17
ईसुअ देखाव बोदलाअहे
(मार्क ९:२-१३; लुक ९:२८-३६)
1 सोव दीह हातींअ, पीतोराल , याकोबुल आने याकोबुअ पावुह योहानाल सोताअरी लीईन ईसु तीयाहांन एक उचा डोगापेअ हादी गीयो। 2 तींहीं तीया चेलाहांअ देखताज तीयाअ देखाव बोदलाय गीयो। तीयाअ मुख दीहाअ होच उजवोळावालों बोंण्यों, आने तीयाअ पोतळें उजवोळाअ होच पांडेंअ-फोट बोंण्यें। 3 आने चेलाहां एक्कायुंअज मोसेल आने एलीयाल तींहीं ईसुअरी गोठ्या केअता देख्या। 4 तांहांअ पीतोरांय ईसुल आख्यों, “मालीख, आपुंह ईंहीं रेजी तों खुब हारों हाय। तोअ मोर्जी वीअ ता, आंय ईंहीं तीन मांडवें बोंणावुं। एक तोअ खातुर, बीहरों मोसेअ खातुर आने तीजों एलीयाअ खातुर।”
5 पीतोर आजी गोगत्लो तांवज, एक उजवोळावालों वादलों आलों आने तीयाहांन बुजी देदा, आने वादलामेनेअ पोरमेहेर ईसुअ बाबोताम गोग्यो, “ओ मांअ सोताअ मेरालो पोयरो हाय। तीयापेअ आंय खुब राजी हाय। तीयाअ गोठ उनाया!”
6 ईं उनायन चेला काबराय गीया, आने पुंय उबडु पोळी गीया। 7 तांहांअ ईसु तीयाहांअ पाही गीयो आने तीयाहांन ओळकीन आख्यों, “उठा! काबराअता मा!” 8 तांहांअ तीयाहां उचे हेअयों ता, तींहीं एखला ईसु सीवाय कांय बी नांय देख्यों। 9 ते बादा डोगापेनेअ एठा उतुअत्ला तांहांअ, ईसुंय तीयाहांन हुकोम केअयो, “तुमां डोगापेअ जों देख्योंह तों, मांहांअ पोयरो मोंजे आंय मोयन हातींअ पोरमेहेर मांन फाचो जीवतो केअ तांव केडाल बी मां आखता!”
10 तांहांअ चेलाहां ईसुल फुच्यों, “तांहांअ नीयोम हीकवुअनारा एंहकींअ काहाल आखताह का ख्रीस्त आवे तीयाअ पेअलांअ एलीयाअ आवांअ जोजे?”
11 तांहांअ ईसुंय जोवाब देदो, “खोरेखोर एलीयाअ आवांअ जोजे आने लोकाहांन फाचा हारी हालोताम लावांअ जोजे। 12 पेन आंय तुमनेंह आखुंह, एलीया ता एगुहवार्योअ आवी गीयोह। पेन लोकाहीं तीयाल ओअख्यो नांय। आने ते तीयाहांअ मोर्जी वेअ तेंहकींअ तीयाअरी वोरतुअत्ला। तेंहकीअज कीईन, ते लोक मांहांअ पोयराल मोंजे मांन बी दुखें पाळनारा हाय।”
13 तांहांअज ते चेला होमज्या का, बापतीस्मा केअनारा योहानाअ बाबोतामुंज ईसु तीयाहांन आखत्लो।
पुथळों लागला पोयराल ईसु हारो केअहे
(मार्क ९:१४-२९; लुक ९:३७-४३)
14 ईसु ने ते तीनु चेला लोकाहांअ टोलाअहीं फाचा आला। तांहांअ एक मांहुंअ ईसुअहीं आलों आने तीयाअ आगलाअ गुठोणे पोळ्यों, 15 आने तीयाल आख्यों, “साहेब, मांअ पोयरापेअ दाया केअ। तीयाल मीरगी वेअहे आने तो खुब तारास केअहे। मीरगीअ लीदे, तो खुब वोखत आगीम का पांअयांम पोळी जाहे। 16 आंय तीयाल तोअ चेलाहांअहीं लीअ आललो। पेन ते तीयाल हारो नांह कीअ सेक्या।”
17 तांहांअ ईसुंय तींहीं टोलवाअला बादाहांन जोवाब देदो, “वीसवाह नांय केअनारा आने खाराब लोकाहीं! आंय कोताअ वोखत लोगुंअ तुमांअ वेठेंह? तीया पोयराल ईंहीं मांअहीं लावा!” 18 हातींअ ईसुंय तीया पोयराल लागला पुथळाल ठोपको देदो, आने तों पुथळों पोयरामेनेअ नींगी गीयो, आने तो पोयरो तीयुज घेळी हारो वीअ गीयो।
19 लोकाहांअरी आथा तीया चेलाहां फाचलांअ नेअ खानगीम ईसुअहीं जायन तीयाल फुच्यों, “तीया पुथळाल आमां काहा काडी नांय सेक्या?”
