14
बापतीस्मा केअनारा योहानाअ मोत
(मार्क ६:१४-२९; लुक ९:७-९)
1 तीयु वोखत गालील वीस्ताराअ राजपाल हेरोद आंतीपा ईसुअ बाबोताम उनाअयो। 2 तांहांअ तीयांय सोताअ दारबारामेर्याअ मांहांहांन आख्यों, “तो ता खोरेखोर बापतीस्मा केअनारो योहान हाय। तो मोअलांमेनेअ फाचो जीवतो उठ्योह तीयाअ लीदे, ओताअ बादा चोमोत्कार केरांअ तीयापेअ ताकोत हाय।” 3-4 हेरोदाअ एंहकींअ आखांअ कारोण ईं आथों का, तीयांय योहानाल माय टाकावलो। ते बाबोत एंहकींअ आथी: हेरोदांय तीयाअ पावुंह फीलीपाअ कोअवाली हेरोदीयाल पाळावी लेदली। मोंजे, योहान हेरोदाल आख्या केअत्लो, “तुंयुं हेरोदीयाल पाळावी लेदीह तों ता पोरमेहेरांय देदला नीयोमाअ पोरमाणे खोटों हाय।” तीयाअ लीदे, हेरोदीया योहानाल तेरांअ हेरोदाल फोरोज पाळ्या केअत्ली। मोंजे, हेरोदांय योहानाल तीईन बांदावलो आने तीयाल जेलाम कोंडांअ हुकोम केअलो। 5 हेरोद योहानाल माय टाकांअ मागत्लो, पेन तीयाल एंहडी बीख आथी का, जो तो एंहकींअ केअ ता, जीया लोकाहांन योहानांय बोद देदलो, ते लोक हेरोदाअ वीरुद धामाल कीअ। काहाका, ते योहानाल पोरमेहेराअ गोठ जाहेर केअनारो मानत्ला।
6-7 तेबी, हेरोदाअ जोन्मा दीहाअ उजवोंणीअ वोखत, हेरोदीयाअ पोयरी बादा गोवाराहांअ आगलांअ नाची, आने हेरोदाल तीयुंय ओतोअ बादो खुस कीअ देदो का, तीयांय होम खायन तीयुल वोचोन देदों का, “माग-माग, तुं जोंबी मागो तों आंय तुल देहें।”
8 तांहांअ सोताअ याहकीअ सोलाहा पोरमाणे तीयु पोयरींय हेरोदाल आख्यों, “बापतीस्मा केअनारा योहानाअ मुनकों आमीन-आमी वाडावीन एक पारातांम थोवीन मांन दे।” 9-12 तों उनायन राजा खुब दुखी वीयो। पेन गोवाराहांअ आगलांअ तीयांय देदला वोचोनाअ लीदे, तीयांय तीयुअ मागणी पुरी केरांअ हुकोम केअयो, आने जेलाम योहानाअ मुनकों वाडाव्यों। हेरोदाअ मांहेंअ योहानाअ मुनकों एक पारातांम लीअ आलें, आने तीयु पोयरील देदों। ने पोयरी तों सोताअ याहकीअहीं लीअ गीयी। तांहांअ योहानाअ चेला आला, आने योहानाअ मुरदाल लीअ जायन कोबीराम ओजी देदों। हातींअ ते गीया आने ईसुल तीयाअ खोबुर देदी।
ईसु पांच हाजार लोकाहांन खावावेह
(मार्क ६:३०-४४; लुक ९:१०-१७; योहान ६:१-१४)
13 ते खोबुर उनायन, बीहरा लोकाहीं अ से सेटे रांअ खातुर ईसु तीयाअ चेलाहांअरी तींहींनेअ नींगीन एक उळीम बोहीन एक उजाळ जागे गीयो।
तीयाअ खोबुर पोळी तांहांअ, लोकाहांअ मोडो टोलो सोताअ गांवांहांमेनेअ नींगीन पाकठ्योज ईसुअ फाचलांअ गीयो। 14 ईसु उळीमेनेअ उत्यो आने तीयांय लोकाहांअ मोडो टोलो तीयाअ वाट जोवतो देख्यो। तांहांअ तीयाल तीया लोकाहांपेअ खुब दाया आली। आने तांहांअ तीयांय जें आजार्यें आथें तीयाहांन हारें केअयें। 15 वाअतों पोळ्यों तांहांअ, तीयाअ चेलाहां तीयाअहीं आवीन आख्यों, “आमी खुब टेम वीअ गीयोह। आने ओ जागो बी उजाळ हाय। ए लोक गांवांहांम जायन सोताअ खातुर खावुलोंअ वेचाअतों लीअ सेके, तीयाअ खातुर तीयाहांन वाटे पाळी दे।”
16 तांहांअ ईसुंय जोवाब देदो, “तीयाहांअ जावुलीअ काय जोरुल नांह। तुमां सोतेज तीयाहांन कावींह खांअ दा!”
