Ana Sorat ni Pablo ki
Tito
1
1 Alin ki Pablo na oripun nin Dios ag apostol ni Jesu-Cristo.
Sinogo ako tanganing pakusugun ana pagsarig nya manga pinili nin Dios, paiwasun ana sakandang naiisiyan manunungud sa kaostowan na makapagrarani sa sa`tun sa Dios. 2 Ag ta`wan sira nin paglaom manunungud sa boway na uda kapondowan. Bago pa lalangun ana kina`ban, ana boway na adi ipinanoga na nin Dios na indi tataong magpotnay. 3 Ipinaisi man adi niya sa tamang panaon ag ipinagkatiwala sa sa`kun tanganing ipangadal, basi sa kasogoan nin Dios na sa`tun na paraligtas. 4 Saimo Tito, na tonay kong agin sa pagtood na itinao sa sa`tun nga'min:
Mapasaimo logod ana pag-ataman ag katoninungan na alin sa Dios Ama ag sa sa`tun na Paraligtas na si Jesu-Cristo.
Ana manga Trabao ni Tito sa Creta
5 Inobon ko ika sa Creta tanganing osayun mo ana manga bagay na buku pang osay ag pomili ika nin mamamayo sa simbaan sa kada banwaan, basi sa isinogo ko na saimo. 6 Ana piliun mo amo adtong uda maitatatsar sa sakanda, usad sana ana sugud, ana manga agin nitood ag bukung manga paribok o kaya makisil ana payo. 7 Kinakaipowan uda katatsaran ana usad na namamayo sa simbaan, ta ana sakanyang pangongo`naan amo ana manga gibong manunungud sa Dios. Kinakaipowan buku iyang abawun, bukung magaga`sun, bukung paraborat, buku man na garugasuun o kaya angap. 8 Bokas ana sakanyang baguy sa pagpadagos nin manga bisita, mamumu`yun sa karaayan, tataong magdesisyon, ostong makiiba sa kapwa, masinonod-sonod sa Dios, ag tataong magpugul sa sadiri. 9 Kinakaipowan na makusug niyang pinapangaptan ana kaostowan tanganing maitoro man niya sa iba kin ono ana tonay na katoroan, ag maipabisto man niya kin ono ana sala adto sa manga nikontra nyaan. 10 Ta dakul ana indi nitood sa katoroan na adi, lalo na ana manga taong alin sa riliiyon nin manga Judio. Pidaya nira ana iba sa paagi nin uda kamutangan na erestoriyaan. 11 Kinakaipowan na mapugulan sira sa sakandang maraut na gibo, ta piraut sana nira ana manga pamilya sa paagi nya pangangadal nin manga bagay na indi man kinakaipowan na itoro, tanganing makakoko nin sentabo. 12 Usad na mismo sa sakandang propita ana nagsabi: “Ana manga tagaCreta potnayun, manga ogaling ayup, manga ogakung angap.” 13 Tama ana sinabi niya. Dail nyaan, biyo mo sirang patanidan, tanganing mamoway sirang osay basi sa sakandang pagtood, 14 ag indi na ika magtood sa manga oroestoriya nya manga Judio, o nya manga toro nin taong tominalikod na sa kaostowan. 15 Sa taong malinig ana isip malinig man ana nga`min na bagay, piro sa taong maraut ag indi nitood, uda bagay na malinig, ta maati ana sakandang poso ag isip. 16 Nisabi sirang bistado nira ana Dios, piro indi man nakikita sa paagi nya sakandang gibo. Grabi ana kara`tan nira ag di nisonod sa Dios kaya buku sirang angay sa onoman na maray na gibo.