18
पोरमेहेराअ राज्याम मोडांम-मोडो मांहुंअ केडों बोंणीअ?
(मार्क ९:३३-३७; लुक ९:४६-४८)
1 तीयुज वोखत, चेलाहां ईसुअहीं जायन फुच्यों, “पोरमेहेराअ राज्याम a केडों मोडांम-मोडों मांहुंअ बोंणीअ?”
2 तांहांअ ईसुंय एक हानाअ पोयराल हादीन चेलाहांअ आगलांअ उबी राख्यों, 3 आने तीयाहांन आख्यों, “ए गोठ बोराबोर उनाय ल्या! b जो तुमां सोताअ वोलोण नांय बोदला आने हानाअ पोयराहांअ होच नांय बोंणा ता, तुमां पोरमेहेराअ राज्याम कीदीह बी नांयज जाय सेकाह। 4 तीयाअ लीदे, जो मांहुंअ ईया पोयराअ होच सोताल गोरीबळा बोंणावीअ, तोज पोरमेहेराअ राज्याम मोडांम-मोडों बोंणीअ। 5 आने केल्लों बी मांहुंअ ईया हानाअ पोयराहांमेर्याअ एक पोयराल बी तो मांअपेअ वीसवाह राखेह तीयाअ लीदे cआवकारेह तांहांअ, तो मांन आवकारेह एंहकींअ होमजुलीअ।
बीहराहांन पापाम पाळांअ बाबोताम
(मार्क ९:४२-४८; लुक १७:१-२)
6 पेन मांअ चेलाहांमेनेअ केडाल बी dमांअपेअ तीयांय राखला वीसवासामेनेअ पाळी टाकनारा मांहांअ कोगीम मोडी कोअटीअ पुळो e बांदीन तीयाल दोरीयाम बुडवी माए तों तीयाअ खतुर वादारे हारों हाय। 7 बीहरा लोकाहांन तीयाहां मांअपेअ राखला वीसवासामनेअ पाळी टाकनारा मांहांहांअ हालोत खुब खाराब वेअनारी हाय। काहाका, वीसवासी लोकाहांन वीसवासामनेअ पाळी टाके एंहडया बाबोत्या ता दुन्याम हायज। पेन जीया मांहांअ मारफोते ते वीसवासामनेअ पोळी जाताह, तीया मांहांअ हालोत खुब खाराब बोंणीअ।
8 पाप केरांअ खातुर सोताअ आथ का पाग वापरांअ तुल मोन वीअ ता, तुंयुं तो आथ का पाग वाडी टाक्यो वीअ तेंहकींअ होमजीन तो आथ का पाग वापरुअतोज मा! f तोअ बेन आथ का बेन पाग वेअ आने पोरमेहेर तुल कायोम आग बोल्याज केअहे एंहडा नोरकाम टाकी दे तीयाअ केअता, तुं ठुठो का खोळ्यो बोंणीन कायोमाअ खातुर जीवो तों, तोअ खातुर वादारे हारों हाय। 9 पाप केरांअ खातुर सोताअ डोंओं वापरांअ तुल मोन वीअ ता, तुंयुं तो डोंओं काडीन फेकी टाक्यो वीअ तेंहकींअ होमजीन तो डोंओं वापरुअतोज मा! g बेन डोंआंवालो वीईन पोरमेहेर तुल कायोम आग बोल्याज केअहे एंहडा नोरकाम टाकी दे तीयाअ केअता, तुं एक डोंआंवालो वीईन कायोमाअ खातुर जीवो तों, तोअ खातुर वादारे हारों हाय।
वाट चुकी गेहलों घेटों
(लुक १५:३-७)
10 “हेअजा! ईया हानाअ पोयराहांमेर्याअ एकाल बी ओलको मां गोंअता! आंय तुमनेंह आखुंह, होरगाम रीईन मांअ पोरमेहेर बाहकाअ दोरसोन केअया केअनारा दुत तीया पोयराहांअ कालजी राखताह। h v 11 ((मांहांअ पोयरो मोंजे आंय वाट चुकी गेहला मांहांहांन तीयाहांअ पापाअ सीक्सामेनेअ वाचावांअ आलोह।))
