45
يوسف دا ئسيكيز ئخف نّس
1 داي ؤر ئغي سيدنا يوسف أد-ئصبر دات ن-ئمزيلّزن نّس أها ئنّاياسن س-ؤغويي: «فّغات زݣ سيا!» داي ئقّيم غاس نتّا د أيتماس أها ئسّيكزاسن ئخف نّس.
2 أها ئقّيم أل ئترو س-ؤغويّي ألّيݣ أس سلان ئمصريين. داي ياوض ؤنغميس فرعون د أيت ؤخام نّس.
3 داي ئنّا سيدنا يوسف يي أيتماس: «نكّين أيد ئݣان يوسف! ئس ئسول ئبّا ݣ تودرت؟» أها ؤر غين أيتماس أد-اس سيولن، ئدّخ هبضن س-ؤخلاع.
4 داي ئنّاياسن: «أوريو تاما نو». داي حدزند غيرس. أها ئنّاياسن ألّو: «نكّين أيد ئݣان يوسف، ؤماتون، نّا تزّنزيم يي ئعطّارن نّا يي دّييوين غر تمازيرت ن مصر.
5 دغي، غاس أد-ؤر ديݣون ئتغيما لحال أد-ؤر-اون ئتطيّار ئدّخ يي تزّنزيم. هان ربّي أيي دّ-يوزن دات-اون حما ؤر تمتاتن ميدّن.
6 هاتين دا زرين ياد سين ن-ئسݣّاسن ن بوهيّوف ݣ تمازيرت-اد أها سولن خمسا ن-ئسݣّاسن ياضن، ؤر-ئدّي أد-يكسن ييلي ؤنبدو.
7 يوزنيييد ربّي دات-اون غر تمازيرت-اد حما أد-اون يادّج تاروا خف واشال أها ئسروحكون زݣ لموت، هاتين أفوكّا أخاتار أياد!
8 ؤر-ئد كوني أيي د يوزن غر داد، والاينّي ربّي أيد-ئݣان أياد. نتّا أيي ئݣان د-أنبداد ن تادّارت ن فرعون د-ؤمشاور نّس د-ؤنبّاض ن تمازيرت ن مصر كول.
9 دغي، سدّرفات ئخفاون نّون أغولات غر ئبّا أها تنيماس هان ماش ئتّيني ممّيش يوسف: «هان ربّي ئݣايي د-أنباض خف تمازيرت ن مصر كول. أورا غيري أد-ؤر تعطّار شا.
10 تدّيد أت تزدغد ݣ تمازيرت ن جاسان أها تݣد أدجار ئنو شݣّين د تاروا نّك د لمال نّك كول.
11 دّيخ أد-اك وشخ أينّا تحدادّجاد كول حما ؤر تمتات، شݣّين د لاهل نّك د لمال نّك، ئدّخ سولن خمسا ن-ئسݣاسن ن بوهيّوف».
12 داي ئنّاياسن سيدنا يوسف ألّو: «ها كوني لا تراعام، لومنّا شݣين أبنيامين، ئد نكّين أون ئساوال.
13 أها تسيولم يي ئبّا خف وادّور ئنو ݣ تمازيرت ن مصر د-ؤينّا تانّايم. ئوا سدّرفات ئخفاون نّون تاويمد ئبّا غر داد».
14 داي ئݣر سيدنا يوسف ئغيل يي بنيامين، ؤماس أشقيق أها قّيمن أل ترون.
15 أها ئݣر ألّو ئغيل يي أيتماس ياضن أها ئقّيم أل ئترو أݣّيدسن. عاد أيد غين أد-اس سيولن.
16 ياوض واوال ئغرم ن فرعون، ئس دّاند أيتماس ن سيدنا يوسف. ئعجباس لحال نتّا د-ئنبّاضن نّس.
17 داي ئنّا وݣليد فرعون يي سيدنا يوسف: «سيول يي أيتماش أد هزان ئخنشيين ن-ئمندي خف ئغيال نّسن أها أغولن غر تمازيرت ن كنعان،
18 حما أد أوين ئبّاتسن د لاهل نّسن، دّاند غوري أد-اسن وشخ تامازيرت نّا ئغودان عنوݣا ݣ مصر يي تفلاحت د-ؤساوغ، أديكس برّعن.
19 تينيد ألّو يي أيتماك أد-اوين لكرارس سياد حما أد سرحلن تيوتمين نّسن د وراو نّسن د-ئباتسن أها دّاند غر داد.
20 أها ؤر ديكسن ئتغيما شا ؤسكّين مش تزرين، ئدّخ لخير ن تمازيرت ن مصر وينّسن أيد-ئݣا كول».
أغول غر تمازيرت ن كنعان
21 داي ݣين واراو ن سيدنا يعقوب أم ؤينّا سن ئنّا ؤݣلّيد فرعون. داي ئوشاسن سيدنا يوسف لكرارس د لعوين يي ؤبريد.
22 أها ئوش يي كو يون زيكسن لكسوت ئژيل، ئد بنيامين ئوشاس تلت ميّا ن-ؤقاريض ن نّقرت د خمسا ن لكساوي.
23 داي يازن يي ئبّاس عشرا ن-ئغيال ؤسين مايد ئݣان شا زݣ لحاشت ئژيل ن تمازيرت د عشرا ن تغيّال ؤسين ئمندي د ماتتشا د لعوين يي ؤبريد.
24 داي ئمصفاض د أيتماس أها ئوصاتن ئنّاياسن: «أد-ؤر تنّاغات ݣ-ؤبريد!»
25 داي دون زݣ مصر غر تمازيرت ن كنعان. نتّا ئوضن غر ئباتسن،
26 نّاناس: «هاتين ئسول يوسف ئدّر! أها ئݣ أنبّاض أخاتار ن تمازيرت ن مصر كول». ؤر تييوي سيدنا يعقوب ݣ واوال نّسن، ئدّخ ؤر-ئقّيم لا تن ئتامن.
27 داي نّاناس ألّو أينّا سن-ئنّا سيدنا يوسف كول أها سنعتناس لكرارس نّا س ديوزن يي رّحيل. داي ئفرح سيدنا يعقوب عنوݣّا.
28 أها ئنّاياسن: «باراكا غيفي ݣ-ئسول ممّي ئدّر! أد دّوخ أت تانّايخ قبل أد مّتخ».