10
ईसु तीयाअ बार चेलाहांन सेवाम मोकलेह
(मार्क ३:१३-१९; लुक ६:१२-१६)
1 ईसुंय तीयाअ बारा चेलाहांन सोताअ पाही हादया, आने पुतळें काडांअ, आने बादी जातीअ रोगाहांमेनेअ आने आजाराहांमेनेअ लोकाहांन हारा केरांअ तीयाहांन आदीकार देदो।
2 मालीखाअ बारु खास चेलाहांअ नांवें एंहकींअ हाय: सीमोन, जीयाअ नांव ईसुंय “पीतोर” पाळलों तो, सीमोनाअ पावुह आंदरीया, झेब्दीअ पोयरो याकोब, याकोबाअ पावुह योहान, 3 फीलीप, बारथोलोमी, थोमा, माथी जो वेरो उगरावनारो आथो तो, आलफीअ पोयरो याकोब, थादी, 4 रोम सारकाराअ वीरुद केअनारी टुकळीमेर्योअ आथो तो सीमोन,a आने केरीयोत गांवांअ येहुदा जीयांय ईसुल तेरावी देदलो तो।
ईसुअ बार चेलाहांअ खास सेवा
(मार्क ६:७-१३; लुक ९:१-६)
5 ईसुंय बारा चेलाहांन एंहडी हीकामोण दीईन मोकल्या, “येहुदी जातीअ नांह तेंहडा लोकाहांअहीं मा जाता! तेंहकींअज सामरी लोकाहांअहीं बी मा जाता! 6 तीयाअ बोदले, ईसरायेल लोकाहांअहीं जा, का जें पुलवाय गेहला घेटाहांअ होच हाय। 7 जायन एंहकींअ जाहेर केअजा का, ‘पोरमेहेर लोकाहांअ जीवोनाहांम राज केरांअ वोखत पाही आलोह।’ 8 आजार्याहांन हारें केअजा! मोअलाहांन फाचें जीवतें केअजा! कोड रोगुवालाहांन बी हारें केरा! आने पुतळाहांन काडजा! वोगुर पोयसे मांयुं ईं वोरदानें तुमनेंह देदेंह, तेंहकींअज तुमां बी तीया वोरदानाहांन वापरीन वोगुर पोयसे बीहराहांअ भोलों केअजा! 9 तुमांअ कोंबोराअ पोटटाहांअ खीचाहांम होनाअ का केल्ली बी जातीअ पोयसा तुमांरी मा लीअ जाता! 10 वाटीअ खातुर झोली का, वादाराअ डोगली, का खाहळें, का लाकुळ बी मा लीअ जाता। काहाका, काम केअनाराहांन तीयाअ रोजी मीलवांअ होक हाय। तीयाअ लीदे, जीया लोकाहांम तुमां काम केअताह तीयाहांपेअ, तुमांअ जोरुलीहींअ खातुर तुमांअ आदार राखांअ जोजे।
11 तुमां केल्ला बी सेहेराम का गांवांम जा तांहांअ, तुमनेंह गोवारा राखांअ जों मांहुंअ लायोक वीअ तीयाअ होदणी केअजा! आने तीयु जागेनेअ नींगा तांव लोगुंअ तीयाअज कोअ रेजा! 12 तुमां एक कोअमें जा तांहांअ, तीया कोअवालाहांन एंहकींअ आखीन सालाम केअजा का, ‘तुमनेंह पोरमेहेर आसीरवाद दे!’ 13 जो तीया कोअवालें तुमनेंह आवकार केअ ता, तुमां देदला आसीरवाद तीयाहांन मीले। पेन जो तें तुमनेंह आवकार नांय केअ ता, ते आसीरवाद तीयाहांन नांय मीले। 14 जो केल्ला बी सेहेराअ का कोअवालें मांहेंअ तुमनेंह आवकार नांय केअ, का तुमांअ गोठ्या नांय माने ता, तो जागो सोळीन जाता रेजा! आने तुमांअ गोठीहींन तीयाहां नोफरोत केअयीह तीयाअ लीदे, तुमां जाता-जाता तुमांअ पागाहांअरी चोटलो तींहींमेनेअ उदलो फोकळी टाकजा! 15 आंय तुमनेंह नोक्कीज आखुंह: मांअ गोठ्या नांय माननारा तीया कोअवालाहांअ का सेहेराअ मांहांहांन नीयायाअ दीह पोरमेहेर सोदोम ने गोमोरा सेहेराहांम रेहला लोकाहांअ केअता वादारे आकरी सीक्सा कीअ!
