपेअनेअ तुमां पोरमेहेराल लांब्या-लांब्या ओरुजया बी केअताह। तीयाअ लीदे, तुमनेंह वादारे सीक्सा मीलीअ।]] 15 ओ नीयोम हीकवुअनाराहां आने फोरीसीहीं, तुमां ढोंगी हाय। तुमां खुब दुख भोगवाह। काहाका, एक मांहांअल येहुदी बोंणावांअ खातुर तुमां आकास-पाताल एक केअताह। पेन तो येहुदी बोंणी जाहे तांहांअ, तीयाल खोटों-खोटों हीकवीन तुमां तीयाल बी तुमांअ होच नोरकाम बेवळी सीक्सा मीलवांअ लायोक बोंणावी देताह।
16 “तुमां खुब दुख भोगवाह। तुमां बीहराहांन दोरवोणी देताह, पेन तुमां सोते आंदला हाय। तुमां एंहकींअ हीकवुअताह का, ‘जो केडों मोंदीराअ होम खाय ता तीयाअ पोरमाणे तों नांय केअ तेबी काय नांय, पेन जो तों मोंदीराअ होनाअ होम खाय ता तीयाअ पोरमाणे केरांअ तों बांदाअलों रेहे।’ 17 तुमां बुददी वोगुराअ ने आंदला हाय। मोंदीराअ होनो वादारे मोडो हाय का तीया होनाल पोरमेहेराअ खातुर जुदो केअनारों मोंदीर वादारे मोडों हाय? 18 तुमां एंहकींअ बी हीकवुअताह का, ‘जो केडों वेदीअ होम खाय ता, तीयाअ पोरमाणे तों नांय केअ तेबी काय नांय, पेन जो तों तीयु वेदीपेअ ओरपोण केअली वोस्तुअ होम खाय ता, तीयाअ पोरमाणे केरांअ तों बांदाअलों रेहे।’ 19 तुमां आंदला हाय। वेदीपेअ ओरपोण केअली वोस्तु वादारे मोडी हाय का तीयु वोस्तुल पोरमेहेराअ खातुर जुदी केअनारी वेदी वादारे मोडी हाय? 20 तीयाअ लीदे, जोंबी मांहुंअ वेदीअ होम खाहे ता तीयाअ ओर्थो ओ हाय का, तों वेदीअ बी होम खाहे, आने वेदीपेअ ओरपोण केअली वोस्तुअ बी होम खाहे। 21 आने जोंबी मांहुंअ मोंदीराअ होम खाहे ता तीयाअ ओर्थो ओ हाय का, तों मोंदीराअ बी होम खाहे आने तींहीं रेनारा पोरमेहेराअ बी होम खाहे। 22 आने जोंबी मांहुंअ जुगीअ होम खाय ता तीयाअ ओर्थो ओ हाय का, तों पोरमेहेराअ राज-गादीअ बी होम खाहे, आने तीयापेअ बोठला पोरमेहेराअ बी होम खाहे।
23 “ओ नीयोम हीकवुअनाराहां आने फोरीसीहीं, तुमां खुब दुख भोगवाह। तुमां ढोंगी हाय। काहाका, पादलों, मोरी आने जीरों एंहडी हानांम-हानी वोस्ताहांअ बी तुमां दोस्मो भाग देताह, पेन हाचें कामें केरांअ आने बीहराहांपेअ दाया केरांअ आने बीहरें भोरुचो राखी सेके तेंहडो वेहवार राखांअ एंहडया वादारे खास बाबोत्या तुमां सोळी देदयाह। दोस्मो भाग ता तुमांअ दांअ जोजे। पेन ईयु वादारे खास बाबोतीहींअ बी तुमांअ ओमोल केरांअ जोजे। 24 तुमां बीहराहांन दोरवोणी देताह, पेन तुमां सोते आंदला हाय। तुमां एंहडा मांहांअ होच हाय का जों पांयांवाला लोटामेनेअ मोगोंहाल चारी टाकेह, पेन उटळाल गींईं जाहे।
25 “ओ नीयोम हीकवुअनाराहां आने फोरीसीहीं, तुमां खुब दुख भोगवाह। तुमां ढोंगी हाय। काहाका, तुमां लोबी ने ईगलायाअ हाय। तुमां उपे-उपेअज चोलाअला पेन माजरीअ वेल एकदोम वीहटांअज रेअला पीयालो आने ठालीहींअ होच हाय। 26 ओ फोरीसीहीं, तुमां आंदला हाय। पेअलांअ तुमां तुमांअ जीवोनाहांअ माजर्याअ भागाल चोख्खो केरा। आने तांहांअ तुमांअ जीवोनाहांअ उपर्योअ भाग बी चोख्खो रीअ।
