माथी 21

ईसु येरुसालेम सेहेराम आवेह

(मार्क ११:१-११; लुक १९:२८-४०; योहान १२:१२-१९)

^1-2 ईसु आने तीयाअ चेला येरुसालेम सेहेराअ पाही आला तांहांअ ते जेतुन चाळाहांवाली डोगीअ कारायापेर्याअ बेथफागे गांवांअ पाही आवी पोच्या। तांहांअ ईसुंय बेन चेलाहांन एंहकींअ आखीन आगलांअ मोकल्या, “हुंबुर्याअ गांवांम जा। आने गांवांम वीहताज तुमनेंह एक फुरकी आने तीयुअ बोचों बांदलों देखाय। तीयाहांन सोळीन मांअहीं लीअ आवजा। ³ आने ‘तुमां एंहकींअ काहाल केअताह?’ एंहडों जो केडों बी तुमनेंह फुचे ता तीयाल आखजा, ‘मालीखाल तीयाहांअ जोरुल पोळीह। तो तीयाहांन तुरुतुज फाचें मोकलावी दीअ।’”

⁴ पोरमेहेराअ गोठ जाहेर केअनारांय जे भोवीसवाणी केअली ते खेरी पोळे तीयाअ खातुरुज एंहकींअ बोंण्यों। तीयांय एंहकींअ भोवीसवाणी केअली का,

⁵ “येरुसालेम सेहेराअ लोकाहांन आखजा का,

‘हेरा! तुमांअ राजा तुमांअहीं आवेह।

तो गोरीबळा सोबावाअ वीईन

फुरक्याअ बोचापेअ सावारी कीईन आवेह।'“

⁶ तांहांअ ते बेनु चेला गीया ने ईसुंय तीयाहांन जेंहकींअ केरांअ आखलों तेंहकींअ तीयाहां केअयों । ⁷ तीयाहां फुरकील ने तीयुअ बोचाल लीअ आवीन तीयाहांपेअ सोताअ पोतळें टाक्यें। आने ईसु फुरक्याअ बोचापेअ फाअतुला पोतळाहांपेअ बोठो। ⁸ टोलामेर्याअ खुब लोकाहीं सोताअ पोतळें वाटीपेअ फाअत्यें आने बीहराहां हींदळाअ ढाग्या वाडीन वाटीपेअ फाअत्या। ⁹ ईसुअ आगलांअ आने तीयाअ फाचलांअ चालनारा टोलामेर्याअ लोकाहीं बोंबलीन आख्यों, “दावीदाअ वोसुलामेर्याअ ख्रीस्त, होसान्ना! मालीखाअ तोरफयाअ आवनाराल पोरमेहेर आसीरवाद दे! होरगामेर्याअ पोरमेहेर, जींदाबाद!”

¹⁰ ईसु येरुसालेमाम वीठो तांहांअ सेहेराअ बादें मांहेंअ बोगलाय गीयें। तीयाहां एक-बीहराल फुच्यों, “ईं केडों हाय?”

¹¹ तांहांअ टोलामेर्याअ लोकाहीं तीयाहांन आख्यों, “ओ ता पोरमेहेराअ गोठ जाहेर केअनारो ईसु, गालील जील्लाअ नाझारेथ गांवांअ हाय।”

येरुसालेम मोंदीराअ चोवठाम ईसु

(मार्क ११:१५-१९; लुक १९:४५-४८; योहान २:१३-२२)

¹² हातींअ ईसु मोंदीराम वीठो आने तीयांय तींहीं वेपार केअनाराहांन आने वेचाअतों लेनाराहांन बादाहांन तींहींनेअ ओळी काडयें; आने तीयांय तींहीं पोयसा बोदली देनाराहांअ गोल्ला आने कोबुतोरें वेचनाराहांअ टेबोलें बी उबडु वाली देदें। ¹³ हातींअ तीयांय तीयाहांन आख्यों, “पोवीतोर लेखाणाहांम एंहकींअ लेखलों हाय का, ‘मांअ कोअ एंहडो जागो आखाय का, जींहीं मांहेंअ मांन ओरुज केअतेंह।’ पेन तुमां ता तीयाल लुटाराहांअ दोबांअ जागो बोंणावी देदोह!”

