43
أحبّل يي سفرت تيسنات غر مصر
1 داي ياسّ بوهيّوف ݣ تمازيرت ن كنعان.
2 نتّا ئقضا ئمندي نّا دّيوين واراو ن يعقوب زݣ تمازيرت ن مصر، ئنّاياسن ئبّاتسن: «دّويات أد-اخ تشيلم ألّو شا ئمندي».
3 داي ئنّاياس يهوذا: «أيبّا هان أنبّاض ئنهراخ أها ئنّاياخ: "ؤر تديم أت تانّايم ؤدم ئنو مش ؤر توويمد ؤماتون أݣّيدون".
4 ئوا أدّج بنيامين أݣّيدنخ ئمّون حما أندّو أد-اك نشيل ئمندي،
5 هاتين مش ؤر ئمّون أݣيدنخ ؤغا نتدّو شا، ئدّخ ئنّاياخ ؤنبّاض: "ؤر تدّيم أت تانّايم ؤدم ئنو غاس مش توويمد ؤماتون أݣّيدون"».
6 داي ئنّاياسن سيدنا يعقوب: «مّاخ أد-اس تينيم يي ؤنبّاض-اد ئس غيرون ئلّا يان ؤماتون ضنين؟ هاتين تخضام!».
7 داي نّاناس: «ئسقساخ ؤنبّاض شايݣان ن-ئسقسيتن غيفنخ د خف لاهل نّخ. ئنّاياخ: "ئس ئسول ئبّاتون ئدر؟ ئس ئلّا غيرون شا ؤماتون ضنين؟" نكني غاس أر نترارا خف ئسقسيتن نّس. مّاخ ئس نژرا ئد أد-اخ ييني أوياتيد ؤماتون؟».
8 داي ئنّا يهوذا يي ئبّاس: «أيبّا، أدّج بنيامين أݣّيدي ئمّون نكّين. هاتين ئخصّاياخ أندّو، مش ؤر-أخ تريد أنمّت س بوهيّوف، شݣّين د نكني د وراونّخ كول.
9 نكّين أغا ت-ئضمن د نكّين أيد تّيسيند. داي مش ؤر-اك تين رّيخ أها سبدّخت دات-اش، أد ݣخ ئمعصي نّك أبدا ن دّونيت.
10 مريد-ئس ؤر نعطّير لا ندّا نعّايد سنات ن لمرّات».
11 داي ئنّاياس سيدنا يعقوب: «مش لابدّا زݣ توادا نّس أوياتّ، تاويم أݣّيدون يي ؤرݣاز لهديت: عمّرات ئخنشيين نّون س لخير ن تمازيرت د شوي ن لجاوي د تامنت د-ئسوفار د زهر د كاوكاو د لّوز.
12 داي ترارم نّقرت نّا توفام ݣ-ئخشيين نّون، بار-ئس خضان أها تاويم أݣّيدون نّقرت نّا س غا تشيلم.
13 داي تاويم ؤماتون أݣّيدون أها تدّوم دغيا غر أرݣاز-اد.
14 ها نكّين دّيخ أت ترخ يي ربّي نّا ئغيين يي كولشي أد ئݣ رّحمت ݣ وول نّس حما أد يادّج بنيامين د شمعون أد أغولن أݣّيدون. ئد نكّين ئدّايي يون ؤربا أبعدا أها دّان أد يي دّون أود وييّاض».
تاوادا ن أيتماس ن يوسف د بنيامين غر مصر
15 داي حبّلن واوماتن يي لهديت د نّقرت. داي ئمّون أݣّيدسن بنيامين غر تمازيرت ن مصر أها دّون غر سيدنا يوسف.
16 نتّا يانّاي سيدنا يوسف بنيامين أݣّيدسن، ئنّا يي ؤخاتار ن-ئمزيلزن ن تادّارت نّس: «أوي ميدّن-اد غر تادّارت ئنو، تغرصم يي يوت ن تمغروصت أها تسوجدم يي ووتشي، ئدّخ دّان أݣّيدي تشين ئمشلي».
17 داي ياويتن ؤخاتار ن-ئمزيلزن غر تادّارت أم ؤينّا ئنّا سيدنا يوسف.
