11
1 ईसु तीयाअ बारा चेलाहांन ए हीकामोण्या दीअ पारवाअयो तांहांअ, तीयांय तीयाहांन ईसरायेल लोकाहांअ सेहेराहांम ने गांवांहांम मोकल्या। हातींअ तो ईसरायेल लोकाहांअ बीहरा सेहेराहांम बोद दांअ आने हारी गोठ जाहेर केरांअ गीयो।
बापतीस्मा केअनारो योहान सोताअ चेलाहांन ईसुअहीं मोकलेह
(लुक ७:१८-३५)
2 ख्रीस्त जें कामें केअत्लो तीया बाबोताम बापतीस्मा केअनारा योहान जेलाम नेअ उनाअयो। तांहांअ, तीयांय सोताअ चेलाहांमेर्याअ थोळाकाहांन ईसुअहीं तीयाल फुचांअ मोकल्या। 3 तीया चेलाहां ईसुल फुच्यों, “योहानांय फुचाव्योंह का, ‘आवनारो आथो तो ख्रीस्त तुंज हाय का, आमां बीहराअ वाट जोवजी?’”
4 तांहांअ ईसुंय तीयाहांन जोवाब देदो, “ईंहीं जों-जों तुमां उनाअताह आने हेअताह, तों फाचा जायन योहानाल आखी देखावजा! मोंजे का, 5 आंय आंदलाहांन देखतें कीअहुं, लुलाहांन चालतें कीअहुं, कोडलांहन हारें कीअहुं, बेरांहन उनाअतें कीअहुं, मोअलाहांन जीवतें कीअहुं, आने जें नासार हाय तीयाहांन हारी गोठ जाहेर कीअहुं। 6 योहानाल ईं बी आखजा का, जें मांअ बाबोताम सोंका नांह राखतें, तीयाहांपेअ पोरमेहेर खुब राजी हाय।”
बापतीस्मा केअनारा योहानाअ बाबोताम ईसुअ साक्सी
7 योहानाअ चेला तींहींनेअ जाहला तांहांअ, ईसु टोलामेर्याअ लोकाहांन योहानाअ बाबोताम आखांअ टेक्यो का, “तुमां उजाळाम योहानाअहीं गेहलें तांहांअ तुमां केल्ली जातीअ मांहांअल हेरांअ गेहलें? वाराअरी आलता बुरुअ होच घेळी-घेळी बोदलाअया केअनारा मांहांअल हेरांअ गेहलें? 8 बीहरों तुमां केल्ली जातीअ मांहांअल हेरांअ गेहलें? रेसमी पोतळें पोवला मांहांअल हेरांअ का? तुमां जांअतेंह का, रेसमी पोतळें पोवनारें मांहेंअ ता मेहेलामुज रेतेंह। 9 बीहरों तुमां केल्ली जातीअ मांहांअल हेरांअ गेहलें? पोरमेहेराअ गोठ जाहेर केअनारा योहानल हेरांअ गेहलें का? आंह, तीयालुज हेरांअ गेहलें। आंय तुमनेंह आखुंह का योहान ता पोरमेहेराअ गोठ जाहेर केअनारा सीदा-सादा मांहांअ केअता वादारे मोडों मांहुंअ आथों। 10 जीयाल मोकलांअ पोरमेहेरांय तीयाअ पोयराल आखलों तो ता योहानुज हाय। पोरमेहेरांय एंहकींअ आखलों, ‘उनाअजे! आंय मांअ खोबरील तोअ आगलांअ मोकलेंह। तो जायन मांहेंअ तोअ आवकार केअ तीयाअ खातुर तीयाहांन तीयार कीअ।’ 11 ए गोठ बोराबोर उनाय ल्या! बापतीस्मा केअनारा योहानाअ केअता मोडों मांहुंअ ईयु तोरतीपेअ आजी लोगुंअ पेदा नांह वीयों। तेबी, पोरमेहेराअ राज्यामेर्योअ हानांम-हानो वीसवासी बी योहानाअ केअतां मोडो हाय। 