17 चेलाहां जोवाब देदो, “ईंहीं आमाहांपेअ ता पांच मांडा ने बेन पुजलें मासें ओतेंअज हाय।”
18 ईसुंय आख्यों, “तें ईंहीं मांअहीं लावा।” तांहांअ चेलाहां तें लावीन ईसुल देदें।
19 आने तीयांय बादा लोकाहांन चारापेअ बोंहांअ आख्यों। हातींअ तीयांय पांच मांडा ने बेन मासें लेदें, आने जुगीअ वेल हीईन पोरमेहेराअ आभार मान्यो, आने मांडा ने मासें पाजीन चेलाहांन देदें। आने चेलाहां तें लोकाहांन वाटी देदें। 20 बादा लोकाहीं तारायन खादों। हातींअ वादला कुटका चेलाहां टोलव्या ता, तीयाअ बारा सीबलें पोराअयें। 21 खानाराहांम पांच हाजार आदमीं आथा, आने बाय-मांहेंअ ने पोयरें ता जुदें!
ईसु पांअयांपेअ चालेह
(मार्क ६:४५-५२; योहान ६:१५-२१)
22 आने तुरुतुज ईसुंय चेलाहांन उळीम बोंहांअ आने तीयाअ आगलांअ तालावाअ तीयु तोळी जांअ आख्यों। आने तो ता लोकाहांन वाटे पाळांअ रीयो। 23 लोकाहांन वाटे पाळीन हातींअ तो एखलोज डोगापेअ पोरमेहेराल ओरुज केरांअ गीयो। वाअतों पोळ्यों तांव तो तींहीं एखलोज आथो। 24 तांहांअ चेला बोठला ते उळी तालावाम खुब सेटे जाती रेहली। आने वारों खुब चालत्लों तीयाअ लीदे, उळी चुवाहांकींअ आल्या केअत्ली।
25 उजालों वेरांअ तीयारीम आथो तांहांअ ईसु पांअयांपेअ चालतो-चालतो आमांअहीं आलो। 26 चेलाहां ईसुल पांअयांपेअ चालतो-चालतो आवतां देख्यो तांहांअ ते काबराय गीया, आने “कावींह बोलाय! कावींह बोलाय!” एंहकींअ आखीन ते बोंबली उठया। 27 पेन ईसुंय ता तुरुतुज चेलाहांन आख्यों, “हींमोत राखा! ओ ता आंय हाय! बीता मा!”
28 तांहांअ पीतोरांय जोवाब देदो, “मालीख, ओ जो खोरेखोर तुं वीअ ता आंय बी तोअहीं पांअयांपेअ चालतो-चालतो आवुं एंहडो मांन हुकोम केअ।”
29 तांहांअ ईसुंय जोवाब देदो, “आव!” तांहांअ पीतोर उळीमेनेअ उतीन पांअयांपेअ चालतो-चालतो ईसुअ वेल जांअ टेक्यो। 30 पेन वारों जोरपेअ चालत्लों तों देखीन पीतोर बीयो, आने पांअयांम बुडांअ टेक्यो, आने तो बोंबली उठ्यो, “मालीख, मांन वाचाव!”
31 तांहांअ तुरुतुज ईसुंय लांबो आथ कीईन तीयाल तीअ लेदो आने तीयाल आख्यों, “ओसा वीसवासावाला! तुंयुं सोंका काहाल राखी?” 32 ते बेनुं उळीम चोळ्या तांहांअ वारों पोळी गीयों। 33 उळीम आथा ते बीहरा चेला ईसुअ पागे पोळीन आखी उठया का, “हुदींअज तुं पोरमेहेराअ पोयरो हाय!”
गेन्नेसारेत जील्लाम ईसु आजार्याहांन हारें केअहे
(मार्क ६:५३-५६)
34 तालावाल उनखीन ईसु आने चेला गेन्नेसारेत जील्लाम आवी पोच्या। 35 आने तींहींर्याअ मांहांहां ईसुल ओअखी काडयो। तांहांअ तीयांय पाहल्या-पाहल्या बादा वीस्ताराम मांहांहांन मोकलीन बादा दुखी लोकाहांन लीअ हादया आने तीयाहांन ईसुअहीं लालें।
36 आने तीयाहां ईसुल कालावाला केअया, “दुखी लोकाहांन तोअ झोब्बाअ कोरील तेबी आथलांअ दे!” तांहांअ तीयाल आथलुअनारा बादा दुखी लोक हारा वीअ गीया।