¹⁴ हातींअ आंदलें ने लुलें मांहेंअ मोंदीराम ईसुअहीं आलें। आने तीयांय तीयाहांन हारें केअयें। ¹⁵ मोंदीराम चोमोत्कार केअता ईसुल आने ‘दावीदाअ वोसुलामेर्याअ ख्रीस्त, जींदाबाद!’ एंहकींअ बोंबलुअता पोयराहांन देख्यें तांहांअ, मोडा पुंजारा आने नीयोम हीकवुअनारा खीजवाअया।

¹⁶ तीयाहां ईसुल फुच्यों, “तें जों बोंबलीन आखतेंह तों तुं उनाअहो का?”

तांहांअ ईसुंय तीयाहांन आख्यों, “आंह! तुमां पोवीतोर लेखाण नांह वाच्यें का? तीयाहांम लेखलों हाय, ‘तुंयुं पोयराहांन आने हानांम-हाना पोयराहांन तोअ गुणगान केरांअ हीकव्योंह।’”

¹⁷ हातींअ ईसु सेहेर सोळीन बेथानी गांवांम जातो रीयो आने तींहीं रात रीयो।

ईसु ओंजीराअ चाळाल हाराप देहे

(मार्क ११:१२-१४, २०-२४)

¹⁸ बीहरे दीह वेगीअ ईसु येरुसालेमाम फाचो जाहलो तांहांअ तीयाल पुख लागी। ¹⁹ तांहांअ वाटीअ एकवेल ओंजीराअ एक चाळ देखीन ईसु तीयाअ पाही गीयो। पेन तीयापेअ एक बी ओंजीर नांय आथों। खाली पानठें ओतेंअज आथें। तीयाअ लीदे, तीयांय चाळाल आख्यों, “फाचे फीरी तोअपेअ कीदीह बी फोलवों नांय लागे!” तांहांअ तुरुतुज तों ओंजीराअ चाळ हुकाय गीयों।

²⁰ ईं देखीन चेला कांहवांयज रीया। तीयाहां ईसुल फुच्यों, “ओंजीराअ चाळ केंहकींअ एकदोमुज हुकाय गीयों?” ²¹ तांहांअ ईसुंय तीयाहांन आख्यों, “आंय तुमनेंह नोक्कीज आखुंह: तुमां वीसवास केरा आने सोंका नांय राखा ता, ईया ओंजीराअ चाळाल मांयुं जों केअयोंह तों बी तुमां कीअ सेकाह। आने ईया डोगाअल तुमां आखी सेकाह का, ‘ईंहींनेअ उपटायन दोरीयाम पोळ,’ आने तेंहडों वीअ बी! ²² जीयाअ खातुर तुमां पोरमेहेराल ओरुज केअयीह तों पोरमेहेर तुमनेंह दीईज एंहडो जो तुमां वीसवास राखाह ता, तों तुमनेंह मीलीअज।”

ईसुअ आदीकाराअ बाबोताम सोवाल

(मार्क ११:२७-३३; लुक २०:१-८)

²³ ईसु फाचो मोंदीराम गीयो। तींहीं तो लोकाहांन बोद देहलो तांहांअ, मोडा पुंजाराहां आने वोळीलाहीं तीयाअहीं आवीन तीयाल फुच्यों, “केल्‍ला आदीकाराकींअ तुं ईं बादों कीअहो? केडांय तुल ओ आदीकार देदोह?”

²⁴ तांहांअ ईसुंय तीयाहांन आख्यों, “आंय बी तुमनेंह एक सावाल फुचेंह। तीयाअ जोवाब जो तुमां मांन दीहा ता, केल्‍ला आदीकाराकींअ आंय ईं कामें कीअहुं तों तुमनेंह आखेंह। ²⁵ बापतीस्मा केरांअ आदीकार योहानाल पोरमेहेरांय देदलो का मांहांहां?”

