28
ईसु जीवतो उठ्यो
(मार्क १६:१-१०; लुक २४:१-१२; योहान २०:१-१०)
1 आरामाअ दीह पुरो वीयो। आने आठवाळ्याअ पेअला दीह, मोंजे रोवीवाराअ दीह वेगीअ, मागदाला गांवांअ मारीयोम आने बीहरी मारीयोम कोबीराल हेरांअ गीया। 2 तांहांअ एक्कायुंअज मोडो तोरतीकोंप वीयो। आने मालीखाअ एक दुत जुगामेनेअ उती आलो, आने कोबीराअ मुवालापेनेअ ढोगळो उंडलावीन तीयापेअ बोठो। 3 तीया दुताअ देखाव वीजाअ होच चोमकुअतो आथो, आने तीयाअ पोतळें ईमाअ होच पांडेंअ आथें। 4 बीखाअ लीदे चोकीदार कापी उठया आने मोअलाअ मीलता वीअ गीया।
5 दुतांय तीयु बायाहांन आख्यों, “तुमां बीत्या मां! मांन खोबुर हाय का तुमां कुरुसापेअ जोळाला ईसुल होदत्याह। 6 तो ईंहीं नांह। तीयांय आखलों तीयाअ पोरमाणे तो जीवतो उठव्योह। आवा आने तीयाअ लासील ओजली तो जागो हेरा! 7 आने हातींअ तुरुतुज जायन तीयाअ चेलाहांन आखजा, ‘तो मोअलामेनेअ जीवतो उठ्योह। आमी तो तुमांअ आगलांअ गालीलाम जाहे। तींहीं तुमां तीयाल हीअहा।’ मांयुं तुमनेंह जों आख्योंह तीयापेअ धीयान दा।”
8 तांहांअ ते बाया उतवाल्या-उतवाल्या कोबीराअहींनेअ नींग्या। ते काबराय गेहल्या, पेन ते खुसीम बी आथ्या। ते चेलाहांन खोबोर दांअ दोवळ्या। 9 ओचींतोज ईसु तीयुहुंन मीलीन आख्यों, “तुमनेंह सांती वेअ!” तांहांअ तीयुहुं तीयाअहीं जायन तीयाअ पाग तीअया आने तीयाअ भोकती केअयी। 10 ताहांअ ईसुंय तीयुहुंन आख्यों, “काबरात्या मां! जायन मांअ चेलाहांन गालीलाम जांअ आखजा। तींहीं ते मांन हीअ।”
चोकीदाराहांअ जुबानी
11 ते बाया जाहल्या तांहांअ, कोबीराअ चोकी केअत्ला तीया चोकीदाराहांमेनेअ थोळाकाहीं येरुसालेम सेहेराम फाचा जायन, कोबीराम जे-जे बोनाव बोंणला ते बादा मोडा पुंजाराहांन आखी देखाव्या। 12 तांहांअ मोडा पुंजाराहां आने वोळीलाहां मीलीन योज्ना केअयी आने तीयाअ पोरमाणे तीयाहां सोयनीकाहांन रुसवोता तोरीके खुब पोयसा देदा, 13 आने तीयाहांन आख्यों, “तुमां बादाहांन एंहकींअ आखजा, ‘आमां हुवत्ला तांहांअ रातींअ तीयाअ चेला आवीन तीयाअ लासील चोय गीया।’ 14 जो राजपालाल तीयाअ खोबुर पोळीअ ता, तो तुमनेंह काय नांय केअ एंहडों आमां तीयाल होमजावी दीहुं।” 15 तांहांअ चोकीदाराहां पोयसा लेदा आने तीयाहांन हीकव्या पोरमाणे तीयाहां केअयों। आने ए गोठ येहुदी लोकाहांम आज लोगुंअ चालती आलीह।
ईसु ओग्यार चेलाहांन दोरसोन देहे
(मार्क १६:१४-१८; लुक २४:३६-४९; योहान २०:१९-२३; खास चेलाहांअ कामें १:६-८)
16 ओग्यार चेला तीयाहांन ईसुंय गालीलाम जांअ आखलों तीया डोगापेअ गीया। 17 तींहीं तीयाल देखीन तीयाहां तीयाअ भोकती केअयी। पेन तीयाहांमेर्याअ थोळाकाहांन सोंका आली। 18 तांहांअ तीयाहांअ पाही आवीन ईसुंय तीयाहांन आख्यों, “जुग आने तोरतीपेअ बादो आदीकार मांन देवाअयोह। 19 तीयाअ लीदे, तुमां जायन बादी जातीअ लोकाहांन मांअ चेला बोंणावा। तीयाहांन बाहकाअ आने पोयराअ आने पोवीतोर आत्माअ नांवे बापतीस्मा देता जा। 20 मांयुं तुमनेंह जेबी हुकोम देदाह ते बादा पालांअ तीयाहांन हीकवा। आने हेरा! जोमानाअ ओंता लोगुंअ आंय कायोम तुमांअरी हाय।”