2
Ana Tamang Katoroan
1 Alagad ika, Tito, ana kinakaipowan mong itoro amo ana tamang katoroan. 2 Toroan mo ana manga gorang na lalaki na magin mapinasensiya, magin maray ana sakandang rungug, mapagpugul sa sadiri, makusug sa pagtood, pagkamuya, ag pagkamatinius. 3 Sa manga gorang na babayi pagsabiyan mo man sirang mamoway nin matanos bilang paratood sa Dios, indi manraut nin iba, o bukung boratsira. Kinakaipowan magtoro man sira kin paono ana maraay na pamomoway, 4 tanganing pangarugan sira nin manga jobin na babayi na mamu`yan ana sugud ag manga agin. 5 Ana manga babaying adi kaipowan man na toroan na magin mapinasensiya, malinig ana kaisipan, maigus, mabuut ag masinonodsonod sa sugud, tanganing uda maitatsar tomang sa sasabyun nin Dios. 6 Pagsabiyan mo man ana manga jobin na lalaki, na magin mapagpugul sa sadiri. 7 Magpakita ika nin maraay na alimbawa sa nga`min na bagay. Magin osto ag tuduk sa poso mo ana sa saimong pangangadal. Magpakita ika nin maray na ladawan. 8 Sa saimong pagtoro, sigoradowun mong manga tamang sasabiyun ana pirmi mong gamitun tanganing indi ika matatsaran nin siisay man manunungud sa manga pisabi mo. Sa paagi nyaan, mapapasupug ana manga nitomang sa sa`tun, ta uda sira masasabing maraut tomang sa`tun.
9 Toroan mo man ana manga oripun na magin masinonodsonod sa sakandang among, bukung mariniklamo; indi sira dapat magsabi nin tomang sa sakandang among. 10 Sabiyun mo sakandang indi mangikit, imbis magin osto sa nga`min na bagay, tanganing maipakita nira ana karaayan nya manga katoroan nin Dios na sa`tun na Paraligtas.
11 Ta ana grasiya o karaayan nin buut nin Dios na nitaong kaligtasan, ipinaisi na sa nga`min na tao. 12 Amo aan ana nitoro sa`tun na ba`yan ta na ana salang pamomoway ag pagma`wut na makalaman. Kaya makakapamoway na kita ngowan nin tanos, togyo ag angay sa Dios, 13 miyentras na piugat ta ana laoyay tang pilaoman, uda iba kindi ana makapangyariyan na pagbalik nya mamorawayun tang Dios ag paraligtas na si Jesu-Cristo. 14 Itinao niya ana sakanyang sadiri tanganing balokatun kita sa nga`min tang kara`tan ag linigun tanganing magin sakanyang banwaan na nakadistino sa paggibo nin maraay. 15 Itoro mo ana nga`min na adi, ag gamitun mo ana intiro mong kapangyariyan tanganing makombinsi sira sa karaayan ag maitogyo alin sa kara`tan. Ag indi mo pagta`wan nin logar na amakun ika nin siisayman.