तांहांअ ते तीया बाबोताम माजाअ-माज चारचा केरांअ टेक्या का, “‘तीयाल तो आदीकार देनारो पोरमेहेर हाय,’ एंहकींअ जो आपुंह जोवाब दीहुं ता, तो आपनेंह फुचीअ का, ‘तांहांअ तुमां योहानाल काहा नांह मान्यो?’ ²⁶ पेन ‘तीयाल तो आदीकार देनारें ता मांहेंअज हाय,’ एंहकींअ जो आपुंह आखुंह ता, खुब मांहेंअ आपुअ वीरुद कीअ एंहडी बीख हाय। काहाका, बादें मांहेंअ योहानाल पोरमेहेराअ गोठ जाहेर केअनारो मानतेंह।” ²⁷ तीयाअ लीदे तीयाहां ईसुल जोवाब देदो, “तीयाअ आमनेंह खोबुर नांह।”

ईसुंय तीयाहांन आख्यों, “तांहांअ केल्‍ला आदीकाराकींअ आंय ईं कामें कीअहुं तों आंय बी तुमनेंह आखनारो नांह।”

बेन पोयराहांअ बाबोताम दाखलो

^28-30 ईसुंय तीयाहांन आख्यों, “आंय तुमनेंह जों आखुंह तीयाअ बाबोताम तुमांअ काय वीचार हाय? एक मांहुंअ आथों। तीयाअ बेन पोयरा आथा। तीयांय मोडा पोयराअहीं जायन आख्यों, ‘बेटा! आज तुं दाराख्साअ वाळीम जायन काम केअ!’ पेन तीया पोयरांय आख्यों, ‘आंय नांह जानारो!’ पेन फाचलांअ नेअ तीयांय सोताअ वीचार बोदल्यो आने दाराख्साअ वाळीम गीयो। हातींअ तीया मांहांय सोताअ हानांअ पोयराअहीं जायन मोडा पोयराल जेंहकींअ आखलों तेंहकींअज आख्यों। तांहांअ तीया पोयराहां आख्यों, ‘हारों बा! आंय जाहें।’ पेन तो गीयोज नांय। ³¹ आमी तीया बेनाहांमेनेअ केल्‍ला पोयरांय सोताअ बाहकाअ मोर्जी पुरी केअयी?”

तांहांअ तीयाहां जोवाब देदो, “मोडा पोयरांयज,” तांहांअ ईसुंय तीयाहांन आख्यों, “आंय तुमनेंह नोक्कीज आखुंह: वेरो उगरावनारा आने वेस्या तुमांअ पेअलांअ तीयाहांअ जीवोनाहांम पोरमेहेराल राज केरांअ देनारें हाय। ³² काहाका, बापतीस्मा केअनारा योहानांय तुमांअहीं आवीन तुमनेंह हाची वाट देखावली। तेबी तुमां तीयाअ गोठ नांय मानी। पेन वेरो उगरावनाराहां आने वेस्याहां तीयाअ गोठ मानी। तों देखीन बी तुमां तुमांअ पापाहांअ खातुर दुखी वीईन ते सोळी नांह देदा। आने तीयाअ गोठ बी नांह मानी।

दाराख्साअ वाळीअ गोंवांदयाहांअ बाबोताम दाखलो

(मार्क १२:१-१२; लुक २०:९-१९)

³³ “बीहरो दाखलो उनाया। एक जोमीनदार आथो। तीयांय दाराख्साअ वाळी बोंणावी, तीयुअ चारु वेल वाळ बांदी, दाराखसाहांमेनेअ रोह काडांअ कुंडी बोंणावी, आने वाळी हाचवांअ उचो मालो बी बोंणाव्‍यो। हातींअ ते वाळी बीहरा खेळुताहांन गोंवांदी दीईन तो जोमीनदार बीहरा देसाम गीयो। ³⁴ दाराखसें तोळांअ वोखत आलो तांहांअ, तीयांय सोताअ भाग लांअ तीयाअ चाकोराहांन गोंवांदया खेळुताहांअहीं मोकल्या।

