16
फोरीसी आने सादुकी लोक ईसुअ पारखों केअताह
(मार्क ८:११-१३; लुक १२:५४-५६)
1 एक दीह, फोरीसी पोंथाअ थोळाक लोक ने सादुकी पोंथाअ थोळाक लोक ईसुअहीं आला। तीयाअ पारखों कीईन तीयाल झुटो पाळांअ तीयाहांअ ईरादो आथो। तीयाअ लीदे, तीयाहां तीयापेअ मागणी केअयी, “पोरमेहेराअहींनेअज तुं आलोह तीयाअ आमनेंह खातरी वेअ तीयाअ खातुर एक चोमोत्कार कीअ देखाव।”
2 तांहांअ ईसुंय तीयाहांन जोवाब देदो, “दीह बुडेह तोतापेअ जुग रातळे तांहांअ तुमां आखताह का, ‘जुग रातळाअयोंह तीयाअ लीदे वाप आवनारो हाय।’ 3 आने वेगीअ जुग रातळे ने आंदारों-आंदारों लागे तांहांअ तुमां आखताह का, ‘जुग रातळीह आने आंदारों-आंदारों लागेह तीयाअ लीदे खुब वोरहात पोळनारो हाय।’ जुगीअ देखावापेनेअ तुमां हावामानाअ भोवीसवाणी कीअ सेकताह। पेन आमी पोरमेहेर जों कीअ रीयोह तों तुमां होमजी नांह सेकता। 4 तुमां खुब खाराब लोक हाय। आने तुमां हाची रीते पोरमेहेराअ भोकती नांह केअता। तुमां मांअपेअ चोमोत्काराअ मागणी केअताह का? योनाअ जीवोनाम वेअला चोमोत्काराअ सीवाय, बीहरो केल्लो बी चोमोत्कार पोरमेहेर तुमांअ आगलांअ नांय देखावीअ।”
एंहकींअ आखीन हातींअ ईसु तीयाहांन सोळीन उळीम बोहीन तीयाहांअहींनेअ जातो रीयो।a
फोरीसी आने सादुकी लोकाहांअ बाबोताम ईसु चेलाहांन चेतवेह
(मार्क ८:१४-२१)
5 गालील तालाव पार कीईन ईसु आने चेला तीयु तोळी पोच्या तांहांअ, चेलाहांन भान आली का ते सोताअरी मांडा लीअ आवांअ वीहराय गेहला। 6 तांहांअ ईसुंय चेलाहांन आख्यों, “हेअजा! फोरीसी आने सादुकी लोकाहांअ खोमीराअ से चेतीन रेजा।” 7 तांहांअ चेला माजाअ-माज चारचा केरांअ टेक्या का, “आपुंह मांडा नांह लाला तीयाअ लीदे तो एंहकींअ आखेह।”
8 चेला जों आखत्ला तों ईसु जांय गीयो। तीयाअ लीदे तीयांय तीयाहांन फुच्यों, “ओ मांअपेअ एकदोम ओसो वीसवास राखनाराहां, तुमाहांपेअ मांडा नांह तीयाअ तुमां माजाअ-माज काहा चारचा केअताह? 9 तुमां आजी नांह होमज्या का? पांच मांडाहांकींअ मांयुं पांच हाजार लोकाहांन खावावलों तांहांअ वादला कुटका तुमां टोलवुअला तीयाअ कोतेंअ सीबलें पोराअलें तों तुमनेंह ईत नांह का? 10 आने सांत मांडाहांकींअ मांयुं चार हाजार लोकाहांन खावावलों तांहांअ वादला कुटका तुमां टोलवुअला तीयाअ कोतेंअ सीबलें पोराअलें तों बी तुमनेंह ईत नांह का?
11 तेबी तुमां एंहकींअ काहा नांह होमजुअता का आंय तुमनेंह मांडाअ बाबोताम नांय आखत्लो? आंय ता एंहकींअ आखत्लो का तुमां फोरीसी आने सादुकी लोकाहांअ खोमीराअ से चेतीन रेजा।”
12 तांहांअ चेला होमज्या का, तो तीयाहांन मोगलुअला नोटाम बेळतां तीयाल फुलावनारा खोमीराअ बाबोताम नांय आखत्लो, पेन तो फोरीसी आने सादुकी लोकाहांअ खोटा बोदाहांअ बाबोतामुंज आखत्लो।
पीतोर कोबुल केअहे का ईसुज ख्रीस्त हाय
(मार्क ८:२७-३०; लुक ९:१८-२१)
13 हातींअ ईसु कायसारीया फीलीप्पी सेहेराअ वीस्ताराम आलो तांहांअ तीयांय चेलाहांन फुच्यों, “मांहांअ पोयरो मोंजे आंय केडो हाय तीया बाबोताम मांहेंअ काय आखतेंह?”