12 “एगाह मांहांपेअ एकहोव घेटें वीअ आने तींहमेनेअ एक घेटों वाट चुकी जाय ता, तों मांहुंअ काय कीअ? ईयु बाबोताम तुमां काय वीचारताह? बीहरा नोव्वाणु घेटाहांन डोगापेअ चोरतें थोवीन, तों मांहुंअ वाट चुकी गेहला एक घेटाल होदांअ नांय जाय का? 13 आंय तुमनेंह नोक्कीज आखुंह: तों घेटों तीयाल झुळे ता, वाट चुकयें नांह तीया नोव्वाणु घेटाहांअ लीदे तीयाल जो आनोंद वीअ तीयाअ केअता, वाट चुकी गेहलों तों एक घेटों झुळ्यों तीयाअ लीदे तीयाल वादारे आनोंद वीअ। 14 ईया हानाअ पोयराहांमेर्योअ एक बी नोरकाम जाय i एंहडी होरगामेर्याअ तुमांअ पोरमेहेर बाहकाअ मोर्जी नांह।
15 “जो तोअ मोंडोळामेर्योअ एक वीसवासी तोअ वीरुद पाप केअ ता, तीयाअहीं तुं खानगीम जो, आने तीयाल तीयाअ तो पाप आखी देखाव! जो तो तोअ गोठ उनायन सोताअ पाप माने ता, तुं तीया मांहांअल फाचों तोअ मोंडोळाम लीअ आलोह एंहकींअ होमजुअजे। 16 पेन जो तो तोअ गोठ नांय उनाय आने सोताअ पाप नांय माने ता, तुं सोताअरी साक्सीहींअ तोरीके मोंडोळाअ एक का बेन आदमीहींन लीईन तीयाअहीं फाचो जो, ईयाअ खातुर का ते तीयाल होमजावीन तीयाअ पाप कोबुल केरावे आने तीयाअरी मेल-मीलाप केरांअ तुंयुं बोंणती कोसीस केअयीह तीयाअ ते साक्सी बोंणे। जो तुं एंहकींअ कीअहो ता, तुं पोवीतोर लेखाणाम जों लेखलों हाय तों पुरों कीअहो। तींहीं एंहकींअ लेखलों हाय का, ‘ओसाम-ओसा बेन का तीन साक्सीहींअ आदारे, केल्ला बी गुनाअ साबीती वेरांअ जोजे।’ 17 आने जो तो तीयाहांअ बी सालाह नांय माने ता, तीया बाबोताम बादी होकीकोत मोंडोळाल जाणावजे, ईयाअ खातुर का, मोंडोळाअ लोक बी तीयाल होमजावीन तीयाअ पाप कोबुल केरावे आने तोअरी मेल-मीलाप केरावे। आने जो तो मोंडोळाअ तीया लोकाहांअ सालाह बी नांय माने ता, जेंहकींअ तुं येहुदी सीवायाअ लोकाहांअरी आने वेरो उगरावनाराहांअरी वोरतुअतो वीअ तेंहकींअ तीयाआरी बी वोरतुअजे।
18 “आंय तुमनेंह नोक्कीज आखुंह: तुमांअ मोंडोळाअ एक मांहांअल सीक्सा केरुलीअ तीया बाबोताम तुमां जों बी नोक्की कीअहा, तीयाअ पोरमाणेज पोरमेहेर बी नोक्की कीअ। आने तीया मांहांअल सीक्सा नांय केरुलीअ तीया बाबोताम तुमां जों बी नोक्की कीअहा, तीयाअ पोरमाणेज पोरमेहेर बी नोक्की कीअ।
19 आंय फाचे तुमनेंह नोक्कीज आखुंह, तुमाहांमेर्याअ बेन आदमी ईयु तोरतीम एक हारका वीचार राखीन केल्ली बी बाबोताम पोरमेहेराल मागणी कीअहा ता होरगामेर्योअ मांअ पोरमेहेर बाहको तुमांअ ते मागणी पुरी कीअ। 20 काहाका, मांअ चेलाहांअ तोरीके j बेन का तीन आदमी जीयु बी जागे टोलवाय तींहीं तीयाहांअरी आंय नोक्कीज हाजोर रेहें।”
माफ नांय केअनारो चाकोर
21 हातींअ पीतोरांय ईसुअहीं आवीन तीयाल फुच्यों, “मालीख, मांअ आर्योअ एक वीसवासी k मांअ वीरुद पाप केअ तांहांअ मांअ तीयाल कोतीअ वोखत माफी दांअ जोजे? हांत वोखत का?”