ईसुअ चेलाहांपेअ पोळांअ हाय तें दुखें
(मार्क १३:९-१३; लुक २१:१२-१७)
16 ईत राखजा का, तोरस्यांअ टोलाम मोकलाअनारा घेटाहांअ होच आंय तुमनेंह खुब खाराब लोकाहांम मोकलुंह। तीयाअ लीदे, तुमां हापळाहांअ होच हुच्यार आने कोबुतोराहांअ होच लुच्चायाअ वोगुर रेजा! 17 येहुदी धोरमाअ आगेवानाहांअ से चेतीन रेजा! काहाका, ते तुमनेंह तीईन येहुदी धोरमाअ कोरुटाम लीअ जाय, आने भोकती मोंडोळाअ पोंगाहांम तुमनेंह चापकाहांअ मार ठोकावीअ। 18 तुमां मांअरी सोबोंद राखनारा हाय तीयाअ लीदे ते आगेवान तुमनेंह राजपाल आने राजाहांअहीं लीअ जाय आने तीयाहांअ आगलांअ तुमनेंह गुनेगार तोरीके उबी राखीअ। तांहांअ तीयाहांन आने बीहरा येहुदी सीवायाअ लोकाहांन मांअ बाबोताम, साक्सी दांअ तुमनेंह मोको मीलीअ। 19 ते आगेवान तुमनेंह तीअ लीअ जाय तांहांअ, ‘तीयाहांन काय आखुलोंअ आने तों केंहकींअ आखुलोंअ’ तीया बाबोताम चींता मां केअता! काहाका, तीयाहांन तुमांअ काय आखुलोंअ तों तीयुज घेळी पोवीतोर आत्मा तुमनेंह आखीअ। 20 तीयु वोखत जों तुमां गोगाह तों, तुमांअ सोताअ सोब्दा नांय वीअ, पेन होरगामेर्याअ तुमांअ पोरमेहेर बाहकाअ पोवीतोर आत्माज तुमांअ मारफोते गोगीअ।
21 मांहेंअ सोताअ पावहाहांनुंज मोताअ साज्या देवावांअ तेरावी दीअ। आने बाहका बी सोताअ पोयराहांनुंज मोताअ साज्या देवावांअ तेरावी दीअ। आने पोयरें तीयाहांअ याहकी-बाहकाअ वीरुद बोंणीअ आने तीयाहांन मोताअ साज्या देवावीअ। 22 तुमां मांअ चेला हाय तीयाअ लीदे, खुब मांहेंअ तुमनेंह नोफरोत कीअ। पेन जें मांहेंअ सेल्ले लोगुंअ मांअपेअ वीसवास राखतें रीअ, तीयाहांनुंज पोरमेहेर वाचावीअ। 23 एक गांवांअ मांहेंअ तुमनेंह सोतावे तांहांअ, बीहरा गांवांम नाही जाजा। आंय तुमनेंह नोक्कीज आखुंह: ईसरायेल देसाअ बादा गांवांहांम तुमांअ काम पुरों केरा तीयाअ पेअलांअ, मांहांअ पोयरो आंय आवी जाहें।
24 एक चेलो तीयाअ गुरुअ केअता चोळीयातो नांह, आने एक चाकोर तीयाअ सेटुअ केअता चोळीयातो नांह। 25 एक गुरुअरी मांहेंअ वोरतुअतेंह तीयाअ केअता वादारे हारकींअ तें तीयाअ चेलाअरी वोरतीअ एंहडी तुमां आस्या नांह राखी सेकता। नेता, एक सेटाअरी मांहेंअ वोरतुअतेंह तीयाअ केअता वादारे हारकींअ तें तीयाअ चाकोराअरी वोरतीअ एंहडी तुमां आस्या नांह राखी सेकता। वादाराम-वादारे तुमां एंहडी आस्या राखी सेकताह का, मांहेंअ मांअरी जेंहकींअ वोरतुअतेंह तेंहकींअज तें तुमांअरी बी वोरतीअ। आंय पोंगाअ मालीखाअ होच हाय। पेन मांहांहां मांन पुतळाहांअ राजा बेएलझेबुल आखीन मांअ ओपमान केअयों। तीयाअ लीदे, तें नोक्कीज तुमांअ बी तीयाअ केअता वादारे ओपमान कीअ। तुमां ता खाली मांअ कोर्यांअ तोरीके हाय।
केडाल बीयांअ जोजे?
