46
ئݣدجي ن سيدنا يعقوب غر تمازيرت ن مصر
1 ئرحل سيدنا يعقوب د لمال نّس غر تمازيرت ن بِئْر سَبْع أها ئݣ تيمغراص يي ربّي نّا ئعبد ئبّاس سيدنا إسحاق.
2 داي ئسيولاس ربّي ݣ توارجيت ݣّيض، ئنّاياس: «يعقوب، يعقوب!» داي ئنّاياس: «نعم، ها نكّين أياد».
3 داي ئنّاياس ربّي: «نكّين أيد-ئݣان ربّي، ربّي نّا ئعبد ئبّاش. أد-ؤر تݣد شا مش تدّيد غر تمازيرت ن مصر، دّيخ أد ݣخ زݣ تاروا نّك دينّا يون ن لݣنس أخاتار.
4 د نكّين أغا ئمّون أݣّيدش غر تمازيرت ن مصر أها رارخ تاروا نّش غر تمازيرت ن كنعان. هاتين يوسف أغا ش-ئنضل أدّاي تمّت».
5 سنين واراو ن يعقوب بّانسن د-ئشيرّان نّسن د توتمين نّسن خف لكرارس نّا س ديوزن فرعون حما أد ئفغ زݣ تمازيرت ن بِئْر سَبْع.
6 داي أوين أݣّيدسن لمال نّسن د-ئسّكين نّا دّيوين زݣ تمازيرت ن كنعان. أها ئرحل سيدنا يعقوب د واراو نّس غر تمازيرت ن مصر.
7 داي ياوي أݣّيدس لاهل نّس كول: أراو نّس د واراو ن وراو نّس د-ئسّيس د-ئسّيس ن واراو نّس.
تاروا ن يعقوب
8 ويدّ أيد-ئݣان ئسماون ن واراو ن سيدنا يعقوب نّا ييس ئمّون غر تمازيرت ن مصر: رأوبين، أمنزو نّس،
9 أراو ن رأوبين: حنوك، فلّو، حصرون د كرمي.
10 أراو ن شمعون: يموئيل، يامين، أوهد، ياكين، صوحر د شأول ممّيس ن تكنعانيت.
11 أراو ن لاوي: جرشون، قهات د مراري.
12 أراو ن يهوذا: عير د-أونان د شيلة د فارص د زاراح. عير د-أونان مّوتن سّين نّسن ݣ تمازيرت ن كنعان، ئد أراو ن فارص: حصرون د حامول.
13 أراو ن يسّاكر: تولاع، فوة، يوب د شمرون،
14 أراو ن زبولون: ساردو، إيلون د ياحَلْئيل.
15 ويدّ أراو ن ليئة نّا تورْو يي سيدنا يعقوب ݣ تمازيرت ن أرام د دينة ئلّيس. لّان كول نّسن س تلاتا ؤتلاتين.
16 ئد أراو ن جاد: صِفيون، حجي، شوني، أصبون، عيري، أرودي د-أرئيلي.
17 أراو ن-أشير: إمنا، يِشوة، يِشوي، بريعة د سارح ؤلماتسن. أراو ن بريعة: جابر د ملكيئيل.
18 ويدّ أيد-ئݣان أراو ن زلفة تيسمغت نّا ئوشا لابان يي ليئة ئلّيس أها تورْوتن يي سيدنا يعقوب، داي ئلين كول نّسن س سطاعش.
19 أراو ن راحيل تامطّوطّ ن سيدنا يعقوب: سيدنا يوسف د بنيامين.
20 داي يورْو سيدنا يوسف ݣ تمازيرت ن مصر منسّى د أفرايم زݣ تمطّوطّ نّس أسنات، ئلّيس ن فوطي فارع، أخاتار ن دّين ن تمدينت ن أون.
21 أراو ن بنيامين: بالع، باكرُ، أشبيل، جيرا، نعمان، إيحي، روش، مُفِّيم، حُفِّيم د-أَرْدْ.
22 ويدّ أيد ئݣان أراو ن راحيل نّا تورْو يي سيدنا يعقوب. أها ئلين كول نّسن س ربعطاعش.
23 أراو ن دان: حوشيم.
24 ئد أراو ن نفتالي: ياحصْئيل، جوني، يصر د شليم.
25 ويدّ أيد ئݣان أراو ن بلهة تيسمغت نّا ئوشا لابان يي راحيل ئلّيس. داي تورْوتن يي سيدنا يعقوب، أها ئلين س سبعا.
26 داي كول أراو ن سيدنا يعقوب نّا ديدّان غر تمازيرت ن مصر، لّان س ستاؤستّين ن بنادم بلا تيوتمين ن واراو نّس.
27 س-ئشيرّان سّين نّا يورْو سيدنا يوسف، أد ئلين واراو ن سيدنا يعقوب نّا ئكشمن غر تمازيرت ن مصر كول س سبعين ن لخلق.
أزدوغ ݣ مصر
28 يازن سيدنا يعقوب يهوذا دات-اس غر سيدنا يوسف حما أݣّيدس د-ئمّون أد ئميانّاي د-ئبّاس ݣ تمازيرت ن جاسان. داي لّيݣ دّ ييوض سيدنا يعقوب،
29 ئحبّل سيدنا يوسف لكروسا نّس أها ئدّو أد ئنّال ئبّاس ݣ تمازيرت ن جاسان. غاس نتّا ييوض غورس مݣران ئغيل أها قّيمن أل تّرون شايݣان.
30 داي ئنّاياس سيدنا يعقوب: «دغي ݣ نميانّاي، غاس ئناس يي لموت أدّود!»
31 داي ئنّا سيدنا يوسف يي أيتماس د لاهل ن-ئبّاس: «ها نكّين دّيخ غر فرعون أد-اس ئنيخ: دّاند غوري أيتما د لاهل ن-ئبّا زݣ تمازيرت ن كنعان.
32 أها ݣان ئكسّابن. ئويند لمال نّسن د-ؤينّا غوروسن ئلّان كول.
33 داي ئنّاياسن سيدنا يوسف ألّو: مش أون ئغرا فرعون أها ئسقساكون ماتّا نتّات لخدمت نّون؟
34 تينيماس: أسيدي، نكني ئكسّابن ن لمال أيد نݣا زݣّوس نمژّي أل دغي، أم لجدود نّخ كول، حما أت تزدغم ݣ تمازيرت ن جاسان. لاحقّاش ؤر-ئحلّا يي ئمصريين أد زدغن د-ئكسّابن».