12 बापतीस्मा केअनारा योहानांय पोरमेहेराअ गोठ आखांअ चालु केअलों तीयु वोखतनेअ आमी लोगुंअ पोरमेहेराअ राज पुरी ताकोताकींअ फेलाअया केअहे। आने खुब मांहेंअ तीया राज्याअओनुभोव केअतेंहज। पेन बीहरें मांहेंअ तीयाहांपेअ खुब हुमलो केअयाज केअतेंह। 13 पोरमेहेराअ गोठ जाहेर केअनारा बादाहां योहानाअ वोखत लोगुंअ पोरमेहेराअ राज्याअ बाबोताम भोवीसवाणी केअली। तेंहकींअज, मोसेंय बी सोताअ नीयोमाहांअ चोपळीहम तीया बाबोताम भोवीसवाणी केअली। 14 जोंबी केडों ए गोठ मानांअ तीयार हाय तीयाल आंय आखेंह: योहानुज एलीयाअ होच मांहुंअ हाय। ख्रीस्ताअ पेअलां आवनारो आथो तो ओज योहान हाय। 15 तुमां खोरेखोर उनायांअ आने होमजांअ मागतें वेरी ता ए गोठ धीयान राखीन उनाया।
16 ईया मांहांहांन, मोंजे, जीयाहां मांअ केअलें कामें देख्येंह तीयाहांन, आंय केडाअरी बोरखावुं? तें बाजाराम बोहीन बेन टुकळ्या पाळीन रोवनारा हानांअ पोयराहांअ होच हाय। 17 एक टुकळीअ पोयराहां बीहरी टुकळी पोयराहां खातुर पावी वाजी, पेन बीहरी टुकळीवालें ता तीयाअ पोरमाणे नांय नाच्यें। तांहांअ तीयाहां मोयाळुअ गीतें आख्यें, पेन तें ता तीयाअ पोरमाणे रोळ्यें बी नांय। 18 तेंहकींअज कीईन ईया मांहांहांन योहानाअ सेवा बी नांह गोंवती, आने मांअ सेवा बी नांह गोंवती। योहान आलो, ने तो उपास राखत्लो, आने तो दाराख्साअ रोह नांय पीहलो। तांहांअ ईं मांहेंअ आखत्लें, ‘तीयाल पुतळों लाग्योंह।’ 19 आने मांहांअ पोयरो आंय आलो, ने आंय खातोह ने पीतोह, आने ईं मांहेंअ आखतेंह का, ‘ईया मांहांअल हेरा! तो खावर्यो ने साकट्यो हाय। आने तो वेरो उगरावनारांअ ने बीहरा पापींअ दोसदार हाय!’ जें मांअ ने योहानाअ कामाहांअ बाबोताम वीचारतेंह तीयाहांन खोबुर पोळीअ का, आमां जों केअताह तों होकीकोतुमुंज गीयानुवालों हाय।”
ईसुपेअ वीसवास नांय केअनारा मांहांहांअ तीन सेहरें
(लुक १०:१३-१५)
20 हातींअ ईसु, जीया सेहेराहांम तीयांय खुब चोमोत्कार केअला, तीया सेहेराहांअ लोकाहांन ठोपको दांअ टेक्यो। काहाका, खुब चोमोत्कार हीईन बी तीयाहां सोताअ पापाहांअ लीदे दुखी वीईन ते नांह सोळ्या। तीयांय तीयाहांन एंहकींअ ठोपको देदो: 21 “ओ खोराजीन सेहेराअ लोकाहीं! तुमांअ हालोत एकदोम खाराब वेअनारी हाय! ओ बेथसायदा सेहेराअ लोकाहीं! तुमांअ बी हालोत खुब खाराब वेअनारी हाय! जे चोमोत्कार तुमांअ आगलांअ मांयुं केअयाह ते जो खुब वोरसांअ पेअलांअ तुर आने सीदोन सेहेराहांअ लोकाहांअ आगलांअ केअया वेअता ता, ते लोक एगुंह वार्याअ सोताअ पापाहांअ लीदे दुखी वेअता, आने तों देखावांअ, खोतलाअ चींजें पोवीन, सोताअ मुंनकाहांपेअ खाअ टाकता, आने हातींअ सोताअ पाप सोळी बी देता। 