47
أجموع ن أيتماس ن يوسف د فرعون
1 داي ئدّو سيدنا يوسف غر فرعون أها ئنّاياس: «ئبّا د-أيتما دّاند غوري زݣ تمازيرت ن كنعان أها ئويند أݣّيدسن لمال نّسن د-ؤينّا غورسن ئلّان كول، هاتين لّان دغي ݣ تمازيرت ن جاسان».
2 داي مّونن أݣّيدس خمسا ن أيتماس غر فرعون.
3 ئسقساتن فرعون، ئنّاياسن: «ماتّا نتّات لخدمت نّون؟» داي نّاناس: «أسيدي، نكني ئكسّابن أي نݣا، أم لجدودنّخ.
4 هاتين ندّاد أنعزّب ݣ تمازيرت-اد، ئدّخ ؤر ئقّيم ؤسيوغ يي لمال نّخ أها يادر بوهيّوف عنوݣّا ݣ تمازيرت ن كنعان. داي مش تريد أدّجاخ أنزدغ ݣ تمازيرت ن جاسان».
أجموع ن يعقوب د فرعون
5 داي ئنّا فرعون يي سيدنا يوسف: «دغي ݣ ديدّا ئبّاش د أيتماك غورك،
6 هان تامازيرت ن مصر س ماس تلّا داو ن تنباطّ نّش. دّو سّزدغ ئبّاك د أيتماك ݣ تمازيرت ئغودان، دّجاسن أد زدغن ݣ تمازيرت ن جاسان. داي مش تسّنت ئس ئلّا ئنݣراسن مايد ئسّن يي تكسّابت مليح ݣيت أد-ئنبض خف ئمكساون ن لمال ئنو».
7 داي ئسّكشم سيدنا يوسف ئبّاس غر فرعون أها ئسلّم سيدنا يعقوب غيفس.
8 داي فّير ن-ؤينّا ئسقسات فرعون ئنّاياس: «مشحال أي غورك ݣ لعمر نّك؟»
9 داي ئنّاياس سيدنا يعقوب: «ئسݣّاسن ن لغروبيت ئنو ميّا د تلاتين ن-ؤسݣّاس، دروسن، حرّان أها ؤر عدّين أنشت ن-ئسݣّاسن ن لغروبيت ن لوالدين ئنو».
10 داي ئبارك سيدنا يعقوب فرعون أها ئفّغ زݣ غورس.
11 داي ئسّزدغ سيدنا يوسف ئبّاس د أيتماس ݣ تمازيرت ن رعمسيس نّا ئݣان جاسان، تامازيرت ئغودان ݣ مصر، أم ؤينّا ئنّا فرعون.
12 أها أر ياكّا يي ئبّاس د أيتماس د أيت ؤخام ن-ئبّاس كول لعولت خف لحساب ن واراو نّسن.
سياسا ن يوسف ݣ تفلاحت
13 داي ئقضو ووتشي زݣ تميزار ن مصر د كنعان، ياسّ بوهيّوف عنوݣا ألّيݣ وحلن ميدّن.
14 داي ئسمون سيدنا يوسف لفلوس كول ن تمازيرت ن مصر د تمازيرت ن كنعان أينّا س-ئزنزا ئمندي أها ئسرسيت ݣ تادّارت ن فرعون.
15 داي لّيݣ قضان لفلوس زݣ تمازيرت ن مصر د تمازيرت ن كنعان، كّرن ئمصريين دّون غر سيدنا يوسف أها نّاناس: «ؤشاخ ماي نتتّا، مّاخ ئس تريد أنمّت؟ ئدّخ ؤر غيرنخ قّيمن لفلوس».
16 داي ئنّاياسن سيدنا يوسف: «مش ؤر-اون قّيمن لفلوس، وشاتييي لمال نّون، س واتيݣ نّس أس دّيخ أد-اون وشخ ماي تتّام».