14 तांहांअ तीयाहां जोवाब देदो, “थोळेंक आखतेंह का तुं बापतीस्मा केअनारो योहान हाय। बीहरें थोळेंक आखतेंह का तुं एलीया हाय। बीहरें आखतेंह का तुं येरेमीया हाय नेता तुं पोरमेहेराअ गोठ जाहेर केअनारो बीहरो एगोह हाय।”
15 तांहांअ ईसुंय तीयाहांन फुच्यों, “आंय केडो हाय तीया बाबोताम तुमां काय आखताह?”
16 सीमोन पीतोरांय तीयाल आख्यों, “तुं ख्रीस्त हाय! तुं जीवता पोरमेहेराअ पोयरो हाय।”
17 तांहांअ ईसुंय तीयाल आख्यों, “ओ योनाअ पोयरा सीमोन! पोरमेहेर तोअपेअ खुब राजी हाय। आमी तुंयुं जों आख्यो तों तुल केल्ला बी मांहांय नांह जाणाव्यों, पेन होरगामेर्याअ मांअ पोरमेहेर बाहकांयज तुल तों जाणाव्यों।
18 आमी आंय तुल आखुंह, तुं पीतोर, मोंजे खोळकों हाय। ईया खोळकापेअ आंय मांअ मोंडोळ चोंणनारो हाय। नोरकाअ ताकोत्या सुदा बी ईया मोंडोळाल हारवी नांय सेके।
19 पोरमेहेराअ राज चालीअ तीया मोंडोळाअ बादी सोत्ता आंय तुल दीहुं। तोरतीपेअ तुं जों जों बोंद पाळोह, तों पोरमेहेर बी बोंद पाळीअ। आने तोरतीपेअ तुं जे जे सुट दीहो, तीयुल पोरमेहेर बी सुट दीअ।”
20 हातींअ ईसुंय तीयाअ चेलाहांन कोळोक रीते हुकोम केअयो, “आंय ख्रीस्त हाय तों तुमां केडाल बी मां आखता!”
सोताअ मोताअ बाबोताम आने तो फाचो जीवतो वीअ तीया बाबोताम ईसु भोवीसवाणी केअहे
(मार्क ८:३१-९:१; लुक ९:२२-२७)
21 तीयु वोखतनेअ ईसु तीयाअ चेलाहांन होमजावांअ टेक्यो का, “मांन येरुसालेम जांअ पोळेह। तींहीं येहुदी आगेवान, मोडा पुंजारा, आने नीयोम हीकवुअनारा जें दुखें मांन पाळीअ तें आंय वेठेंह। आने ते मांन मोताअ साज्या दीअ। आने मोयन हातींअ तीजे दीह पोरमेहेर मांन फाचो जीवतो उठवीअ।”
22 तांहांअ पीतोर ईसुल एक वेल लीअ जायन तीयाल ठोपको दांअ टेक्यो, “मालीख, मेरबानी कीईन पोरमेहेर तोअ जीवोनाम एंहडों वेरांअ नांय दे। एंहडों तोअ जीवोनाम कीदीह बी बोंणांअ नांय जोजे।”
23 तांहांअ ईसुंय पीतोराअ वेल फीरीन तीयाल आख्यों, “सेतानाअ होच तुं मां गोगतो! पोरमेहेराअ मोर्जी पुरी केअता तुं मांन ओटकावोह। ओ तोअ वीचार ता पोरमेहेराअ मोर्जी पोरमाणे नांह, पेन मांहांहांअ मोर्जी पोरमाणेज हाय।”
24 हातींअ ईसुंय तीयाअ चेलाहांन आख्यों, “जो केडों बी मांअ चेलों बोंणांअ मागतों वेरी ता, तीयाअ सोताअ मोर्जी पोरमाणे चालांअ सोळी दांअ जोजे आने मांअ लीदे दुखें वेठीन मोरांअ बी तीयार वीईन मांअ चेलों बोंणांअ जोजे। 25 काहाका, जों बी सोताअ जीव वाचावांअ मोथेह, तों कायोमाअ खातुर नांयज जीवे। पेन जीयाल बी तों मांअ चेलों हाय तीयाअ लीदे मांहेंअ माय टाकतेंह, तों कायोमाअ खातुर जीवीअ। 26 मांहेंअ दुन्याअ बादया वोस्तु मीलवे पेन कायोमाअ खातुर नांय जीवे ता तीयाहांन काय बी लाब नांह। एंहडी एक बी वोस्तु नांह का जे मांहुंअ पोरमेहेराल दीईन कायोमाअ खातुर जीवी सेके। 27 काहाका, मांहांअ पोयरो आंय मांअ पोरमेहेर बाहकाअ मोडाय लीईन मांअ दुताहांअरी आवनारो हाय। आने तांहांअ आंय बादा मांहांहांन तीयाहांअ कामाहांअ पोरमाणे बोदलो देहें।
28 ए गोठ बोराबोर उनाय ल्या! आमी ईंहीं उबी रेनाराहांम थोळेंक एंहडें हाय का जें आंय आवीन लोकाहांअ जीवोनाहांम राज केअहें तों हेअतां पेअलांअ नांय मोय।”