19
फारगुतीअ बाबोताम
(मार्क १०:१-१२)
1 ए बादया गोठ्या ईसु आखी पारवाअयो तांहांअ तो गालील जील्लामेनेअ नींगीन योरदान खाडीअ दीह उगताअ वेल्याअ तोळीपेर्याअ येहुदीया जील्लाम गीयो। 2 तींहीं लोकाहांअ मोडा-मोडा टोला ईसुअ फाचलांअ गीया आने तीया टोलामेर्याअ आजार्याहांन तीयांय हारें केअयें।
3 तांहांअ थोळाक फोरीसी तीयाअहीं आला, आने तीयाल गोठीहींम तेरांअ ईरादो राखीन तीयांय तीयाल फुच्यों, “सोताअ थेअयुल गोवें तीया कारोणे सुटा सेळा दांअ आदमील आपुअ नीयोमाअ पोरमाणे सुट हाय का?”
4 तांहांअ ईसुंय तीयाहांन जोवाब देता फुच्यों, “पोवीतोर लेखाणाहांम जों लेखलों हाय तों तुमां नांह वाच्यों का? तींहमें एंहकींअ लेखलों हाय का, ‘पेअलांम पेअलांअ पोरमेहेरांय बादों बोंणाव्यों तांहांअ तीयांय एक आदमी आने एक बाय बोंणव्यें। 5 आने तीया कारोणे पोरमेहेरांय आख्यों, 'आदमी सोताअ याहकी-बाहकाल सोळीन सोताअ थेअयुअरी जोळाय आने तें बेनुं एकुज सोरीलाअ बोंणी जाय'। 6 तीयाअ लीदे ते बेन नांय, पेन एकुज सोरीलाअ बोंणी जातेंह। तीयाअ लीदे, पोरमेहेरांय जों जोळों बोंणाव्योंह, तीयाल केडाअ बी तोळांअ नांय जोजे।”
7 तांहांअ तीया फोरीसीहीं तीयाल फुच्यों, “तांहांअ सोताअ थेअयुल लेखाण कीईन फारगुती दांअ मोसेंय आदमील काहाल नीयोम देदोह?”
8 तांहांअ ईसुंय जोवाब देदो, “तुमांअ टीणीवाला सोबावाअ लीदेज मोसेंय तुमनेंह सोताअ थेअयुंहन फारगुती दांअ सुट देदली। पेन पोरमेहेरांय पेअलांअ मांहांहांन बोंणावलें तांहांअ तीयाअ एंहडी मोर्जी नांय आथी का आदमी सोताअ थेअयुल फारगुती दे। 9 मोंजे आंय तुमनेंह आखुंह, जो एक आदमी सीनालाअ कारोणा सीवायाअ बीहरा केल्ला बी कारोणे सोताअ थेअयुल फारगुती दीईन बीहरी थेअयुल राखे ता, पोरमेहेराअ नोजराम तों सीनालों केअनारो बोंणीअ।”
10 तांहांअ तीयाअ चेलाहां तीयाल आख्यों, “एंहडों वीअ ता, आदमी कीदीह बी वोराळ नांय केअ तोंज वादारे हारों हाय!”
11 तांहांअ ईसुंय आख्यों, “बादें मांहेंअ ए गोठ मानी नांह सेकतें। पेन पोरमेहेरांय जीयाहांन खास वोरदान देदोंह, तें एखलेंज ए गोठ मानी सेकतेंह। 12 थोळेंक मांहेंअ वोराळ नांह केअतें तीयाअ खुब कारोणे वीअ सेके। एक कारोण ईं हाय का, जोन्मे देखुंज तें सांवसार कीअ नांय सेके एंहडें हाय। बीहरों कारोण ईं हाय का, थोळाक मांहांहांन बीहरें मांहेंअ, तें सांवसार कीअ नांय सेके एंहडें बोंणावी देतेंह। तीजों कारोण ईं हाय का, थोळेंक मांहेंअ सांवसार कीअ सेके एंहडें हाय तेबी, तें पोरमेहेराअ राज्याअ बाबोताअ गोठ फेलावांअ खातुर वोराळ नांह केअतें। तेंज ए गोठ मानी बी सेकतेंह।”
ईसु हानाअ पोयराहांन आसीरवाद देहे
(मार्क १०:१३-१६; लुक १८:१५-१७)
13 एक वोखत, थोळेंक मांहेंअ हानाअ पोयराहांन ईसुअहीं लालें, ईयाअ खातुर का तो तीया पोयराहांपेअ आथ थोवे आने तीयाहांअ खातुर पोरमेहेराल ओरुज केअ। पेन चेलाहां तीया मांहांहांन ठोपको देदो।
14 पेन ईसुंय चेलाहांन आख्यों, “हानाअ पोयराहांन मांअहीं आवांअ दा, आने तीयाहांन ओटकावता मां! ईया हानाअ पोयराहांअ होच जें हाय तीयाहांनुज पोरमेहेराअ राज्याअ ओनुभोव केरांअ होक हाय।”
15 एंहकींअ आखीन, ईसुंय हानाअ पोयराहांपेअ सोताअ आथ थोवीन तीयाहांन आसीरवाद देदो आने तींहींनेअ नींग्यो।
एक मालदार जुवान मांहुंअ ईसुअहीं आवेह
(मार्क १०:१७-३१; लुक १८:१८-३०)
16 एक वोखत, एक जुवान मांहांय ईसुअहीं आवीन तीयाल फुच्यों, “गुरुजी! कायोमाअ जीवोन मीलवांअ खातुर मांअ केल्लों हारों काम केरांअ जोजे?”