22 तांहांअ ईसुंय जोवाब देदो, “हांतुज वोखत नांय, पेन जांव तो तोअपेअ माफी माग्या केअ तांव, तीयाल तुं माफी देयाज केअजे! 23 तोअ एंहकींअ केरांअ जोजे तीयाअ लीदे तुल होमजावांअ आंय तुल एक गांय आखुंह। तीयु गांअयुंम एक राजा सोताअ ओमोलदाराहांअरी जेंहकींअ वोरत्यो, तेंहकींअज पोरमेहेर बी सोताअ राज्यामेर्याअ लोकाहांअरी वोरतीअ। 24 तीया राजांय सोताअ ओमोलदाराहांपेर्योअ लेणी-देणीअ ईसाब तापासांअ नोक्की केअयों। तीयांय ईसाब तापासांअ चालु केअयों तांहांअ, तीयाअ थोळाक चाकोर तीया राजाअ ओमोलदाराहांमेर्याअ एक आदमील तीयाअहीं लाला। तीया ओमोलदारापेअ राजाअ कोरोळो रुप्यांअ लेणों नीगत्लों। 25 तीया ओमोलदारापेअ तों लेणों पोरांअ पोयसा नांय आथा। तीयाअ लीदे, तों लेणों वोसुल केरांअ खातुर तीया ओमोलदाराल आने तीयाअ थेअ-पोयराहांन गुलाम तोरीके वेची दांअ आने तीयापेअ जोंबी आथों तीयाल बादाल बी वेची दांअ राजांय हुकोम केअयो। 26 तांहांअ तीया ओमोलदारांय राजाअ पागे पोळीन कालावाला केअया, ‘जाराक धीरोज राख! आंय तोअ बादों लेणों पोय देहें।’ 27 तांहांअ तों मांहुंअ देवों पोय सेके एंहडी तीयाअ हालोत नांय आथी तों देखीन राजाल तीयापेअ दाया आली। तीयाअ लीदे, तीयांय तीया ओमोलदाराअ बादों लेणों माफ केअयों आने तीयाल जांअ देदो।
28 तो ओमोलदार राजाअहींनेअ नींग्यो का तुरुतुज, तीयाल तीयाअ आर्योअ बीहरो एक ओमोलदार मील्यो। तीयापेअ ईया ओमोलदाराअ पांचेक हाजार रुप्यांअ लेणों आथों। तीया ओमोलदाराल बोचीम तीईन ईया ओमोलदारांय आख्यों, ‘तोअपेर्योंअ मांअ लेणों चुकवी दे!’ 29 तांहांअ तीयाअ आर्याअ देवावाला ओमोलदारांय तीयाल पागे पोळीन कालावाला केअया, ‘थोळीक धीरोज राख! आंय तोअ बादों लेणों पोय देहें।’ 30 पेन ईया ओमोलदारांय ता धीरोज नांय राखी। उलटों तीयांय तो देवावालो ओमोलदार बादों लेणों पोई दे तांव लोगुंअ तीयाल जेलाम कोंडावी देदो। 31 बीहरा ओमोलदाराहां तों देख्यों तांहांअ तीयाहांन ईया दाया वोगुराअ ओमोलदारापेअ खुब रोग चोळी, आने तीयाहां राजाअहीं जायन तीयाल बादों आखी देखाव्यों।
32 तांहांअ राजांय तीया ओमोलदाराल हादीन आख्यों, ‘ओ खाराब सोबावावाला ओमोलदार! तुंयुं मांन कालावाला केअया तीयाअ लीदे मांयुं तोअ बादों लेणों माफ केअयों। 33 जेंहकींअ मांयुं तोअपेअ दाया केअयी, तेंहकींअ तोअ बी तोअ आर्याअ ओमोलदारापेअ दाया केरांअ जोजत्लों।’ 34 हातींअ राजा खुब खीजवाअयो आने तो ओमोलदार सोताअ बादों लेणों चुकवे तांव लोगुंअ तीयांय तीयाल रीबामोणीअ साज्या वेठांअ खातुर जेलीअ ओमोलदाराहांअ आथाम होपी देदो।”
35 “जो तुमां खेरा मोनाहांकींअ तुमांअ आर्याअ वीसवास्यांहन माफी नांय दा ता, होरगामेर्याअ मांअ पोरमेहेर बाहको बी तुमनेंह माफी नांय दीअ।”