49
يعقوب دا ئسباراك ئشيرّان نّس
1 داي ئغرد سيدنا يعقوب يي وراو نّس أها ئنّاياسن: «أوريو غوري أد-اون ئنيخ ماغ-اون ئجرون ݣ-ؤسّان نّا ديدّان:
2 جمعات، سّغدات أتاروا ن يعقوب، سّغدات يي ماغ-اون ييني ئبّاتون.
3 أرأوبين، شݣّين أمنزو نو، لغلت تامزواروت نّا ؤروخ لّيݣ لّيخ س صّاحت ئنو. تكّيد نّيݣ ن-أيتماش ݣ لعزّ د دّرع،
4 والاينّي لا تفلوفولد أم وامان، ؤغا تݣّد أمزْوارو، ئدّخ تݣند د تمطّوطّ ئنو بلها هاتين تسحشّمدييي.
5 شمعون د لاوي يون رّاي أي غورسن. لا تمساسان غاس خف منغيوت.
6 ؤر دّيخ أد كشمخ تاݣراوت نّسن أها ؤر دّيخ أد-امّوخ ݣ-ؤجمّوع نّسن. ئدّخ س-ؤطير نّسن نغان بنادم أها س-ؤفراح نّسن ستّورسن ئعجليين.
7 ئتّونعل ؤطيّر نّسن، ئدّخ ؤر ديكس تلّي رّحمت! د-ؤحراق نّسن، ئدّخ ئخّا شايݣان. دّيخ أد بضوخ تاروا نّسن أها دّيخ أت تن زلعخ ݣ تمازيرت ن إسرائيل.
8 يهوذا، دّان أيتماش أد سّمغورن ئسّك. أها تدّيد أت ترّود ئعداون نّش أها دّان أيتماك أد-اش بندقن.
9 يهوذا، أممّي، تݣيد أم ممّيس ن-ئزم نّا د ياغولن زݣ تصياطّ. تݣند أم ئزم نغد أم تيزمت ئوا ماݣ غيين أت تيسكّر؟
10 ؤغا تواكّاس تݣلّديت زݣ يهوذا نغد تانباطّ زݣ واراو نّس، أل ديدّو باب نّس ن غا ضاعن ميدّن.
11 ئدّا أد-ئقّن أغيّول نّس غر دّيليت، ئدّخ غورس تعدّا أها ئدّا أد ئسّيرد ئعبان نّس س شراب، ئدّخ ئݣّودي أم وامان. a b
12 زݣّاغن والّن نّس س شّراب أها ملّولن تغماس نّس س-ؤغي، ئدّخ ئلّا غورس شايݣان.
13 زبولون ئدّا أد-ئزدغ تاما ن لبحر، ݣ-ؤدغار نّاݣ تبدادن ئغرّوبا. أها تدّا تمازيرت نّس أت تامژ أل تمدينت ن صيدون.
14 يسّاكر أم ؤغيّول ئصحان، ئمحضن ئنݣر ن لكوارا.
15 يوفا ئس ئژيل وانسا أها تغودا تمازيرت، ئسمال ئغير نّس ئ واݣّا أها ئݣّ لخدمت ن-ئسمغان.
16 ئدّا دان أد-ئنبض خف لقوم نّس، ئدّا أد ئݣ أم تقبلين ياضن ن يعقوب.
17 ئدّا دان أد ئݣ أم ئفيغر ݣ-ؤبريد، د تفيغري ݣ تبريت. ئدّا أد-ئقّس يي وْييس ݣ-ؤعرقوب أها ئدّا ؤمناي أد-ئتّوتي غر تفّير.
18 أمولانا ݣونّيخش أد يي تفوكّاد!
19 دّان أد هجمن ئخوّان خف جاد، والاينّي ئدّا أت تن ئژّع أها ئتفارتن.
20 تدّا تمازيرت ن أشير أت توش شايݣان ن لغلّات. أشال نّس أد ئوش لغلت نّا تيرين ئݣلّيدن.
21 نفتالي أم تملالت يوسين ئخف، نّا ئتارون ئغجدن ئغودان.
22 يوسف ئݣا أم ؤسكلو ئتّارون، ئمغيد تاما ن-ؤغبالو. أها كّين تسطوين نّس نّيݣ ن-ؤݣادير.
23 هجمن غيفس س تفاليون أها سخوبناست ئنضليبن نّس.
24 والاينّي ئسّيغ ئعداون نّس أها صحوناس ئفاسن. س تنباط ن ربّي أخاتار، أمكسا، أنبداد ن يعقوب.
25 س ربّي نّا ئتعباد ئبّاش نّا ش-ئسعاوان، س ربّي نّا ئغين يي مايد-ئݣّان شا نّا ش-ئسباركن س-ؤنژار د وامان ن دّاون ن واشال د تاروا د شايݣان ن لمال.
26 لباراكا ن-ئبّاش نّا يوݣرن لخير ن لعواري ن وبدا د توريرين تيقديمين. أت ترس خف يوسف نّا ئتنباضن خف أيتماس!
27 بنيامين ؤشّن أموعار، تيفاوت لا ئتتّا تاصياطّ نّس، غر تادݣّات لا يوطّو سعايت نّس».
28 ويدّ أيد ئݣان أراو ن سيدنا يعقوب، لّان س تناعش داي زيكسن أيد فّغن تقبلين ن-إسرائيل. د واد أيدّ ئݣان أوال نّس نّا ئنّا يي واراو نّس لّيݣ تن ئبارك، كو يون س لباراكا نّس.
لموت ن سيدنا يعقوب
29 داي ئوصّا سيدنا يعقوب أراو نّس ئنّاياسن: «ها نكّين دّجاورخ أد مّتخ، نضلاتيتي تاما ن لوالدين ئنو ݣ-ئفري نّا ئلّان ݣ-ئݣر ن عفرون أحثي
30 نّا مي تّينين ئݣر ن مكفيلا تاما ن ممرا ݣ تمازيرت ن كنعان نّا ئسغا إبراهيم د-ئݣر زݣ عفرون أحثي حما أت ت-ئݣ د-ئسنضال.
31 ديكس أݣ تّونضل إبراهيم د تمطّوطّ نّس سارا د إسحاق د تمطّوطّ نّس رفقا أها ديكس أي نضلخ ليئة.
32 هاتين ئسغا إبراهيم ئݣر د-ئفري نّا ديكس ئلّان زݣ أراو ن حث».
33 لّيݣ ئكمّل سيدنا يعقوب أوال، ئمحض خف ؤسداري نّس أها ئسمون ئضار نّس. داي ياويت ربّي أم لجدود نّس.