18 لّيݣ سولن ݣ-ؤبريد، ݣّدن واوماتن ن سيدنا يوسف أها قّيمن أر تمسوالن ئنݣراسن، داي نّان: «ئويناخد غر داد حما أد-اخ كرفسن، ݣيناخ د-ئسمغان نسن أها أوين ئغيال نّخ خف نّيرت ن نّقرت نّاخ دياغول لمرت تامزواروت.
19 نتّا ران أد كشمن حادزن غر أخاتار ن-ئمزيلّزن أها نّاناس:
20 «أسيدي، سمحاخ عافاش، أد-اش نيني: هاتين ندّاد غر داد أبعدا يوت ن لمرت أنشيل ئمندي
21 داي لّيݣ نسغا نعّايد، نبدّ ݣ-ؤبريد يي منسيوت، داي نرژم ئخنشيين نّخ أها يوفا كو يون نّقرت نّس س ماس تلّا. هاتين نرارتيد أݣّيدنخ.
22 أها ناويد نّقرت ياضن س غا نشيل ئمندي. ؤر نسّين مايد ئݣان نّقرت ݣ-ئخنشيين نّخ».
23 ئنّاياسن ؤخاتار ن-ئمزيلزن: «غاس هنّات، أد ؤر تݣّدات شا، ربّي نّون نّا ئتعباد ئبّاتون، أون ئݣان لكنز ݣ-ئخنشيين نّون. ئد نّقرت نون دا تيوضييد». داي ئكر ئسّوفغاسن ئماتسن شمعون.
24 داي ئسّكشمتن ؤخاتار ن-ئمزيلزن غر تادّارت ن سيدنا يوسف أها ئوشاسن أمان أد سّيردن ئضار نّسن أم ؤينّا تݣا لعادا نّسن د لعلف يي ئغيال نّسن.
25 داي سوجدن لهديت أها قّيمن أل تراجان سيدنا يوسف، ئدّخ سلين ئس دّان أت تشين ئمشلي أݣّيدس.
26 لّيݣ ديدّا سيدنا يوسف غر تادّارت، وشاناس لهديت نّا س ديوين أها سجدن دات-اس.
27 داي ئسقساتن سيدنا يوسف ئد لاباس غورسن أها ئنّاياسن: «مايد ئعنا ئبّاتون أوسار نّا خف مي تسيولم؟ ئس ئسول ݣ تودرت؟»
28 داي نّاناس: «أسيدي ئبّاتنخ، لاباس غورس أها ئسول ئدّر». أها سجدناس ألّو.
29 يانّاي سيدنا يوسف بنيامين ؤماس أشقيق أها ئنّاياسن: «ئد واد أيد ئݣان ؤماتون أمژيّان نّا يي تنّام؟». أها ئنّاياس: «أك ئبارش ربّي أممي!»
30 داي تحرك تاسا ن سيدنا يوسف خف ؤماس أها دّوناسدّ ئمطاون، ئدّو س ترولا غر لبيت نّس أها ئقّيم أل ئترو.
31 داي يادر ݣ تاسا نّس، ئسّيرد ؤدم نّس، يغولد غورسن أها ئنّا ئ-ئٍمزيلزن نّس: «دغي أوياد ؤتشي».
32 داي ؤشين يي سيدنا يوسف أد ئتّش غاس نتّا، ؤشين يي أيتماس وحدو نّسن أها ؤشين ألّو يي ئمصريين نّا غورس ديدّان وحدو نّسن، ئدّخ ؤر-اسن ئحلّا أد تشين د-ئعبرانيين.
33 داي سغيمن ئمزيلزن أوماتن بنيد ن سيدنا يوسف خف لحساب ن لعمر نّسن زݣ ؤخاتار أل أمژيان. داي رعبن واوماتن قّيمن أل تمفرّاجن ئنݣراسن.
34 داي ئكّر سيدنا يوسف ئوشاسن زݣ ؤتشي نّس أها ياݣر ؤمور ن بنيامين ئمورّ ن أيتماس س خمسا ن لمرات. داي تشين، سوين ألّيݣ دّجيون.