17 तांहांअ ईसुंय जोवाब देदो, “‘काय हारों हाय’ तीया बाबोताम तुं मांन काहाल फुचोह? हारो ता पोरमेहेर एखलोज हाय। हारों! जो तुं कायोम जीवांअ मागो ता, पोरमेहेराअ हुकोमाहांअ पोरमाणे चाल।”
18 तांहांअ तीया मांहांय ईसुल फाचों फुच्यों, “केल्ला हुकोमाअ पोरमाणे मांअ चालांअ जोजे?”
तांहांअ ईसुंय जोवाब देदो, “‘खुन मां कीअहो’, ‘सीनालों मां कीअहो’, ‘चोरी मां कीअहो’, ‘झुटी साक्सी मां दीहो’, 19 ‘तोअ याहकी-बाहकाल मान दे,’ आने ‘जेंहकींअ सोतापेअ तेंहकींअ बीहराहांपेअ बी माया राख।’”
20 तांहांअ तीया जुवान मांहांय जोवाब देदो, “ईया बादा हुकोमाअ पोरमाणे ता आंय चालतोज आलोह। तेबी आजी मांअ बीहरों काय केरांअ जोजे?”
21 तांहांअ ईसुंय तीयाल आख्यों, “जायन तोअपेअ जेबी मीलकोत हाय ते बादी वेची टाक, आने तीयाअ जेबी पोयसा उबजे ते बादा गोरीबाहांन दीअ दे। तांहांअ तुल होरगाम आत्मीक खोजानो मीलीअ। हातींअ मांअरी आव ने मांअ चेलो बोंण। तांहांअ तुं कायोमाअ खातुर जीवोह।”
22 ईं उनायन तों जुवान मांहुंअ दुखी वीईन जातों रीयों। काहाका तों मालदार आथों।
23 हातींअ ईसुंय तीयाअ चेलाहांन आख्यों, “ए गोठ बोराबोर उनाय ल्या! मालदार मांहुंअ सोताअ जीवोनाम पोरमेहेराल राज केरांअ दे तों खुब ओगरों हाय। 24 बोराबोर उनाय ल्या! मालदार मांहुंअ सोताअ जीवोनाम पोरमेहेराल राज केरांअ दे तीयाअ केअता, हुयुअ नाकलामेनेअ उटळो वीहे तों वादारे हेल्लों हाय।”
25 ईं उनायन चेलाहांन खुब नोवाय लागी। आने तीयाहां ईसुल फुच्यों, “तांहांअ नोरकाअ सीक्सामेनेअ केडों वाचाय सेकीअ?”
26 तांहांअ ईसुंय चेलाहांअ वेल हीईन तीयाहांन आख्यों, “मांहांहांन ईं नांयज बोंणे, पेन पोरमेहेराल बादोंज बोंणेह।”
27 तांहांअ पीतोरांय जोवाब देता ईसुल आख्यों, “हेअ! आमां ता आमांअ बादोंज सोळी थोवीन तोअ चेला बोंण्याह। ता आमनेंह काय बोदलो मीलीअ?”
28 तांहांअ ईसुंय चेलाहांन आख्यों, “ए गोठ बोराबोर उनाय ल्या! मांहांअ पोयरो, मोंजे आंय, आवनारी नोवी दुन्याम खुब मोडायावाला राजा तोरीके गादीपेअ बोंहेंह तांहांअ, तुमां मांअ चेला बी बार गादीहींपेअ बोहीन ईसरायेलाअ बार कुलाहांअ लोकाहांअ नीयाय कीअहा।
29 मांअ चेलो बोंण्यों तीयाअ लीदे जीयांय बी सोताअ कोअ-बांअ, का बीहरी मीलकोत, का पावुह, का बोंअयांह, का बाहको, का याहकी, का पोयरें-चावरें सोळी देदें वीअ ता, तीयाल तीयाअ केअता एकसो भाग वादारे मीलीअ, आने तो कायोम जीवीअ बी। 30 पेन आमी वादारे मानुवालें गोंणाअनारें खुब मांहेंअ भोवीस्याम ओसा मानुवालें बोंणीअ, आने आमी ओसा मानुवालें गोंणाअनारें खुब मांहेंअ भोवीस्याम वादारे मानुवालें a बोंणीअ।”