44
لكاس ن نّقرت نّا يوشكان
1 داي ئنّا سيدنا يوسف يي ؤخاتار ن-ئمزيلّزن: «عمّر ئخنشيين ن-ئرݣزن س-ئمندي، أينّا مي غيين أد-اسين، ترارد نّقرت ن كو يون ݣ تخنشيت نّس،
2 تسرسد لكاس ئنو ن نّقرت ݣ تخنشيت ن-ؤمژيّان د نّقرت نّس أتيݣ ن-ئمندي أها تݣد أياد س-ؤخزّون». داي ئݣ ؤخاتار ن-ئمزيلّزن أم ؤينّا س ئنّا سيدنا يوسف.
3 نتّا ئفّو لحال، ئوين واراو ن سيدنا يعقوب ئغيال أها دّون ئبردان نّسن.
4 ماشان سولن ؤر بعيدن زݣ تمدينت، ألّيݣ ئنّا سيدنا يوسف يي ؤخاتار ن-ئمزيلّزن: «أزّل تفار ئرݣزن-اد، أدّاي تن تاوطّ تنيداسن: "مّاخ ألّيݣ ترارم لخير س لعار؟
5 مّاخ ألّيݣ توشرم لكاس نّاݣ-ئسّا سيدي أها أل ئس ئتكشاف؟ هاتين تخضام"».
أتيافا ن لكاس ݣ تخنشييت ن بنيامين
6 نتّا ياوطّن ؤخاتار ن-ئمزيلّزن، ئنّاياسن أوال-اد.
7 داي نّاناس واوماتن: «أسيدي، مّاخ ألّيݣ غيفنخ تݣريد لباطل؟ حاشا أنݣ أياد.
8 هان نّقرت نّا نوفا ݣ-ئخنشيين نّخ دا نراراشت أݣّيدنخ زݣ تمازيرت ن كنعان. ئوا مّاخ أناكر نّقرت نغد دّهب زݣ تادارت ن سيدي نّك؟
9 داي ونّا غر توفيد لكاس زيݣنخ أد ئمّت أها نݣ نكني ئسمغان نّش».
10 داي ئنّاياسن ؤخاتار ن-ئمزيلّزن: «واخّا! والاينّي غاس أخوّان ن لكاس أغا ئݣين ئسمغ ئنو، ئد ويياض أد دّون ئبردان نّسن».
11 داي كو يون ئسرس تاخنشيت نّس س زّرب أها ئرژمت.
12 داي ئكر ؤخاتار ن-ئمزيلزن أل ئتقلاب أها ئسفال زݣ تخنشيت ن-ؤخاتار ألّيݣ ن ييوض تاخنشيت ن-ؤمژيّان. داي يوفا لكاس ݣ تخنشيت ن بنيامين.
13 داي هبضن واوماتن، فلين ئعبان نّسن. ئݣر كو يون تاخنشيت نّس خف ؤغيّول نّس أها أغولن غر تمدينت.
أيتماس ن يوسف دا تسجادن يي يوسف
14 لّيݣ د-ئعّايد يهوذا د أيتماس، ئسول سيدنا يوسف ݣ تادارت. داي كشمن غورس أها سجدن دات-اس.
15 داي ئنّاياسن سيدنا يوسف: «ماتّا ؤياد تݣام؟ ئس ؤر تسّينم نكني ئنبّاضن ئس نغي أنكاشف؟»
16 داي ئنّا يهوذا: «ماغ-اش نيني أسيدي؟ ماغا نيني حما أنبرّا ئخفاون نّخ؟ هان ربّي ئفضحاخ! دغي، نكني د ونّا غر توفيد لكاس أد-اش نݣ ئسمغان».
17 داي ئنّاياسن سيدنا يوسف: «ؤر يي ئتسماح ربّي مش ݣيخ أياد، ماشان أرݣاز نّا غر ؤفيخ لكاس أغا ئݣين ئسمغ ئنو. ئد كوني دّويات ݣ لمان غر ئبّاتون».
يهوذا دا ئتفوكّا بنيامين
18 داي ئحادز يهوذا غر سيدنا يوسف أها ئنّاياس: «عافاش أسيدي، سامحيي أد ئنيخ شا ئواليون دات-اش، والاينّي ؤر-اش ئتطيار، ئدّخ تانباطّ نّش أم تين فرعون.
19 لمرت تامزواروت، تسقساتاخ أسيدي: "ئس ئلّا غيرون ئبّاتون نغد ؤماتون؟"
20 داي ننّاش: ئلّا غورخ ئبّاتنخ أوسّار، د يون لعيل أماژوژ، ئلالاسد ݣ توسر نّس. أها أل ت-ئتّيري عنوݣا، ئدّخ غاس نتّا أيد-اس ئقيمن زݣ راحيل تامطّوطّ نّس، ئد ؤماس أشقيق دا ئمّوت.
21 داي تنّيداخ: "أوياتّيد غوري، رّيخ أت تانّايخ".
22 داي ننّا يي سيدي: ؤر ئتّيغي أد ئزري ئبّاس، ئدّخ مش ئسّ ئبضا ئدّا بّانس أد ئمّت.
23 داي تنّيداخ أسيدي: "ؤر تدّيم أت تانّايم ؤدم ئنو غاس مش ديدّا ؤماتون أݣّيدون".
24 لّيݣ ندّا غر ئبّاتنخ أسيدي، ننّاياس أينّا خ تنّيد.
25 داي ئنّاياخ ئبّاتنخ: "أغولات شيلاتاخ شا ئمندي".
26 داي ننّاياس: ؤر نتّيغي أندّو غر دينّا غاس مش ئمّون أݣّيدنخ ؤماتنخ أمژيّان. هاتين مش ؤر-ئدّي أݣّيدنخ، ؤر ندّي أد نانّاي أنبّاض ن تمازيرت.
27 داي ئنّاياخ ئبّاتنخ: "تسّنم مليح ئس ؤر يي تورْو تمطّوطّ ئنو راحيل غاس سين ن-ئشيرّان.
28 زݣ واسّ نّاݣ يي يوشكا يون زيكسن، ؤر دّجين تانّايخ. عنيخ ئتشات شان لوحش.
29 داي مش تيويم بنيامين أها ئجروياس شا. تدّام أد يي تنغيم غر توسر ئنو س تيخت". أياد أيد ئنّا ئبّاتنخ.
30 دغي، أسيدي، مش أغولخ غورس بلا لعيل.
31 غاس أد يانّاي ئس ؤر ئلّي ؤربا أݣّيدنخ، ئدّا أد ئمّت، ئدّخ لا ت-ئتّيري عنوݣا. ئوا أميد نكني أي ت-ئنغان س تيخت ݣ توسر نّس.
32 هاتين نكّين أيت ئضمن أها نّيخاس يي ئبّا: مش ؤر-اش تين رّيخ، أد ݣخ ئمعصي نّش أبدا ن دّونيت.
33 عفاك أسيدي أمژييي أد ݣخ ئسمغ نّش ݣ وانسا ن-ؤربا، أها ترژمت-اس أد ئعّايد د أيتماس.
34 ؤر نّيخ أد عّايدخ غر ئبّا غاس مش ئمّون ؤربا أݣيدي، ؤر تّيغييخ أد أنّايخ ئبّا ݣ-ؤخوب».