3
Ana Kristiyanong Ogali
1 Iparumrum mo sa manga miyembro na pomasakup pirmi sa manga nipamayo ag sa manga otoridad, sonoron adi, ag pirming anda sa paggibo nin maray. 2 Indi sira kinakaipowan magsabi nin maraut maski kiisay. Imbis, kinakaipowan sirang maging mabuut, ag magpakita nin kapakombabaan sa kiisay man. 3 Ta kaso buku pa kitang paratood kolang man kita nin pakaintindi manunungud sa kaostowan ag manga parabalga. Nagin kitang oripun nya sadiri tang pagmati ag nya nga`min na klasi nin kaosmakan. Namoway man kita na agko maraut na kaisipan ag pang-ori sa kapwa, ikinagasa kita nin iba, ag kita nagasa man sakanda. 4 Piro kaso maipaisi ana grasiya o karaayan nin buut ag pagkamuya nin Dios na sa`tun na Paraligtas, 5 ilinigtas niya kita, buku dail sa sa`tun na mararaay na gibo, kindi pormedyo nya sakanyang pagkairak sa sa`tun. Naligtas kita ag naipangagin otro sa Espirito Santo na among lomininig ag nagtao nin ba`gong boway sa sa`tun. 6 Sa paagi nya sa`tun na Paraligtas na si Jesu-Cristo, ibino`bo sa sa`tun nin Dios ana Espirito Santo 7 tanganing sa paagi nya sakanyang grasiya o karaayan nin buut, ginibo kitang manga matanos ag maresibi ana boway na uda kapondowan na pilaoman ta. 8 Osto ana katoroan na adi ag mapagkakatiwalaan. Kaya muya kong itoro mo ana manga bagay na adi tanganing ana manga nitood sa Dios, magin maigus sa paggibo nin maraay. Ana manga adi maraay ag mapapakinabangan nya nga`min. 9 Likayan mo ana uda manga kamutangan na manga diriskotiran, manga pagsasaysay nin laaaba na listaan nin manga pag-ererensiya, ana manga diskosiyon ag dibati manunungud nya Kasogoan, ta ana manga adi uda naitataong karaayan. 10 Pagsabiyan mo ana manga taong niraut nya sainyong pagkakauusad. Isikwal mo iya kin napagsabiyan mo na nin usad o dowang beses na patanid piro indi pa nibago. 11 Ta ana bagaan na tao maraut, ag ana manga kasa`lan niya mismo amo ana nipabistong iya sala.
Oltimong Kasogoan
12 Papopontaun ko diyan si Artemas, o kaya si Tiquio. Kin omabot na siisay man sakanda, ingowaun mong makaponta tolos sa Nicopolis, ta nakapagdesisyon na akong adto omistar anggan na matapos ana tagliput. 13 Ingowaun mong matabangan si Apolos ag si Zenas na abogado tanganing mapadali ana sakandang pagbyai. Sigoroon mong agko sira nya nga`min nirang kaipowan. 14 Ag toroan mo ana sa`tun na manga ipatngod na maging maigus sa paggibo nin maraay, tanganing makatabang sa nangangaipo. Sa bagaan, magigin kapakipakinabang ana sakandang boway.
15 Pikomosta ika nya nga`min na manga kaibanan ko didi. Ikomosta mo man ako diyan sa nga`min na ipatngod sa pagtood.
Mapasainyo logod ana nga`min na bendisyon nin Dios.