³⁵ पेन तीया खेळुताहां तीया चाकोराहांन तीईन, तीयाहांमेर्याअ एकाल देदो, बीहराल माय टाक्यो आने तीजाल ढोगळाहांअ मार दीईन माय टाक्यो। ³⁶ तांहांअ तीया जोमीनदारांय तीया खेळुताहांअहीं पेअलांअ केअता वादारे चाकोराहांन मोकल्या। आने ते तीया चाकोराहांअरी बी तेंहकीअज वोरत्या। ³⁷ सेल्‍ले तीया जोमीनदारांय एंहकींअ वीचारीन सोताअ पोयरालुज तीयाहांअहीं मोकल्यो का, ‘ते मांअ पोयराअ नोक्कीज मान राखीअ’।

³⁸ पेन खेळुताहां जोमीनदाराअ पोयराल देख्यो तांहांअ तीयाहां एक-बीहराल आख्यों, ‘ओ ता मीलकोताअ वारोसदार हाय। चाला आपुंह तीयाल माय टाकजी आने तीयाअ मीलकोत वाअटी लेजी’! ³⁹ हातींअ तीयाहां तीयाल तेअयो ने वाळीअ बारे काडीन माय टाक्यो। ⁴⁰ तांहांअ दाराख्साअ वाळीअ मालीख आवीअ तांहांअ तो तीया खेळुताहांन काय कीअ?” ⁴¹ तांहांअ मोडा पुंजाराहां आने वोळीलाहीं ईसुल जोवाब देदो, “तो तीया खाराब गोंवांदयाहांन खाराब मोते माय टाकीअ। आने जे दाराखसें तोळांअ वोखत तीयाल हारकींअ हीचो दे एंहडा बीहरा गोंवांदयाहांन ते वाळी गोंवांदी दीअ।” ⁴² तांहांअ ईसुंय तीयाहांन आख्यों,

“‘बोंगलो बांदनाराहां जीया ढोगळाल नोक्कामो गोंअलो,

तोज ढोगळो बोंगलाल मोजबुत राखनारो ढोगळो बोंण्‍योह।

ईं काम ता मालीखांयज केअयोंह।

आने तों आपुअ नोजराम कोतोंअ नोवायुअ हाय?’ एंहकींअ पोवीतोर लेखाणाहांम तुमां नोक्कीज वाच्योंहकने?

⁴³ “तीयाअ लीदे आंय तुमनेंह आखुंह, पोरमेहेर सोताअ राजाल तुमांअहींनेअ लीअ लीअ, ने तीयाल तो तीयाअ राज मानीन सोताअ जीवोनाहांम तों देखावनारा लोकाहांन दीअ दीअ। ⁴⁴ मोडा ढोगळापेअ पोळनारों मांहुंअ जेंहकींअ पाजायन कुटका वीअ जाहे आने जेंहकींअ एक मोडो ढोगळो तीयापेअ पोळे ता तों मांहुंअ चुअवाय जाहे तेंहकींअ मांन नांह माननाराहांअ नास वीअ।”

⁴⁵ ईसुअ ए दाखला उनायन ते मोडा पुंजारा आने फोरीसी पोंथाअ वोळील होमजी गीया का ईसु तीयाहांअ बाबोतामुज आखत्लो। ⁴⁶ तीयाअ लीदे, तीयाहां तीयाल तेरांअ कोसीस केअयी तेबी, तीयाहां तेंहकींअ नांह केअयों। काहाका, ते ईसुल तेअ ता लोकाहांअ टोला तीयाहांपेअ हुमलो कीअ एंहकींअ ते बीया। काहाका, लोकाहांअ टोला ईसुल पोरमेहेराअ गोठ जाहेर केअनारो मानत्‍ला।