(लुक १२:२-७)
26 तुमनेंह माय टाकांअ धोमकी देनारा लोकाहांन बीता मा! मांहेंअ नांह जांअतें एंहडी दोरेक गोठील तुमां जाहेर केरा ते पोरमेहेराअ मोर्जी हाय। तीयाअ मोर्जी ए नांह का, तीयाअ हाचाय दोबली ने भेदुवाली रे। 27 तीयाअ लीदे, आंय तुमनेंह जों खानगीम आखुंह तों तुमां लोकाहांन जाहेराम आखजा! आने तुमां मांअपेनेअ जों खानगीम उनाअयाह तों तुमां बादें मांहेंअ उनाय तेंहकींअ जोरपेअ आखजा!
28 जें एखला तुमांअ सोरीलालुज माय टाकांअ मोर्जी राखतेंह पेन आत्माल माय टाकी नांह सेकतें, तीयाहांन बीता मां! उलटों, एखला पोरमेहेरालुज बीया! तोज नोरकाम सोरीलाअ आने आत्माअ बेनुंअ नास कीअ सेकेह। 29 तांबाअ एक हानांअ सीक्काअb बेन चीळखुलें वेचाअतेंह। तेबी, तीयाहांमेनेअ एक बी चीळखुलों तुमांअ पोरमेहेर बाहकाअ राज्या सीवाय नांह मोअतों। काहाका, पोरमेहेर बादों जांअहे। 30 तो तुमांअ बाबोताम बी बादों जांअहे। तुमांअ मुंनकाअ कोतेंअ चोट्यें हाय तों बी तो जांअहे! 31 खुब चीळखुलाहांअ केअता तुमां पोरमेहेराअ नोजुराम वादारे कींमती हाय! तीयाअ लीदे, तुमनेंह माय टाकांअ धोमकी देनारा लोकाहांन बीता मां!