17 داي ئويناسد لمال أها ئوشاسن ئمندي بنيد ن-ئسان د وولي د تغطن د-ئزيار د-ئغيال. أسݣّاس-اد ئوشاسن سيدنا يوسف ماي تتّان س واتيݣ ن لمال نّسن كول.
18 ضارت ن-ؤسݣاس-اد، نّاناس: «أسيدي هات ؤلا ماي غيفش نفّر، لفلوس قضاناخ د لمال ئݣا وين سيدي أها ؤر ئقّيم غاس نكني د ئݣران نّخ.
19 ماخ ئس تريد أنمّت نكني د تميزار نّخ؟ ئوا سغاخ نكني د تميزار نّخ أها نݣ نكني ئسمغان ن فرعون. داي توشتاخ ؤتشي حما أندير د-ئفسان أت تن نكرز أها ؤر تغارا تمازيرت.
20 داي ئسغ سيدنا يوسف يي فرعون تامازيرت ن مصر كول، ئدّخ ئمصريين زنزان ئݣران نّسن خف نّيرت ن بوهيّوف نّا ئوعرن. داي تݣ تمازيرت ن مصر كول تين فرعون.
21 أها ݣين ئمصريين كول ئسمغان ن فرعون.
22 ماشان تيميزار ن-ئخاتار ن دّين ؤر تن ئسغي، ئدّخ لا سن ياكّا فرعون أينّا س تعيشن، أياد أخف مي ؤر زنزين تيميزار نّسن.
23 داي ئنّا سيدنا يوسف يي ئمصريين: «هاتين سغيخكون أسّ-اد كوني د تميزار نّون يي فرعون، دّيخ أد-اون وشخ ئفسان أت تكرزم.
24 داي أدّاي تسمونم أنبدو أت توشيم لخمس يي فرعون أها ثامژم ربعا ن-ئمّور نّا ئقيمن حما أت تكرزم ئݣران أها تتّشيم زّيكسن كوني د أيت ئخامن نون».
25 داي نّاناس ئمصريين: «تسروحداخ زݣ لموت، أوايد يوفان أد-يݣنخ تنهلّاد أسيدي أها نݣ ئسمغان ن فرعون».
26 داي غاس تيميزار ن-ئخاتار ن دّين أور ئسغي فرعون. لخمس زݣ لغلت وين فرعون أيد ئݣا. داي ئݣ سيدنا يوسف أياد د شّرع ݣ تمازيرت ن مصر كول. a
أقاول ن يوسف يي يعقوب
27 داي زدغن أيت يعقوب ݣ جاسان ݣ تمازيرت ن مصر. سغين تيميزار أها ݣين شباع. أرْون شايݣان ن-ئشيرّان أها يوعدّون عنوݣا.
28 داي ئقّيم سيدنا يعقوب ݣ تمازيرت ن مصر سبعطاعش ن-ؤسݣّاس. أها ئݣ لعمر نّس كول ميّا د سبعا وربعين ن-ؤسݣّاس.
29 داي نتّا تقرّب لوقت ن لموت ن سيدنا يعقوب، ئغرد يي سيدنا يوسف أها ئنّاياس: «مش غيرك عزّخ، سنعتييي لحنانيت د رحمت نّك، ݣ أفوس نّك دّاو ن تازوكتb ئنو أك سݣيلّخ، ؤر يي نطّل ݣ تمازيرت ن مصر.
30 أدّاي متخ أويييي نضلييي ݣ-ئسنضال ن لجدود ئنو». داي ئنّاياس سيدنا يوسف: «أد ݣخ أم ؤينّا تنّيد».
31 داي ئنّاياس سيدنا يعقوب: «ئوا ݣالّييي». داي ئݣّال-اس سيدنا يوسف. داي ئسجد سيدنا يعقوب يي ربّي أها ئقّيم أل-ئتژلّا خف ؤسداري نّس.