48
يعقوب دا ئسباراك أراو ن يوسف
1 فّير ن شا ووسان، نّاناس يي سيدنا يوسف: «ئبّاك ياغت شا». داي ئمّون د وراو نّس منسّى د-أفرايم أد يانّاي ئبّاس.
2 داي لّيݣ نّان يي سيدنا يعقوب: «هان ممّيش يوسف ئدّاد غيرك». داي ئݣ درع أها ئقيم خف ؤسداري.
3 داي ئنّا سيدنا يعقوب يي سيدنا يوسف: «ئضهريي ربّي نّا ئغين يي كولشي ݣ تمدينت ن لوزa، ݣ تمازيرت ن كنعان أها ئباركييي.
4 داي ئنّايي: ها نكّين دّيخ أد سعدّوخ تاروا نّش عنوݣا، ݣخ زيك شايݣان ن لݣنوس أها وشخ تامازيرت-اد يي تاروا نّش أبدا فّير-اك.
5 دغي، أراو نّك سّين أفرايم د منسّى نّا تورْوت دات ن توادا نو غر تمازيرت ن مصر وينو أي ݣان. أد-يي كوسان أم رأوبين د شمعون.
6 ماشان أراو نّك نّ غا ئلالن فّير-اسن أد ݣين وينّش أها أمژن أمور زݣ توكوست ن أيتماتّسن.
7 ئد نكّين لّيݣ د-أغولخ زݣ تامازيرت ن أرام يوغيي مشرضول س لموت ن مايش راحيل ݣ تامازيرت ن كنعان، داي نضلخت تاما ن-ؤبريد ن تمدينت ن أفراتا نّا مي تّينين: بيت لحم».
8 نتّا ئخايل سيدنا يعقوب ئشيرّان ن سيدنا يوسف، ئنّاياس: «ماي مسين ويدّ؟»
9 داي ئنّاياس سيدنا يوسف: «هاتين ئشيرّان-ئنو نّا يي ئوشا ربّي ݣ تمازيرت-اد». داي ئنّاياس سيدنا يعقوب: «سّحدزتنين غيري أت تن باركخ».
10 ؤر ئقّيم سيدنا يعقوب لا ئسّادّا شا مليح ئدّخ ئوسير عنوݣا. داي ئسحادز سيدنا يوسف ئشيرّان نّس غر ئبّاس. داي ئݣراسن سيدنا يعقوب ئغيل أها ئسّودمتن.
11 داي ئنّا يي سيدنا يوسف: «ؤر دميخ أد علوخ ؤدم نّش، ئوا هان ربّي يودّجايي ألّيݣ أنّايخ أود أراو نّك».
12 داي ئهزّا سيدنا يوسف أراو نّس زݣ دات ن-ئبّاس أها ئسجد دات-اس.
13 داي يامژ سيدنا يوسف أفرايم س-ؤفوس أفاسي، ئسبدّيت ݣ-ئديس أزلماض ن سيدنا يعقوب، أها يامژ منسّى س-ؤفوس أزلماض ئسبدّيت ݣ-ئديس أفاسي ن سيدنا يعقوب.
14 ماشان سيدنا يعقوب ئسمخلّاف ئفاسن نّس. ئسرس أفوس أفاسي خف ؤقرّو ن-أفرايم مغار نتّا أيد ئݣان أمژيّان د-ؤفوس أزلماض خف ئخف ن منسّى واخا د نتّا أيد ئݣّان أمنزو.
15 داي ئبارك سيدنا يعقوب سيدنا يوسف أها ئنّا: «لا تتّرخ يي ربّي نّا س-ؤمنن لوالدين ئنو إبراهيم د إسحاق، ربّي نّا يي ئحضان زݣّوس لالخ أل دغي،
16 لملاك نّس نّا يي ئفوكّان زݣ ماݣّان لحاشت نّا ؤر-ئحلين أد ئبارك ئشيرّان-اد! ئسّن أس دّان ميدّن أد شتين ئسم ئنو د-ئسم ن لوالدين ئنو إبراهيم د إسحاق. أد-ئسعدّو تاروا نّسن عنوݣّا ݣ واشال!»
17 داي لّيݣ يانّاي سيدنا يوسف ئس ئسرس ئبّاس أفوس أفاسي خف ؤقرّو ن أفرايم ؤر-اس ئعجيب لحال. أها يامژ أفوس ن-ئبّاس حما أت تيسموتّي زݣ ئخف ن أفرايم س أقرّو ن منسّى.
18 داي ئنّاياس سيدنا يوسف: «ئهي أيبّا، هاتين تخضيد، واد أيد ئݣان أمنزو، ئوا سرس أفاسي نّك خف ئخف نّس».
19 والاينّي سيدنا يعقوب ؤر ئري أها ئنّاياس: «سّنخ أممّي، سّنخ. تاروا ن منسّى تدّا أود نتّات أت تݣ يون ن لݣنس أخاتار، ماشان ؤماس أمژيان ئدّا أت تياݣر أها تݣ تاروا نّس شايݣان ن لݣنوس».
20 داي ئسباركتن ݣ واسّ نّا أها ئنّا: «دّان أيت يعقوب أت ترن لباراكا س-ئسماون نّون أها أل تّمْيينين ئنݣراسن: "أك ئبارك ربّي أم أفرايم د منسّى!"» أياد أخف ئسّزوير أفرايم خف منسّى.
21 داي ئنّا سيدنا يعقوب يي سيدنا يوسف: «ها نكّين دجاورخ أد مّتخ، والاينّي ئدّا ربّي أد-اݣّيدون ييلي أها ئراركون غر تمازيرت ن لجدود نون.
22 ها نكّين وشيخاك تامازيرت ن شكيم، يون ؤمور توݣرد ئسّ أيتماش، ئويخت س دّرع ئنو زݣ ئموريين.