20 तांहांअ ईसुंय जोवाब देदो, “तीयाअ कारोण ईं हाय का, तुमाहांपेअ पुरतो वीसवाह नांय आथो। रायाअ बीयाराअ होच तुमाहांम थोळोकुज वीसवाह वेअ तेबी तुमां ईया डोगाअल आखी सेकता का, ‘ईंहींनेअ उपटायन तींहीं जो!’ आने तो तीयाअ पोरमाणे जाय बी। तुमनेंह नांय बोंणे एंहडों काय बी नांय रीअ। 21 [[पेन एंहडी जातीअ पुथळाल ता उपास राखीन पोरमेहेराल ओरुज कीअनुंज काडी सेकाय। बीहरा केंहडाकींअ बी काडी नांय सेकाय।”]]
ईसु सोताअ मोताअ बाबोताम आने तो फाचो जीवतो वीअ तीया बाबोताम फाचो आखेह
(मार्क ९:३०-३२; लुक ९:४३-४५)
22 चेला गालील जील्लाम एक जागे टोलवाअया तांहांअ ईसुंय तीयाहांन आख्यों, “मांहांअ पोयराल मोंजे मांन लोक बीहरा लोकाहीं अ आथाम होपी दीअ। 23 ते बीहरा लोक मांन माय टाकीअ, पेन तीजे दीह पोरमेहेर मांन फाचो जीवतो उठवीअ।” ईं उनायन चेला खुब दुखी वीया।
मोंदीराअ वेरो पोरांअ बाबोताम
24 ईसु आने चेला कापेरनाहुम आवी पोच्या तांहांअ, येहुदी मोंदीराअ वेरो उगरावनाराहां पीतोराअहीं आवीन तीयाल फुच्यों, “तुमांअ गुरुजी मोंदीराअ वेरो पोअहे का?”
25 तांहांअ पीतोरांय जोवाब देदो, “होव, तो पोअहेज!” पीतोर कोअमे गीयो तांहांअ तो तीया बाबोताम कांय बी आखे तीयाअ पेअलांअ ईसुंयज तीयाल फुच्यों, “सीमोन, तुल केंहडों लागेह? दुन्यामेर्याअ राजा केडापेनेअ वेरो उगरावताह? सोताअ देसाअ लोकाहांपेनेअ का, जीयाहांपेअ तीयाहां जीत मीलवीह तीया पोरदेसी लोकाहांपेनेअ?”
26 तांहांअ पीतोरांय जोवाब देदो, “पोरदेसी लोकाहांपेनेअज।” तांहांअ ईसुंय जोवाब देदो, “तांहांअ पोरमेहेराअ राज्याअ लोकाहां तोरीके मोंदीराअ वेरो पोरांअ फोरोजामेनेअ आपुंह सुटा हाय। 27 तेबी आपुंह वेरो उगरावनाराहांन खोटों लागवांअ नांह मागता। तीयाअ लीदे तालावाम जायन गोलीअ टाकजे! आने जों पेअलों मासों लागे तीयाअ मुंय उगाळजे। आने तींहमे तुल चांदीअ एक सीक्को झुळीअ। तो लीईन मांअ भागर्योअ ने तोअ भागर्योअ वेरो पोराय तीयाअ खातुर तीयाहांन तो दी देजे!”