27 “ओ नीयोम हीकवुअनाराहां आने फोरीसीहीं, तुमां खुब दुख भोगवाह। काहाका, तुमां चुनो लागवुअली कोबीराहांअ होच हाय। ते कोबीर्या बारीअ वेलेनेअ ता हार्या देखाअत्याह, पेन माज ता ते मोअला मांहांहांअ आटकाहां ने गोंदकीकींअ पोअल्या रेत्याह। 28 तेंहकींअज कीईन, तुमां बी लोकाहांन उपे-उपेअ ता हाचा लागताह, पेन तुमांअ मोने ता ढोंगाकींअ पोअलें हाय। आने तुमां पोरमेहेराअ नीयोम बी नांह पालता।
नीयोमाअ हीकवुअनाराहांन ने फोरीसीहींन मीलनारी साज्या
(लुक ११:४७-५१)
29 “ओ नीयोम हीकवुअनाराहां आने फोरीसीहीं, तुमां ढोंगी हाय आने तुमां खुब दुख भोगवाह। काहाका, पोरमेहेराअ गोठ जाहेर केअनाराहांअ खातुर तुमां कोबीर बांदताह आने खेरों जीवोन जीवी गेहला लोकाहांअ कोबीर पीळताह। 30 आने तुमां आखताह का, ‘जो आमां आमांअ आगलाअ डायाहांअ वोखताम वेअता ता, पोरमेहेराअ गोठ जाहेर केअनाराहांन माय टाकनारा तीया आगलाअ डायाहांअरी मीलीन तीयाहांन माय नांय टाकता।’ 31 एंहकींअ कीईन तुमां सोतेज कोबुल केअताह का, तुमां पोरमेहेराअ गोठ जाहेर केअनाराहांन माय टाकनाराहांअ वोसुलामेर्याअ हाय। 32 तुमांअ आगलाअ डायाहांअ होच तुमां बी लोकाहांअ खुन केरांअ तीयारुज हाय!
33 “तुमां झेरी हापळाहांअ होच खोतोरनाक हाय! नोरकाअ सीक्सामेनेअ तुमां केंहकींअ वाचाअहा? 34 ए गोठ बोराबोर उनाय ला। ईया कारोणेज आंय तुमांअहीं पोरमेहेराअ गोठ जाहेर केअनाराहांन, आने गीयानावालाहांन, आने नीयोम हीकवुअनाराहांन मोकलेंह। तीयाहांमेर्याअ थोळाकाहांन तुमां माय टाकावाह, आने बीहरा थोळाकाहांन कुरुसापेअ जोळीन माय टाकावाह। आने बीहराहांन तुमां तुमांअ भोकती मोंडोळाअ पोंगाहांम चापकाहांअ मार ठोकीन एक सेहेरामेनेअ बीहरा सेहेराम रोखळावाह। 35 तीयाअ पोरीणामे, आदामाअ पोयरो गुना वोगुराअ हाबेलाअ खुनाअहींनेअ बाराखीयाअ पोयरा झाखारीयाअ खुना लोगुंअ का जीयाल तुमां मोंदीराअ माजर्याअ भागाअ आने वेदीअ नीसमुर्याअ जागे माय टाकलो तीया बादा गुना वोगुराअ लोकाहांअ खुनाहांअ सीक्सा पोरमेहेर तुमनेंह दीअ। 36 ए गोठ बोराबोर उनाय ला। d पोरमेहेराअ गोठ जाहेर केअनारा ईया बादाहांअ खुनाहांअ सीक्सा पोरमेहेर ईया वोखताम रेनारा तुमनेंहज दीअ!
येरुसालेम सेहेराअ लोकाहांपेअ ईसुअ माया
(लुक १३:३४-३५)
37 “ओ येरुसालेमाम रेनारा लोकाहीं, पोरमेहेराअ गोठ जाहेर केअनाराहांन तुमां माय टाक्याह आने पोरमेहेरांय तुमांअहीं मोकलुअला खोबुर देनाराहांन ढोगळा ठोकीन माय टाक्याह। जेंहकींअ कुकळी सोताअ बोचाहांन तीयुअ फाकळीहींअ थुले एकठें केअहे, तेंहकींअ तुमनेंह बादाहांन एकठा केरांअ मांयुं खुब वोखत मोर्जी राखली। पेन तुमनेंह तों गोंव्यों नांय! 38 हेरा! तुमांअ आखों सेहेर उजाळ वीअ जानारों हाय। 39 आंय तुमनेंह आखुंह, ‘मालीखाअ तोरफयोअ आवनाराल पोरमेहेर आसीरवाद दे!’ एंहकींअ तुमां आखाह तांहांअज तुमां मांन फाचा हीअहा।”