जाहेर रीते ईसुल कोबुल केरुलोंअ ने तीयाअ नाकार केरुलोंअ
(लुक १२:८-९)
32 जोबी बीहराहांअ आगलांअ ‘आंय ईसुअ चेलो हाय’ एंहकींअ कोबुल केअहे, तीया बाबोताम आंय बी होरगामेर्याअ मांअ पोरमेहेर बाहकाअ आगलांअ कोबुल केअहें का, ‘तो मांअ चेलो हाय।’ 33 पेन जोबी बीहराहांअ आगलांअ ‘आंय ईसुअ चेलो नांह’ एंहकींअ आखीन मांअ नाकार केअहे, तीयाअ आंय बी होरगामेर्याअ मांअ पोरमेहेर बाहकाअ आगलांअ, ‘तो मांअ चेलो नांह’ एंहकींअ आखीन नाकार केअहें।
सांती दांअ नांय, पेन फाट-फुट पाळांअ
(लुक १२:५१-५३; १४:२६-२७)
34-35 आंय दुन्याम आलो तीयाअ पोरीणामे दुन्याअ मांहेंअ एक-बीहराअरी सांतीम रीअ एंहकींअ मा धारता! आंय आलो तीयाअ पोरीणामे ता, मांअपेअ वीसवास नांय राखनारा पोयरा, मांअपेअ वीसवास राखनारा तीयाहांअ बाहकाहांअ वीरुद उठीअ। आने मांअपेअ वीसवास नांय राखनार्या पोयर्या, मांअपेअ वीसवास राखनार्या तीयुहुंअ याहकीहींअ वीरुद उठीअ। आने मांअपेअ वीसवास नांय राखनार्या वोवळ्याह, मांअपेअ वीसवास राखनार्या तीयुहुंअ हावुळीहींअ वीरुद उठीअ। एंहकींअ कीईन मांअ लीदे एकुज कोअमें फाट-फुट पोळीअ। 36 मांअपेअ वीसवास राखनारा मांहांअ दुसमोन ता, मांअपेअ वीसवास नांय केअनारें तीयाहांअ कोर्येंअज हाय।
37 जोंबी मांहुंअ मांअ केअता तीयाअ बाहकापेअ का याहकीपेअ वादारे माया राखेह, तों मांअ चेलो गोंणायांअ लायोक नांह। आने जोंबी सोताअ पोयराल का पोयरील मांअ केअता वादारे मेर केअहे, तों बी मांअ चेलो गोंणायांअ लायोक नांह। 38 जीयु जागे मांहेंअ गुनेगाराल कुरुसापेअ जोळीन माय टाकतेंह, तीयु जागे तो गुनेगार सोताअ कुरुस उसली जाहे। ईयाअ होच जोंबी मांअ लीदे दुखें वेठीन मोरांअ बी तीयार नांह वेअतों, आने मांयुं देखावली वाटे नांह चालतों, तों बी मांअ चेलो गोंणायांअ लायोक नांह। 39 दुखें पोळे तांहांअ, जोंबी तों मांअ चेलो नांह एंहकींअ बीहराहांअ आगलांअ आखीन सोताअ जीव वाचावांअ कोसीस केअहे, तों कायोमाअ खातुर नांयज जीवे। पेन जीयाल बी तों मांअ चेलो हाय तीयाअ लीदे मांहेंअ माय टाकतेंह, तों कायोमाअ खातुर जीवीअ।
40 जोंबी तुमांअ आवकार केअहे, तों मांअज आवकार केअया बोराबोर हाय। आने जोंबी मांअ आवकार केअहे, तो मांन मोकलुअनारा मांअ पोरमेहेर बाहकाअ बी आवकार केअया बोराबोर हाय। 41 एक आदमी पोरमेहेरांय मोकलुअलो चेलो हाय तीयाअ लीदे, जोंबी मांहुंअ तीयाअ आवकार केअहे, तों मांहुंअ सोते बी, तीया चेलाल पोरमेहेरापेनेअ जो बोदलो मीलेह तो बोदलो मीलवीअ। आने एंहकींअ कीईन, एक आदमी हाचो हाय तीयाअ लीदे जोंबी मांहुंअ तीयाअ आवकार केअहे, तों मांहुंअ सोते बी, तीया हाचा आदमील पोरमेहेरापेनेअ जो बोदलो मीलेह तो बोदलो मीलवीअ। 42 आंय तुमनेंह नोक्कीज आखुंह: धारा का, केडाल बी, मोंजे ईया मांअ चेलाहांमेनेअ जो नांवांअतो नांह तीयाल सुदा बी, तो मांअ चेलो हाय तीयाअ लीदे, तुमां एक गालास हेलों पांयज बी दा, ता तुमनेंह पोरमेहेरापेनेअ नोक्कीज तीयाअ बोदलो मीलीअ।”