22 तीयाअ लीदे, ईत राखजा का, सेल्ला नीयायाअ दीह, पोरमेहेर तुर आने सीदोनाअ लोकाहांन जे सीक्सा दीअ, तीयाअ केअता तुमनेंह तो वादारे सीक्सा दीअ। 23 आने ओ कापेरनाहुमाअ लोकाहीं! तुमां ओभीमान राखीन सोताल होरगा लोगुंअ उचा केरांअ मोर्जी राखत्ला। पेन सेल्ला नीयायाअ दीह, पोरमेहेर तुमनेंह नोरकाम टाकी दीअ। जे चोमोत्कार मांयुं तुमांअ आगलांअ केअयाह, ते जो सोदोम सेहेराअ लोकाहांअ आगलांअ केअया वेअता ता, तीया सेहेराअ लोक सोताअ पापाहांअ लीदे दुखी वीईन ते सोळी देता आने पोरमेहेर बी तीया सेहेराहांअ नास नांय केअतो। आने तों सेहेर आमी बी हायाताम रेतों। 24 तीयाअ लीदे, ईत राखजा का, सेल्ला नीयायाअ दीह, पोरमेहेर सोदोम सेहेराअ लोकाहांन जे सीक्सा दीअ, तीयाअ केअता तुमनेंह तो वादारे सीक्सा दीअ।”
थाकलाहांअ खातुर आराम
(लुक १०:२१-२२)
25 तीयु वोखत ईसुंय पोरमेहेराल आख्यों, “जुग-तोरतीपेअ राज केअनारा ओ बाहका! सोताल गीयानुवाला आने लेखला गोंअनारा लोकाहांन तोअ राज्याअ बाबोताअ गोठ्या जे तुंयुं नांह जाहेर केअया, ते तुंयुं वीसवासाम काचा मांहांहांन जाहेर केअयाह। तीयाअ लीदे आंय तोअ आभार मानुंह। 26 ओ बाहका, एंहकींअ केरांअ तुल गोव्यों।”
27 हातींअ ईसुंय तींहीं जें तीयाअ गोठ उनायांअ मागत्लें तीयाहांन आख्यों, “मांअ पोरमेहेर बाहकांय तीयाअ ईरादो लोकाहांन जाहेर केरांअ आने तो पुरो केरांअ बादों काम मांन होप्योंह। मांअ बाहकाअ सीवाय मांन बीहरों केडों बी पुरी रीते नांह ओअखुअतों। आने मांअ सीवाय आने जीयाहांन मांअ बाहकाल ओअखावांअ मांअ मोर्जी वेअ तीयाहांअ सीवाय मांअ बाहकाल बीहरों केडों बी पुरी रीते नांह ओअखुअतों। 28 वोजो उसली-उसलीन थाकलाहां, तुमां बादें मांअहीं आवा, आने आंय तुमांअ थाक उतावेंह। 29 जेंहकींअ बेन डोगरें एक जुहराअरी जुपायन आरी मीलीन वोजो तांय जातेंह तेंहकींअ, तुमांअ वोजो मांन उसली लागांअ ध्या! आने मांअपेनेअ पोरमेहेराअ बाबोताअ पुरी हाचाय हीकी ल्या! काहाका, आंय मीठो ने गोरीबळा सोबावुवालो हाय। आने आंय तुमनेंह आराम दीहुं। 30 काहाका, जुहरा रुपी मांअ बोदा पोरमाणे चालांअ हेल्लों हाय, आने वोजा रुपी मांअ नीयोम पालांअ बी हेल्लों हाय।”